Lucas 5:1-39
5 Usa ka adlaw, han hi Jesus nagtututdo han pulong han Dios ha ligid han linaw han Genesaret, ginsusuok hiya han mga tawo nga nagpipinamati ha iya.
2 May nakita hiya nga duha nga baluto ha ligid han linaw, pero an mga parapangisda nakahaw-as na ngan naglilimpyo han ira mga pukot.
3 Sinakay hiya ha usa nga baluto ngan ginhangyo an tag-iya hito nga hi Simon nga ighurohirayo ito ha baybayon. Katapos liningkod hiya ha baluto ngan nagtutdo ha mga tawo.
4 Kahuman niya pagtutdo, ginsidngan niya hi Simon: “Dad-a ha hilarom an baluto, ngan ihulog an iyo mga pukot basi makadakop.”
5 Pero binaton hi Simon: “Magturutdo, ha bug-os nga gab-i nangalimbasog kami kondi waray kami nadakop, pero tungod han imo ginsiring, ihuhulog ko an mga pukot.”
6 Han ginbuhat nira ini, nakadakop hira hin damu gud nga isda. Nagisi pa ngani an ira mga pukot.
7 Salit nagsinyas hira ha ira mga kaupod ha iba nga baluto nga kumadto ha ira basi buligan hira. Napuno nira hin isda an duha nga baluto salit nagtikalunod ito.
8 Han nakita ini ni Simon Pedro, linuhod hiya ha atubangan ni Jesus ngan nagsiring: “Ginoo, diri ako takos humirani ha imo, kay makasasala ako nga tawo.”
9 Tungod han damu gud nga isda nga ira nadakop, nahipausa hiya ngan an ngatanan nga iya kaupod,
10 pati na hira Santiago ngan Juan nga mga anak ni Sebedeo, nga mga kasosyo ni Simon. Kondi ginsidngan ni Jesus hi Simon: “Ayaw na kahadlok. Tikang yana mangingisda ka hin buhi nga mga tawo.”
11 Salit iginbalik nira ha baybayon an mga baluto, ngan ginbayaan an ngatanan ngan sinunod ha iya.
12 Han nakadto liwat hiya ha usa han mga syudad, kitaa! may usa nga tawo nga grabe an liprosi. Pakakita niya kan Jesus, hinapa hiya ngan nakimalooy: “Ginoo, kon karuyag mo, matatambal mo ako.”
13 Salit ginkaptan hiya ni Jesus ngan ginsidngan: “Karuyag ko nga matambal ka.” Ngan nawara dayon an iya liprosi.
14 Katapos gintugon hiya ni Jesus nga diri magsumat ha bisan hin-o. Ngan ginsidngan hiya: “Kondi kadto lugod ha saserdote, ngan paghalad sumala ha iginsugo ha balaud ni Moises sugad nga pamatuod ha ira nga nag-opay ka.”
15 Pero nagtikadamu la lugod an nahibaro mahitungod ha iya, ngan damu an napakadto basi mamati ngan magpatambal han ira mga sakit.
16 Ngan napakadto hiya ha mamingaw nga mga lugar ngan nag-aampo.
17 Usa ka adlaw han nagtututdo hiya ha usa nga balay, may nangangalingkod didto nga mga Pariseo* ngan mga magturutdo han Balaud tikang ha mga baryo han Galilea, Judea, ngan Jerusalem, ngan gintagan hiya ni Jehova hin gahum ha pagpanambal.
18 Ngan gindara han mga tawo an usa nga paralisado nga lalaki nga nahigda ha tiheras, ngan nangalimbasog hira nga dad-on hiya ha sulod ngan ibutang hiya ha atubangan ni Jesus.
19 Pero waray hira maaagian tungod kay damu an tawo, salit sinaka hira ha atop, ginbuhoan ito ngan gintunton ha atubangan ni Jesus an tiheras nga hinihigdaan han paralisado.
20 Han nakita niya an ira pagtoo, nagsiring hiya: “Sangkay, ginpasaylo na an imo mga sala.”
21 Tungod hito, an mga eskriba* ngan mga Pariseo nag-iristorya: “Hin-o ini nga nagyayakan hin mga pasipara? Hin-o an makakapasaylo han mga sala labot la han Dios?”
22 Pero tungod kay nasabtan ni Jesus an ira mga pangatadongan, iya ginsidngan hira: “Ano an iyo iginpapangatadongan dida ha iyo kasingkasing?
23 Ano an mas masayon, an pagsiring, ‘Ginpasaylo na an imo mga sala,’ o an pagsiring, ‘Buhát ngan lakat’?
24 Pero basi kamo mahibaro nga an Anak han tawo may awtoridad dinhi ha tuna ha pagpasaylo han mga sala . . . ” ginsidngan niya an paralisado: “Buhát, dad-a an imo tiheras ngan uli ha iyo balay.”
25 Ngan binuhát dayon hiya ha ira atubangan, gindara an iya hinihigdaan, ngan inuli nga gindadayaw an Dios.
26 Nahipausa gud hira ngatanan, ngan gindayaw nira an Dios ngan nahadlok hira, nasiring: “Urusahon ini nga aton nakit-an yana!”
27 Katapos hini, ginawas hi Jesus ngan nakita an parasukot hin buhis nga hi Levi nga nalingkod ha opisina para han pagbuhis, ngan iya ginsidngan: “Sunod ha akon.”
28 Salit binuhát hi Levi, ginbayaan an ngatanan ngan sinunod ha iya.
29 Nag-andam hi Levi hin daku nga panagtawo ha iya balay para kan Jesus, ngan damu nga parasukot hin buhis ngan iba pa an nalingkod nga nangangaon upod nira.
30 Tungod hini an mga Pariseo ngan an ira mga eskriba nagngurutob ha iya mga disipulo: “Kay ano nga nakaon ngan nainom kamo upod han mga parasukot hin buhis ngan magpakasasala?”
31 Nagsiring hi Jesus ha ira: “An mga mahimsog diri nanginginahanglan hin doktor, kondi an mga may sakit.
32 Kinanhi ako diri para ha magtadong, kondi para ha magpakasasala basi aghaton hira nga magbasol.”
33 Nagsiring hira ha iya: “An mga disipulo ni Juan agsob magpuasa ngan mangamuyo, sugad man an mga sumurunod han mga Pariseo, pero an imo mga disipulo nakaon ngan nainom.”
34 Binaton hi Jesus: “Diri niyo mapapapuasa an kasangkayan han karaslon nga lalaki mentras kaupod nira hiya, diri ba?
35 Pero maabot an panahon nga an karaslon nga lalaki kukuhaon ha ira, ngan hito nga panahon magpupuasa hira.”
36 Nagsaysay liwat hiya ha ira hin ilustrasyon: “Waray nagtatabas hin itarangkop tikang ha bag-o nga pantungbaw nga panapton basi itangkop ha daan nga pantungbaw nga panapton. Kon ito an iya buhaton, an bag-o nga tangkop makakagisi ha daan nga panapton ngan diri na ito maangay ha daan.
37 Waray liwat nagsusulod hin bag-o nga bino ha daan nga anit nga surudlan. Kon ito an iya buhaton, mabuburit ito ngan makakarag an bino pati an anit nga surudlan.
38 Lugod, an bag-o nga bino kinahanglan isulod ha bag-o nga anit nga surudlan.
39 An nakainom han daan nga bino diri na maruruyag pag-inom han bag-o, kay masiring hiya, ‘Maopay an daan.’ ”
