Lucas 14:1-35
14 Ha usa nga okasyon ha adlaw han Sabbath, han kinadto hi Jesus ha balay han usa nga lider han mga Pariseo basi kumaon, ginbinantayan gud nira hiya.
2 Ha iya atubangan, may usa ka tawo nga nanhuhupong an bug-os nga lawas.
3 Tungod hito, nagpakiana hi Jesus ha mga eksperto ha Balaud ngan ha mga Pariseo: “Uyon ba ha Balaud an pagtambal ha adlaw han Sabbath o diri?”
4 Pero waray hira bumaton. Salit ginkaptan niya an tawo, gintambal, ngan ginpalakat.
5 Katapos nagsiring hiya ha ira: “Hin-o ha iyo an diri makadto dayon basi kuhaon an iya anak o toro kon mahulog ito ha atabay* ha adlaw han Sabbath?”
6 Waray hira makabaton.
7 Han nakita niya nga ginpipili han mga gin-imbitar an pinakamaopay nga mga pwesto, nagsaysay hiya hin ilustrasyon:
8 “Kon may mag-imbitar ha imo ha panagtawo* ha kasal, ayaw lingkod ha pinakamaopay nga pwesto. Bangin may gin-imbitar liwat hiya nga mas kilala kay ha imo,
9 ngan dumaop hiya ha imo ngan magsiring, ‘Ihatag hini nga tawo ini nga pwesto.’ Salit naaawod nga mabalhin ka ha pinakaubos nga pwesto.
10 Lugod kon imbitaron ka, pakadto ngan lingkod ha pinakaubos nga pwesto, basi pagdaop han nag-imbitar ha imo, masiring hiya, ‘Sangkay, balhin ha maopay nga pwesto.’ Ngan mapapasidunggan ka ha atubangan han ngatanan nga imo igkasi-bisita.
11 Kay an bisan hin-o nga nagpapahitaas pauubson, ngan an bisan hin-o nga nagpapaubos pahihitas-on.”
12 Katapos nagsiring liwat hi Jesus ha nag-imbitar ha iya: “Kon mag-andam ka hin paniudto o panihapon, ayaw imbitara an imo kasangkayan, kabugtoan, mga paryente, o riko nga mga amyaw. Bangin imbitaron ka liwat nira ngan magin bayad ito ha imo.
13 Lugod, kon mag-andam ka hin panagtawo, imbitara an mga pobre, baldado, piay, ngan buta,
14 ngan malilipay ka, kay waray hira maibabalos ha imo. Pero babalosan ka ha pagkabanhaw han mga matadong.”
15 Pakabati hini han usa han mga bisita, nagsiring hiya kan Jesus: “Malipayon an nakaon hin tinapay ha Ginhadian han Dios.”
16 Nagsiring ha iya hi Jesus: “Usa nga tawo an nag-andam hin daku nga panihapon, ngan damu an iya gin-imbitar.
17 Ha oras han panihapon, ginsugo niya an iya uripon nga sidngan an mga gin-imbitar, ‘Kadi na kamo, kay andam na an panihapon.’
18 Pero namaribad hira ngatanan. An siyahan nagsiring, ‘Nakapalit ako hin uma ngan kinahanglan kadtoon ko ito basi kitaon. Pasensya na, diri ako puydi.’
19 Ngan an usa nagsiring, ‘Nakapalit ako hin lima ka padis nga baka ngan kakadtoon ko ito basi usisahon. Pasensya na, diri ako puydi.’
20 An usa pa nagsiring, ‘Bag-o la ako nga kasal, salit diri ako puydi kumadto.’
21 Binalik an uripon ha iya agaron ngan iginsumat ini. Nangalas gud an agaron ngan nagsiring ha iya uripon, ‘Kadto dayon ha haluag nga mga dalan ngan ha kakalsadahan han syudad, ngan dad-a nganhi an mga pobre, baldado, buta, ngan piay.’
22 Pagbalik han uripon nagsiring hiya, ‘Agaron, gintuman ko na an imo sugo, pero may bakante pa.’
23 Ngan an agaron nagsiring ha uripon, ‘Kadto ha mga dalan ngan ha inalad nga mga lugar, ngan pirita hira pagkanhi, basi mapuno an akon balay.
24 Susumatan ko kamo: Bisan usa hito nga mga gin-imbitar diri makakatilaw han akon gin-andam nga panihapon.’ ”
25 Samtang nagbabaktas hi Jesus upod an damu nga tawo, inatubang hiya ha ira ngan nagsiring:
26 “Bisan hin-o nga nadaop ha akon ngan mas nahigugma* ha iya tatay, nanay, asawa, mga anak, kabugtoan, ngan bisan ha iya kalugaringon nga kalag kay ha akon, diri hiya magigin akon disipulo.
27 Bisan hin-o nga diri nagpapas-an han iya pasakitan nga kahoy* ngan diri nasunod ha akon, diri magigin akon disipulo.
28 Pananglitan, hin-o ha iyo nga naruruyag pagtukod hin torre an diri anay malingkod ngan magkwenta han magagasto basi masiguro kon may ighuhuman hiya hito?
29 Kay kon diri, bangin maglatag hiya han pundasyon pero diri makakahuman hito, ngan tatamayon hiya han ngatanan nga makakakita,
30 nga masiring: ‘Ini nga tawo nagtikang pagtukod kondi waray pakahuman.’
31 O hin-o nga hadi nga makikig-away ha usa nga hadi an diri anay malingkod ngan mangaro hin sagdon kon hiya ba ngan an iya 10,000 nga kasundalohan makakaatubang ha naabot nga iya kaaway nga may 20,000 nga kasundalohan?
32 Kon diri gud niya maaakos, magsusugo hiya hin mga embahador basi makigmurayaw samtang hirayo pa an kaaway.
33 Sugad man, diri magigin akon disipulo an bisan hin-o nga diri naruruyag pagbaya ha ngatanan nga iya panag-iya.
34 “Ha pagkamatuod, an asin maopay. Pero kon magtab-ang ito, paonan-o maibabalik an kaasin hito?
35 Diri na ito angay isalakot ha tuna o ha abuno. Iginlalabog ito han mga tawo ha gawas. An may mga talinga ha pagpamati, mamati.”
Mga footnote
^ O “bubon.”
^ O “resepsyon.”
^ Ha literal, “diri nangangalas.” Nangangahulogan nga “mas gutiay an gugma.”
^ Kitaa an Apendise 6.
