Lucas 4:1-44
4 Hi Jesus nga puno han baraan nga espiritu binaya ha Jordan, ngan gin-giyahan hiya han espiritu samtang nakadto ha kamingawan
2 ha sulod hin 40 ka adlaw, diin ginsulay hiya han Yawa. Hito nga mga adlaw waray hiya ginkaon, salit katapos hito, nagutom hiya.
3 Ngan an Yawa nagsiring ha iya: “Kon anak ka han Dios, himoa nga tinapay ini nga bato.”
4 Pero hi Jesus binaton: “Ini an iginsurat: ‘Diri la ha tinapay nabubuhi an tawo.’ ”
5 Salit gindara hiya ha hitaas gud nga bukid ngan iginpakita dayon ha iya an ngatanan nga ginhadian ha tuna.
6 Ngan an Yawa nagsiring ha iya: “Ihahatag ko ha imo ini ngatanan nga awtoridad ngan an himaya hini kay igintubyan na ini ha akon, ngan ihahatag ko ini ha bisan hin-o nga karuyag ko tagan.
7 Salit kon magsingba ka ha akon bisan makausa la, magigin imo ini ngatanan.”
8 Hi Jesus binaton: “Ini an iginsurat: ‘Hi Jehova nga imo Dios an kinahanglan mo singbahon, ngan ha iya ka la mag-alagad.’ ”
9 Gindara liwat hiya han Yawa ngadto ha Jerusalem ngan iginbutang hiya ha igbaw han pader han templo ngan ginsidngan: “Kon anak ka han Dios, layog tikang dinhi,
10 kay ini an iginsurat: ‘Susugoon niya an iya mga anghel nga panalipdan ka,
11 ngan sasaluhon ka nira basi an imo tiil diri gud mahimalmal ha bato.’ ”
12 Binaton hi Jesus: “An Kasuratan nasiring: ‘Diri mo sarihan hi Jehova nga imo Dios.’ ”
13 Katapos hini ngatanan nga pagsulay, ginbayaan hiya han Yawa tubtob nga magkaada iba nga higayon.
14 Pinaagi han gahum han espiritu, binalik hi Jesus ha Galilea. Ngan an mag-opay nga istorya mahitungod ha iya nahibantog ha ngatanan nga kahigrani nga lugar.
15 Nagtikang liwat hiya pagtutdo ha ira mga sinagoga,* ngan gindayaw hiya han ngatanan.
16 Katapos kinadto hiya ha Nazaret diin hiya nagdaku, ngan sugad han iya nabatasan ha adlaw han Sabbath,* sinulod hiya ha sinagoga ngan tinindog basi magbasa.
17 Salit iginhatag ha iya an linukot nga basahon ni propeta Isaias. Ginbuklad niya ito ngan nakita niya kon diin iginsurat ini:
18 “An espiritu ni Jehova aadi ha akon kay ginpili* niya ako ha pagpasamwak han maopay nga sumat ha mga pobre, ginsugo niya ako ha pagpasamwak han kagawasan han mga bihag ngan ha pagpahiuli han pagkita han mga buta, ha paghatag hin kagawasan han mga tinalumpigos,
19 ngan ha pagsangyaw mahitungod han panahon nga makakarawat utro nira an bendisyon ni Jehova.”
20 Katapos iya ginlukot an basahon, iginbalik ito ha kabulig, ngan liningkod. Ginkinita hiya han ngatanan nga tawo ha sinagoga.
21 Ngan nagsiring hiya ha ira: “Yana nga adlaw natuman ini nga kasuratan nga iyo pa la nabatian.”
22 Hira ngatanan nagyakan hin maopay mahitungod ha iya ngan nahipausa gud ha makaruruyag nga mga pulong nga nagawas ha iya baba, ngan nagsiring hira: “Diri ba anak hiya ni Jose?”
23 Tungod hito nagsiring hiya ha ira: “Sigurado nga ako an iyo ginhuhunahuna hini nga puplunganon: ‘Doktor, tambala an imo kalugaringon,’ ngan masiring kamo ha akon: ‘Hinbatian namon an imo ginbuhat ha Capernaum, salit buhata liwat ito dinhi ha imo lugar.’ ”
24 Kondi hiya nagsiring: “Ha pagkamatuod susumatan ko kamo, waray propeta nga kinakarawat ha iya lugar.
25 Pananglitan, susumatan ko kamo han kamatuoran: Damu an balo nga babaye ha Israel ha panahon ni Elias han waray umuran hin tulo ka tuig ngan unom ka bulan, salit nagkaada duro nga gutom ha bug-os nga nasud.
26 Pero waray sugoa hi Elias nga kumadto ha kababayin-an ha Israel, kondi ngadto la ha balo ha Sarepat ha nasud han Sidon.
27 Damu liwat an may liprosi ha Israel ha panahon ni propeta Eliseo, pero waray gintambal bisan usa ha ira, kondi hi Naaman la nga taga-Sirya.”
28 Nasina an ngatanan ha sinagoga nga nakabati hini,
29 ngan nanindog hira ngan gindara hiya ha gawas han syudad basi ihulog hiya ha may pangpang han bukid nga hinmumutangan han ira syudad.
30 Pero inagi hiya ha butnga mismo nira ngan nagpadayon ha paglakat.
31 Katapos kinadto hiya ha Capernaum, nga syudad ha Galilea. Ngan nagtutdo hiya ha mga tawo ha adlaw han Sabbath.
32 Nahipausa hira ha iya paagi han pagtutdo, kay may awtoridad an iya pagyakan.
33 Ha sinagoga, may lalaki nga ginsaniban hin maraot nga espiritu, ngan nagsinggit:
34 “Ah! Ano an imo tuyo ha amon, Jesus nga Nazareno? Kinanhi ka ba basi poohon kami? Maaram gud ako kon hin-o ka, ikaw an Usa nga Baraan tikang ha Dios.”
35 Pero ginsaway ito ni Jesus: “Ayaw pag-inaringasa, ngan gawas ha iya.” Salit katapos itumba han demonyo an lalaki ha butnga nira, ginawas ito ha iya nga waray hiya pasakiti.
36 Tungod hini, nahipausa an ngatanan, ngan nag-iristorya hira: “Ano ini nga klase hin mga pulong, kay may awtoridad hiya ngan gahum ha pagsugo ha magraot nga espiritu, ngan nagawas hira?”
37 Salit an mga istorya mahitungod ha iya padayon nga nahibantog ha ngatanan nga lugar ha kahigrani nga nasud.
38 Pagbaya ni Jesus ha sinagoga, kinadto hiya ha balay ni Simon. Hito nga panahon, hitaas an hiranat han ugangan nga babaye ni Simon ngan naghangyo hira nga buligan hiya.
39 Salit kinadto hi Jesus ha ginhihigdaan han babaye ngan gintambal an iya hiranat. Tinindog dayon an babaye ngan gin-asikaso hira.
40 Kondi han tikatunod na an adlaw, gindara kan Jesus han ngatanan nga tawo an ira mga sulod-balay nga may mga sakit. Gintambal niya hira pinaagi han pagkapot ha tagsa ha ira.
41 Ginpagawas liwat ha damu nga tawo an mga demonyo nga nagsisinggit: “Ikaw an Anak han Dios.” Kondi ginsaway niya an mga demonyo ngan waray hira payakna, kay maaram hira nga hiya an Kristo.
42 Kinabuwasan, ginawas hiya ngan kinadto ha mamingaw nga lugar. Pero ginbiling hiya han mga tawo ngan nakaabot hira ngadto ha iya, ngan naghangyo hira nga diri hiya bumaya.
43 Kondi nagsiring hiya: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay ginsugo ako tungod hini.”
44 Salit nagpadayon hiya ha pagsangyaw ha mga sinagoga han Judea.
Mga footnote
^ O “lugar han pagsingba.”
^ Kitaa an “Sabbath” ha Glossary.
^ Ha literal, “gindihogan.” Kitaa an “Pagdihog” ha Glossary.
