Lucas 23:1-56
23 Nanindog hira ngatanan ngan gindara hi Jesus kan Pilato.
2 Katapos ira gin-akusaran hiya: “Nakita namon nga ginsasamok hini nga tawo an aton nasud, igindidiri an pagbayad hin buhis ha Cesar, ngan nasiring nga hiya an Kristo nga hadi.”
3 Nagpakiana hi Pilato ha iya: “Ikaw ba an Hadi han mga Judio?” Binaton hi Jesus: “Ikaw mismo an nasiring hito.”
4 Nagsiring hi Pilato ha punoan nga mga saserdote ngan ha mga tawo: “Waray ako nakikita nga sayop hini nga tawo.”
5 Pero nag-insister hira: “Nagigin hinungdan han kasamok an iya igintututdo ha mga tawo ha bug-os nga Judea, tikang pa ha Galilea tubtob dinhi.”
6 Pakabati hito ni Pilato, nagpakiana hiya kon taga-Galilea hi Jesus.
7 Katapos masiguro nga tikang hiya ha nasasakopan ni Herodes, iginpadara hiya ni Pilato kan Herodes, nga hito nga panahon nakadto liwat ha Jerusalem.
8 Pakakita ni Herodes kan Jesus, nalipay gud hiya, kay maiha na nga karuyag niya makita hi Jesus tungod han damu nga iya nabatian mahitungod ha iya, ngan naglalaom hiya nga makakita hin milagro ni Jesus.
9 Salit damu an iya pakiana kan Jesus, pero waray hiya bumaton.
10 Kondi pauroutro nga tinindog an punoan nga mga saserdote pati an mga eskriba ngan nasisina nga gin-akusaran hiya.
11 Katapos gintamay hiya ni Herodes pati han mga gwardya nga sundalo, ngan ginhimo hiya nga pataraw-an pinaagi ha pagsul-uti ha iya hin magarbo nga bado, ngan ginpabalik hiya kan Pilato.
12 Hito nga adlaw nagin magsangkay hi Herodes ngan hi Pilato, kay hadto magkaaway hira.
13 Iginpatawag ni Pilato an punoan nga mga saserdote pati an mga opisyal ngan an katawohan
14 ngan ginsidngan hira: “Gindara niyo ha akon ini nga tawo nga gin-aakusaran nga nagsusulsol ha mga tawo nga magrebelde. Yana kitaa! gin-imbistigar ko hiya ha iyo atubangan pero waray ako nakita nga basihan han iyo mga akusasyon ha iya.
15 Ha pagkamatuod, hi Herodes waray liwat nakita ha iya nga sala kay iginbalik hiya ha aton, ngan waray hiya nabuhat nga angay hin kamatayon.
16 Salit sisirotan ko hiya ngan bubuhian.”
17 * ——
18 Kondi nagsinggit an ngatanan nga tawo: “Pataya hiya, pero buhii hi Barabas!”
19 (Ginpriso ini nga tawo tungod han pagrebelde nga nahitabo ha syudad ngan tungod ha pagpatay.)
20 Hi Pilato nagyakan utro ha ira kay karuyag niya buhian hi Jesus.
21 Pero nagsinggit hira: “Igraysang hiya! Igraysang hiya ha kahoy!”
22 Ha ikatulo nga higayon, nagyakan hiya ha ira: “Kay ano? Ano nga maraot an ginbuhat hini nga tawo? Waray ako nakita ha iya nga angay hin kamatayon. Salit sisirotan ko hiya ngan bubuhian.”
23 Tungod hito nagsinggit hira kay iginpipirit nira nga igraysang hiya, ngan nagtikakusog la an ira singgit.
24 Salit nagdesisyon hi Pilato nga ihatag an ira gin-aaro:
25 Ginbuhian niya an tawo nga karuyag nira pagawson, nga napriso tungod ha pagrebelde ngan pagpatay. Pero iya iginhatag ha ira hi Jesus uyon ha ira karuyag.
26 Han gindadara na nira hi Jesus, ira ginpwersa hi Simon nga taga-Cirene nga nalabay tikang ha uma nga pas-anon an pasakitan nga kahoy* ni Jesus ngan ginpasunod ha iya.
27 Damu liwat nga tawo an nagsinunod ha iya, upod na an kababayin-an nga nagngunguyngoy ngan nagpupukpok han ira dughan tungod han duro nga kasubo.
28 Liningi hi Jesus ha kababayin-an ngan nagsiring: “Mga anak nga babaye han Jerusalem, ayaw na kamo pagtinangis tungod ha akon. Lugod, pagtangis kamo tungod ha iyo kalugaringon ngan ha iyo mga anak
29 kay maabot an panahon nga an mga tawo masiring, ‘Malipayon an baog nga kababayin-an, adton waray manganak ngan adton waray ginpasuso!’
30 Ngan masiring hira ha kabukiran, ‘Matimpag kamo ha amon!’ ngan ha kabungtoran, ‘Tabuni kami!’
31 Kon ginbubuhat nira ini samtang buhi pa an kahoy, ano an mahitatabo kon mauga na ito?”
32 Gindara liwat an duha nga lalaki nga kawatan nga papatayon upod ni Jesus.
33 Ngan pag-abot nira ha lugar nga tinatawag nga Kalabera, iginraysang nira ha kahoy hi Jesus ngan an mga kawatan, an usa ha iya too ngan an usa ha wala.
34 [Pero nagsiring hi Jesus: “Amay, pasayloa hira kay diri hira maaram han ira ginbubuhat.”]* Ngan ira ginbarahin an iya mga bado pinaagi ha pagripa.*
35 An mga tawo natindog nga nagkinita. Pero an mga opisyal nanyam-id ngan nag-insulto: “Gintalwas niya an iba, salit talwason niya an iya kalugaringon kon hiya an Kristo nga Pinili han Dios.”
36 Ginhimo liwat hiya nga pataraw-an han mga sundalo, nadaraon ha iya basi tagan hiya hin maaslom nga bino
37 ngan nasiring: “Kon ikaw an Hadi han mga Judio, talwasa an imo kalugaringon.”
38 May nakasurat liwat ha bawbaw han iya ulo: “Ini an Hadi han mga Judio.”
39 Pero gin-insulto hiya han usa han ginbitay nga mga kawatan: “Ikaw an Kristo, diri ba? Talwasa an imo kalugaringon pati kami.”
40 Ginsaway hiya han usa: “Diri ka gud ba nahahadlok ha Dios, yana nga ginsirotan ka liwat?
41 Husto gud ini nga sirot ha aton kay aton nakakarawat an angay gud ha aton ginbuhat. Pero ini nga tawo waray ginbuhat nga maraot.”
42 Katapos nagsiring hiya: “Jesus, hinumdumi ako kon aadto ka na ha imo Ginhadian.”
43 Binaton hi Jesus: “Ha pagkamatuod susumatan ko ikaw yana, Makakaupod ko ikaw ha Paraiso.”
44 Mga alas-12 na adto han udto,* pero nagsirom an bug-os nga tuna tubtob han mga alas-3 ha kulop*
45 tungod kay nagdulom an adlaw; katapos nagisi ngan natunga an kurtina han santuaryo.
46 Ngan hi Jesus ginuliat ngan nagsiring: “Amay, igintatapod ko ha imo an akon espiritu.” Pakayakan niya hini, nawad-an hiya hin gininhawa.
47 Tungod kay nakita han opisyal han mga sundalo an nahitabo, gindayaw niya an Dios ngan nagsiring: “Matadong gud ini nga tawo.”
48 Han an ngatanan nga tawo nga kinadto tungod hini nga kiritaon nakakita han mga nahitabo, nanguli hira nga ginpupukpok an ira dughan tungod han duro nga kasubo.
49 Ngan an ngatanan nga nakilala ha iya natindog ha hirayo. Nakadto liwat an kababayin-an nga nagsinunod ha iya tikang ha Galilea ngan nakita nira an mga nahitabo.
50 Ngan may usa ka tawo nga Jose an ngaran, nga membro han Konseho.* Maopay ngan matadong hiya nga tawo.
51 Waray hiya umuyon ha ira plano ngan ginbuhat. Tikang hiya ha Arimatea nga syudad han Judea, ngan naghuhulat hiya han Ginhadian han Dios.
52 Ini nga tawo kinadto kan Pilato ngan naghangyo nga kukuhaon niya an lawas ni Jesus.
53 Salit iya ito iginlusad ngan ginputos hin maopay nga klase hin tela, ngan iginbutang ha lubnganan nga gin-ukad ha bato nga waray pa lubngi.
54 Adlaw adto han Pangandam, ngan ha gab-i magtitikang na an Sabbath.
55 Pero an kababayin-an nga nagsinunod ha iya tikang ha Galilea kinadto liwat pagkita han lubnganan, ngan nakita nira an pagbutang didto han iya lawas.
56 Ngan inuli hira basi mag-andam hin mga pahamot* ngan maghamot nga lana. Pero pinahuway hira ha adlaw han Sabbath sugad nga pagsunod han sugo.
Mga footnote
^ Kitaa an footnote ha Mat 17:21.
^ Kitaa an Apendise 6.
^ Kitaa an footnote ha Mat 16:3.
^ Kitaa an “Pagripa” ha Glossary.
^ Ha literal, “ikaunom nga oras.”
^ Ha literal, “ikasiyam nga oras.”
^ O “an Sanhedrin.”
^ Mga pulbos o mga dahon ngan mga lana nga ginagamit ha pag-andam han lawas para ha paglubong.
