Lucas 10:1-42
10 Katapos hini, nagpili an Ginoo hin 70 pa nga disipulo ngan ginpadis-padis hira basi mag-una ha iya ha mga syudad ngan mga lugar nga kakadtoan niya.
2 Ngan ginsidngan niya hira: “Ha pagkamatuod, damu an aranihon, kondi gutiay an mag-arani. Salit pakimalooy kamo ha Agaron nga magpadara hin mga mag-arani ha iya aranihon.
3 Lakat kamo. Kitaa! sugad kamo hin mga karnero nga ginsusugo ko ha butnga han mga lobo.
4 Ayaw kamo pagdara hin supot han kwarta o surudlan han pagkaon o sandalyas, ngan ayaw paghangkop ha bisan hin-o ha dalan sugad nga pangumusta.
5 Bisan diin nga balay kamo sumulod, siring anay: ‘Hinaot magkaada kamurayawan ini nga balay.’
6 Ngan kon may mamurayawon nga tawo didto, an iyo kamurayawan magpapabilin ha iya. Pero kon waray, mabalik ha iyo an kamurayawan.
7 Salit pagpabilin kamo hito nga balay; kaon ngan inom han ira iginhahatag, kay an trabahador takos han suhol ha iya. Ayaw pagburobalhin ha mga balay.
8 “Ngan bisan diin nga syudad kamo sumulod ngan ira kamo karawaton, kaona an iginsiserbi ha iyo,
9 ngan tambala an mga may sakit didto ngan sumati hira: ‘An Ginhadian han Dios hirani na ha iyo.’
10 Pero kon sumulod kamo ha usa nga syudad ngan diri kamo karawaton, gawas kamo ngadto ha dagku nga kalsada ngan siring:
11 ‘Bisan an tapotapo ha amon mga tiil nga tikang ha iyo syudad, amon ipapadpad kontra ha iyo. Kondi hinumdumi nga an Ginhadian han Dios hirani na.’
12 Susumatan ko kamo nga hito nga adlaw mas makuri an sirot hito nga syudad kay ha Sodoma.
13 “Kairo mo Corasin! Kairo mo Betsaida! kay kon an gamhanan nga mga buhat nga nahitabo ha iyo nahitabo ha Tiro ngan Sidon, maiha na unta hira nga nagbasol pinaagi han pagsul-ot hin sako nga panapton ngan paglingkod ha mga agbon.
14 Salit ha paghukom, mas makuri an sirot ha iyo kay ha Tiro ngan Sidon.
15 Ngan ikaw, Capernaum, pahihitas-on ka ba ngadto ha langit? Diri! Hingangadto ka ha Hades!*
16 “An namamati ha iyo namamati liwat ha akon. Ngan an nagsasalikway ha iyo nagsasalikway liwat ha akon. Sugad man, an nagsasalikway ha akon nagsasalikway liwat ha nagsugo ha akon.”
17 Katapos, an 70 binalik nga malipayon, nasiring: “Ginoo, bisan an mga demonyo nasugot ha amon pinaagi ha paggamit namon han imo ngaran.”
18 Tungod hito hiya nagsiring: “Nakita ko hi Satanas nga nahulog na sugad hin kidlat tikang ha langit.
19 Kitaa! gintagan ko kamo hin awtoridad ha pagtamak ha mga halas ngan mga iskorpyon ngan ha ngatanan nga gahum han kaaway, ngan waray makakadaot ha iyo.
20 Pero ayaw kamo pagkalipay tungod kay nasugot ha iyo an magraot nga espiritu, lugod magkalipay kamo kay an iyo mga ngaran nahisurat na ha langit.”
21 Hito mismo nga oras, nalipay gud hiya ha baraan nga espiritu ngan nagsiring: “Amay, Ginoo han langit ngan han tuna, gindadayaw ko ikaw ha kadaygan, kay ini nga mga kamatuoran imo gintago tikang ha mga maaramon ngan edukado ngan iginpahayag ini ha kabataan. Oo, Amay, kay uyon ini han imo kaburut-on.
22 An ngatanan nga butang igintapod ha akon han akon Amay, ngan waray nakilala ha Anak labot la han Amay; ngan waray liwat nakilala ha Amay labot la han Anak ngan ha iya nga karuyag sumatan han Anak.”
23 Katapos nagsiring hiya ha mga disipulo nga hira la: “Malipayon an mga mata nga nakakakita han iyo nakikita.
24 Susumatan ko kamo: Damu nga propeta ngan mga hadi an naghingyap nga makit-an an iyo nakikita kondi waray nira makita, ngan naghingyap nga mabatian an iyo nababatian kondi waray nira mabatii ito.”
25 Kitaa! usa nga lalaki nga eksperto ha Balaud an tinindog basi sarihan hiya ngan nagsiring: “Magturutdo, ano an kinahanglan ko buhaton basi mapanunod an kinabuhi nga waray kataposan?”
26 Binaton hiya: “Ano an nahisurat ha Balaud? Ano an imo pagsabot ha imo nabasa?”
27 Binaton an lalaki: “ ‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga kusog, ngan ha bug-os mo nga hunahuna,’ ngan ‘higugmaa an imo igkasi-tawo sugad ha imo kalugaringon.’ ”
28 Nagsiring hi Jesus: “Husto an imo baton; ‘padayon nga buhata ini ngan magkakaada ka kinabuhi.’ ”
29 Pero tungod kay karuyag pamatud-an han lalaki nga matadong hiya, nagpakiana hiya kan Jesus: “Hin-o gud ba an akon igkasi-tawo?”
30 Binaton hi Jesus: “Usa nga lalaki tikang ha Jerusalem an tikadto ha Jerico. Ginburubligan hiya hin mga tulisan ngan ginhuboan, ginkastigo, ngan ginbayaan nga haros patay na.
31 Nahituman nga may saserdote nga inagi hito nga dalan, pero han hinkit-an niya an lalaki, didto hiya agi ha luyo nga ligid han dalan.
32 Inagi liwat didto an usa nga Lebihanon, ngan han nakita niya an lalaki, inagi hiya ha luyo nga ligid han dalan.
33 Pero usa nga Samaritano an inagi hito nga dalan. Han nakita niya an lalaki, nalooy hiya.
34 Salit dinaop hiya ngan ginbendahan an mga samad han lalaki ngan ginbuboan ito hin lana ngan bino. Katapos, iya iginsakay an lalaki ha iya hayop ngan gindara ha balay nga pahuwayan ngan ginmangnoan.
35 Kinabuwasan, kinuha hiya hin duha nga denaryo, iginhatag ito ha parabantay han balay nga pahuwayan, ngan nagsiring, ‘Mangnoi hiya, ngan anoman an imo magasto labot hini, babayaran ko ikaw pagbalik ko.’
36 Ha imo hunahuna, hin-o hini nga tulo an igkasi-tawo han lalaki nga gintulis?”
37 Binaton hiya: “An usa nga nagpakita hin kalooy ha iya.” Ngan ginsidngan hiya ni Jesus: “Lakat, ngan buhata liwat ito.”
38 Padayon hira nga nagbaktas ngan kinadto ha usa nga baryo. Didto, gin-abiabi hiya ha balay han usa nga babaye nga an ngaran Marta.
39 May bugto liwat hiya nga babaye nga Maria an ngaran, nga liningkod ha may tiil han Ginoo ngan nagpinamati ha iya igintututdo.
40 Pero hi Marta okupado ha pag-inasikaso ha mga buruhaton. Salit dinaop hiya ngan nagsiring: “Ginoo, diri ako ginbubuligan han akon bugto ha mga buruhaton, diri mo ba hiya sisidngan? Alayon sidnga hiya nga buligan ako.”
41 Binaton an Ginoo: “Marta, Marta, nababaraka ngan okupado ka ha damu nga butang.
42 Pero pipira la nga butang an ginkikinahanglan, o usa la ngani. Ginpili ni Maria an maopay nga butang, ngan diri ito kukuhaon ha iya.”
Mga footnote
^ Kitaa an Apendise 8.
