Lucas 21:1-38
21 Han ginkikinita ni Jesus an mga kahon han kwarta, naobserbaran niya an mga riko nga naghuhulog han ira mga donasyon.
2 Ngan nakakita hiya hin pobre nga balo nga babaye nga naghuhulog didto hin duha nga sinselyo nga gutiay gud an kantidad,
3 ngan nagsiring hiya: “Ha pagkamatuod susumatan ko kamo: Ini nga balo, bisan kon pobre, naghulog hin mas damu kay ha ira ngatanan.
4 Kay hira ngatanan naghulog hin mga regalo tikang ha ira sobra, kondi iginhulog hini nga babaye an ngatanan nga iya ginpakabuhian, bisan kon nanginginahanglan hiya.”
5 Katapos, han may nag-iiristorya mahitungod han templo, kon paonan-o ito gindekorasyonan hin mag-opay nga bato ngan hin sagrado nga mga butang nga iginhalad,
6 nagsiring hiya: “Mahitungod hini nga mga butang nga iyo nakikita, maabot an panahon nga waray usa nga bato dinhi nga magpapabilin ha bawbaw han usa nga bato nga diri marurumpag.”
7 Ngan nagpakiana hira: “Magturutdo, san-o gud ini mahitatabo, ngan ano an magigin tigaman nga hirani na ito mahitabo?”
8 Binaton hiya: “Pag-ikmat nga diri kamo maisimang, kay damu an maabot nga magamit han akon ngaran, nga masiring, ‘Ako an Kristo,’ ngan ‘Hirani na an itinanda nga panahon.’ Ayaw kamo pagsunod ha ira.
9 Dugang pa, kon makabati kamo hin mga girra ngan mga kasamok, ayaw kamo kahadlok. Kay kinahanglan mahitabo anay ito, pero an kataposan diri pa mahitatabo dayon.”
10 Katapos nagsiring hiya ha ira: “An mga nasud makikig-away ha iba nga nasud ngan an mga ginhadian makikig-away ha iba nga ginhadian,
11 ngan magkakaada magkusog nga linog, ngan ha iba-iba nga lugar magkakaada mga epidemya ngan gutom, ngan an mga tawo makakakita hin makaharadlok nga mga butang ngan hin dagku nga tigaman tikang ha langit.
12 “Pero antes mahitabo ini ngatanan, dadakpon ngan pagtitimarauton kamo han mga tawo, dadad-on kamo ha mga sinagoga ngan mga prisohan, pati ha mga hadi ngan mga gobernador tungod ha akon ngaran.
13 Tungod hito, magkakaada kamo higayon ha pagpamatuod.
14 Salit diri na kamo kinahanglan mangandam kon paonan-o mangangatadongan,
15 kay ihahatag ko ha iyo an mga pulong nga yayaknon ngan an kinaadman nga diri mahimo kontrahon o supakon bisan pa han urosa nga pangalimbasog han mga nakontra ha iyo.
16 Ngan tatraydoran kamo bisan han iyo mga kag-anak, kabugtoan, paryente, ngan kasangkayan, ngan ira papatayon an iba ha iyo,
17 ngan mapupungot ha iyo an ngatanan nga tawo tungod ha akon ngaran.
18 Pero bisan usa nga buhok han iyo ulo diri gud mawawara.
19 Pinaagi han iyo pagpailob matatalwas an iyo kalag.*
20 “Dugang pa, kon makita niyo nga an Jerusalem ginpapalibotan han nagkakampo nga kasundalohan, tigamni nga hirani na an kabungkagan hito.
21 An mga aadto ha Judea sadang pumalagiw ngadto ha kabukiran, ngan an aadto ha sulod han Jerusalem sadang gumawas, ngan an aadto ha kaumhan diri sumulod ngadto,
22 kay panahon ito ha pagpadapat han hustisya basi matuman an ngatanan nga iginsurat.
23 Kairo han mga burod ngan han may minasus-an nga ginmamangnoan hito nga panahon! Kay magkakaada daku nga kasakitan ha tuna ngan kangangalasan ini nga katawohan.
24 Pamamatayon hira pinaagi han espada ngan dadad-on hira nga bihag ha ngatanan nga nasud, ngan an Jerusalem tatamakan han mga nasud tubtob nga matapos an itinanda nga panahon han mga nasud.
25 “Magkakaada liwat mga tigaman ha adlaw, bulan, ngan mga bitoon. Mag-aantos an mga nasud ha tuna ngan malilisang tungod han hagubuhob han mabalud nga dagat.
26 An mga tawo madidismayo tungod ha kahadlok ngan pagpinamulat han mga mahitatabo ha bug-os nga inuukyan nga tuna, kay mababay-og an gamhanan nga mga butang ha langit.
27 Ngan makikita nira an Anak han tawo nga nalusad upod han dampog nga may gahum ngan daku nga himaya.
28 Pero kon magtikang na mahitabo ini nga mga butang, tindog kamo hin tadong ngan hangad kamo kay an iyo katalwasan hirani na.”
29 Ngan nagsaysay hiya ha ira hin ilustrasyon: “Tagda an igera ngan an iba nga mga kahoy.
30 Kon nananaringsing ito, maaram kamo nga hirani na an katpaso.
31 Ha pariho nga paagi, kon makita niyo nga nahitatabo na ini nga mga butang, makakasiguro kamo nga hirani na an Ginhadian han Dios.
32 Ha pagkamatuod susumatan ko kamo: Diri gud malabay ini nga henerasyon tubtob nga mahitabo ini ngatanan.
33 An langit ngan an tuna mawawara, pero an akon mga pulong diri gud mawawara.
34 “Kondi tagi hin atensyon an iyo kalugaringon nga an iyo kasingkasing diri mabug-atan han sobra nga pagkinaon, pag-ininom, ngan han mga kabaraka ha kinabuhi, ngan ito nga adlaw tigda nga maabot ha iyo
35 sugad hin lit-ag. Kay maabot ito ha ngatanan nga naukoy ha bug-os nga tuna.
36 Salit padayon nga magmata, ngan mangamuyo kamo ha ngatanan nga panahon nga makapalagiw kamo hini ngatanan nga butang nga itinanda nga mahitatabo ngan makatindog kamo ha atubangan han Anak han tawo.”
37 Kon adlaw nagtututdo hiya ha templo, pero kon gab-i na nagawas hiya ngan napahuway ha Bukid han mga Olibo.
38 Ngan an ngatanan nga tawo aga-aga pa nga napakadto ha iya ha templo basi mamati.
Mga footnote
^ O “matitipigan an iyo kinabuhi.”
