Lucas 7:1-50
7 Katapos ni Jesus magyakan ha mga tawo, kinadto hiya ha Capernaum.
2 Hito nga panahon, grabe an sakit ngan tikamatay na an hinigugma nga uripon han opisyal han kasundalohan.
3 Han hinbatian han opisyal an mahitungod kan Jesus, nagsugo hiya hin katigurangan han mga Judio ngadto kan Jesus basi hangyoon hiya nga kumadto ngan tambalon an iya uripon.
4 Ngan an mga kinadto kan Jesus nakimalooy gud ha iya: “Takos hiya nga buligan mo,
5 kay hinigugma niya an aton nasud ngan hiya an nagtindog han sinagoga dinhi.”
6 Salit inupod ha ira hi Jesus. Pero han hirani na hiya ha balay, an opisyal nakagsugo na hin kasangkayan nga sumatan hi Jesus: “Ginoo, ayaw na la pagpadayon, kay diri ako takos nga pakadtoon ka ha akon balay.
7 Tungod hito waray ako dumaop ha imo. Pero pagsiring la nga mag-oopay hiya, ngan matatambal na an akon surugoon.
8 Kay ako liwat, bisan kon may ginpapasakopan nga awtoridad, may sakop ako nga mga sundalo. Kon nasiring ako ha usa, ‘Kadto!’ napakadto hiya, ngan ha usa pa, ‘Kadi!’ nadaop hiya, ngan kon nasiring ako ha akon surugoon, ‘Buhata ini!’ iya ito ginbubuhat.”
9 Han hinbatian ini ni Jesus, nahipausa hiya ha opisyal, ngan inatubang hiya ha mga tawo nga nagsisinunod ha iya ngan nagsiring: “Susumatan ko kamo: Bisan ha Israel waray pa gud ako makakita hin sugad hini kadaku nga pagtoo.”
10 Ngan han nakabalik ha balay an mga ginsugo, nakita nira nga nag-opay na an uripon.
11 Katapos hini, kinadto hiya ha syudad han Nain, kaupod an iya mga disipulo ngan an damu nga tawo.
12 Han hirani na hiya ha ganghaan han syudad, may patay nga lalaki nga gindadara tipagawas, hiya la an anak han balo nga babaye. Kaupod han balo an damu nga tawo tikang ha syudad.
13 Han nakita han Ginoo an balo, nalooy hiya ngan nagsiring: “Ayaw na pagtinangis.”
14 Katapos dinaop hiya ha tiheras ngan ginkaptan ito, ngan inundang an mga nagdadara. Ngan nagsiring hiya: “Batan-on, ginsusugo ko ikaw: Buhát!”
15 An patay liningkod ngan nagyakan, katapos iginhatag hiya ni Jesus ha iya nanay.
16 Nahadlok an ngatanan, ngan gindayaw nira an Dios: “Usa nga harangdon nga propeta an ginsugo nganhi ha aton,” ngan “Nalooy an Dios ha iya katawohan.”
17 Ini nga mga sumat mahitungod han ginbuhat ni Jesus nahibantog ha bug-os nga Judea ngan ha ngatanan nga kahigrani nga nasud.
18 Ini ngatanan iginsumat kan Juan han iya mga disipulo.
19 Salit ginsugo ni Juan an duha han iya mga disipulo ngadto ha Ginoo basi magpakiana: “Ikaw na ba an Usa nga Makanhi nga amon ginpipinamulat, o may iba pa nga maabot?”
20 Pag-abot nira ha iya, nagsiring hira: “Ginsugo kami nganhi ha imo ni Juan nga Parabaptis basi magpakiana, ‘Ikaw na ba an Usa nga Makanhi nga amon ginpipinamulat, o may iba pa nga maabot?’ ”
21 Hito nga oras, gintambal niya an damu nga may sakit, an may grabe nga sakit, ngan an mga ginsaniban hin magraot nga espiritu, ngan an damu nga buta basi makakita.
22 Salit nagsiring hi Jesus ha ira: “Balik kamo kan Juan ngan isumat ha iya an iyo hinkit-an ngan hinbatian: An mga buta nakakakita na, an mga piay nakakalakat na, an mga may liprosi nagkatatambal na, an mga bungol nakakabati na, an mga patay nagkababanhaw, ngan iginpapahayag an maopay nga sumat ha mga pobre.
23 Ngan malipayon hiya nga diri nahipapakdol ha akon.”
24 Han linakat na an mga mensahero ni Juan, nagpakiana hi Jesus ha mga tawo mahitungod kan Juan: “Ano an iyo karuyag makita han kinadto kamo ha kamingawan? Usa ba nga tangbo nga ginlulurolabyog han hangin?
25 Kon sugad, ano an karuyag niyo makita paggawas niyo? Usa ka tawo ba nga nakasul-ot hin mahumok nga pantungbaw nga panapton? An mga nakasul-ot hin maopay gud nga bado ngan nagkikinabuhi hin mahimyang aadto ha mga palasyo han hadi.
26 Kay ano gud ba nga ginawas kamo? Basi makakita hin propeta? Oo, ginsusumatan ko kamo nga labaw pa gud hiya kay ha propeta.
27 Mahitungod ha iya, ini an iginsurat: ‘Kitaa! Ginsusugo ko an akon mensahero nga mag-una ha imo basi ig-andam an imo dalan.’
28 Susumatan ko kamo: Waray pa natawo nga labaw kan Juan, kondi an usa nga uroubos ha Ginhadian han Dios mas labaw ha iya.”
29 (Pakabati hini han ngatanan nga tawo ngan han mga parasukot hin buhis nga ginbawtismohan ni Juan, iginpahayag nira nga matadong an Dios.
30 Pero tungod kay ginbalewaray han mga Pariseo ngan han mag-aram han Balaud an sagdon han Dios ha ira, waray hira bawtismuhi ni Juan.)
31 “Salit kan kanay ko igpapariho an mga tawo hini nga henerasyon, ngan hin-o an kapariho nira?
32 Pariho hira hin kabataan nga nangangalingkod ha merkado ngan nagsisiringgitay: ‘Nagplawta kami para ha iyo pero waray kamo sumayaw, nagnguyngoy kami pero waray kamo manangis.’
33 Sugad man, kinanhi hi Juan nga Parabaptis nga diri nakaon hin tinapay ngan diri nainom hin bino, pero nasiring kamo: ‘May demonyo hiya.’
34 An Anak han tawo kinanhi nga nakaon ngan nainom, pero nasiring kamo: ‘Kitaa! An tawo nga malamon ngan parainom hin bino, sangkay han mga parasukot hin buhis ngan magpakasasala!’
35 Kondi an kinaadman napapamatud-an nga matadong pinaagi han ngatanan nga anak hito.”
36 Usa nga Pariseo an nag-inimbitar kan Jesus nga kumaon upod niya. Salit sinulod hiya ha balay han Pariseo ngan liningkod ha may lamesa.
37 Ngan usa nga babaye nga kilala ha syudad sugad nga makasasala an nahibaro nga hi Jesus nakaon ha balay han Pariseo, ngan nagdara hiya hin alabastro* nga surudlan han mahamot nga lana.
38 Kinadto hiya ha may tiil ni Jesus, nagtangis ngan ginhulos an mga tiil ni Jesus han iya mga luha, ngan gintrapohan niya ito han iya buhok. Mahigugmaon nga ginharokan liwat niya an mga tiil ni Jesus ngan ginpahiran ito han mahamot nga lana.
39 Han nakita ito han Pariseo nga nag-imbitar kan Jesus, nagsiring hiya ha kalugaringon: “Kon propeta ini nga tawo, maaram unta hiya kon hin-o ngan kon ano nga klase hin babaye ito nga nakapot ha iya, nga makasasala hiya.”
40 Kondi hi Jesus nagsiring ha iya: “Simon, may ig-iistorya ako ha imo.” Binaton hiya: “Magturutdo, ano ito?”
41 “Duha nga lalaki an may utang ha parapautang. An usa 500 nga denaryo* an utang, pero an usa 50.
42 Han waray hira pakakabayad ha iya, kinasingkasing nga iya ginpasaylo hira nga duha. Salit, hin-o ha ira an mas maghihigugma ha iya?”
43 Binaton hi Simon: “Para ha akon, an nakautang hin mas daku nga kinasingkasing nga ginpasaylo niya.” Hiya nagsiring: “Husto an imo baton.”
44 Salit liningi hi Jesus ha babaye ngan nagsiring kan Simon: “Nakikita mo ba ini nga babaye? Pagsulod ko ha imo balay, waray mo ako hatagi hin tubig nga ihirimsaw. Pero an akon mga tiil ginhulos hini nga babaye han iya mga luha ngan gintrapohan ito han iya buhok.
45 Waray mo ako haruki, pero mahigugmaon nga ginhinarokan hini nga babaye an akon mga tiil tikang nga sinulod ako.
46 Waray mo pahiri hin lana an akon ulo, pero ginpahiran hini nga babaye hin mahamot nga lana an akon mga tiil.
47 Tungod hini, susumatan ko ikaw nga bisan kon damu an iya mga sala, ginpasaylo na ito kay nagpakita hiya hin daku nga gugma, kondi an ginpasaylo hin gutiay, nagpapakita hin gutiay nga gugma.”
48 Ngan nagsiring hiya ha babaye: “Ginpasaylo na an imo mga sala.”
49 Tungod hito, an mga nalingkod kaupod niya ha may lamesa nagsiring ha ira kalugaringon: “Hin-o ini nga tawo nga nagpapasaylo bisan han mga sala?”
50 Kondi nagsiring hiya ha babaye: “An imo pagtoo an nagtalwas ha imo. Lakat nga mamurayawon.”
Mga footnote
^ Kitaa an “Alabastro” ha Glossary.
^ Silber nga sinselyo han Roma. Kitaa an Apendise 11.
