Lucas 16:1-31
16 Nagsiring liwat hi Jesus ha mga disipulo: “Usa nga riko nga tawo an may tinaporan nga iginsumbong ha iya tungod ha pagkarag han iya mga panag-iya.
2 Salit gintawag niya an tinaporan ngan ginsidngan, ‘Ano ini nga akon nababatian mahitungod ha imo? Ihatag ha akon an imo rekord sugad nga tinaporan, kay paiiwason ko na ikaw.’
3 An tinaporan nagsiring ha kalugaringon, ‘Ano an akon bubuhaton, kay paiiwason na ako han akon agaron? Diri ko na maaakos an mabug-at nga trabaho, ngan naaawod ako makilimos.
4 Ah! maaram na ako han akon bubuhaton, basi kon paiwason na ako, karawaton ako han mga tawo ha ira balay.’
5 Salit gintawag niya an kada usa nga nakautang ha iya agaron, ngan nagpakiana hiya ha siyahan, ‘Pira an imo utang ha akon agaron?’
6 Binaton hiya, ‘100 ka takos* nga lana han olibo.’ Nagsiring an tinaporan, ‘Kuhaa an sinurat nga kasabotan han imo utang. Lingkod ngan surati dayon ito hin 50.’
7 Sunod, nagpakiana hiya ha usa pa, ‘Pira an imo utang?’ Binaton hiya, ‘100 ka sako* nga trigo.’ Nagsiring an tinaporan, ‘Kuhaa an sinurat nga kasabotan han imo utang ngan surati ito hin 80.’
8 Gindayaw han agaron an iya tinaporan bisan kon diri-matadong, kay ginios hiya nga may praktikal nga kinaadman; kay an mga anak hini nga sistema mas maaramon magtratar ha mga tawo ha ira henerasyon kay ha mga anak han kalamrag.
9 “Susumatan ko liwat kamo: Pakigsangkay kamo pinaagi han karikohan hinin diri-matadong nga kalibotan basi kon maubos ito, karawaton kamo nira ha permanente nga mga urukyan.
10 An tawo nga matinumanon ha gutiay nga butang matinumanon liwat ha daku nga butang, ngan an diri matadong ha gutiay nga butang diri liwat matadong ha daku nga butang.
11 Salit, kon diri niyo ipakita nga matataporan kamo han mga karikohan hinin diri-matadong nga kalibotan, hin-o an matapod ha iyo han totoo nga karikohan?
12 Ngan kon diri niyo ipakita nga matataporan kamo han mga panag-iya han iba, hin-o an mahatag ha iyo han balos nga para ha iyo?
13 Waray surugoon ha balay an mahimo magin uripon han duha nga agaron, kay kasisinahan niya an usa ngan hihigugmaon an usa, o magpapabilin hiya ha usa ngan babayaan an usa. Diri niyo mahimo pagdunganon an pagin uripon han Dios ngan han karikohan.”
14 An mga Pariseo nga mahigugmaon ha salapi nagpinamati hini ngatanan, ngan nanyam-id hira kan Jesus.
15 Salit nagsiring hiya ha ira: “Nagpapakamatadong kamo ha atubangan han mga tawo, kondi maaram an Dios han aada ha iyo kasingkasing, kay an ginpapahitaas han mga tawo mangil-ad ha pagkita han Dios.
16 “An Balaud ngan an mga sinurat han mga Propeta iginpasamwak tubtob kan Juan. Tikang hadto, iginpapasamwak an maopay nga sumat han Ginhadian han Dios, ngan an ngatanan nga klase han tawo nangangalimbasog nga makasulod hito.
17 Ha pagkamatuod, mas mawawara pa an langit ngan an tuna kay ha mawara an usa nga letra han Balaud nga diri matutuman.
18 “An bisan hin-o nga nakikigdiborsyo ha iya asawa ngan nag-aasawa hin iba, nag-aadulteryo.* Ngan an nag-aasawa hin babaye nga nakigdiborsyo ha bana, nag-aadulteryo.
19 “May usa nga riko nga tawo, nga an bado marahalon nga purpura.* Kada adlaw nagkikinabuhi hiya ha kalipayan ngan kahimyang.
20 Pero may makililimos nga Lasaro an ngaran nga puno hin samad. Gindadara hiya pirme ha ganghaan han riko nga tawo.
21 Ngan naghihingyap hiya nga mabusog han mga pagkaon nga nahuhulog tikang ha lamesa han riko nga tawo. Gindidilaan pa ngani han mga ayam an iya mga samad.
22 Paglabay han panahon, namatay an makililimos, ngan gindara hiya han mga anghel ngan ginpalingkod ha sapit* ni Abraham.
“Namatay liwat an riko nga tawo ngan iginlubong.
23 Didto ha Hades* diin hiya nagsasakit, hinangad hiya ngan ha hirayo nakita niya hi Abraham ngan hi Lasaro nga magsapit nga nalingkod.
24 Salit nagsinggit hiya, ‘Amay nga Abraham, malooy ka ha akon, ngan sugoa hi Lasaro nga itunlob ha tubig an iya tudlo basi patugnawon an akon dila, kay nagsasakit ako tungod hinin naglalaga nga kalayo.’
25 Pero hi Abraham nagsiring, ‘Anak, hinumdumi nga han buhi ka pa, nakarawat mo hin bug-os an mag-opay nga butang, pero hi Lasaro magraot nga butang an nakarawat. Kondi yana mahimyang hiya didi, samtang ikaw nagsasakit.
26 Dugang pa, may hilarom nga pangpang ha butnga naton, salit an naruruyag kumada ha iyo tikang didi diri makakahimo, ngan diri liwat makakatabok an mga tawo tikang dida ngadi ha amon.’
27 Ngan nagsiring an riko nga tawo, ‘Tungod hito, nakikimalooy ako ha imo, Amay, nga pakadtoon mo hi Lasaro ha balay ni Tatay,
28 basi masumatan gud niya an akon lima nga bugto nga lalaki, basi diri liwat hira hinganhi hini nga lugar han pagsakit.’
29 Pero nagsiring hi Abraham, ‘Aadto ha ira hi Moises ngan an mga Propeta, sadang hira mamati ha ira.’
30 Ngan nagsiring an riko nga tawo, ‘Diri, Amay nga Abraham, pero kon may kumadto ha ira tikang ha mga patay, magbabasol hira.’
31 Pero nagsiring hi Abraham, ‘Kon diri hira namamati kan Moises ngan ha mga Propeta, diri liwat hira makukombinse kon may kumadto ha ira nga nabanhaw tikang ha mga patay.’ ”
Mga footnote
^ O “mga 600 ka galon.”
^ An usa ka sako 170 ka kilo.
^ Kitaa an “Adulteryo” ha Glossary.
^ Ha English, purple.
^ Ha literal, “ngadto ha dughan ni Abraham,” nangangahulogan hin pwesto nga may espesyal nga pabor.
^ Kitaa an Apendise 8.
