Lucas 19:1-48
19 Han tikadto hi Jesus ha Jerusalem, ha Jerico hiya inagi.
2 May usa nga lalaki didto nga Sakeo an ngaran. Usa hiya nga punoan nga parasukot hin buhis, ngan riko hiya.
3 Nangalimbasog hiya nga makita kon hin-o ini nga Jesus, pero tungod han damu nga tawo, diri hiya nakakakita kay habubo hiya.
4 Salit dinalagan hi Sakeo ha unhan ngan sinaka ha kahoy nga igera basi makita hi Jesus tungod kay didto hiya maagi.
5 Pag-abot ni Jesus didto, hinangad hiya ngan nagsiring: “Sakeo, lusad dayon kay makadto ako yana ha imo balay.”
6 Salit nagdagmit hiya paglusad ngan malipayon nga gin-abiabi hi Jesus sugad nga bisita.
7 Pero han nakita ito han mga tawo, nagngurutob hira: “Binisita hiya ha balay han usa nga makasasala.”
8 Kondi tinindog hi Sakeo ngan nagsiring ha Ginoo: “Kitaa, Ginoo! Ihahatag ko ha mga pobre an katunga han akon mga panag-iya, ngan anoman nga nakuha ko tikang ha bisan hin-o pinaagi han buwa nga akusasyon, ibabalik ko hin upat ka pilo.”
9 Tungod hito, nagsiring hi Jesus ha iya: “Yana nga adlaw an katalwasan inabot hini nga panimalay kay anak ka liwat ni Abraham.
10 Tungod kay an Anak han tawo kinanhi basi bilngon ngan talwason an nawara.”
11 Samtang namamati hito an mga disipulo, nagsaysay hiya hin usa pa nga ilustrasyon, kay hirani na hiya ha Jerusalem ngan naghuhunahuna hira nga pag-abot niya didto, maabot dayon an Ginhadian han Dios.
12 Salit nagsiring hiya: “Usa nga tawo tikang ha hadianon nga pamilya an magbibiyahe ha hirayo nga nasud basi makarawat gud niya an pagkahadi, ngan katapos hito mabalik hiya.
13 Nagtawag hiya hin napulo nga uripon niya ngan gintagan hira hin napulo ka mina* ngan ginsidngan hira, ‘Pagnegosyo kamo tubtob ha akon pagbalik.’
14 Pero an iya mga igkasi-tuminungnong nasina ha iya ngan nagsugo hin mga embahador basi magsiring ha iya, ‘Diri kami naruruyag nga maghadi ka ha amon.’
15 “Pagbalik niya katapos makarawat an pagkahadi, iya iginpatawag an mga uripon nga gintagan niya hin silber nga kwarta basi hibaroan kon pira an ira ganansya ha pagnegosyo.
16 An siyahan dinaop ngan nagsiring, ‘Ginoo, an imo mina nakaganansya hin napulo ka mina.’
17 Salit nagsiring hiya ha uripon, ‘Maopay an imo ginbuhat, matataporan nga uripon! Tungod kay iginpakita mo nga matinumanon ka ha gutiay nga butang, tatagan ko ikaw hin awtoridad ha napulo nga syudad.’
18 Dinaop an ikaduha nga uripon ngan nagsiring, ‘Ginoo, an imo mina nakaganansya hin lima ka mina.’
19 Nagsiring liwat hiya hini nga uripon, ‘Magdudumara ka liwat hin lima nga syudad.’
20 Pero dinaop an usa pa nga uripon ngan nagsiring, ‘Ginoo, aadi an imo mina nga ginputos ko hin tela.
21 Nahahadlok ako ha imo kay istrikto ka; imo ginkukuha an waray mo ideposito ngan gin-aani an waray mo igsabwag.’
22 Nagsiring hiya ha uripon, ‘Tungod han imo ginsiring, ginhuhukman ko ikaw, maraot nga uripon. Diri ba maaram ka nga istrikto ako, nga ginkukuha ko an waray ko ideposito ngan gin-aani an waray ko igsabwag?
23 Salit, kay ano nga waray mo ibutang ha bangko an akon silber nga kwarta? Basi pag-abot ko, makuha ko unta ito pati an tubo.’
24 “Tungod hito nagsiring hiya ha mga naninindog didto, ‘Kuhaa ha iya an mina ngan ihatag ito ha may napulo ka mina.’
25 Pero nagsiring hira, ‘Ginoo, may-ada na hiya napulo ka mina!’—
26 ‘Susumatan ko kamo: An bisan hin-o nga may-ada na, dudugangan pa, pero an waray, kukuhaon bisan an aada ha iya.
27 Dad-a niyo nganhi an akon mga kaaway nga diri naruruyag nga maghadi ako ha ira, ngan pataya hira ha akon atubangan.’ ”
28 Katapos igsaysay ito ni Jesus, nagpadayon hiya ngadto ha Jerusalem.
29 Ngan han hirani na hira ha Betfage ngan ha Betania ha Bukid han mga Olibo, nagsugo hiya hin duha nga disipulo
30 ngan gintugon hira: “Kadto kamo hito nga baryo nga iyo nakikita ha unhan, ngan kon makasulod na kamo makakakita kamo hin asno nga nakahigot nga waray pa gud masakyi hin tawo. Badbari ito ngan dad-a nganhi.
31 Pero kon may magpakiana ha iyo, ‘Kay ano nga ginbabadbad niyo an higot hito?’ siring kamo: ‘Kinahanglanon ini han Ginoo.’ ”
32 Salit linakat an mga ginsugo ngan nakita nira ito sugad gud han ginsiring niya ha ira.
33 Kondi han ginbabadbad na nira an higot han asno, an mga tag-iya hito nagpakiana ha ira: “Kay ano nga ginbabadbad niyo an higot han asno?”
34 Binaton hira: “Kinahanglanon ini han Ginoo.”
35 Gindara nira kan Jesus an asno, ngan ginsapinan ito han ira pantungbaw nga mga panapton ngan sinakay hiya hito.
36 Samtang nagpapadayon hiya tipaunhan, iginlatag nira ha dalan an ira pantungbaw nga mga panapton.
37 Han hirani na hiya ha dalan tipalusad ha Bukid han mga Olibo, an ngatanan nga disipulo nagkalipay ngan nagdayaw ha Dios ha daku nga tingog tungod han ngatanan nga gamhanan nga mga buhat nga ira nakita,
38 nasiring: “Bendisyonan unta Hiya nga napakanhi sugad nga Hadi ha ngaran ni Jehova! Kamurayawan ha langit, ngan paghimayaon an Dios ha kahitas-an!”
39 Pero an iba nga Pariseo nga kaupod han mga tawo nagsiring kan Jesus: “Magturutdo, sidnga an imo mga disipulo nga diri mag-inaringasa.”
40 Kondi binaton hiya: “Susumatan ko kamo: Kon maghilom hira, mga bato an masinggit.”
41 Han hirani na hiya ha Jerusalem, ginkita niya an syudad ngan nagtangis hiya,
42 ngan nagsiring: “Ginhingyap ko gud nga unta nasabtan mo ini nga mga butang nga maghahatag ha imo hin kamurayawan, pero yana diri ka makakakita hito.
43 Tungod kay maabot an panahon nga an imo mga kaaway magbubutang ha imo palibot hin magtais nga alad, papalibotan ngan aatakehon ka tikang ha ngatanan nga direksyon,
44 bubungkagon ka nira ngan an imo mga anak, ngan waray usa nga bato nga papabay-an nira ha bawbaw han usa nga bato kay waray ka makasabot han paghukmi ha imo.”
45 Katapos sinulod hi Jesus ha templo ngan ginpaiwas an namamaligya didto
46 ngan ginsidngan hira: “Ini an iginsurat: ‘An akon balay magigin balay nga arampoan,’ pero ginhimo niyo ini nga lungib han mga kawatan.”
47 Nagpadayon hiya pagtutdo ha templo kada adlaw. Pero an punoan nga mga saserdote, mga eskriba, ngan mga lider han katawohan nangalimbasog pagpatay ha iya.
48 Kondi waray hira makabiling hin paagi ha pagbuhat hito, kay an mga tawo diri nabulag kan Jesus kay naruruyag hira pagpinamati ha iya.
Mga footnote
^ Ha Griego, an usa ka mina 340 ka gramo ngan mga 100 ka drakma an kantidad. Kitaa an Apendise 11.
