Lucas 9:1-62
9 Katapos gintawag niya an 12 nga apostol ngan gintagan hin gahum ngan awtoridad ha pagpagawas han ngatanan nga demonyo ngan ha pagtambal han mga sakit.
2 Iya ginsugo hira nga magsangyaw han Ginhadian han Dios ngan manambal,
3 ngan nagsiring hiya: “Ayaw kamo pagdara hin bisan ano ha biyahe, bisan tungkod o surudlan hin pagkaon, o tinapay o silber nga kwarta, o reserba* nga bado.
4 Kondi bisan diin nga balay kamo sumulod, didto la kamo tubtob nga bumaya kamo.
5 Pero kon diri kamo karawaton han mga tawo, paggawas niyo hito nga syudad, ipadpad an tapotapo ha iyo mga tiil sugad nga pamatuod kontra ha ira.”
6 Katapos, kinadto hira ha mga baryo basi ipasamwak an maopay nga sumat ngan manambal ha bisan diin.
7 Hinbatian ni Herodes nga magmarando han distrito an ngatanan nga nahitatabo, ngan nabaraka gud hiya kay nasiring an iba nga hi Juan ito nga nabanhaw,
8 kondi an iba nasiring nga hi Elias ito nga nagpakita, kondi an iba pa nasiring nga usa ito han mga propeta hadto nga nabanhaw.
9 Nagsiring hi Herodes: “Ginpapugotan ko hi Juan. Hin-o man ini nga nababatian ko nga gin-iiristoryahan?” Salit karuyag niya nga makita Hiya.
10 Pagbalik han mga apostol, iginsumat nira kan Jesus an ngatanan nga ira ginbuhat. Ngan igin-upod niya hira ngadto ha syudad han Betsaida nga hira la.
11 Pero tungod kay hinbaroan ito han mga tawo, sinunod hira ha iya. Ngan iya gin-abiabi hira hin maopay, ginsumatan mahitungod han Ginhadian han Dios, ngan gintambal an nanginginahanglan hin pagtambal.
12 Han tikagab-i na, an 12 nga apostol dinaop ha iya ngan nagsiring: “Palakta na an mga tawo basi kumadto hira ha kahirani nga mga baryo ngan mga lugar ha palibot ngan makabiling hin mauukyan ngan makakaon, kay aanhi kita hinin hirayo nga lugar.”
13 Pero nagsiring hiya: “Tagi niyo hira hin makakaon.” Binaton hira: “May kita lima la nga tinapay ngan duha nga isda, labot la kon lumakat kami ngan pumalit hin pagkaon para hini ngatanan nga tawo.”
14 Mga 5,000 hira nga kalalakin-an. Kondi nagsiring hiya ha mga disipulo: “Palingkora hira nga mga tag-50 an kada grupo.”
15 Ngan ira ginpalingkod hira ngatanan.
16 Han nakada na ha iya an lima nga tinapay ngan duha nga isda, hinangad hiya ha langit, nag-ampo,* gintipik-tipik ito ngan ipinanhatag ha mga disipulo basi ipanhatag ha mga tawo.
17 Salit nangaon hira ngatanan ngan nabusog, ngan an nahisalin nga mga tipik nga ira natirok, 12 ka basket.
18 Katapos samtang nag-aampo hiya nga nag-uusahan, gindaop hiya han mga disipulo, ngan iya ginpakianhan hira: “Hin-o ako sumala ha mga tawo?”
19 Binaton hira: “Hi Juan nga Parabaptis, kondi an iba nasiring, hi Elias, ngan an iba pa nasiring, usa han mga propeta hadto nga nabanhaw.”
20 Katapos nagpakiana hiya: “Kondi para ha iyo, hin-o ako?” Binaton hi Pedro: “An Kristo nga ginsugo han Dios.”
21 Ngan gintugon gud niya hira nga diri ini isumat ha bisan hin-o,
22 pero nagsiring hiya: “An Anak han tawo kinahanglan mag-antos hin damu nga kasakitan ngan isalikway han katigurangan, punoan nga mga saserdote, ngan mga eskriba. Ngan papatayon hiya pero babanhawon ha ikatulo ka adlaw.”
23 Ngan nagsiring hiya ha ngatanan: “An bisan hin-o nga naruruyag sumunod ha akon, isalikway niya an iya kalugaringon, pas-anon kada adlaw an iya pasakitan nga kahoy,* ngan padayon nga sumunod ha akon.
24 Kay an bisan hin-o nga nagpapanalipod han iya kalag* mawawad-an hito, pero an bisan hin-o nga mawad-an han iya kalag tungod ha akon amo an magtatalwas hito.
25 Kon sugad, ano an kapulsanan kon maangkon han usa nga tawo an bug-os nga kalibotan pero madadaot an iya kalugaringon o mawawara an iya kinabuhi?
26 Kay kon ako ngan an akon mga pulong ikaawod han bisan hin-o, ikakaawod liwat hiya han Anak han tawo kon umabot na hiya ha iya himaya ngan ha himaya han Amay ngan han baraan nga mga anghel.
27 Kondi susumatan ko kamo han kamatuoran: An iba nga naninindog dinhi diri mamamatay tubtob nga makita anay nira an Ginhadian han Dios.”
28 Ha pagkamatuod, paglabay hin mga walo ka adlaw tikang nga ginyakan ini ni Jesus, igin-upod niya hira Pedro, Juan, ngan Santiago ngadto ha bukid basi mag-ampo.
29 Samtang nag-aampo hiya, nag-iba an hitsura han iya nawong ngan an iya bado nagsanag ha kabusag.
30 Ngan kitaa! duha nga lalaki an nakikiistorya ha iya, hira Moises ngan Elias.
31 Mahimayaon nga nagpakita hira ngan nag-iristorya mahitungod han iya pagbaya, nga itinanda nga iya tutumanon ha Jerusalem.
32 Hi Pedro ngan an iya mga kaupod nanhingaturog, pero pagmata nira, nakita nira an himaya ni Jesus ngan an duha nga lalaki nga natindog kaupod niya.
33 Han tibaya na an duha nga lalaki, nagsiring hi Pedro kan Jesus: “Magturutdo, maopay kay nakaupod kami nganhi, salit magtitindog kami hin tulo nga tolda, usa para ha imo, usa para kan Moises, ngan usa para kan Elias.” Pero diri maaram hi Pedro han iya ginyayakan.
34 Kondi samtang nagyayakan pa hiya, nagkaada dampog nga naglandong ha ira. Han natatabonan na hira han dampog, nahadlok hira.
35 Ngan may tingog tikang ha dampog nga nasiring: “Ini an akon Anak nga akon pinili. Pamati kamo ha iya.”
36 Han hinbatian an tingog, nakita nira nga nag-uusahan na la hi Jesus. Kondi hito nga panahon waray hira mag-istorya ngan magsumat ha bisan hin-o han ira hinkit-an.
37 Kinabuwasan, paglusad nira ha bukid, gintapo hiya han damu nga tawo.
38 Ngan ha butnga nira may lalaki nga nagsinggit: “Magturutdo, nakikimalooy ako ha imo nga kitaon mo an akon anak nga lalaki, kay hiya gud la an akon anak.
39 Ginsasaniban hiya hin maraot nga espiritu, ngan tigda nga naguliat, ginpapakisaykisay hiya ngan nagbubura an iya baba, ginsasamaran hiya, ngan diri gud ito nabaya ha iya.
40 Ginhangyo ko an imo mga disipulo nga pagawson ito, pero waray nira ito mapagawas.”
41 Nagsiring hi Jesus: “Waray pagtoo ngan matinalapason nga henerasyon, tubtob san-o ako makikig-upod ha iyo ngan magpapailob ha iyo? Dad-a ha akon an imo anak.”
42 Pero bisan han nadaop na an bata, gintumba hiya ha tuna ngan ginpakisaykisay gud hiya han demonyo. Kondi ginsaway ni Jesus an maraot nga espiritu ngan gintambal an bata ngan iginhatag hiya ha iya tatay.
43 Nahipausa gud hira ngatanan ha pagkadaku han gahum han Dios.
Samtang nahipapausa hira han ngatanan nga iya ginbuhat, nagsiring hiya ha mga disipulo:
44 “Pamati kamo hin maopay ngan hinumdumi ini, kay an Anak han tawo sigurado nga itutubyan ha iya mga kaaway.”
45 Pero waray la gihapon nira masabti an iya ginyakan. Ha pagkamatuod, igintago ito ha ira basi diri nira masabtan, ngan nahadlok liwat hira pagpakiana ha iya mahitungod hito.
46 Katapos nagdiskusyon an mga disipulo kon hin-o ha ira an gidadakui an awtoridad.
47 Tungod kay maaram hi Jesus kon ano an aada ha ira kasingkasing, ginpatindog niya an usa nga bata tupad niya,
48 ngan nagsiring hiya ha ira: “Bisan hin-o nga nakarawat hini nga bata tungod ha akon ngaran nakarawat liwat ha akon, ngan bisan hin-o nga nakarawat ha akon nakarawat liwat ha Iya nga nagsugo ha akon. Kay an nagawi sugad nga ubos ha iyo ngatanan amo an may daku nga awtoridad.”
49 Hi Juan nagsiring: “Magturutdo, nakakita kami hin tawo nga nagpapagawas hin mga demonyo pinaagi han imo ngaran, ngan gindid-an namon hiya kay diri naton hiya kaupod.”
50 Kondi nagsiring hi Jesus ha iya: “Ayaw niyo hiya pagdid-i, kay an diri nakontra ha iyo, nadapig ha iyo.”
51 Samtang nagtitikahirani an panahon han pagsaka ni Jesus ha langit, determinado hiya nga kumadto ha Jerusalem.
52 Salit nagsugo hiya hin mga mensahero basi mag-una ha iya. Linakat hira ngan sinulod ha usa nga baryo han mga Samaritano basi mag-andam para ha iya,
53 kondi waray hiya karawata han mga tawo kay disidido hiya kumadto ha Jerusalem.
54 Han nakita ini han mga disipulo nga hira Santiago ngan Juan, nagsiring hira: “Ginoo, karuyag mo ba nga magpalusad kami hin kalayo tikang ha langit basi bungkagon hira?”
55 Kondi liningi hiya ngan ginsaway hira.
56 Salit hi Jesus ngan an mga disipulo kinadto ha iba nga baryo.
57 Samtang nagbabaktas hira, may nagsiring ha iya: “Maupod ako ha imo bisan diin ka kumadto.”
58 Pero hi Jesus nagsiring: “An mga garong may mga lungib ngan an katamsihan may mga salag, kondi an Anak han tawo waray kalugaringon nga urukyan nga makakaturogan.”
59 Katapos nagsiring hiya ha usa pa: “Sunod ha akon.” Binaton an lalaki: “Tuguti anay ako pag-uli ngan paglubong ha akon tatay.”
60 Pero nagsiring hi Jesus ha iya: “Pabay-i an mga patay nga maglubong han ira mga patay, kondi lakat lugod ngan ipasamwak ha bisan diin an Ginhadian han Dios.”
61 Ngan nagyakan an usa pa: “Ginoo, maupod ako ha imo, kondi tuguti anay ako pagsarit ha akon pamilya.”
62 Nagsiring ha iya hi Jesus: “Waray tawo nga nakapot ha arado ngan nalingi an takos makasulod ha Ginhadian han Dios.”
Mga footnote
^ O “duha nga bado.”
^ Ha literal, “ginbendisyonan ito.”
^ Kitaa an Apendise 6.
^ O “kinabuhi.”
