Lucas 17:1-37
17 Katapos, nagsiring hi Jesus ha iya mga disipulo: “Diri malilikyan an pag-abot han mga hiparakdolan.* Kondi kairo han usa nga amo an hinungdan han pag-abot hito!
2 Mas maopay pa nga bitayan hiya hin gilingan nga bato ha liog ngan ilabog hiya ha dagat kay ha makapakdol hiya ha usa hini nga mga ubos.
3 Paghatag hin atensyon ha iyo kalugaringon. Kon makasala an imo bugto, sawaya hiya, ngan kon magbasol, pasayloa hiya.
4 Bisan kon makasala hiya hin pito ka beses kada adlaw ngan magbalik-balik hiya ha imo hin makapito basi sumiring, ‘Nagbabasol ako,’ kinahanglan pasayloon mo hiya.”
5 An mga apostol nagsiring ha Ginoo: “Tagi kami hin dugang nga pagtoo.”
6 Nagsiring an Ginoo: “Kon may pagtoo kamo nga sugad kaguti han liso han mustasa, masiring kamo hini nga kahoy nga mulberi, ‘Magabot ka ngan mahitanom ha dagat!’ ngan masugot ito ha iyo.
7 “Hin-o dinhi ha iyo an may uripon nga nag-aarado o nag-aataman han mga hayop ngan masiring ha iya pag-uli niya tikang ha uma, ‘Pakadi dayon ha lamesa ngan lingkod basi ka kumaon’?
8 Diri ba masiring lugod hiya ha uripon, ‘Iandam an akon panihapon, ngan pag-epron, serbihi ako tubtob nga matapos ako kumaon ngan uminom; katapos, mahimo ka na kumaon ngan uminom’?
9 Diri hiya magpapasalamat ha uripon kay ginbuhat la niya an sugo ha iya, diri ba?
10 Sugad man, kon nabuhat na niyo an ngatanan nga sugo ha iyo, siring kamo, ‘Waray kami pulos nga mga uripon. Ginbuhat la namon an amon obligasyon.’ ”
11 Han tikadto hi Jesus ha Jerusalem, inagi hiya ha butnga han Samaria ngan Galilea.
12 Ngan han tisulod na hiya ha usa nga baryo, tinindog an napulo ka tawo nga may liprosi han nakita nira hiya, pero hirayo la hira.
13 Katapos nagsinggit hira: “Jesus, Magturutdo, kalooyi kami!”
14 Han nakita niya hira, nagsiring hiya: “Kadto kamo ngan pagpakita ha mga saserdote.” Samtang tipakadto, natambal hira.
15 Pakakita han usa ha ira nga natambal hiya, binalik hiya ngan gindayaw an Dios ha daku nga tingog.
16 Yinukbo hiya ha may tiil ni Jesus ngan nagpasalamat ha iya. Usa hiya nga Samaritano.
17 Nagsiring hi Jesus: “Napulo an natambal, diri ba? Hain man an siyam?
18 Waray ba iba nga binalik basi magdayaw ha Dios kondi ini la nga tawo nga taga-iba nga nasud?”
19 Ngan ginsidngan hiya ni Jesus: “Tindog ngan lakat; nag-opay ka tungod han imo pagtoo.”
20 Usa ka adlaw, ginpakianhan hiya han mga Pariseo kon san-o maabot an Ginhadian han Dios, ngan binaton hiya: “Diri ngatanan makakakita han pag-abot han Ginhadian han Dios.
21 An mga tawo diri masiring, ‘Kitaa niyo didi!’ o ‘Didto!’ Kay an Ginhadian han Dios aada ha butnga niyo.”
22 Nagsiring hiya ha mga disipulo: “Maabot an panahon nga maghihingyap kamo nga makita an usa han mga adlaw han Anak han tawo, pero diri niyo ito makikita.
23 Ngan an mga tawo masiring ha iyo, ‘Kitaa niyo didto!’ o ‘Kitaa niyo didi!’ Ayaw kamo paggawas o paglanat ha ira.
24 Kay pariho han kidlat nga naglalamrag tikang ha usa nga bahin ha ilarom han langit tubtob ha luyo nga bahin, magigin sugad liwat hito an Anak han tawo.
25 Kondi kinahanglan mag-antos anay hiya hin damu nga kasakitan ngan isalikway hini nga henerasyon.
26 Ngan an nahitabo ha mga adlaw ni Noe mahitatabo liwat ha mga adlaw han Anak han tawo:
27 An mga tawo nagpinangaon, nagpinanginom, an kalalakin-an nangasawa, an kababayin-an ginpangasawa tubtob nga sinulod hi Noe ha arka. Inabot an Baha ngan namatay hira ngatanan.
28 Pariho liwat hito an nahitabo ha panahon ni Lot: Okupado an mga tawo ha pagpinangaon, pagpinanginom, pagpinamalit, pagpinamaligya, pagpinananom, ngan pagpinanhimo hin balay.
29 Pero ha adlaw han paggawas ni Lot ha Sodoma, inuran hin kalayo ngan asupre tikang ha langit ngan namatay hira ngatanan.
30 Pariho liwat hito an mahitatabo ha panahon kon igpahayag na an Anak han tawo.
31 “Hito nga panahon, an aadto ha atop han balay diri lumusad pagkuha han iya mga gamit ha sulod han balay, ngan an aadto ha uma diri liwat umuli pagkuha han mga butang nga iya ginbayaan.
32 Hinumdumi niyo an asawa ni Lot.
33 An bisan hin-o nga nangangalimbasog pagtalwas han iya kalag* mawawad-an hito, kondi matitipigan ito han bisan hin-o nga mawad-an hito.
34 Susumatan ko kamo: Hito nga gab-i may duha nga tawo ha usa nga higdaan; an usa kukuhaon pero an usa babayaan.
35 May duha nga babaye nga naggigiling ha usa nga gilingan; an usa kukuhaon pero an usa babayaan.”
36 * ——
37 Salit, nagpakiana hira ha iya: “Diin, Ginoo?” Binaton hiya: “Kon hain an lawas, didto matitirok an mga agila.”
