Lucas 3:1-38
3 Ha ika-15 ka tuig nga pagmando ni Tiberio Cesar, hi Ponsio Pilato an gobernador ha Judea, hi Herodes an magmarando ha distrito han Galilea, ngan hi Felipe nga iya bugto an magmarando ha distrito han Iturea ngan Traconite, ngan hi Lisanias an magmarando ha distrito han Abilinia
2 ha panahon ni Caifas ngan han Hitaas nga Saserdote nga hi Anas. Hito nga panahon, inabot kan Juan nga anak ni Sakarias an mensahe han Dios samtang nakadto hiya ha kamingawan.
3 Salit ginlibot niya an ngatanan nga lugar ha palibot han Jordan, ngan nagsinangyaw mahitungod han bawtismo sugad nga simbolo han pagbasol basi mapasaylo an mga sala,
4 sugad la han iginsurat ha libro ni propeta Isaias: “Pamati kamo! May nagsisinggit ha kamingawan: ‘Ig-andam niyo an dalan ni Jehova! Hawani an iya mga aragian.
5 Kinahanglan tambakan hin tuna an kada walog, patagon an kada bukid ngan bungtod, tadungon an mga kurbada ngan hamison an mga lubak,
6 ngan an ngatanan nga tawo makakakita han paagi han Dios ha pagtalwas.’ ”
7 Tungod hito nagsiring hiya ha mga tawo nga naabot basi magpabawtismo ha iya: “Kamo nga katulinan han mga halas, hin-o an nagsiring ha iyo nga makakalikay kamo ha tiarabot nga kangalas han Dios?
8 Salit ipakita ha mga buhat nga nagbabasol kamo. Ngan ayaw kamo pagsiring ha iyo kalugaringon, ‘Hi Abraham an amon amay.’ Susumatan ko kamo, may gahum an Dios ha paghimo hin mga anak para kan Abraham tikang hini nga mga bato.
9 Oo, an atsa andam na pag-utod han gamot han mga kahoy. Salit an tagsa nga kahoy nga diri nagbubunga hin maopay uutdon ngan ilalabog ha kalayo.”
10 An mga tawo nagpakiana ha iya: “Kon sugad, ano an amon bubuhaton?”
11 Binaton hiya ha ira: “Kon hin-o an may duha nga bado, tagan niya an tawo nga waray bado, ngan kon hin-o an may pagkaon, tagan niya an waray kinakaon.”
12 Bisan an mga parasukot hin buhis kinadto basi magpabawtismo, ngan nagsiring hira ha iya: “Magturutdo, ano an amon bubuhaton?”
13 Ginsidngan niya hira: “Ayaw pagsukot hin sobra ha baraydan nga buhis.”
14 Ginpakianhan liwat hiya han mga sundalo: “Ano an amon bubuhaton?” Binaton hiya: “Ayaw kamo panraugdaog o pag-akusar hin buwa ha bisan hin-o, kondi makontento kamo ha iyo katigayonan.”
15 Samtang naghuhulat an mga tawo, ha ira kasingkasing sugad hini an ira pangatadongan mahitungod kan Juan, “Hiya ba an Kristo?”
16 Ginbaton hira ni Juan: “Nagbabawtismo ako ha iyo ha tubig, kondi hiya nga makanhi mas may awtoridad kay ha akon, ngan diri ako takos pagbadbad han sintas han iya mga sandalyas. Magbabawtismo hiya ha iyo pinaagi ha baraan nga espiritu ngan ha kalayo.
17 Ginkakaptan niya an pala nga ginagamit ha pagpalíd* basi limpyohan hin maopay an iya giriokan ngan tirukon an trigo ngadto ha iya bodega, kondi an mga upa iya susunugon ha kalayo nga diri mapaparong.”
18 Tungod hito, hi Juan naghatag liwat hin damu nga sagdon ngan padayon nga nagpasamwak han maopay nga sumat ha mga tawo.
19 Kondi ginsaway ni Juan hi Herodes nga magmarando han distrito tungod kan Herodias nga asawa han iya bugto, ngan tungod han ngatanan nga magraot nga ginbuhat ni Herodes,
20 ngan an iya mga ginbuhat nadugangan pa hini: Iginpapriso niya hi Juan.
21 Kabawtismuhi han ngatanan nga tawo, ginbawtismohan liwat hi Jesus. Ngan han nag-aampo hiya, an langit naabrihan,
22 ngan linusad ngada ha iya an baraan nga espiritu nga sugad hin sarapati, ngan may tingog nga nabatian tikang ha langit: “Ikaw an akon Anak nga hinigugma, ikaw an akon nalilipayan.”
23 Han nagtikang hi Jesus ha iya buruhaton, 30 anyos na hiya. Sumala han ginhuhunahuna han mga tawo, hiya an anakni Jose,nga anak ni Heli,
24 nga anak ni Matat,nga anak ni Levi,nga anak ni Melki,nga anak ni Jannai,nga anak ni Jose,
25 nga anak ni Matatias,nga anak ni Amos,nga anak ni Nahum,nga anak ni Esli,nga anak ni Nagai,
26 nga anak ni Maat,nga anak ni Matatias,nga anak ni Semein,nga anak ni Josec,nga anak ni Joda,
27 nga anak ni Joanan,nga anak ni Resa,nga anak ni Serubabel,nga anak ni Sealtiel,nga anak ni Neri,
28 nga anak ni Melki,nga anak ni Addi,nga anak ni Cosam,nga anak ni Elmadam,nga anak ni Er,
29 nga anak ni Jesus,nga anak ni Eliezer,nga anak ni Jorim,nga anak ni Matat,nga anak ni Levi,
30 nga anak ni Simeon,nga anak ni Judas,nga anak ni Jose,nga anak ni Jonam,nga anak ni Eliakim,
31 nga anak ni Melea,nga anak ni Mena,nga anak ni Matata,nga anak ni Natan,nga anak ni David,
32 nga anak ni Jesse,nga anak ni Obed,nga anak ni Boas,nga anak ni Salmon,nga anak ni Nason,
33 nga anak ni Aminadab,nga anak ni Arni,nga anak ni Hesron,nga anak ni Peres,nga anak ni Juda,
34 nga anak ni Jacob,nga anak ni Isaac,nga anak ni Abraham,nga anak ni Tera,nga anak ni Nahor,
35 nga anak ni Serug,nga anak ni Reu,nga anak ni Peleg,nga anak ni Eber,nga anak ni Shela,
36 nga anak ni Cainan,nga anak ni Arpacsad,nga anak ni Sem,nga anak ni Noe,nga anak ni Lamec,
37 nga anak ni Metusela,nga anak ni Enoc,nga anak ni Jared,nga anak ni Mahalalel,nga anak ni Cainan,
38 nga anak ni Enos,nga anak ni Set,nga anak ni Adan,nga anak han Dios.
Mga footnote
^ Kitaa an “Pagpalíd” ha Glossary.
