Lucas 6:1-49
6 Ha adlaw han Sabbath han naagi hiya ha kaumhan han trigo, an iya mga disipulo nangutos hin mga uhay, ginkusokuso ito ha ira kamot ngan ginkaon.
2 Tungod hini an iba nga Pariseo nagsiring: “Kay ano nga ginbubuhat niyo an igindidiri ha adlaw han Sabbath?”
3 Binaton hi Jesus: “Waray gud ba niyo mabasa an ginbuhat ni David han gin-gutom hiya ngan an iya kaupod nga kalalakin-an?
4 Diri ba sinulod hiya ha balay han Dios ngan ginkarawat an halad nga mga tinapay ngan ginkaon ito ngan gintagan liwat niya an iya kaupod nga kalalakin-an bisan kon diri uyon ha balaud nga kaunon ito han bisan hin-o kay para la ito ha mga saserdote?”
5 Ngan nagsiring pa hiya: “An Anak han tawo amo an Ginoo han Sabbath.”
6 Ha usa pa nga Sabbath, sinulod hi Jesus ha sinagoga ngan nagtutdo. May tawo didto nga uga an too nga kamot.
7 Ginbinantayan hiya han mga eskriba ngan mga Pariseo kon magtatambal ba hiya ha adlaw han Sabbath, basi maakusaran hiya.
8 Pero maaram hiya han ira ginhuhunahuna, salit ginsidngan niya an tawo nga uga an kamot: “Buhát ngan tindog ha butnga.” Salit binuhát hiya ngan nagpabutnga.
9 Katapos hi Jesus nagsiring ha ira: “May ipapakiana ako ha iyo, Uyon ba ha balaud han Sabbath an pagbuhat hin maopay o pagbuhat hin maraot, an pagtalwas o pagbungkag hin kalag?”
10 Katapos niya kitaon hira ngatanan, ginsidngan niya an tawo: “Unata an imo kamot.” Ginbuhat ito han tawo ngan nag-opay an iya kamot.
11 Kondi nasina gud hira ngan nagsarabot kon ano an ira bubuhaton kan Jesus.
12 Usa ka adlaw, kinadto hiya ha bukid basi mag-ampo. Ha bug-os nga gab-i nag-inampo hiya ha Dios.
13 Kondi pagkaaga, gintawag niya an iya mga disipulo ngan nagpili hin 12 nga iya liwat gintawag nga mga apostol:
14 hi Simon nga ginngaranan liwat niya hin Pedro, hi Andres nga bugto ni Pedro, hira Santiago, Juan, Felipe, Bartolome,
15 Mateo, Tomas, hi Santiago nga anak ni Alfeo, hi Simon nga tinatawag nga an usa nga aktibo,*
16 hi Judas nga anak ni Santiago, ngan hi Judas Iscariote nga nagin traydor.
17 Linusad hira ha bukid ngan tinindog hiya ha patag nga lugar han nakita niya an damu nga disipulo ngan an damu gud nga tawo tikang ha bug-os nga Judea, Jerusalem, ngan ha mga baybayon han Tiro ngan Sidon. Kinadto hira basi mamati ha iya ngan matambal an ira mga sakit.
18 Nag-opay bisan an mga ginsasakit han magraot nga espiritu.
19 Nangalimbasog an ngatanan nga makaptan hiya kay nagawas ha iya an gahum ngan natatambal hira.
20 Ginkita niya an iya mga disipulo ngan nagsiring:
“Malipayon kamo nga mga pobre, kay para ha iyo an Ginhadian han Dios.
21 “Malipayon kamo nga ginugutom yana, kay bubusugon kamo.
“Malipayon kamo nga nagtatangis yana, kay magtatawa kamo.
22 “Malipayon kamo kon an mga tawo nasisina ha iyo, nagsasalikway ha iyo, nag-iinsulto ha iyo, ngan nagpapakaraot han iyo ngaran tungod han Anak han tawo.
23 Hito nga panahon magrayhak kamo ngan lukso ha kalipay, kay daku an iyo balos ha langit, tungod kay ito liwat an ginbuhat han ira kaapoy-apoyan ha mga propeta.
24 “Kondi kairo niyo nga mga riko nga tawo, kay naeksperyensyahan na niyo an bug-os nga kahimyang.
25 “Kairo niyo nga mga busog yana, kay magugutom kamo.
“Kairo niyo nga nagtitinawa yana, kay mabibido ngan magtatangis kamo.
26 “Kairo niyo kon gindadayaw kamo han ngatanan nga tawo, kay ito an ginbuhat han ira kaapoy-apoyan ha buwa nga mga propeta.
27 “Pero ginsisidngan ko kamo nga namamati: Padayon nga higugmaa an iyo mga kaaway, magbuhat hin maopay ha mga nasisina ha iyo,
28 magyakan hin maopay ha mga nanhihimaraot ha iyo, ngan ig-ampo an mga nag-iinsulto ha iyo.
29 Kon may magtampalo han imo usa nga bayhon, ipatampalo liwat an luyo, ngan kon may magkuha han imo pantungbaw nga panapton, ihatag liwat bisan an imo pan-ilarom nga bado.
30 Hatagi an ngatanan nga nangangaro ha imo, ngan kon may magkuha han imo mga butang, ayaw ito pagbawia.
31 “Ngan an karuyag niyo buhaton ha iyo han mga tawo, buhata liwat ha ira.
32 “Kon an iyo hihigugmaon an mga nahigugma la ha iyo, ano an kapulsanan hito? Kay bisan an magpakasasala nahigugma ha mga nahigugma ha ira.
33 Kon nagbubuhat kamo hin maopay ha mga nagbubuhat la hin maopay ha iyo, ano an kapulsanan hito? Bisan an magpakasasala nagbubuhat liwat hito.
34 Ngan kon an ginpapahuram* la niyo an ginlalaoman niyo nga makakabayad, ano an kapulsanan hito? Bisan an magpakasasala nagpapahuram liwat ha magpakasasala ngan naglalaom nga babayaran han bug-os nga kantidad.
35 Lugod, padayon nga higugmaa an iyo mga kaaway, buhata an maopay ngan magpahuram nga diri naglalaom hin bayad, kay daku an magigin balos ha iyo, ngan magigin mga anak kamo han Gihitaasi, kay buotan hiya bisan ha mga diri-mapasalamaton ngan magraot.
36 Magpadayon kamo ha pagin maloloy-on, sugad la nga an iyo Amay maloloy-on.
37 “Ayaw na kamo paghukom, basi diri gud kamo paghukman, ngan ayaw na kamo pag-akusar ha iba, basi diri gud kamo akusaran. Padayon nga magpasaylo, basi pasayloon kamo.
38 Batasana an paghatag, ngan an mga tawo mahatag ha iyo. Ira igbubuhos ha iyo surudlan an bug-os nga sukol, sinusô, inuy-og, ngan nagsasap-ay. Kay an suruklan nga iyo ginagamit ha iba, ito liwat an gagamiton ha iyo.”
39 Nagsaysay liwat hiya hin ilustrasyon: “Makakatugway ba an buta ha igkasi-buta? Diri ba hira nga duha mahuhulog ha buho?
40 An estudyante diri malabaw ha iya magturutdo, kondi an natutdoan hin maopay magigin pariho ha iya magturutdo.
41 Kay ano nga ginkikita mo an dagami ha mata han imo bugto pero diri mo nakikita an daku nga kahoy* ha imo mata?
42 Paonan-o mo masisiring ha imo bugto, ‘Bugto, kukuhaon ko an dagami ha imo mata,’ nga diri mo ngani nakikita an daku nga kahoy ha imo mata? Hipokrito! Kuhaa anay an daku nga kahoy ha imo mata, basi makakita ka hin maopay ha pagkuha han dagami ha mata han imo bugto.
43 “Waray maopay nga kahoy nga nagbubunga hin maraot, ngan waray maraot nga kahoy nga nagbubunga hin maopay,
44 kay ha bunga nakikilala an tagsa nga kahoy. Pananglitan, an mga tawo diri nakakakuha hin igos ha mga tunok, o hin mga ubas ha tunukon nga tanom.
45 An maopay nga tawo nagpapagawas hin maopay tikang ha maopay nga bahandi han iya kasingkasing, kondi an maraot nga tawo nagpapagawas hin maraot tikang ha iya maraot nga bahandi, kay kon ano an aada ha kasingkasing amo an nagawas ha iya baba.
46 “Salit, kay ano nga gintatawag niyo ako nga Ginoo! Ginoo! pero diri niyo ginbubuhat an akon ginsisiring?
47 Ipapakita ko ha iyo kon hin-o an kapariho han bisan hin-o nga nakanhi ha akon ngan namamati ha akon mga pulong ngan nagbubuhat hito:
48 Pariho hiya han tawo nga karuyag magtindog hin balay, salit nag-ukad hiya hin hilarom ngan gintindog an pundasyon hito ha bato. Han pagbaha, masulog gud an awas han salog ngada hito nga balay, kondi waray ito maruba kay marig-on ito.
49 Pero hiya nga namamati kondi diri nagbubuhat hito, pariho hiya han tawo nga nagtindog hin balay ha tuna nga waray pundasyon. Han pagbaha, naruba dayon ito, ngan bug-os nga narumpag han sulog.”
