Lucas 20:1-47
20 Usa ka adlaw, han nagtututdo hi Jesus ha mga tawo ha templo ngan han nagpapasamwak hiya han maopay nga sumat, dinaop an punoan nga mga saserdote ngan an mga eskriba pati an katigurangan,
2 ngan nagsiring hira ha iya: “Sumati kami kon ha ano nga awtoridad ginbubuhat mo ini nga mga butang o kon hin-o an naghatag ha imo hini nga awtoridad.”
3 Binaton hiya: “May ipapakiana liwat ako ha iyo, ngan batona niyo:
4 An awtoridad ba ni Juan ha pagbawtismo tikang ha langit o ha mga tawo?”
5 Nag-iristorya hira: “Kon sumiring kita, ‘Tikang ha langit,’ masiring hiya, ‘Kay ano man nga waray kamo tumoo ha iya?’
6 Pero kon sumiring kita, ‘Tikang ha mga tawo,’ babatuhon kita han ngatanan nga tawo, kay natoo hira nga propeta hi Juan.”
7 Salit binaton hira nga diri hira maaram kon diin tikang an awtoridad ni Juan.
8 Tungod hito, nagsiring hi Jesus ha ira: “Diri ko liwat isusumat ha iyo kon ha ano nga awtoridad ginbubuhat ko ini nga mga butang.”
9 Katapos nagsaysay hiya ha mga tawo hin ilustrasyon: “May usa nga tawo nga nagtanom hin urubasan ngan ginpaataman ito ha mga parauma, ngan nagbiyahe hiya ha iba nga nasud ngan nag-iha didto.
10 Han panahon na ha pag-ani han mga ubas, nagsugo hiya hin uripon ngadto ha mga parauma basi ihatag nira an iya bahín ha urubasan. Pero ginkastigo han mga parauma an uripon, katapos ginpabaya hiya nga waray dara.
11 Salit nagsugo utro hiya hin iba nga uripon. Ginkastigo liwat nira an uripon, gin-insulto, ngan ginpabaya nga waray dara.
12 Kondi nagsugo utro hiya hin ikatulo; ini liwat nga uripon ira ginsamad ngan gindanas ngadto ha gawas.
13 Salit an tag-iya han urubasan nagsiring, ‘Ano an akon bubuhaton? Pakakadtoon ko an akon anak nga hinigugma. Posible nga irespeto nira hiya.’
14 Han nakit-an hiya han mga parauma, nagsarabot hira, ‘Ini an eredero; patayon naton hiya basi magin aton an panurundon.’
15 Salit ira hiya gindanas ngadto ha gawas han urubasan ngan ginpatay hiya. Tungod hito, ano an bubuhaton ha ira han tag-iya han urubasan?
16 Makadto hiya ngan papatayon an mga parauma ngan ihahatag ha iba an urubasan.”
Pakabati hini han mga tawo, nagsiring hira: “Hinaot diri gud ito mahitabo!”
17 Pero ginkita niya hira ngan ginsidngan: “Kon sugad, ano an kahulogan hini nga iginsurat: ‘An bato nga iginsalikway han mga magtirindog, ini an nagin pinakaimportante nga pandugtong nga bato ha eskina’?*
18 An ngatanan nga mahuhulog ngada hito nga bato magkakababarian. Sugad man, an bisan hin-o nga mahulogan hito nga bato, marurumok.”
19 Hito nga oras, an mga eskriba ngan an punoan nga mga saserdote nangalimbasog pagdakop ha iya kay nasantop nira nga hira an gin-uunabi ni Jesus ha iya ilustrasyon, pero nahadlok hira ha mga tawo.
20 Gin-inobserbaran gud nira hiya, katapos nagsugo hira hin kalalakin-an nga sekreto nga ginsuholan nira nga magpakunokuno nga matadong basi madakop hiya ha iya mga pulong ngan itubyan hiya ha gobyerno ngan ha awtoridad han gobernador.
21 Ngan nagpakiana hira ha iya: “Magturutdo, maaram kami nga nagyayakan ka ngan nagtututdo han tama ngan waray ka ginpapaurog, ngan igintututdo mo an dalan han Dios uyon ha kamatuoran:
22 Uyon ba ha balaud nga magbayad kami hin buhis ha Cesar* o diri?”
23 Kondi naobserbaran niya nga tuso hira ngan nagsiring hiya:
24 “Ipakita ha akon an usa ka denaryo. Kan kanay ladawan ngan titulo an aadi?” Binaton hira: “Kan Cesar.”
25 Nagsiring hiya ha ira: “Kon sugad, ihatag ha Cesar an mga butang han Cesar, pero ihatag ha Dios an mga butang han Dios.”
26 Hini nga ginyakan niya, waray hira naiakusar ha iya ha atubangan han mga tawo, pero tungod kay nahipausa hira ha iya baton, waray hira pakayakan.
27 Kondi an iba han mga Saduseo,* nga nasiring nga waray pagkabanhaw, dinaop ha iya ngan nagpakiana:
28 “Magturutdo, hi Moises nagsurat ha aton: ‘Kon an bugto han usa nga tawo mamatay nga may asawa pero waray anak, sadang niya pangasaw-on an asawa han iya bugto basi magkaada mga anak para ha iya.’
29 May pito nga magburugto, an suhag nag-asawa ngan namatay nga waray anak.
30 Salit an babaye ginpangasawa han ikaduha
31 ngan han ikatulo. Ginpangasawa hiya han pito pero nagkamatay hira nga waray mga anak.
32 Ha urhi, namatay liwat an babaye.
33 Kon sugad, ha pagkabanhaw, hin-o ha ira an iya magigin bana, kay nagin asawa hiya han pito?”
34 Binaton hi Jesus: “An mga anak hini nga sistema nangangasawa ngan ginpapangasawa,
35 kondi an mga takos banhawon ngan kumarawat han kinabuhi ha tiarabot nga sistema diri na mag-aasawa o pangangasaw-on.
36 Ha pagkamatuod, diri na hira mamamatay kay magigin pariho hira han mga anghel. Ngan tungod kay babanhawon hira, magigin mga anak hira han Dios.
37 Pero bisan hi Moises nagpamatuod nga babanhawon an mga patay han nagsaysay hiya mahitungod han tunukon nga tanom, han gintawag niya hi Jehova nga ‘an Dios ni Abraham ngan Dios ni Isaac ngan Dios ni Jacob.’
38 Hiya an Dios, diri han mga patay, kondi han mga buhi, kay para ha iya hira ngatanan buhi.”
39 Salit nagsiring an iba nga mga eskriba: “Magturutdo, tama gud an imo ginsiring.”
40 Tungod hito, waray na hira kaisog nga magpakiana ha iya.
41 Salit nagsiring hiya ha ira: “Kay ano nga nasiring hira nga an Kristo anak ni David?
42 Hi David mismo nagsiring ha libro han Mga Salmo, ‘Hi Jehova nagsiring ha akon Ginoo: “Lingkod ha akon too
43 tubtob nga ibutang ko an imo mga kaaway sugad nga tungtongan han imo mga tiil.” ’
44 Salit kon gintawag hiya ni David nga Ginoo, paonan-o hiya nagin anak ni David?”
45 Samtang namamati an ngatanan nga tawo, nagsiring hiya ha mga disipulo:
46 “Pag-ikmat kamo ha mga eskriba nga naruruyag paglinakat-lakat nga nakabado hin hilaba ngan naruruyag tagan hin katalahoran ha mga merkado ngan paglingkod ha prente nga mga lingkoran ha mga sinagoga ngan ha pinakamaopay nga mga pwesto ha mga panihapon,
47 ngan gin-aagaw nira an mga balay* han mga balo nga babaye ngan nag-aampo hin higlaba pero pakita la. Mas mabug-at nga sirot an ira makakarawat.”
Mga footnote
^ Kitaa an footnote ha Mat 21:42.
^ O “Emperador han Roma.”
^ Kitaa an “Saduseo” ha Glossary.
^ O “propyedad.”
