Lucas 18:1-43
18 Nagpadayon hi Jesus ha pagsaysay ha mga disipulo hin ilustrasyon mahitungod han panginahanglan nga mag-ampo pirme hira ngan diri umundang.
2 Nagsiring hiya: “Ha usa nga syudad may huwes nga waray kahadlok ha Dios ngan waray respeto ha tawo.
3 May balo nga babaye liwat didto nga nagbinalikbalik ha iya ngan nagsiniring, ‘Alayon siguroha nga makarawat ko an hustisya ha akon kaso.’
4 Waray anay hiya maruyag pagbulig ha balo. Pero ha urhi nagsiring hiya ha kalugaringon, ‘Bisan kon diri ako nahahadlok ha Dios o narespeto ha tawo,
5 tungod kay gindidinisturbo ako hini nga balo, sisiguruhon ko nga makarawat niya an hustisya basi diri na hiya magbinalikbalik ngan magpinirit ha akon tubtob nga diri na ako makailob.’ ”
6 Ngan an Ginoo nagsiring: “Hinbatian ba niyo an ginsiring han huwes, bisan kon diri hiya matadong?
7 Kon sugad, diri ba sisiguruhon han Dios nga mahatagan hin hustisya an iya mga pinili nga nangangamuyo ha iya ha adlaw ngan gab-i, samtang nagpapakita hiya hin hilawig nga pagpailob ha ira?
8 Susumatan ko kamo: Sigurado nga tatagan dayon niya hira hin hustisya. Kondi, kon umabot na an Anak han tawo, makakakita gud ba hiya ha tuna hin sugad hini nga pagtoo?”
9 Nagsaysay liwat hiya hin ilustrasyon ha mga nasarig ha ira pagkamatadong ngan naghuhunahuna nga waray pulos an iba. Nagsiring hiya:
10 “May duha ka tawo nga kinadto ha templo basi mag-ampo, an usa Pariseo ngan an usa parasukot hin buhis.
11 An Pariseo tinindog ngan nag-ampo hin hilom, ‘O Dios, nagpapasalamat ako ha imo kay diri ako pariho hini nga parasukot hin buhis o ha iba—mga kawatan, diri matadong, nag-aadulteryo.
12 Kada semana duha ka beses ako nga nagpupuasa; iginhahatag ko an ikanapulo ka bahin han ngatanan nga akon katigayonan.’
13 Kondi an parasukot hin buhis nga natindog ha hirayo diri ngani naruruyag paghangad ha langit, pero padayon nga ginpupukpok an iya dughan ngan nasiring, ‘O Dios, kalooyi ako nga usa nga makasasala.’
14 Susumatan ko kamo: Pag-uli niya, mas matadong hiya kay han Pariseo, kay an nagpapahitaas pauubson, kondi an nagpapaubos pahihitas-on.”
15 Katapos, gindara liwat ha iya han mga tawo an ira gudtiay nga kabataan basi kaptan niya, pero pakakita hini han mga disipulo, ginpugngan hira.
16 Pero ginpadaop ni Jesus ha iya an gudtiay nga kabataan ngan nagsiring: “Pabay-i an kabataan nga kumadi ha akon, ngan ayaw hira pagdid-i. Kay an Ginhadian han Dios para ha mga sugad ha ira.
17 Ha pagkamatuod susumatan ko kamo: Bisan hin-o nga diri kumarawat han Ginhadian han Dios sugad han pagkarawat han usa nga bata, diri gud makakasulod hito.”
18 Ngan nagpakiana ha iya an usa ka tawo nga may awtoridad: “Maopay nga Magturutdo, ano an kinahanglan ko buhaton basi mapanunod an kinabuhi nga waray kataposan?”
19 Binaton hi Jesus: “Kay ano nga gintatawag mo ako nga maopay? Waray iba nga maopay kondi an Dios la.
20 Maaram ka han mga sugo: ‘Diri ka mag-adulteryo, diri ka magpatay, diri ka mangawat, diri ka magtestigo hin buwa, pasidunggi an imo tatay ngan nanay.’ ”
21 Binaton hiya: “Ginbubuhat ko na ito ngatanan tikang pa han akon kabata.”
22 Pakabati hito ni Jesus, nagsiring hiya: “Usa pa an kulang ha imo: Ibaligya an ngatanan nga imo gintatag-iya ngan ihatag ha mga pobre, ngan magkakaada ka bahandi ha langit, ngan kadi, sunod ha akon.”
23 Pakabati niya hini, nasubo gud hiya, kay riko hiya hinduro.
24 Ginkita hiya ni Jesus ngan nagsiring: “Makuri gud makasulod ha Ginhadian han Dios an mga damu an kwarta!
25 Ha pagkamatuod, mas masayon pa an kamel makalusot ha luho han dagum nga ginagamit ha pagtahi kay ha makasulod ha Ginhadian han Dios an riko nga tawo.”
26 An mga nakabati hini nagsiring: “Hin-o man an posible nga matalwas?”
27 Binaton hiya: “An imposible ha mga tawo, posible ha Dios.”
28 Pero nagsiring hi Pedro: “Kitaa! Ginbayaan namon an amon mga butang ngan sinunod ha imo.”
29 Nagsiring hi Jesus: “Ha pagkamatuod susumatan ko kamo: Bisan hin-o nga binaya ha balay, asawa, kabugtoan, mga kag-anak, o mga anak tungod ha Ginhadian han Dios
30 makarawat hin mas damu pa gud hito yana nga panahon, ngan ha maabot nga sistema kinabuhi nga waray kataposan.”
31 Katapos, iya ginkaistorya an 12 nga apostol han hira na la. Nagsiring hiya: “Tikadto kita ha Jerusalem, ngan matutuman an ngatanan nga iginsurat han mga propeta mahitungod han Anak han tawo.
32 Pananglitan, ira itutubyan hiya ha mga tawo han mga nasud ngan hihimoon hiya nga pataraw-an, mamaltratuhon, ngan tutuprahan.
33 Katapos kastiguhon, papatayon hiya, pero babanhawon ha ikatulo ka adlaw.”
34 Kondi an mga apostol waray makasabot hini, kay gintago ha ira an kahulogan hini nga mga pulong.
35 Han hirani na hi Jesus ha Jerico, may buta nga tawo nga nalingkod ha ligid han dalan ngan nakikilimos.
36 Tungod kay hinbatian niya nga naagi an damu nga tawo, nagpakiana hiya kon ano an nahitatabo.
37 Ginsumatan hiya han mga tawo: “Naagi hi Jesus nga Nazareno!”
38 Salit nagsinggit hiya: “Jesus, Anak ni David, malooy ka ha akon!”
39 Ngan ginsidngan hiya han mga nag-uuna nga diri mag-inaringasa, pero dinugang la hiya pagsininggit: “Anak ni David, malooy ka ha akon!”
40 Inundang hi Jesus ngan nagsugo nga dad-on ha iya ito nga tawo. Han hirani na hiya, ginpakianhan hiya ni Jesus:
41 “Ano an karuyag mo nga buhaton ko para ha imo?” Binaton hiya: “Ginoo, buligi ako nga makakita utro.”
42 Salit hi Jesus nagsiring ha iya: “Makakakita ka na; nag-opay ka tungod han imo pagtoo.”
43 Nakakita dayon hiya, ngan nag-inupod kan Jesus ngan nagdinayaw ha Dios. Pakakita hito han ngatanan nga tawo, nagdayaw liwat hira ha Dios.
