Lucas 11:1-54
11 Katapos ni Jesus mag-inampo didto ha usa nga lugar, usa han iya mga disipulo an nagsiring ha iya: “Ginoo, tutdui kami kon paonan-o mag-aampo, pariho han pagtutdo ni Juan ha iya mga disipulo.”
2 Ngan binaton hiya: “Kon mag-ampo kamo, siring: ‘Amay, pagbaraanon an imo ngaran. Kumanhi unta an imo Ginhadian.
3 Kada adlaw tagi kami hin pagkaon nga amon ginkikinahanglan para ha bug-os nga adlaw.
4 Ngan pasayloa kami han amon mga sala, kay ginpapasaylo liwat namon an ngatanan nga nakakasala ha amon, ngan ayaw kami pabay-i nga madaog han pagsulay.’ ”
5 Nagsiring liwat hiya ha ira: “Pananglitan, usa ha iyo an may sangkay ngan kinadto ka ha iya ha katutnga han gab-i ngan nagsiring ha iya, ‘Sangkay, pautanga ako hin tulo nga tinapay
6 kay may sangkay ako nga inabot pa la tikang ha biyahe ngan waray ako ipapakaon ha iya.’
7 Pero an tagbalay binaton: ‘Ayaw ako pagdisturboha. Nakatrangka na an purtahan, ngan nahigda na kami han akon gudtiay pa nga mga anak. Diri ako makakabuhát ngan makakahatag ha imo hin bisan ano.’
8 Susumatan ko kamo: Bisan kon diri hiya bumuhát ngan maghatag hin bisan ano tungod han ira pagin magsangkay, sigurado nga mabuhát hiya ngan mahatag han iya ginkikinahanglan tungod han iya padayon nga pagpirit.
9 Salit, susumatan ko kamo: Padayon nga mangaro kay ihahatag ito ha iyo, padayon nga mamiling kay hiaagian ito niyo, padayon nga magtuktok kay aabrihan kamo.
10 Kay an bisan hin-o nga nangangaro may nakakarawat, an bisan hin-o nga namimiling nakakaagi, ngan an bisan hin-o nga nagtutuktok inaabrihan.
11 Ha pagkamatuod, hin-o nga tatay an mahatag hin halas kon an iya anak mangaro hin isda?
12 O kon mangaro liwat hiya hin bonay, mahatag ba hiya hin iskorpyon?
13 Salit kon kamo nga magraot maaram humatag ha iyo mga anak hin mag-opay nga regalo, labi na gud nga mahatag an iyo Amay ha langit hin baraan nga espiritu ha mga nangangaro ha iya!”
14 Katapos, ginpagawas niya an demonyo nga nakapangula han tawo nga ginsaniban. Paggawas hito nga demonyo, nakayakan na an tawo. Ngan nahipausa gud an mga tawo.
15 Pero an iba ha ira nagsiring: “Nagpapagawas hiya hin mga demonyo pinaagi kan Beelsebub, an magmarando han mga demonyo.”
16 Kondi basi sarihan hiya, an iba nangaro ha iya hin tigaman tikang ha langit.
17 Tungod kay maaram hi Jesus han ira ginhuhunahuna, nagsiring hiya ha ira: “An tagsa nga ginhadian nga nagkakabahinbahin mabubungkag, ngan an panimalay nga nagkakabahinbahin mapupukan.
18 Salit kon hi Satanas mismo nababahin, paonan-o matindog an iya ginhadian? Kay nasiring kamo nga ginpapagawas ko an mga demonyo pinaagi kan Beelsebub.
19 Kon nagpapagawas ako hin mga demonyo pinaagi kan Beelsebub, pinaagi kan kanay ginpapagawas hira han iyo mga anak? Tungod hini, huhukman kamo han iyo mga anak.
20 Pero kon nagpapagawas ako hin mga demonyo pinaagi han tudlo han Dios, waray kamo mahibaro nga an Ginhadian han Dios inabot na.
21 Kon ginbabantayan han makusog ngan armado nga tawo an iya palasyo, waray makakapangawat han iya mga panag-iya.
22 Pero kon atakehon ngan pirdihon hiya hin tawo nga mas makusog ha iya, kukuhaon hito nga tawo an ngatanan nga armas nga iya sinasarigan, ngan babahinbahinon an mga butang nga ginkuha ha iya.
23 An diri nadapig ha akon nakontra ha akon, ngan an diri nabulig pagtirok han mga tawo ngadi ha akon nagtatabog ha ira pahirayo ha akon.
24 “Kon may maraot nga espiritu nga nagawas ha usa nga tawo, naagi hiya ha mga lugar nga waray tubig ha pagpinamiling hin mapapahuwayan, ngan kon waray hiya hin-aagian, nasiring hiya, ‘Mabalik ako ha akon ginbayaan nga balay.’
25 Ngan pag-abot niya ha balay, limpyo ngan gindekorasyonan na ito.
26 Salit malakat hiya ngan mag-uupod hin pito nga espiritu nga mas maraot pa ha iya, ngan pagsulod nira, maukoy hira didto. Tungod hito, an kahimtang hito nga tawo magigin mas maraot pa kay ha siyahan.”
27 Samtang ginyayakan niya ini, usa nga babaye ha butnga han mga tawo an ginuliat: “Malipayon an babaye nga nanganak ngan nagpasuso ha imo!”
28 Kondi binaton hiya: “Diri, lugod, Malipayon an mga namamati han pulong han Dios ngan nagbubuhat hito!”
29 Han nagtitirirok an mga tawo, nagsiring hiya: “Maraot ini nga henerasyon; namimiling hira hin tigaman. Kondi waray tigaman nga ihahatag ha ira labot la han tigaman ni Jonas.
30 Kay sugad la nga hi Jonas nagin tigaman ha mga taga-Ninibe, sugad man an Anak han tawo magigin tigaman liwat hini nga henerasyon.
31 Ha paghukom, an rayna ha sur mababanhaw upod han mga tawo hini nga henerasyon, ngan iya ipapakita nga salaan hira, kay nagbiyahe hiya hin hirayo basi mamati ha kinaadman ni Solomon. Pero kitaa, labaw pa kan Solomon an aanhi!
32 Ha paghukom, an mga tawo ha Ninibe mababanhaw upod hini nga henerasyon, ngan ira ipapakita nga salaan ini, kay nagbasol hira han nagsangyaw ha ira hi Jonas. Kondi kitaa, labaw pa kan Jonas an aanhi!
33 Kon may tawo nga nagdadagkot hin lampara, diri niya ito iginbubutang ha tago nga lugar o diri ito gintatakloban hin taraksan nga basket,* kondi iginbubutang ito ha burutangan han lampara, basi an mga nasulod ha balay makakita han kalamrag.
34 An lampara han lawas amo an imo mata. Kon an imo mata simple,* malamrag liwat an imo bug-os nga lawas, pero kon maraot ito, masirom liwat an imo lawas.
35 Tungod hito, pagbantay nga an kalamrag nga aada ha imo diri kasisidman.
36 Salit kon malamrag an imo bug-os nga lawas ngan waray gud masirom nga bahin hito, magigin sugad ito kalamrag han lampara nga naglalawag ha imo.”
37 Pakasiring niya hini, may Pariseo nga nag-imbitar ha iya ha pangaon. Salit kinadto hiya ngan liningkod ha may lamesa.
38 Pero nahipausa an Pariseo nga waray hiya maghunaw* antes kumaon.
39 Kondi nagsiring an Ginoo: “Kamo nga mga Pariseo, ginhuhugasan niyo an gawas han tasa ngan yahong, pero an iyo kasingkasing puno hin kahakog ngan karaotan.
40 Diri kamo makatadunganon! An naghimo han gawas amo liwat an naghimo han sulod, diri ba?
41 Lugod, ighatag sugad nga mga hatag tungod ha kalooy an mga butang nga aada ha sulod han iyo kasingkasing, ngan magigin limpyo an ngatanan nga butang mahitungod ha iyo.
42 Kondi kairo niyo nga mga Pariseo, kay iginhahatag niyo an ikanapulo nga bahin han herbabuena ngan ruda* ngan han iba pa nga klase hin utanon, pero ginbabalewaray niyo an hustisya ngan gugma han Dios! Obligado kamo nga buhaton ini, pero diri niyo sadang igbalewaray an iba nga butang.
43 Kairo niyo nga mga Pariseo, kay karuyag niyo lumingkod ha prente nga mga lingkoran ha sinagoga ngan hatagan hin katalahoran han mga tawo ha mga merkado!
44 Kairo niyo, kay pariho kamo han mga lubnganan* nga diri nakikita, salit natatamakan ito han mga tawo pero diri hira maaram!”
45 Usa nga eksperto ha Balaud an nagsiring ha iya: “Magturutdo, tungod hini nga imo ginsiring, gin-iinsulto mo liwat kami.”
46 Binaton hiya: “Kairo liwat niyo nga mga eksperto ha Balaud, kay ginpapapas-an niyo an mga tawo hin paras-anon nga makuri dad-on, pero kamo mismo diri naruruyag bisan pagbantad hito han iyo tudlo!
47 “Kairo niyo, kay naghihimo kamo hin mga lubnganan han mga propeta, pero an iyo kaapoy-apoyan an nagpatay ha ira!
48 Maaram gud kamo han ginbuhat han iyo kaapoy-apoyan pero ginkukonsinter niyo hira, kay ginpatay nira an mga propeta kondi kamo an naghihimo han ira mga lubnganan.
49 Tungod hini, an maaramon nga Dios nagsiring liwat: ‘Magsusugo ako hin mga propeta ngan mga apostol ngadto ha ira, ngan papatayon ngan pagtitimarauton nira an iba ha ira,
50 salit ini nga henerasyon an may baratunon han ginpaagay nga dugo han ngatanan nga propeta tikang pa ha tinikangan han kalibotan,
51 tikang ha dugo ni Abel tubtob ha dugo ni Sakarias, nga ginpatay ha butnga han halaran ngan han balay.’ Oo, susumatan ko kamo: May baratunon ini nga henerasyon.
52 “Kairo niyo nga mga eksperto ha Balaud, kay ginkuha niyo an yawi han kahibaro; kamo mismo diri nasulod, ngan an mga nasulod iyo ginpupugngan!”
53 Salit paggawas niya didto, ginpalibotan hiya han mga eskriba ngan mga Pariseo basi tarhugon ngan damu gud an ira iginpakiana ha iya,
54 kay nagbibinantay hira nga makayakan hiya hin magagamit nira kontra ha iya.
Mga footnote
^ Ginagamit ini ha pagtakos hin mga lugas sugad han trigo.
^ O “sinsero; nakapukos.”
^ Karuyag sidngon, paglimpyo ha iya kalugaringon uyon ha kustomre.
^ Tanom nga pantambal ngan panakot ha pagkaon.
^ O “handumanan nga lubnganan.” Kitaa ha Glossary.
