Lucas 22:1-71
22 Hirani na an Piyesta han Tinapay nga Waray Libadura, an tinatawag nga Paskua.
2 An punoan nga mga saserdote ngan an mga eskriba nagbiniling hin maopay nga paagi ha pagpatay kan Jesus, pero nahahadlok hira ha mga tawo.
3 Katapos gin-impluwensyahan ni Satanas hi Judas Iscariote, nga usa han 12 nga apostol,
4 ngan kinadto hiya ngan nakiistorya ha punoan nga mga saserdote pati ha mga kapitan han templo kon ano an maopay nga paagi ha pag-aresto kan Jesus.
5 Nalipay hira ngan nagkauruyon nga tagan hiya hin silber nga kwarta.
6 Salit naruyag hi Judas, ngan namiling hiya hin maopay nga higayon ha pagtraydor kan Jesus nga waray mga tawo ha palibot.
7 Inabot na an adlaw han piyesta han tinapay nga waray libadura, diin ighahalad an hayop para ha Paskua.
8 Ginsugo ni Jesus hira Pedro ngan Juan: “Lakat kamo ngan pag-andam para ha Paskua basi mangaon kita.”
9 Nagpakiana hira: “Diin mo karuyag nga iandam namon ito?”
10 Binaton hiya: “Pagsulod niyo ha syudad, tatapoon kamo hin lalaki nga may dara nga tibod hin tubig. Upod kamo ha iya ngadto ha balay nga iya susudlan.
11 Ngan sidnga an tagbalay, ‘An Magturutdo nasiring ha imo: “Hain an kwarto para ha bisita nga akon kakaonan para han panihapon ha Paskua upod an akon mga disipulo?” ’
12 Ipapakita niya ha iyo an daku nga kwarto ha igbaw nga nakaandam na. Pag-andam kamo didto.”
13 Salit linakat hira ngan nakita nira ito sugad la han ginsiring ha ira ni Jesus, ngan nag-andam hira para ha Paskua.
14 Pag-abot han oras, liningkod hiya ngan an mga apostol ha may lamesa.
15 Ngan nagsiring hiya ha ira: “Naghingyap gud ako nga kumaon upod niyo hini nga panihapon ha Paskua antes ako mag-antos,
16 kay susumatan ko kamo: Diri na ako makaon utro hini tubtob nga matuman ini ha Ginhadian han Dios.”
17 Ngan pagtagi ha iya hin kopa, nag-ampo hiya ngan nagsiring: “Karawata niyo ini ngan sadang uminom an kada usa ha iyo,
18 kay susumatan ko kamo: Tikang yana diri na ako mainom hin bino tubtob nga umabot an Ginhadian han Dios.”
19 Kinuha liwat hi Jesus hin tinapay, nag-ampo, gintipik-tipik ito ngan iginhatag ha ira, ngan nagsiring: “Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.”
20 Sugad man, katapos nira manihapon, ginkuha niya an kopa ngan nagsiring: “Ini nga kopa nagsisimbolo han bag-o nga kasabotan nga ginhimo pinaagi han akon dugo nga igpapaagay para ha iyo.
21 “Pero kitaa! an magtatraydor ha akon aanhi kaupod ko ha lamesa.
22 An Anak han tawo mabaya sumala han igintagna; pero kairo hito nga tawo nga magtatraydor ha iya!”
23 Salit nag-iristorya hira kon hin-o gud ha ira an magbubuhat hito.
24 Pero nagdiskusyon liwat hira kon hin-o ha ira an may gidadakui nga awtoridad.
25 Kondi nagsiring hiya ha ira: “An mga hadi han mga nasud nagpapakaagaron ha katawohan, ngan an mga may awtoridad ha ira gintatawag nga Pilantropo.*
26 Pero diri kamo magin sugad hito. Kondi an may gidadakui nga awtoridad ha iyo magin sugad han gimanghuri, ngan an usa nga nangunguna magin sugad hin nagsiserbi.
27 Kay hin-o an mas daku an awtoridad, an nalingkod ha lamesa o an nagsiserbi? Diri ba an nalingkod ha lamesa? Kondi ako, pariho han usa nga nagsiserbi ha iyo.
28 “Pero kamo an nagpabilin nga kaupod ko ha akon mga kasakitan,
29 ngan naghihimo ako hin kasabotan ha iyo, sugad la nga an akon Amay naghimo hin kasabotan ha akon, para ha usa nga Ginhadian,
30 basi kumaon ngan uminom kamo ha lamesa ha akon Ginhadian ngan lumingkod ha mga trono basi hukman an 12 nga tribo han Israel.
31 “Simon, Simon, pamati! nagsiring hi Satanas nga karuyag niya ag-agon kamo sugad hin trigo.
32 Pero nangamuyo ako para ha imo nga diri magluya an imo pagtoo, ngan katapos mo magbasol, parig-ona an imo kabugtoan.”
33 Ngan nagsiring hi Simon: “Ginoo, andam ako umupod ha imo ha prisohan ngan ha kamatayon.”
34 Pero nagsiring hi Jesus: “Susumatan ko ikaw, Pedro, antes tumugaok an manok yana nga adlaw, igninigar mo ako hin tulo ka beses.”
35 Nagsiring liwat hiya ha ira: “Han ginsidngan ko kamo nga diri magdara hin supot han kwarta ngan surudlan han pagkaon ngan hin sandalyas, waray kamo makulangi hin bisan ano, diri ba? Binaton hira: “Waray!”
36 Ngan nagsiring hiya ha ira: “Pero yana an may supot han kwarta magdara hito, sugad man hin surudlan han pagkaon, ngan an waray espada magbaligya han iya pantungbaw nga panapton ngan pumalit hin usa.
37 Kay susumatan ko kamo nga kinahanglan matuman ha akon ini nga iginsurat, ‘Ngan gintagad hiya nga kaupod han mga matinalapason.’ Kay an ginsurat mahitungod ha akon natutuman na.”
38 Ngan nagsiring hira: “Ginoo, kitaa! may duha nga espada didi.” Binaton hiya: “Puydi na ito.”
39 Paggawas niya, kinadto hiya ha Bukid han mga Olibo sugad han iya nabatasan, ngan inupod liwat an mga disipulo.
40 Pag-abot didto, nagsiring hiya ha ira: “Padayon nga mag-ampo kamo basi diri kamo madara han pagsulay.”
41 Kinadto hiya ha uruunhan* ngan linuhod basi mag-ampo:
42 “Amay ko, kon karuyag mo, alayon kuhaa ha akon ini nga kopa. Pero diri an akon kaburut-on an matutuman kondi an imo.”
43 Ngan usa nga anghel tikang ha langit an nagpakita kan Jesus ngan nagparig-on ha iya.
44 Pero han duro na an iya kasakit, mas naniguro gud hiya pag-inampo, ngan an iya balhas nagin sugad hin dugo nga nanunuro ha tuna.
45 Katapos niya mag-ampo, kinadto hiya ha mga disipulo ngan naabtan niya nga nangangaturog hira kay naguol tungod han duro nga kasubo,
46 ngan nagsiring hiya ha ira: “Kay ano nga nangangaturog kamo? Buhát kamo ngan padayon nga mag-ampo basi diri kamo madara han pagsulay.”
47 Han nagyayakan pa hiya, kitaa! inabot an mga tawo ngan nag-uuna ha ira hi Judas nga usa han 12 nga apostol. Dinaop hiya kan Jesus basi harokan hiya.
48 Pero hi Jesus nagsiring ha iya: “Judas, gintatraydoran mo ba an Anak han tawo pinaagi hin harok?”
49 Pakakita han mga nakapalibot kan Jesus han mahitatabo, nagsiring hira: “Ginoo, maninigbas ba kami pinaagi hin espada?”
50 Gintigbas gud han usa ha ira an uripon han hitaas nga saserdote salit napalong an too nga talinga.
51 Pero binaton hi Jesus: “Husto na.” Ginkaptan niya an talinga han uripon ngan gintambal hiya.
52 Katapos nagsiring hi Jesus ha punoan nga mga saserdote, mga kapitan han templo ngan katigurangan nga kinadto basi dakpon hiya: “Kinanhi ba kamo kontra ha akon nga baga hin kawatan ako, nga nagdara pa kamo hin mga espada ngan mga ibaralbag?
53 Han kaupod ako niyo kada adlaw ha templo waray ako niyo arestoha. Pero oras niyo yana ngan han usa nga may awtoridad han kasisidman.”
54 Katapos ira gin-aresto hiya ngan gindara ha balay han hitaas nga saserdote, pero nagsinunod hi Pedro.
55 Han nagharing hira ha butnga han bungsaran ngan urupod nga nangalingkod, hi Pedro liningkod upod nira.
56 Pero an surugoon nga babaye nakakita ha iya nga nalingkod ha nalalamragan han kalayo ngan ginkinita hiya, katapos nagsiring: “Kaupod liwat niya ini nga tawo.”
57 Pero nagnigar hi Pedro: “Diri ko hiya kilala, Babaye.”
58 Waray pag-iha, nakita hiya han usa pa nga tawo nga nagsiring: “Usa ka liwat ha ira.” Pero nagsiring hi Pedro: “Diri.”
59 Paglabay hin usa ka oras, usa pa nga tawo an nag-insister: “Sigurado nga kaupod niya ini nga tawo kay taga-Galilea hiya!”
60 Pero nagsiring hi Pedro: “Diri ako maaram han imo ginyiyinakan.” Samtang nagyayakan pa hiya, tinugaok an manok.
61 Liningi an Ginoo ngan ginkita hi Pedro, ngan nahinumdoman niya an ginsiring ha iya han Ginoo: “Antes tumugaok an manok yana nga adlaw, igninigar mo ako hin tulo ka beses.”
62 Katapos ginawas hi Pedro ngan nagtangis tungod han duro nga kasubo.
63 Katapos, hi Jesus ginhimo nga pataraw-an ngan ginsuntok han mga tawo nga nagbabantay ha iya.
64 Kahuman nira tahoban an iya nawong, nagsiring hira: “Kon propeta ka, tigoha, hin-o an nagsuntok ha imo?”
65 Ngan damu pa an ira ginyinakan ha pagpasipara ha iya.
66 Pagkaaga, nagkatirok an katigurangan, punoan nga mga saserdote ngan mga eskriba. Gindara hiya ha ira katirokan han Sanhedrin,* ngan nagsiring hira:
67 “Kon ikaw an Kristo, sumati kami.” Pero binaton hiya: “Bisan kon sumatan ko kamo, diri gud kamo matoo.
68 Ngan kon pakianhan ko kamo, diri gud kamo mabaton.
69 Pero tikang yana, an Anak han tawo malingkod ha too han gamhanan nga Dios.”
70 Tungod hini, hira ngatanan nagpakiana: “Kon sugad, ikaw ba an Anak han Dios?” Binaton hiya: “Kamo mismo an nasiring nga ako.”
71 Hira nagsiring: “Kay ano nga magkikinahanglan pa kita hin testigo? Nabatian naton mismo an iya ginsiring.”
Mga footnote
^ Dungganon nga titulo para ha mga tawo nga mabinuligon ha iba.
^ O “mga usa ka paglabog hin bato” an distansya.
^ Kitaa an footnote ha Mat 26:59.
