Lucas 1:1-80
1 Damu an nangalimbasog pagsurat mahitungod han ngatanan nga nahitabo nga aton liwat gintotoohan.
2 Iginsumat liwat ini ha aton han mga testigo nga nakakita ngan han mga parasamwak han mensahe han Dios.
3 Salit, tungod kay gin-usisa ko hin maopay ini ngatanan tikang ha tinikangan, nagdesisyon liwat ako nga magsurat ha imo, harangdon gud nga Teofilo, mahitungod hini sumala ha pagkasunod-sunod,
4 basi hibaroan mo nga masasarigan gud an mga igintutdo ha imo.
5 Ha panahon ni Herodes nga hadi han Judea, may saserdote ha grupo ni Abias nga Sakarias an ngaran, ngan hi Elizabeth an iya asawa, nga usa han kababayin-an nga anak ni Aaron.
6 Ini nga mag-asawa matadong ha pagkita han Dios kay nagkikinabuhi* hira nga waray ikasaway uyon ha ngatanan nga sugo ngan balaud ni Jehova.
7 Kondi waray hira anak kay baog hi Elizabeth, ngan mga lagas na hira.
8 Han turno na han grupo ni Sakarias, hiya an gintokahan nga magin saserdote ha atubangan han Dios.
9 Uyon ha kustomre han pagkasaserdote, turno niya nga maghalad hin insenso pagsulod niya ha santuaryo ni Jehova,
10 ngan an ngatanan nga tawo nag-iinampo ha gawas ha oras han paghalad hin insenso.
11 Nagpakita ha iya an anghel ni Jehova nga natindog ha too han halaran han insenso.
12 Kondi pakakita hito ni Sakarias, nalisang hiya ngan nahadlok.
13 Pero an anghel nagsiring ha iya: “Ayaw kahadlok, Sakarias, kay ginpamatian han Dios an imo pangamuyo, ngan hi Elizabeth nga imo asawa mag-aanak hin lalaki, ngan Juan an imo igngangaran ha iya.
14 Malilipay ka ngan magrarayhak, ngan damu an malilipay tungod han iya katawo,
15 kay magigin harangdon hiya ha atubangan ni Jehova. Kondi kinahanglan diri gud hiya uminom hin bino ngan mapintas nga irimnon. Mapupuno hiya han baraan nga espiritu tikang gud ha katawo,*
16 ngan damu han mga anak ni Israel an iya pababalikon kan Jehova nga ira Dios.
17 Hi Juan nga may kadasig ngan gahum pariho kan Elias mag-uuna liwat ha Iya, basi an mga kasingkasing han mga amay magin pariho han mga anak ngan an mga matinalapason magkaada praktikal nga kinaadman han mga matadong, basi ig-andam an katawohan para kan Jehova.”
18 Nagsiring hi Sakarias ha anghel: “Paonan-o ini mahitatabo? Lagas na ako ngan an akon asawa.”
19 Binaton an anghel: “Ako hi Gabriel, nga natindog hirani ha Dios, ngan ginsugo ako nga makiistorya ha imo ngan ipasamwak ha imo an maopay nga sumat mahitungod hini.
20 Pero diri ka makakatingog ngan makakayakan tubtob ha adlaw nga mahitabo ini, kay waray ka tumoo ha akon mga pulong nga matutuman ha itinanda nga panahon.”
21 An mga tawo padayon nga naghinulat kan Sakarias, ngan nanhipausa hira nga nag-iniha hiya ha santuaryo.
22 Kondi paggawas niya, waray na hiya pakayakan ha ira, ngan nasabtan nira nga nakakita hiya hin urusahon ha santuaryo. Nagsininyas hiya ha ira kay diri hiya nakakayakan.
23 Katapos han iya baraan nga pag-alagad* hin pipira ka adlaw, inuli hiya.
24 Kondi paglabay han mga adlaw, nagburod an iya asawa nga hi Elizabeth, ngan waray hiya gumawas ha balay ha sulod hin lima ka bulan. Nagsiring hiya:
25 “Ginbubuhat ini ni Jehova ha akon yana basi ipakita an iya pagtagad ha akon ngan kuhaon an akon kaarawdan ha mga tawo.”
26 Ha ikaunom ka bulan na han iya pagburod, ginsugo han Dios an anghel nga hi Gabriel nga kumadto ha syudad han Nazaret ha Galilea,
27 ngadto ha usa nga birhen nga hi Maria nga nakigsabot na ha pagpakasal kan Jose nga tulin ni David.
28 Pag-abot ni Gabriel, nagsiring hiya: “Maopay nga adlaw Maria, nalilipay gud ha imo hi Jehova, ngan ginbibendisyonan ka.”
29 Kondi nagupong gud hiya hito nga ginsiring, ngan nangalimbasog hiya nga masabtan ito nga mga pulong.
30 Salit nagsiring an anghel ha iya: “Ayaw kahadlok Maria, kay nalilipay gud ha imo an Dios.
31 Kitaa! Magbuburod ka ngan manganganak hin lalaki, ngan Jesus an imo igngangaran ha iya.
32 Magigin harangdon hiya ngan tatawagon nga Anak han Gihitaasi, ngan ihahatag ha iya ni Jehova nga Dios an trono ni David nga iya amay,
33 ngan magmamando hiya ha kadayonan sugad nga Hadi ha panimalay ni Jacob, ngan waray kataposan an iya Ginhadian.”
34 Kondi hi Maria nagsiring ha anghel: “Paonan-o ini mahitatabo nga waray man ako bana?”
35 Binaton an anghel: “An baraan nga espiritu maabot ha imo ngan an gahum han Gihitaasi malandong ha imo. Tungod hito, ini nga matatawo tatawagon nga baraan ngan Anak han Dios.
36 An imo paryente nga hi Elizabeth unom ka bulan na yana nga burod, bisan kon lagas na ngan nasiring an mga tawo nga baog hiya,
37 kay waray kapahayagan han Dios nga diri matutuman.”
38 Salit nagsiring hi Maria: “Iini ako, an kan Jehova uripon nga babaye! Matuman unta ha akon an imo ginsiring.” Ngan binaya ha iya an anghel.
39 Katapos, nag-andam hi Maria ngan kinadto dayon ha bukiron nga distrito ha usa nga syudad han Juda,
40 ngan sinulod hiya ha balay ni Sakarias ngan ginkumusta hi Elizabeth.
41 Pakabati ni Elizabeth han pangumusta ni Maria, nagkiwa an bata ha iya tiyan, ngan napuno hi Elizabeth han baraan nga espiritu
42 ngan nagsinggit: “Darayawon ka ha ngatanan nga kababayin-an, ngan darayawon an bunga han imo tiyan!
43 Kay ano nga nagkaada ako hini nga pribilehiyo nga bisitahon han nanay han akon Ginoo?
44 Kay pakabati ko han imo pangumusta, an bata ha akon tiyan nagkiwa tungod han daku nga kalipay.
45 Malipayon liwat hiya nga natoo, kay bug-os nga matutuman an ginsiring ha iya ni Jehova.”
46 Nagsiring hi Maria: “Gindadayaw ko hi Jehova,
47 ngan diri mapugngan han akon kasingkasing an daku nga kalipay ha Dios nga akon Paratalwas,
48 tungod kay nakita niya an ubos nga kahimtang han iya uripon nga babaye. Ngan tikang yana tatawagon ako nga malipayon han ngatanan nga henerasyon
49 kay an gamhanan nga Dios nagbubuhat hin mga urusahon para ha akon, ngan baraan an iya ngaran.
50 Ha ngatanan nga panahon nagpapakita hiya hin kalooy ha mga nahahadlok ha iya.
51 Naghihimo hiya hin gamhanan nga mga buhat pinaagi han iya butkon, ngan iya ginpapapatlaag ha higrayo nga lugar an mga mapahitas-on an kasingkasing.
52 Iya ginpapalusad tikang ha mga trono an gamhanan nga mga tawo ngan ginpapahitaas an mga ubos,
53 iya ginbubusog hin mag-opay nga butang an mga nagugutom, ngan ginpapabaya nga waray dara an mga rikohanon.
54 Ginbubuligan niya an Israel nga iya surugoon basi ipakita an kalooy ha kadayonan,
55 sugad la han iya ginsiring ha aton kaapoy-apoyan, kan Abraham ngan ha iya katulinan.”
56 Ngan hi Maria inukoy kanda Elizabeth hin tulo ka bulan, katapos inuli hiya ha ira balay.
57 Inabot an panahon nga nagbatî hi Elizabeth, ngan nanganak hiya hin lalaki.
58 Ngan hinbatian han iya mga amyaw ngan mga paryente nga hi Jehova nagpakita hin daku nga kalooy ha iya, ngan nagkalipay hira upod niya.
59 Han ikawalo ka adlaw, ginturi nira an bata, ngan an ira igngangaran unta ha iya pariho han ngaran han iya tatay nga hi Sakarias.
60 Kondi nagsiring an nanay han bata: “Diri puydi! Juan an igngangaran ha iya.”
61 Tungod hito, nagsiring hira ha iya: “Waray bisan usa ha imo mga paryente nga sugad hito an ngaran.”
62 Salit pinaagi hin pagsinyas, ira ginpakianhan an tatay han bata kon ano an karuyag niya igngaran ha iya.
63 Nangaro hiya hin gutiay nga tabla ngan ginsuratan ito: “Juan an iya ngaran.” Tungod hito, nahipausa hira ngatanan.
64 Nagkiwa dayon an iya dila ngan nakayakan na hiya, ngan iya gindayaw an Dios.
65 Nahadlok an ngatanan nga ira kahigrani, ngan gin-iristoryahan ini ha bug-os nga bukiron nga distrito han Judea,
66 ngan gintipigan ito ha kasingkasing han ngatanan nga nakabati, ngan nagsiring: “Magigin ano gud ba ini nga bata?” Kay an gahum ni Jehova aada ha iya.
67 Ngan an iya tatay nga hi Sakarias napuno han baraan nga espiritu ngan nagtagna:
68 “Darayawon hi Jehova, an Dios han Israel, kay iya ginkaloy-an an iya katawohan ngan gintagan hira hin katalwasan.
69 Ngan naghatag hiya hin sungay han katalwasan para ha aton ha panimalay ni David nga iya surugoon,
70 sugad la han iya ginyakan pinaagi ha baba han baraan nga mga propeta ha kadaan nga panahon.
71 Nagyakan hiya mahitungod han pagtalwas ha aton tikang ha mga kaaway ngan ha ngatanan nga nasisina gud ha aton,
72 basi ipakita an kalooy ha aton tungod han iya saad ha aton kaapoy-apoyan ngan ipakita nga nahinunumdom hiya han iya baraan nga kasabotan
73 nga iya iginsaad kan Abraham nga aton kaapoy-apoyan.
74 Ngan katapos talwason kita tikang ha mga kaaway, ihahatag ha aton an pribilehiyo han sagrado nga pag-alagad ha iya nga waray kahadlok,
75 nga may pagkamaunungon ngan pagkamatadong ha iya atubangan ha ngatanan naton nga adlaw.
76 Kondi ikaw, anak ko, tatawagon ka nga propeta han Gihitaasi, kay mag-uuna ka kan Jehova basi iandam an iya mga dalan,
77 basi isumat ha iya katawohan an mensahe han katalwasan pinaagi han pagpasaylo han ira mga sala
78 tungod han mahigugmaon nga kalooy han aton Dios. Pinaagi hini nga kalooy, makikita naton an kalamrag tikang ha langit sugad han pagsirang han adlaw
79 basi lamragan an nangangalingkod ha kasisidman ngan an nalalandongan han kamatayon, ngan basi malampuson nga giyahan an aton mga tiil ha dalan han kamurayawan.”
80 An bata padayon nga nagtubo ngan nagtikakusog ha espiritu, ngan inukoy hiya ha kamingawan tubtob ha adlaw nga nagpakita hiya hin dayag ha Israel.
Mga footnote
^ Ha literal, “naglalakat nga waray ikasaway.”
^ O “ha tiyan han iya nanay.”
^ O “pagserbisyo ha publiko.”
