Lucas 15:1-32
15 An ngatanan nga parasukot hin buhis ngan an magpakasasala hinirani kan Jesus basi mamati.
2 Tungod hito, an mga Pariseo ngan mga eskriba nagrineklamo: “Gin-aabiabi hini nga tawo an magpakasasala ngan nakaon hiya upod nira.”
3 Katapos, nagsaysay hiya ha ira hini nga ilustrasyon:
4 “Kon an bisan hin-o ha iyo nga may 100 nga karnero mawad-an hin usa, diri ba babayaan niya an 99 ha kamingawan ngan bibilngon ito tubtob nga hiagian?
5 Ngan kon hiagian niya ito, papas-anon niya ito ngan maglilipay.
6 Pag-uli niya, tatawagon niya an iya kasangkayan ngan mga amyaw ngan masiring ha ira, ‘Pagkalipay kita, kay hin-agian ko na an akon karnero nga nawara.’
7 Susumatan ko kamo, mas daku an kalipay ha langit tungod ha usa nga makasasala nga nagbabasol kay ha 99 nga matadong nga diri kinahanglan magbasol.
8 “O kon an usa nga babaye nga may 10 ka drakma* nga sinselyo mawad-an hin usa, diri ba magdadagkot hiya hin lampara ngan maninilhig ha balay ngan pamimilngon ito hin maopay tubtob nga hiagian?
9 Ngan kon hiagian niya ito, tatawagon niya an iya kasangkayan nga kababayin-an ngan mga amyaw. Masiring hiya, ‘Pagkalipay kita, kay hin-agian ko na an akon drakma nga sinselyo nga nawara.’
10 Susumatan ko kamo, nagkakalipay an mga anghel han Dios tungod ha usa nga makasasala nga nagbabasol.”
11 Katapos nagsiring hiya: “May usa ka tawo nga may duha nga anak nga lalaki.
12 Ngan an manghod nagsiring ha iya amay, ‘Tatay, ihatag ha akon an akon bahín ha imo mga propyedad.’ Salit iya ginbahin ha ira an iya mga propyedad.
13 Waray pag-iha, gintirok han manghod an ngatanan nga iya gamit ngan kinadto ha hirayo nga nasud. Didto ginwaldas niya ha maraot nga pagkinabuhi an iya propyedad.
14 Han nagasto na niya an ngatanan, nagkaada duro nga gutom ha bug-os nga nasud, ngan nagkuri hiya.
15 Dinaop pa ngani hiya ha usa nga tuminungnong hito nga nasud ngan nagpirit nga tagan hiya hin trabaho. Salit iginpaataman ha iya an mga baboy ha uma.
16 Karuyag niya nga kaunon na la an ginkakaon han mga baboy, pero waray nahatag ha iya hin bisan ano.
17 “Han nakapamurubuot hiya, nagsiring hiya: ‘Abunda hin tinapay an damu nga trabahador ni Tatay, pero ako haros mamatay na dinhi han gutom!
18 Malakat ako ngan makadto kan Tatay. Masiring ako ha iya: “Tatay, nakasala ako ha Dios ha langit ngan ha imo.
19 Diri na ako angay tawagon nga imo anak. Himoa ako nga usa han imo mga trabahador.” ’
20 Salit linakat hiya ngan kinadto ha iya tatay. Han hirayo pa hiya, nakit-an hiya han iya tatay ngan nalooy ha iya. Dinalagan an iya tatay ngan mahigugmaon nga ginhangkopan ngan ginharokan hiya.
21 Katapos, nagsiring an anak, ‘Tatay, nakasala ako ha Dios ha langit ngan ha imo. Diri na ako angay tawagon nga imo anak. Himoa ako nga usa han imo mga trabahador.’
22 Pero nagsiring an tatay ha iya mga uripon, ‘Dagmita niyo! Kuha kamo han pinakamaopay nga bado ngan isul-ot ha iya. Sul-uti hin singsing an iya tudlo ngan hin sandalyas an iya mga tiil.
23 Dad-a nganhi an pinatambok nga nati nga baka, ihawa* niyo ito basi mangaon ngan magkalipay kita,
24 kay ini nga akon anak namatay ngan nabuhi; nawara hiya ngan naagian.’ Ngan nagkalipay hira.
25 “Hito nga panahon, an magurang nga anak nakadto ha uma. Pag-uli niya, han hirani na hiya ha balay, nabatian niya an musika ngan an sarayaw.
26 Salit gintawag niya an usa nga surugoon ngan ginpakianhan kon ano an nahitatabo.
27 Nagsiring an surugoon, ‘Inabot na an imo bugto, ngan an pinatambok nga nati nga baka iginpaihaw han imo tatay kay an imo bugto nakauli nga maopay an panlawas.’
28 Pero nangalas hiya ngan diniri pagsulod. Salit ginawas an iya tatay ngan ginhangyo hiya nga sumulod.
29 Nagsiring hiya ha iya tatay, ‘Damu ka tuig na nga nagsiserbi ako ha imo sugad hin uripon, ngan bisan makausa waray ko talapasa an imo sugo, pero waray mo pa gud ako hatagi hin nati nga kanding basi magkalipay kami han akon kasangkayan.
30 Kondi pagbalik hini nga imo anak nga nagwaldas han imo mga propyedad ha pakig-upod ha mga puta, gin-ihaw mo dayon para ha iya an pinatambok nga nati nga baka.’
31 Nagsiring an tatay, ‘Anak, pirme mo ako kaupod, ngan an ngatanan nga akon, imo liwat.
32 Pero kinahanglan magkalipay kita, kay an imo bugto namatay ngan nabuhi; nawara hiya ngan naagian.’ ”
