Lucas 13:1-35
13 Hito mismo nga oras may mga tawo didto nga nagsumat kan Jesus mahitungod han mga taga-Galilea nga ginpatay ni Pilato samtang naghahalad hira.
2 Salit nagsiring hiya ha ira: “Naghuhunahuna ba kamo nga ha ngatanan nga taga-Galilea, hira an pinakasalaan kay nahitabo ito ha ira?
3 Diri! Susumatan ko kamo, mahinunugad liwat kamo ngatanan ha ira kon diri kamo magbasol.
4 O naghuhunahuna ba kamo nga an 18 nga namatay tungod han karumpagi han torre ha Siloam mas makasasala kay ha iba nga mga tawo nga naukoy ha Jerusalem?
5 Diri! Susumatan ko kamo nga mamamatay liwat kamo ngatanan pariho ha ira kon diri kamo magbasol.”
6 Katapos, nagsaysay hiya hin ilustrasyon: “May usa ka tawo nga may igera ha iya uma, ngan kinadto hiya basi kitaon kon may bunga ito, pero waray hiya nakita.
7 Ngan ginsidngan niya an parauma, ‘Tulo ka tuig na nga nagkikinanhi ako basi kitaon kon may bunga na ini nga igera, kondi waray ako nakikita. Pudla ito! Kay ano nga kakaragan la hito an tuna?’
8 Binaton ha iya an parauma, ‘Agaron, pabay-i anay ito hini nga tuig tubtob nga maukaran ko an palibot hito ngan mabutangan hin abuno.
9 Katapos, kon magbunga ito, maopay. Pero kon diri, pudla ito.’ ”
10 Ha adlaw han Sabbath, nagtutdo hi Jesus ha usa han mga sinagoga didto.
11 May babaye didto nga 18 ka tuig na nga may sakit tungod kay hiya may maraot nga espiritu. Diri na gud hiya nakakatindog hin tadong.
12 Han nakita hiya ni Jesus, iya gintawag hiya ngan ginsidngan: “Babaye, talwas ka na ha imo sakit.”
13 Ginkaptan hiya ni Jesus ngan nakatindog dayon hiya hin tadong, ngan gindayaw niya an Dios.
14 Pero tungod kay nagtambal hi Jesus ha adlaw han Sabbath, nasina an punoan nga opisyal han sinagoga, salit ginsidngan niya an mga tawo: “May unom ka adlaw ha pagtrabaho, salit hito la nga mga adlaw kamo pagpatambal, diri ha adlaw han Sabbath.”
15 Kondi ginbaton hiya han Ginoo: “Mga hipokrito, diri ba ginbabadbaran niyo an toro o an asno ha kwadra ngan gintutugwayan ngadto ha maiinuman?
16 Diri ba angay liwat talwason ha adlaw han Sabbath ini nga babaye nga anak ni Abraham, nga gin-gapos ni Satanas hin 18 ka tuig na?”
17 Katapos niya igyakan ini, naawod an ngatanan nga nakontra ha iya, pero nalipay gud an mga tawo tungod han urusahon nga iya ginbuhat.
18 Salit nagsiring hiya: “Ano an kapariho han Ginhadian han Dios, ngan ha ano ko ito itatanding?
19 Pariho ito ha liso han mustasa nga igintanom han usa nga tawo ha iya hardin. Tinubo ito ngan nagin kahoy, ngan an katamsihan nahapon ha mga sanga hito.”
20 Ngan nagsiring utro hiya: “Ha ano ko itatanding an Ginhadian han Dios?
21 Pariho ito han libadura nga ginkuha han usa nga babaye ngan iginsalakot ha tulo ka takos* nga harina tubtob nga tinubo an bug-os nga minasa.”
22 Han tikadto hi Jesus ha Jerusalem, inagi hiya ha mga syudad ngan mga baryo basi manutdo ha mga tawo.
23 Ngan may lalaki nga nagpakiana ha iya: “Ginoo, gutiay la ba an matatalwas?” Nagsiring hiya ha ira:
24 “Paniguro gud kamo pagsulod ha haligot nga purtahan. Susumatan ko kamo, damu an mangangalimbasog pagsulod pero diri hira makakahimo.
25 Kay pagbuhát han tagbalay ngan pagtrangkahi han purtahan, aadto kamo natindog ha gawas ngan nagtutuktok ha purtahan, nasiring, ‘Ginoo, abrihi kami.’ Pero mabaton hiya ha iyo: ‘Diri ako maaram kon diin kamo tikang.’
26 Katapos masiring kamo, ‘Nangaon ngan nanginom kami kaupod mo, ngan nanutdo ka ha amon haluag nga kakalsadahan.’
27 Pero masiring hiya ha iyo, ‘Diri ako maaram kon diin kamo tikang. Iwas ha akon, kamo ngatanan nga magburuhat hin karaotan!’
28 Didto mananangis kamo ngan mangingigot an iyo mga ngipon, kon makita niyo ha Ginhadian han Dios hira Abraham, Isaac, Jacob, ngan an ngatanan nga propeta, pero kamo aadto ha gawas.
29 Magkakaabot liwat an mga tawo tikang ha este, weste, norte, ngan sur, ngan malingkod hira ha may lamesa ha Ginhadian han Dios.
30 Ngan may mga nauurhi nga mahiuuna, ngan may mga nahiuuna nga mauurhi.”
31 Hito mismo nga oras may inabot nga mga Pariseo nga nagsiring ha iya: “Gawas ngan iwas dinhi, kay karuyag ni Herodes nga patayon ka.”
32 Nagsiring hiya ha ira: “Kadto kamo ngan sumati ito nga garong, ‘Pamati! Nagpapagawas ako hin mga demonyo ngan nananambal yana pati buwas, ngan ha ikatulo ka adlaw matatapos ako.’
33 Pero kinahanglan magpadayon ako pagbiyahe yana, buwas, ngan ha sunod nga adlaw, kay an usa nga propeta diri puydi patayon ha gawas han Jerusalem.
34 Jerusalem, Jerusalem, an parapamatay han mga propeta ngan nagbabato han mga ginsugo ngada ha imo! Makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô* ha ilarom han iya mga pako, pero diri kamo naruruyag!
35 Kitaa! Babayaan han Dios an iyo balay. Susumatan ko kamo, diri na gud ako niyo makikita tubtob nga sumiring kamo: ‘Bendisyonan unta hiya nga napakanhi ha ngaran ni Jehova!’ ”
