Lucas 2:1-52
2 Hito nga panahon, nagsugo hi Cesar* Agusto nga magparehistro an ngatanan nga umurukoy ha tuna.
2 (Inin siyahan nga pagparehistro nahitabo han hi Quirinio an gobernador han Sirya),
3 ngan an ngatanan nga tawo nanguli ha syudad nga ira natawohan basi magparehistro.
4 Tungod kay hi Jose membro han panimalay ni David, tikang ha syudad han Nazaret ha Galilea, inuli liwat hiya ha Betlehem ha syudad ni David ha Judea.
5 Kinadto hiya basi magparehistro upod hi Maria nga iya asawa, nga hito nga panahon hirani na manganak.
6 Han nakadto na hira, nagbatî hi Maria.
7 Ngan igin-anak niya an iya suhag nga lalaki, ngan ginputos niya hin lampin ngan ginpahigda ha sabsaban kay waray na kwarto nga ira mauukyan.
8 Hito nga distrito, may mga paraataman liwat han karnero ha gawas nga nagbabantay han ira mga panon ha bug-os nga gab-i.
9 Tigda la nga nagpakita ha ira an anghel ni Jehova, ngan naglamrag an ira palibot tungod han himaya ni Jehova, salit nahadlok gud hira.
10 Pero nagsiring ha ira an anghel: “Ayaw kamo kahadlok! kay iginpapasamwak ko ha iyo an maopay nga sumat nga makakalipay gud ha ngatanan nga tawo,
11 tungod kay natawo yana ha syudad ni David an iyo Paratalwas, an Kristo nga Ginoo.
12 Ngan ini an pangirilal-an niyo ha iya: Makakakita kamo hin minasus-an nga ginputos hin lampin ngan nahigda ha sabsaban.”
13 Tigda nga inabot ngada ha anghel an damu pa gud nga langitnon nga kasundalohan nga nagdadayaw ha Dios ngan nasiring:
14 “Pagdayawon an Dios ha kahitas-an, ngan ha tuna kamurayawan para ha mga tawo nga iya nalilipayan.”
15 Salit pagbalik han mga anghel ngadto ha langit, an mga paraataman han karnero nag-iristorya: “Kadto dayon kita ha Betlehem, ngan kitaon naton ini nga hitabo nga iginpahibaro ha aton ni Jehova.”
16 Kinadto dayon hira, ngan nakita hira Maria ngan Jose pati an minasus-an nga nahigda ha sabsaban.
17 Pakakita nira ha minasus-an, iginsumat nira an iginpahibaro ha ira mahitungod ha iya.
18 Ngan nahipausa an ngatanan nga nakabati ha iginsumat han mga paraataman han karnero,
19 pero gintipigan ni Maria ito ngatanan nga sumat, ngan ginpamalandong niya an kahulogan hito.
20 Katapos, binalik an mga paraataman ngadto ha ira mga karnero, samtang ginhihimaya ngan gindadayaw nira an Dios tungod han ngatanan nga ira nabatian ngan nakit-an, sumala han iginsumat ha ira.
21 Paglabay hin walo ka adlaw, han panahon na basi turion an bata, Jesus an iginngaran ha iya, an ngaran nga ginsiring han anghel antes hiya igburod.
22 Pag-abot liwat han panahon ha pagputli ha ira sumala ha Balaud ni Moises, ira gindara hiya ngadto ha Jerusalem basi ipresentar kan Jehova,
23 sugad han iginsurat ha Balaud ni Jehova: “An tagsa nga suhag nga lalaki* tatawagon nga baraan para kan Jehova.”
24 Ngan naghalad hira uyon ha ginsiring ha Balaud ni Jehova: “Magpadis nga tukmo o duha nga gudtiay pa nga sarapati.”
25 Ha Jerusalem may usa nga lalaki nga Simeon an ngaran, matadong hiya ngan may kahadlok ha Dios. Naghuhulat hiya han panahon han pagliaw han Dios ha Israel, ngan ginigiyahan hiya han baraan nga espiritu.
26 Dugang pa, iginpahayag ha iya han Dios pinaagi han baraan nga espiritu nga diri hiya mamamatay tubtob nga diri pa niya makita an Kristo nga ginsugo ni Jehova.
27 Pinaagi han giya han espiritu, kinadto hiya ha templo, ngan han an bata nga hi Jesus gindara ngadto han iya mga kag-anak uyon ha sugo han Balaud,
28 ginkugos niya an bata, gindayaw an Dios ngan nagsiring:
29 “Soberano nga Ginoo, an imo uripon puydi na yana mamatay nga mamurayawon sumala ha imo ginsiring,
30 kay nakita ko na an imo gagamiton ha pagtalwas
31 nga imo igintagana basi makita han ngatanan nga katawohan.
32 Hiya an kalamrag nga magkukuha han kasisidman nga nalambong ha mga nasud ngan hiya an himaya han Israel nga imo katawohan.”
33 Ngan an mga kag-anak han bata nahipausa ha mga ginyakan ni Simeon mahitungod han bata.
34 Gindayaw liwat hira ni Simeon, ngan nagsiring kan Maria, an nanay han bata: “Kitaa! Hiya an magigin hinungdan han kapukan ngan pagbangon utro han damu ha Israel ngan magigin tigaman nga pagtatamayon
35 (oo, an imo kalag bubun-on hin hilaba nga espada), basi mahibuhayhag an mga pangatadongan han damu nga kasingkasing.”
36 Hito nga panahon nakadto an propetisa nga hi Ana, nga anak ni Panuel ha tribo ni Aser. (Lagas na ini nga babaye ngan pito ka tuig la nga nakaupod an iya bana tikang han ira pag-asawa.
37 Balo hiya ngan 84 anyos na.) Diri gud hiya napalya ha sagrado nga pag-alagad ha templo ha adlaw ngan gab-i, nagpupuasa ngan nangangamuyo.
38 Hito mismo nga oras, dinaop hiya ha ira ngan nagpasalamat ha Dios ngan nag-inistorya mahitungod han bata ha ngatanan nga naghuhulat han katalwasan han Jerusalem.
39 Salit han natuman na nira* an ngatanan uyon ha Balaud ni Jehova, binalik hira ha ira syudad ha Nazaret ha Galilea.
40 Ngan an bata padayon nga nagtubo ngan nagtikakusog, nag-uswag an kinaadman ngan padayon nga nalipayan han Dios.
41 An iya mga kag-anak napakadto ha Jerusalem kada tuig para ha piyesta han Paskua.*
42 Han 12 anyos na hiya, kinadto hira ha pagselebrar han piyesta sugad han nahiaraan na.
43 Katapos han mga adlaw han piyesta, han tipauli na hira, an mga kag-anak han bata nga hi Jesus waray igsarabot nga nabayaan hiya ha Jerusalem.
44 Kahuna nira nga kaupod hiya ha biyahe. Han usa ka adlaw na hira nga nagbibinaktas, ginbiling nira hiya ha ira mga paryente ngan kasangkayan.
45 Pero waray nira hiya makita, salit binalik hira ha Jerusalem ngan ginbiniling gud hiya.
46 Paglabay hin tulo ka adlaw, nakit-an nira hiya ha templo nga nalingkod ha butnga han mga magturutdo, nagpipinamati ngan nagpipinakiana ha ira.
47 Pero an ngatanan nga namamati ha iya nahipausa gud ha kahilarom han iya pagsabot ngan ha iya mga baton.
48 Han nakita hiya han iya mga kag-anak, nahipausa hira ngan an iya nanay nagsiring: “Anak, kay ano nga ginbuhat mo ini ha amon? Nabaraka gud kami ni imo tatay ngan nagpinamiling kami ha imo.”
49 Pero nagsiring hiya: “Kay ano nga iyo ako ginbiniling? Diri ba kamo maaram nga kinahanglan aanhi ako ha balay han akon Amay?”
50 Kondi waray hira makasabot hito nga iya ginsiring.
51 Inupod hiya ha ira ngadto ha Nazaret, ngan padayon nga nagpasakop ha ira. Ngan an ngatanan nga iya ginsiring gintipigan gud han iya nanay.
52 Padayon nga nagtubo hi Jesus ngan nag-uswag an kinaadman, ngan nalipayan gud han Dios ngan han mga tawo.
Mga footnote
^ O “Emperador han Roma.”
^ Ha literal, “an tagsa nga lalaki nga nag-abri han tagoangkan.”
^ Karuyag sidngon, “hira Jose ngan Maria.”
^ Kitaa an “Paskua” ha Glossary.
