Lucas 12:1-59

12  Hito nga panahon, han nagkakatirok an damu ka yukot nga tawo nga tungod hito nagkakatamaktamakay hira, nagsiring hi Jesus ha mga disipulo: “Pag-ikmat kamo ha libadura han mga Pariseo, nga amo an pagkahipokrito. 2  Pero waray igintago hin maopay nga diri mabubuhayhag, ngan waray sekreto nga diri mahibabaroan. 3  Salit anoman an iyo sidngon ha kasisidman mababatian ha kalamrag, ngan an iyo ighuring ha pribado nga mga kwarto ipapasamwak tikang ha atop han mga balay. 4  Dugang pa, susumatan ko kamo mga kasangkayan: Ayaw kamo kahadlok ha mga nakakamatay han lawas ngan waray na nahihimo katapos hito. 5  Kondi isasaysay ko ha iyo kon hin-o an angay niyo kahadlokan: Kahadluki Hiya nga may awtoridad diri la ha pagpatay, kondi ha paglabog liwat ngadto ha Gehenna.* Oo, susumatan ko kamo, kahadluki niyo Hiya. 6  An lima nga maya iginbabaligya hin duha nga sinselyo nga gutiay la an kantidad, diri ba? Pero bisan usa ha ira diri hinngangalimtan han Dios. 7  Kondi maaram hiya bisan han kadamu han iyo buhok ha ulo. Ayaw kahadlok, mas importante kamo kay ha damu nga maya. 8  “Salit susumatan ko kamo: An bisan hin-o nga nagpapakilala ha atubangan han mga tawo nga kahiusa ako niya, kikilalahon liwat hiya han Anak han tawo ha atubangan han mga anghel han Dios nga hiya kahiusa niya. 9  Pero an nagsasalikway ha akon ha atubangan han mga tawo isasalikway liwat ha atubangan han mga anghel han Dios. 10  Ngan an bisan hin-o nga nagyayakan kontra ha Anak han tawo papasayloon, kondi an nagpapasipara ha baraan nga espiritu diri gud papasayloon. 11  Kon dad-on kamo ha atubangan han nagkakatirok nga mga tawo, mga opisyal han gobyerno, ngan mga may awtoridad, ayaw kamo kabaraka kon paonan-o kamo magyayakan o kon ano an iyo igyayakan sugad nga depensa o kon ano an iyo isisiring, 12  kay an baraan nga espiritu magtututdo kon ano an iyo isisiring hito nga oras.” 13  Katapos usa han mga tawo an nagsiring ha iya: “Magturutdo, sugoa an akon bugto nga bahinan ako han panurundon.” 14  Hi Jesus binaton: “Hin-o an nagpili ha akon nga hukom o paragtuhay niyo nga duha?” 15  Katapos nagsiring hiya ha ira: “Padayon nga magbantay kamo ngan mag-ikmat kontra han ngatanan nga klase hin kahakog, kay bisan kon damu an panag-iya han usa nga tawo, an iya kinabuhi diri nadepende ha iya mga gintatag-iya.” 16  Tungod hito, naghatag hiya ha ira hin ilustrasyon: “Damu an ani han uma han usa nga riko nga tawo. 17  Salit ha iya kasingkasing nangatadongan hiya, ‘Yana nga waray na ako nabubutangan han akon mga inani, ano an akon bubuhaton?’ 18  Katapos nagsiring hiya, ‘Ini an akon bubuhaton: Rurub-on ko an akon mga bodega ngan magtitindog hin durodagku, ngan didto ko ibubutang an ngatanan nga inani ngan mag-opay nga butang, 19  ngan masiring ako ha akon kalag: “Kalag, damu na an mag-opay nga butang nga imo natirok para ha tiarabot nga katuigan; salit pahuway, kaon, inom, ngan paglipay.” ’ 20  Pero an Dios nagsiring ha iya, ‘Ikaw nga lurong, yana nga gab-i kukuhaon nira an imo kalag.* Hin-o an magtatag-iya han imo mga gintirok?’ 21  Ito an nahitatabo ha tawo nga nagtitirok hin bahandi para ha iya kalugaringon kondi diri riko ha Dios.” 22  Katapos nagsiring hiya ha mga disipulo: “Tungod hini, susumatan ko kamo: Ayaw na kamo kabaraka han iyo kalag kon ano an iyo kakaunon o han iyo lawas kon ano an iyo igbabado. 23  Kay an kalag mas importante kay ha pagkaon ngan an lawas kay ha bado. 24  Kitaa an mga uwak. Diri hira nagsasabwag o nag-aani ngan waray hira mga kamalig o bodega. Pero ginpapakaon hira han Dios. Diri ba mas importante gud kamo kay ha katamsihan? 25  Hin-o ha iyo an makakadugang hin bisan la gutiay ha kahilaba* han iya kinabuhi tungod ha kabaraka? 26  Salit, kon diri niyo mahihimo an pinakagutiay nga butang, kay ano nga nababaraka kamo ha iba pa nga butang? 27  Kitaa kon paonan-o natubo an mga bukad, diri ito nagtatrabaho o nagtatahi hin bado, pero susumatan ko kamo: Hi Solomon, bisan kon harangdon, waray makagbado hin sugad kaopay han mga bukad. 28  Kon ginbabadoan han Dios an mga tanom ha kapatagan nga aanhi yana kondi buwas ilalabog ha kalayo, mas pagbabadoan gud kamo, kamo nga gutiay an pagtoo! 29  Salit ayaw na kamo pagpinamiling han iyo kakaunon ngan iinumon, ngan ayaw na kamo kabaraka hin sobra, 30  kay ini ngatanan an gintitinguha gud han mga tawo ha kalibotan, pero maaram an iyo Amay nga ginkikinahanglan niyo ini. 31  Lugod, padayon nga pamilnga an iya Ginhadian, ngan ini nga mga butang idudugang ha iyo. 32  “Ayaw kahadlok, gutiay nga panon, kay an Ginhadian iginhatag ha iyo han iyo Amay. 33  Ibaligya an iyo mga panag-iya ngan paghatag hin mga hatag tungod ha kalooy. Paghimo hin diri nadadaan nga mga supot para han iyo kwarta, an diri nauubos nga bahandi ha langit, kay didto waray kawatan nga makakahirani ngan waray mga insekto nga makakapangutkot. 34  Kay kon hain an iyo bahandi, aadto liwat an iyo kasingkasing. 35  “Pag-epron ngan pag-andam* kamo, palagaha an iyo mga lampara, 36  ngan magin pariho kamo ha kalalakin-an nga naghuhulat ha pag-abot han ira agaron tikang ha kasal, basi ha iya pag-abot ngan pagtuktok, ira abrihan dayon hiya. 37  Malipayon an mga uripon nga nagbabantay ha pag-abot han agaron! Ha pagkamatuod, susumatan ko kamo: Mag-iepron hiya basi magserbi, palilingkuron hira ha may lamesa, ngan madaop hiya ngan magsiserbi ha ira. 38  Ngan malipayon hira kon pag-abot niya ha ikaduha nga bahin han pagbantay,* o bisan ha ikatulo,* nagbabantay hira! 39  Pero hinumdumi niyo nga kon maaram an tagbalay kon ano nga oras maabot an kawatan, padayon hiya nga magbabantay basi waray makasulod ha iya balay. 40  Pag-andam liwat kamo, kay an Anak han tawo maabot ha oras nga diri niyo ginlalaoman.” 41  Katapos hi Pedro nagpakiana: “Ginoo, iginsusumat mo ba ini nga ilustrasyon ha amon o ha iba liwat?” 42  Ngan an Ginoo nagsiring: “Hin-o gud an matinumanon nga tinaporan, an usa nga maaramon, nga ha iya itatapod han Agaron an Iya grupo han mga surugoon basi padayon nga maghatag ha ira hin igo nga pagkaon ha husto nga panahon? 43  Malipayon ito nga uripon kon ha pag-abot han iya Agaron ito an iya ginbubuhat! 44  Ha pagkamatuod susumatan ko kamo: Iya itatapod hito nga uripon an ngatanan nga iya panag-iya. 45  Pero kon ito nga uripon magsiring ha kalugaringon, ‘Nalalangan an akon agaron,’ ngan iya pangastiguhon an mga surugoon nga lalaki ngan babaye, ngan magkinaon, mag-ininom, ngan maghubog, 46  an Agaron hito nga uripon maabot ha adlaw nga diri niya ginlalaoman ngan ha oras nga diri niya hinbabaroan, ngan duro nga sirot an ipapadapat ha iya ngan ilalabog hiya ha hinmumutangan han mga diri-matinumanon. 47  Katapos ito nga uripon nga maaram han kaburut-on han iya agaron kondi waray mag-andam o magbuhat uyon ha kaburut-on han iya agaron, lalatiguhon hin damu ka beses. 48  Pero an uripon nga diri maaram ngan nagbuhat hin mga butang nga angay han mga latigo, lalatiguhon hin pipira la ka beses. Ha pagkamatuod, an kada tagsa nga gintagan hin damu, damu man an aaroon ha iya, ngan an usa nga gintaporan han mga tawo hin damu, labaw ha kasagaran an ira aaroon ha iya. 49  “Kinanhi ako basi magharing hin kalayo ha tuna, ngan ano pa an akon hihingyapon kon naglalaga na ito? 50  Ha pagkamatuod, may bawtismo nga akon maieksperyensyahan, ngan nagsasakit gud ako tubtob nga matapos ito! 51  Naghuhunahuna ba kamo nga kinanhi ako basi magdara hin kamurayawan ha tuna? Susumatan ko kamo, diri kamurayawan kondi pagkabahin-bahin. 52  Kay tikang yana, an lima ha usa nga balay mababahin, an tulo kontra ha duha ngan an duha kontra ha tulo. 53  Magkakabahinbahin hira, an amay kontra ha anak nga lalaki ngan an anak nga lalaki kontra ha amay. An iroy kontra ha anak nga babaye ngan an anak nga babaye kontra ha iroy. An ugangan nga babaye kontra ha umagad nga babaye ngan an umagad nga babaye kontra ha ugangan nga babaye.” 54  Katapos nagsiring liwat hiya ha mga tawo: “Kon nakakakita kamo hin dampog ha weste, nasiring dayon kamo, ‘May bagyo nga tiabot,’ ngan nahitatabo ito. 55  Ngan kon nahangin tikang ha sur, nasiring dayon kamo, ‘Magigin mapaso gud,’ ngan nahitatabo ito. 56  Mga hipokrito, maaram kamo mag-usisa han kahimtang han tuna ngan han langit, kondi kay ano nga diri kamo maaram mag-usisa hini nga panahon? 57  Kay ano nga diri liwat kamo magdesisyon kon ano an matadong? 58  Pananglitan, kon ikaw ngan an nagkiha ha imo tikadto ha huwes, pakigtuhay dayon ha iya samtang tikadto pa la kamo, basi diri ka niya dad-on ha atubangan han huwes, ngan itubyan ka han huwes ha gwardya ngan prisuhon ka niya. 59  Susumatan ko ikaw: Sigurado nga diri ka makakagawas didto tubtob nga mabaydan mo an ultimo nga sinselyo* han imo utang.”

Mga footnote

^ Kitaa an Apendise 9.
^ O “kinabuhi.”
^ Ha literal, “usa ka siko,” nga mga 17.5 ka pulgada an kahilaba.
^ Ha literal, “Takgungi an iyo baliatang.”
^ Nagtitikang ha alas-9 ha gab-i tubtob ha katutnga.
^ Nagtitikang ha katutnga tubtob ha alas-3 ha aga.
^ Ha literal, “an ultimo nga lepton.” Ini an sweldo para ha mga 5 minutos nga pagtrabaho. Kitaa an Apendise 11.