Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE AHURU MA HOÊ

Ua vai ara noa e ua tiai oia

Ua vai ara noa e ua tiai oia

1, 2. (a) Eaha ta Elia e rave e ere hoi mea ohie? (b) Eaha te taa-ê-raa i rotopu ia Elia e ia Ahaba?

UA HINAARO Elia e paraparau o ’na ana‘e i to ’na Metua i te ra‘i. Teie nei râ, no ite noa mai ra te nunaa i teie peropheta mau i te piiraa i te auahi no te ra‘i mai, e mea rahi tei hinaaro ia haamaitai Elia ia ratou. Hou râ Elia a pauma ’i i nia i te mou‘a Karemela no te pure o ’na ana‘e i te Atua ra o Iehova, ia paraparau o ’na i te arii Ahaba. E ere râ mea ohie no ’na.

2 Mea taa ê roa tera na tane. E ahu arii to Ahaba apotata hema hanoa e te nounou. To Elia râ, e ahu peropheta ïa, e ahu au noa e te meumeu, hamanihia paha i te iri animara aore ra i te huruhuru kamela aore ra te huruhuru puaaniho. E tane itoito mau o ’na, haapao maitai roa e te faaroo rahi. I taua mahana ra, ua ite-roa-hia te taa-ê-raa i rotopu i te huru o Elia e to Ahaba.

3, 4. (a) No te aha Ahaba e te tahi atu mau taata haamori ia Baala i pohe roa ’i i te haama i tera mahana? (b) Eaha te mau uiraa ta tatou e pahono?

3 I tera mahana, ua pohe roa o Ahaba e te tahi atu mau taata haamori ia Baala i te haama. Ua tairi-roa-hia te haamoriraa ěê ta Ahaba e ta ta ’na vahine Iezebela i turu i roto i te basileia o na ahuru opu o Iseraela. Ua itehia e e atua haavare o Baala. Aita roa ’tu i ama noa ’‘e te auahi ia Baala no te pahono i te mau taparuparuraa tutuô a ta ’na na 450 peropheta tei ori e tei otioti ia ratou. Aita o Baala i faaora noa ’‘e ia ratou, tei haapohehia ma te tano roa. Aita atoa i noaa ia ’na ia arai i te hoê ati. Hau atu i te toru matahiti to te mau peropheta a Baala ta‘u-noa-raa i to ratou atua ia tapea i te pa‘urâ, aita râ i tia ia ’na. O Iehova râ, fatata ïa i te faatopa mai i te ûa, a faaite atu ai e o ’na te Atua mau.—Arii 1, 16:30–17:1; 18:1-40.

4 Inafea Iehova i ohipa mai ai? Eaha ta Elia i rave a tiai noa ’i? Eaha te haapiiraa e huti mai i te hi‘oraa o teie taata faaroo?  O ta tatou ïa e hi‘o mai.—A taio i Te mau arii 1, 18:41-46.

E taata pure

5. (a) Eaha ta Elia i parau ia Ahaba? (b) Ua huti mai anei Ahaba i te haapiiraa i te mau ohipa i tupu i tera mahana?

5 Tapiri atura Elia ia Ahaba e na ô atura: “A haere, a amu i te maa e inu hoi i te pape; e ûa rahi teie e haruru mai nei.” Ua huti mai anei te arii i te haapiiraa i te mau ohipa i tupu i tera mahana? E au ra e aita. Aita te faatiaraa e parau mai ra e ua tatarahapa o ’na aore ra ua ani i te peropheta i te tauturu no te pure ia Iehova ia faaore mai i ta ’na hara. Teie noa râ, “haere atura Ahaba e amu i te maa, e inu hoi i te pape.” (Arii 1, 18:41, 42) E o Elia?

6, 7. Eaha ta Elia i ani na roto i te pure, e no te aha?

6 “Haere atura Elia i nia i te mou‘a ra o Karemela; ua tipapa ihora oia i raro i te repo, ua tuu ihora i te mata i ropu i na turi.” I to Ahaba haereraa e tamaa, pure a‘era Elia i to ’na Metua i te ra‘i. A hi‘o na i ta ’na i rave: ua tipapa o ’na i raro, te upoo i raro roa i te repo a piri atu ai to ’na hoho‘a mata i to ’na turi. No te aha? Te faaite mai ra te Iakobo 5:18, ua pure Elia ia  ore te pa‘urâ. Ua pure paha o ’na i nia i te tupuai o te mou‘a Karemela.

Ua faaite ta Elia mau pure i to ’na hiaai rahi ia tupu te hinaaro o te Atua

7 Na mua ’tu, ua parau Iehova: “Na ’u e hopoi atu i te ûa i nia i te fenua.” (Arii 1, 18:1) Ua pure ïa Elia ia tupu te hinaaro o Iehova. Fatata 1 000 matahiti i muri a‘e, ua haapii Iesu i ta ’na mau pǐpǐ ia na reira atoa.—Mat. 6:9, 10.

8. Eaha te haapiiraa ta Elia e horoa mai ra no nia i te pure?

8 Mea rahi te haapiiraa ta Elia e horoa mai ra no nia i te pure. Te ohipa matamua roa i roto i te feruriraa o Elia, te tupuraa ïa te hinaaro o te Atua. Ia pure tatou, e haamana‘o ana‘e: “Ia ani noa ’tu tatou i te mau mea atoa i au [i te Atua] ra, te faaroo maira ïa oia ia tatou.” (Ioa. 1, 5:14) Ia ite ïa tatou na mua eaha to ’na hinaaro e farii ai te Atua i ta tatou pure. E haapii tamau ana‘e ïa i te Bibilia. Ua hinaaro mau atoa Elia ia ore te pa‘urâ, no te mea te mauiui ra te nunaa i teie ati. Eita e ore e ua î roa to ’na aau i te mauruuru i to Iehova faatupuraa i te semeio i tera mahana. Ia faaite atoa ïa ta tatou mau pure i to tatou mauruuru rahi e te tapitapi ia vetahi ê.—A taio i te Korinetia 2, 1:11 i roto i te nota i raro i te api *; Philipi 4:6.

Ua tiaturi e ua vai ara noa

9. (a) Eaha ta Elia i faaue i ta ’na tavini? (b) Eaha na huru maitatai ta tatou e hi‘o mai?

9 Ua papu ia Elia e e tapea Iehova i te pa‘urâ, aita râ o ’na i ite afea. Eaha ïa ta te peropheta i rave? Te na ô ra te faatiaraa: “Ua parau maira [oia] i te tavini, A haere i nia e hi‘o tia i tai. Ua haere ihora oia i nia, e ua hi‘o, e ua parau atura, Aita [hoê a‘e]. Ua parau maira oia, A haere e ia hitu noa ’tu te haerea.” (Arii 1, 18:43) E piti haapiiraa e huti mai i to Elia hi‘oraa. A tahi, ua tiaturi o ’na e e haa mai iho â Iehova. A piti, ua vai ara noa o ’na.

Ua tamoemoe noa Elia i te mau tapao e faaite ra e fatata Iehova i te faatopa i te ûa

10, 11. (a) Mea nafea to Elia faaiteraa i to ’na tiaturi i ta Iehova parau fafau? (b) No te aha tatou e nehenehe atoa ai e tiaturi mai ia Elia?

10 No to ’na tiaturi i ta Iehova i fafau, ua tamoemoe noa Elia i te mau tapao e faaite ra e fatata Iehova i te faatopa i te ûa. Ua  faaue o ’na i ta ’na tavini ia haere i te hoê vahi teitei no te hi‘o i tai. I to te tavini ho‘iraa mai, parau atura oia ma te peapea e aita hoê a‘e ata, mea ateatea maitai te ra‘i. No parau noa mai ra hoi Elia i te arii Ahaba e “e ûa rahi teie e haruru mai nei.” No te aha teie peropheta i na reira ’i i te parau, aita hoi e ata?

11 Ei peropheta e ei tia no Iehova, ua papu ia ’na e e faatupu iho â to ’na Atua i ta ’na parau. No to ’na tiaturi papu ia Iehova, mai te huru ra e te faaroo ra o ’na i te ûa. Te haamana‘o ra paha tatou i ta te Bibilia e parau ra no Mose: “Itoito maite atura oia i te hi‘oraa ’tu i te Atua, i tei ore e itea ia hi‘o ra.” E no oe, te vai mau atoa ra anei te Atua? Te horoa mai ra o ’na e rave rahi tumu e faatupu ai tatou i te faaroo ia ’na e i ta ’na mau parau fafau.—Heb. 11:1, 27.

12. (a) No te aha tatou e parau ai e ua vai ara noa Elia? (b) Eaha ta Elia i rave i to ’na faarooraa e e ata iti te haere mai ra?

12 A tapao atoa e ua vai ara noa Elia. E hitu taime to ’na tonoraa i ta ’na tavini, e ere hoê aore ra e piti noa taime. Ua rohirohi paha te tavini i te haere-noa-raa e te ho‘iraa mai. O Elia râ, tei hinaaro roa e ite i te tahi tapao, aita ïa i tuu. I te hitu o te taime, ho‘i maira te tavini e na ô maira: “Inaha, e ata iti te tupu maira na tai maira, mai te rima taata nei â te huru.” A feruri na ia ’na e toro ra i to ’na rima, a mahora ’tu ai i to ’na rima no te faito i te aano o te ata iti e tere mai ra na te iriatai mai o te miti Mediteranea! E ere paha i te haapaoraa ata no te tavini. No Elia râ, oia ïa. Faaue ru atura o ’na i ta ’na tavini: “A haere i nia, e parau atu ia Ahaba, A faaineine i te pereoo n[o] oe, e haere i raro, a roohia oe i te ûa.”—Arii 1, 18:44.

13, 14. (a) E nafea ia pee ia Elia tei vai ara noa? (b) No te aha ia ru ai tatou i te ohipa?

13 Te horoa faahou mai ra Elia i te hi‘oraa maitai. Te ora atoa nei tatou i te hoê tau fatata te Atua i te faatupu i to ’na hinaaro. I tiai na Elia ia ore te pa‘urâ. I teie mahana, te tiai ra te mau tavini a te Atua ia mou teie nei faanahoraa ino o te mau mea. (Ioa. 1, 2:17) E vai ara noa ana‘e, mai ia Elia, e tae roa i te taime e ohipa mai ai Iehova. Teie ta Iesu, te Tamaiti a te Atua, i a‘o i ta ’na mau pǐpǐ: “E teie nei, e ara, aore hoi outou i ite i te hora e tae mai ai to outou Fatu.” (Mat. 24:42) Te hinaaro ra anei Iesu e parau e eita roa ’tu ïa ta ’na mau pǐpǐ e ite afea te hopea e tae mai ai? Eita. Ua faataa o ’na eaha te tupu i roto i teie nei ao i te anotau hopea. Te ite nei tatou pauroa i te tapao tatuhaahia o “te anotau hopea o teie nei faanahoraa o te mau mea.” A taio i te Mataio 24:3 i roto i te nota i raro i te api *; e te irava 4 tae roa i te 7.

Hoê noa ata iti, papu roa ia Elia e fatata Iehova i te faatopa i te ûa. Te ite nei tatou i te tapao o te anotau hopea, ru ana‘e ïa i te ohipa

14 Te horoa mai ra te tuhaa taitahi o taua tapao ra i te mau haapapuraa e te ora nei tatou i te anotau hopea. E nahea ïa tatou? E ru anei tatou i te ohipa i roto i ta Iehova taviniraa? Hoê noa ata iti te tere mai ra na tai mai, papu roa ia Elia e fatata Iehova i te faatopa i te ûa. Ua tatarahapa anei taua peropheta faaroo ra?

Te haumǎrû e te mau haamaitairaa

15, 16. (a) Eaha tei tupu taue mai? (b) Eaha paha ta Elia i uiui no nia ia Ahaba?

15 Te na ô mai ra te faatiaraa: “E aore a‘era i mahia, ua ereere ihora te ra‘i i te ata e te mata‘i, o te ûa ihora hoi e mea rahi. Ua horo ihora Ahaba [na nia iho i to ’na pereoo] e tae atura i Iezereela.” (Arii 1, 18:45) I to te tavini a Elia faaiteraa ’tu i te poroi a te peropheta ia Ahaba, haapoiri ihora te ra‘i i te ata, e farara maira te mata‘i. A tahi ra a ûa faahou ai i nia i te fenua o Iseraela, a toru matahiti atura e te afa. Rari maitai ihora te fenua. A rahi mai ai te ûa, maraa maira te pape o Kisona e mâ ’tura taua vahi ra tei viivii i te toto o te mau peropheta a Baala tei haapohehia. E nehenehe ïa te mau Iseraela orure hau e faaore i te haamoriraa a Baala i to ratou fenua, a faaore mai ai Iehova i ta ratou hara.

“Ûa ihora hoi e mea rahi”

16 Mea maitai e e na reira ratou, ta Elia paha ïa i mana‘o, a uiui atoa ’i paha e nahea râ Ahaba. E tatarahapa anei o ’na, a faarue atu ai i te haamoriraa viivii a Baala? Ia hi‘ohia te mau ohipa i tupu i tera mahana, mea tano iho â ia na reira o ’na. Aita tatou i ite eaha ta Ahaba i faaoti e rave. Ta te faatiaraa noa e parau mai ra, ‘ua horo Ahaba na nia i to ’na pereoo e tae atura i Iezereela.’ Ua huti mai anei o ’na i te haapiiraa? Ua faaoti anei o ’na e taui? E au ra e aita, ia au i tei tupu i muri iho. Aita râ taua mahana ra i hope atura no Ahaba e no Elia atoa.

17, 18. (a) Eaha tei tupu i nia ia Elia a horo ai o ’na i Iezereela? (b) No te aha mea maere mau â ’i to Elia hororaa mai Karemela e tae roa i Iezereela? (A hi‘o atoa i te nota i raro i te api.)

 17 Na nia atoa ’tura te peropheta a Iehova i te purumu mea na reira Ahaba i te revaraa. Mea atea hoi te vahi ta ’na e haere ra, mea ûa, mea haapoiri te ra‘i e ua po atoa. Tupu ihora râ te tahi ohipa maere roa.

18 “Tei nia maira te rima o Iehova ia Elia; ua tatua ihora i tana tauupu, ua horo ihora na mua ia Ahaba e tae noa ’tura i . . . Iezereela.” (Arii 1, 18:46) E mana rahi mau â to “te rima o Iehova” i nia ia Elia. E 30 kilometera te atea e tae atu ai i Iezereela. E ere hoi Elia i te taurearea. * A feruri na i te peropheta e huti ra i to ’na ahu roa i nia, a taamu atu ai i nia i to ’na tauupu ia ore to ’na avae ia tafifi, e taumi atura i te horo i raro a‘e i te ûa. Mea ra‘u to ’na hororaa, roaa ’tura e hemo maira ia ’na te pereoo o te arii!

19. (a) Te haamana‘o mai ra ta Elia i fana‘o i teihea mau parau tohu? (b) A horo noa ’i Elia i Iezereela, ua papu roa ia ’na te aha?

19 E haamaitairaa mau â tera no Elia! Eita e ore oia i te oaoa roa i te fana‘oraa i tera huru puai e tera huru itoito, mea tapea o ’na, hau a‘e paha i ta ’na i fana‘o na i to ’na apîraa. Te haamana‘o mai ra paha te reira i te mau parau tohu e e fana‘o te feia taiva ore i te ea maitai roa, e itoito roa atoa mai ratou i roto i te paradaiso i te fenua nei a muri a‘e. (A taio i te Isaia 35:6; Luka 23:43) A horo noa ’i Elia i raro a‘e i te ûa, ua papu roa ia ’na e ua farii maitai to ’na Metua, te Atua mau hoê roa o Iehova, ia ’na!

20. E nafea ia imi i ta Iehova mau haamaitairaa?

20 E hinaaro iho â Iehova e haamaitai ia tatou. E imi ana‘e ïa i ta ’na mau haamaitairaa. E hoona ta tatou mau tutavaraa atoa i te na reira. Mai ia Elia, e vai ara noa ana‘e, a tamoemoe ai i te mau tapao e haapapu ra e fatata Iehova i te ohipa mai i teie anotau ru e te atâta. Mea tano roa ia tiaturi roa tatou, mai ia Elia, i te mau parau fafau a Iehova, “te Atua parau mau.”—Sal. 31:5.

^ par. 8 Korinetia 2, 1:11: “O outou hoi i te ohipa-atoa-raa i te pure [no] matou, ia haamaitai te taata atoa e rave rahi i te Atua [no] matou, i te maitai i noaa ia matou i te taata atoa e rave rahi.”

^ par. 13 Mataio 24:3 (Traduction du monde nouveau): “Te parahi ra Iesu i nia i te mou‘a Oliveta i haere mai ai ta ’na mau pǐpǐ ana‘e ia ’na ra e na ô maira: ‘A faaite mai na afea teie mau mea e tupu ai, e eaha te tapao o to oe vairaa mai e o te anotau hopea o teie nei faanahoraa o te mau mea?’”

^ par. 18 I muri rii a‘e, ua faaue Iehova ia ’na ia haapii ia Elisaia, ta te Bibilia e parau e na ’na e “ninii i te pape i nia i te rima o Elia.” (Arii 2, 3:11) E riro Elisaia ei tavini na Elia, e au ra e no te tauturu ia ’na te hoê ruhiruhia.