Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

Parau faaotiraa

Parau faaotiraa

“[A] pee . . . i te feia i noaa tei parauhia maira i te faaroo e te faaoromai.”—HEBERA 6:12.

1, 2. No te aha mea faufaa roa ’i ia ru i te haapuai i te faaroo? A horoa i te hoê hi‘oraa.

FAAROO. E parau nehenehe teie. E huru maitatai au roa. Ua taaihia râ teie ta‘o i te tahi atu ta‘o: “Ru!” Oia mau, aita ana‘e to tatou e faaroo, e ru ana‘e i te faahotu i te reira. E ia noaa mai te faaroo, ru ana‘e i te paruru e te atuatu i te reira. No te aha?

2 A feruri na ia oe i roto i te hoê medebara. Mea faufaa roa ïa te pape. Ia itea mai ia oe, ia paruru oe i taua pape ra i te mahana. Ia faaî noa atoa oe i ta oe farii i te pape ia navai hoi ta oe pape e tae noa ’tu i te vahi ta oe e haere ra. I teie mahana, te ora nei tatou pauroa i roto i te hoê medebara i te pae varua, oia hoi teie nei ao mea varavara te faaroo mau. Ia ore ia paruruhia e ia atuatuhia taua faaroo ra, e moe taue te reira. Mea faufaa roa te faaroo. Aita ana‘e e pape, eita tatou e ora. Aita atoa ana‘e e faaroo, eita tatou e ora ’tu i te pae varua.—Roma 1:17.

3. (a) Eaha ta Iehova i horoa mai no te tauturu ia tatou ia haapuai i to tatou faaroo? (b) E nahea tatou i teie nei?

3 Ua ite Iehova e mea faufaa roa te faaroo, e mea fifi roa ia atuatu i te reira. No reira ïa oia i horoa mai ai i te mau hi‘oraa ia pee tatou. Ua haapapai oia i te aposetolo Paulo: “[A] pee . . . i te feia i noaa tei parauhia maira i te faaroo e te faaoromai.” (Heb. 6:12) No reira ïa ta Iehova faanahonahoraa e faaitoito mai ai ia rohi i te pee i te hi‘oraa o te mau tane e vahine haapao maitai, ta tatou i haapii i roto i teie buka. E nahea râ tatou i teie nei? A tahi, e tamau noa ana‘e i te haapuai i to tatou faaroo. A piti, e haamana‘o noa ana‘e i to tatou tiaturiraa.

4. (a) No te aha tatou e parau ai e e enemi Satani no te faaroo? (b) Te auraa anei e eita iho â e haere ia tatou ia haapuai i to tatou faaroo?

4 E tamau noa ana‘e i te haapuai i to tatou faaroo. O Satani te enemi rahi o te faaroo. Ua faariro oia i teie nei ao, o ’na hoi te faatere, mai te hoê medebara ra te huru e mea fifi roa ia atuatu i te faaroo. Mea puai a‘e o ’na ia tatou. Te auraa anei ïa e eita iho â e haere ia tatou ia haapuai i to tatou faaroo? E ere roa ’tu! E Hoa rahi Iehova no te feia atoa e imi ra i te faaroo mau. Te haapapu mai ra oia e maoti ta ’na tauturu, e nehenehe tatou e patoi i te Diabolo, a maue ê atu ai o ’na ia tatou. (Iak. 4:7) E patoi tatou ia ’na ma te faataa i te taime pauroa te mahana no te haapuai i to tatou faaroo. E nafea?

5. Mea nafea i noaa mai ai i te mau tane e vahine haapao maitai o te Bibilia te faaroo? A faataa na.

 5 Mai ta tatou i ite na, aita te mau tane e vahine haapao maitai o te Bibilia i fanauhia mai e te faaroo. Te haapapu mai ra râ to ratou oraraa e na te varua mo‘a o Iehova i faatupu i te faaroo. (Gal. 5:22, 23) Ua pure ratou no te ani i te tauturu, e ua pahono mai Iehova ma te haapuai i to ratou faaroo. Na reira atoa ana‘e ïa, ma te ore roa e haamoe e e horoa noa Iehova i to ’na varua i te feia e ani atu ia ’na, a ohipa ’tu ai ia au i ta ratou mau pure. (Luka 11:13) E nahea ’tu â tatou?

6. E nafea tatou e faufaa-roa-hia ’i i ta tatou haapiiraa i te mau faatiaraa Bibilia?

6 I roto i teie buka, ua hi‘opoa tatou i te tahi noa mau hi‘oraa faahiahia o te faaroo. Mea rahi atu â râ. (A taio i te Hebera 11:32.) E nehenehe tatou e faahohonu atu â i ta tatou haapiiraa i tera mau hi‘oraa. Ia na nia nia noa ta tatou taioraa, eita to tatou faaroo e puai mai. Ia faufaa-roa-hia râ tatou i ta tatou taioraa, e faataa ana‘e i te taime no te paheru i roto i te Bibilia no te ite eaha te huru tupuraa o tera e tera faatiaraa. E haamana‘o noa ana‘e e e taata tia ore taua mau tavini haapao maitai ra “mai ia tatou atoa te huru.” E papu atu â ïa ia tatou e i ora mau na ratou. (Iak. 5:17) E tamata ana‘e i te taa i to ratou huru aau i mua i te mau fifi, ta tatou atoa e faaû nei.

7-9. (a) Eaha te huru o vetahi mau tane e vahine haapao maitai o te Bibilia ia parauhia ia ratou ia haamori ia Iehova mai ta tatou e rave nei? (b) No te aha e haapuai ai i to tatou faaroo na roto i te ohipa?

7 E haapuai atoa tatou i to tatou faaroo na roto i te ohipa. Inaha “te faaroo aore e ohipa ra, e mea pohe” ïa. (Iak. 2:26) Papu maitai, e oaoa roa te mau tane e vahine haapao maitai ta tatou i haapii mai, i te rave i ta Iehova i faaue ia tatou e rave i teie mahana!

8 E rave ana‘e i te hi‘oraa o Aberahama, tei haamori na ia Iehova i nia i te mau fata ofai faatiahia i te medebara. Eaha to ’na huru ia parauhia ia ’na ia haamori ia Iehova i rotopu i te hoê pǔpǔ taata faanahohia i roto i te hoê Piha a te Basileia nehenehe aore ra i te hoê tairururaa? E faaroo ïa o ’na ia tatarahia mai te mau parau fafau ta ’na noa i ite “i te atea ê.” (A taio i te Hebera 11:13.) E o Elia? I haapohe na oia i te mau peropheta ino a Baala, a tutava noa ’i i te haamori ia Iehova i raro a‘e i te faatereraa a te hoê arii ino apotata. Eaha to ’na huru ia parauhia ia ’na ia haere e farerei i te taata no te faaite atu i te hoê poroi tamahanahana o te horoa i te tiaturiraa? Papu roa, e farii oioi te mau tane e vahine haapao maitai o te Bibilia i te haamori ia Iehova, mai ta tatou e rave nei i teie mahana.

9 E tamau noa ana‘e ïa i te haapuai i to  tatou faaroo na roto i te ohipa. Mea na reira tatou e pee maite ai i te hi‘oraa o te mau tane e vahine faaroo o te Bibilia. Mai tei faahitihia i roto i te Parau omuaraa, e piri atu â tatou ia ratou, mai te huru ra e e hoa tatou. Fatata râ taua auhoaraa ra i te riro ei tupuraa mau.

10. E oaoa roa tatou i te aha i roto i te paradaiso?

10 E haamana‘o noa ana‘e i to tatou tiaturiraa. Ua itea noa mai i te mau tane e vahine haapao maitai te puai i roto i te tiaturiraa no ǒ mai i te Atua. E oe? A feruri na i te oaoa rahi ia farerei i te mau tavini haapao maitai a te Atua ia ho‘i mai ratou i te ora i te ‘tia-faahou-raa o te feia parau-tia.’ (A taio i te Ohipa 24:15.) Eaha ta oe e hinaaro e ani ia ratou?

11, 12. I roto i te ao apî, eaha ta oe e ui ia (a) Abela? (b) Noa? (c) Aberahama? (d) Ruta? (e) Abigaila? (f) Esetera?

11 E ui paha oe ia Abela: “Mai te aha te huru o to oe na metua?” Aore ra “Ua paraparau anei oe i te mau kerubi e tiai ra i te ô i Edene? Ua pahono anei ratou ia oe?” E ia Noa, teie paha ta oe uiraa: “Ua riaria anei oe i te mau aito? Mea nafea oe i te haapaoraa i tera rahiraa animara i roto i te araka i tera roaraa?” E ia Aberahama, teie paha ïa: “Ua farerei anei oe ia Sema? Na vai i haapii ia oe no nia ia Iehova? Mea fifi anei no oe i te faarueraa ia Ura?”

12 E uiraa atoa paha ta oe i te mau vahine haapao maitai e faatia-faahou-hia mai. “Ruta, na te aha i turai ia oe ia haamori ia Iehova?” “Abigaila, ua riaria anei oe i te faaite ia Nabala e i tauturu na oe ia Davida?” “Esetera, nehenehe oe e faatia mai i te hopea o to oe aamu e to Moredekai?”

13. (a) Eaha paha ta te feia e faatiahia mai e ui ia oe? (b) Eaha to oe mana‘o i te farereiraa i te mau tane e vahine haapao maitai i tahito ra?

13 Mea rahi atoa paha te uiraa a taua mau tane e vahine ra ia oe. Mea au roa ïa ia faatia ’tu i te mau mahana hopea, e mea nafea Iehova i te haamaitairaa i to ’na nunaa i te mau taime fifi! E putapû roa paha ratou ia ite mea nafea Iehova i te faatupuraa i ta ’na mau parau fafau atoa. Aita e faufaa faahou ia haaputa mai ia ratou i roto i to tatou feruriraa. E tia roa mai hoi ratou i pihai iho ia tatou i roto i te paradaiso! No reira, a rohi noa i te mana‘o i taua mau tavini ra, tei ora mau na. A tamau noa i te pee i to ratou faaroo, a oaoa ’tu ai oe i te tavini ia Iehova i pihai iho i taua mau hoa here ra e a muri noa ’tu!