Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE PITI

‘Ua au to ’na haerea i te Atua’

‘Ua au to ’na haerea i te Atua’

1, 2. Eaha te ohipa ta Noa e to ’na utuafare i rave, e eaha te tahi mau fifi ta ratou i farerei?

A FERURI na ia Noa i nia i te hoê pou tarava. Te faaafaro ra o ’na ia ’na e te hautiuti ra i to ’na tino e mauiui rii ra. Faafaaea ’tura o ’na maa taime a hi‘o noa ’i i te tiapai araka e hamanihia ra. Te hau‘a ra te tapau veavea e te faaroohia ra te maniania o te mau mauhaa tamuta. Mai te vahi ta ’na e parahi ra, te ite atu ra o ’na i ta ’na mau tamaiti e rohi ra. E rave rahi matahiti i teie nei to ta ’na mau tamaiti, ta ratou vahine e ta ’na iho vahine here tautururaa ia ’na ia hamani i te araka. Ua nuu maitai te ohipa i mua, mea rahi râ te ohipa e toe ra!

2 Ua mana‘o te taata e e maamaa Noa e to ’na utuafare. Rahi atu â te ohipa i te haere i mua, rahi atu â te taata i te vahavaha i te faaararaa a Noa e e nina roa te diluvi i te fenua taatoa. ‘Eaha ïa huru! E tupu iho â ïa tena ati?’ ta ratou paha ïa i parau ma te faaooo. Aita ratou e taa ra no te aha teie taata e to ’na utuafare e haamâu‘a ’i i to ratou taime no teie ohipa maamaa. Mea taa ê roa râ te mana‘o o Iehova, te Atua o Noa.

3. Ua au to Noa haerea i te Atua i roto i teihea auraa?

3 Te na ô ra te Parau a te Atua: “Ua au to Noa haerea i te Atua.” (A taio i te Genese 6:9.) Eaha te auraa? Ua auraro maite Noa i te Atua e ua here roa ia ’na, mai te huru ra ïa e e hoa raua Iehova. E tausani matahiti i muri a‘e, ua parau te Bibilia e ‘ua faahapa Noa i to te ao i to ’na faaroo.’ (Heb. 11:7) Mea nafea ïa? Eaha te haapii mai i to ’na faaroo?

Te hoê taata tia i roto i te hoê ao ino

4, 5. I te tau o Noa, mai te aha te huru o te ao?

4 Ua paari mai Noa i roto i te hoê ao tei ino oioi. Ua haamata ê na te reira i te tau o Enoha, te papa o to ’na papa ruau. E taata parau-tia atoa teie tei au to ’na haerea i te Atua. Ua tohu Enoha e e tae mai te hoê mahana haavaraa e faautuahia ’i te feia paieti  ore. I te tau râ o Noa, mea ino roa ’tu â ïa te oraraa. Ua ino roa te fenua i mua i te aro o Iehova, ua î hoi te fenua i te parau-tia ore. (Gen. 5:22; 6:11; Iuda 14, 15) Eaha hoi tei tupu?

5 E fifi rahi tei tupu i rotopu i te mau melahi a te Atua. Ua orure hau a‘ena te hoê melahi ia Iehova, ua pari haavare ia ’na e ua turai ia Adamu raua Eva ia hara. Riro maira taua melahi ra ei Diabolo ra o Satani. I te tau o Noa, ua patoi atoa te tahi atu mau melahi i ta Iehova faatereraa tia. Ua faarue ratou i te tiaraa ta te Atua i horoa ’tu i te ra‘i, ua pou mai i te fenua nei, ua rave i te tino taata e ua maiti i te mau tamahine nehenehe ei vahine na ratou. E hi‘oraa ino mau tera mau melahi orure hau, miimii e te teoteo no te taata.—Gen. 6:1, 2; Iuda 6, 7.

6. Ua aha ’tu â te mau aito, e eaha ta Iehova i faaoti e rave?

6 Hau atu â, fanau maira ta teie mau melahi tei rave i te tino taata e tei taati ma te tano ore i te mau vahine, i te mau tiapai tamarii e te pautuutu. Parauhia ratou i roto i te Bibilia e aito. Ua faau‘ana ’tu â taua mau aito atâta ra i te huru feruriraa ino e te haavî o te taata. Ite a‘era te Atua poiete e “e ino rahi to te taata o te ao nei, e ua ino ana‘e te mau mana‘o atoa, e te mau opuaraa atoa o te aau i te mau mahana atoa.” Faaoti atura Iehova e haamou i taua mau taata ino i roto 120 matahiti.—A taio i te Genese 6:3-5.

7. I titauhia na ia paruru Noa e ta ’na vahine i ta raua mau tamaroa i te aha?

7 E ere mea ohie ia rave i te tamarii i roto i te hoê ao mai tera te huru! O ta Noa ïa i faaruru. Ua itea mai ia ’na te hoê vahine maitai. Ua fanau mai ta Noa, tei hau atu i te 500 matahiti, e toru  tamaroa: Sema, Hama e Iapheta. * I titauhia na ia paruru raua i ta raua mau tamaroa i te mau amuimuiraa ino. E faahiahia roa na te mau tamaroa ia hi‘o ratou i te mau “aito” e “feia tui roo” hoi. Eita hoi ta Noa e ta ’na vahine e nehenehe e tapiri i te tari‘a o ta raua mau tamaroa ia ore e faaroo i te mau mea maere ta te mau aito i rave. Teie râ, e nehenehe ta raua e haapii ia ratou i te parau mau faahiahia mau no nia i te Atua ra o Iehova, mea au ore hoi na ’na te mau ohipa ino atoa. Ia tauturu hoi raua ia ratou ia taa e e peapea roa Iehova no te haavîraa u‘ana e te orureraa hau.—Gen. 6:6.

I titauhia na ia paruru Noa e ta ’na vahine i ta raua mau tamarii i te mau amuimuiraa ino

8. E nafea te mau metua î i te paari e nehenehe ai e pee i te hi‘oraa o Noa e ta ’na vahine?

8 E taa oioi noa i te mau metua te tupuraa o Noa e ta ’na vahine. Mea rahi atoa hoi te haavîraa u‘ana e te orureraa hau i teie mahana. E pinepine, na te mau pǔpǔ feia apî ohipa ino e faatere e rave rahi oire. Mea rahi atoa te haavîraa u‘ana i roto i te mau faaanaanataeraa na te tamarii. E imi te mau metua î i te paari i te mau ravea atoa no te paruru i ta ratou mau tamarii, ma te haapii ia ratou o vai Iehova, te Atua hau o te faaore roa i te ino. (Sal. 11:5; 37:10, 11) E haere iho â ia ratou! Ua haere hoi ia Noa e ta ’na vahine. Ua riro mai ta raua mau tamaroa ei tane maitai, o tei faaipoipo i te vahine tei farii atoa e tuu i te Atua mau ra o Iehova i te parahiraa matamua i roto i to ratou oraraa.

“A tarai . . . i te hoe araka no oe”

9, 10. (a) Eaha ta Iehova i faaue i taui roa ’i to Noa oraraa? (b) Eaha ta Iehova i horoa e i faaue ia Noa?

9 I te hoê mahana, ua taui roa to Noa oraraa. Ua paraparau Iehova i ta ’na tavini here e ua faaite atu e ua opua oia e haamou i te ao o taua tau ra. Ua faaue atura oia ia Noa: “A tarai na oe i te hoe araka no oe, i te raau.”—Gen. 6:14, Te Bibilia Mo’a V.C.J.S., 1976.

10 E ere te araka i te hoê pahi mai ta vetahi e mana‘o ra. Aita hoi to ’na e muaraa e te muriraa. Aita atoa e ta‘ere e te hôe faatere. E tiapai afata teie. Ua horoa Iehova ia Noa i te mau faito tia o te araka e te tahi mau faataaraa no nia i to ’na huru hamaniraa. Ua faaue atoa Iehova ia parai i te rotoraa e te rapaeauraa o te araka i te tapau. No te aha? Ua na ô oia: “Teie au e hopoi mai i te diluvi i nia i te fenua nei, . . . te mau mea ora atoa o te fenua nei, e pohe ïa.” (Gen. 6:17) Ua faaau râ Iehova i teie faufaa ia Noa: “E  tomo oe i roto i te araka, o oe, e to mau tamarii, e to vahine, e na vahine o to mau tamarii.” Ia aratai atoa hoi Noa i te mau huru animara atoa i roto i te araka. Te feia e te animara i roto i te araka, o ratou ana‘e te ora mai i te diluvi!—Gen. 6:18-20, V.C.J.S.

Ua ohipa amui Noa e to ’na utuafare no te rave i ta te Atua i faaue

11, 12. Eaha te ohipa e tiai mai ra ia Noa? Ua aha o ’na?

11 E ohipa iti rahi te tiai mai ra ia Noa, e hamani i te hoê tiapai araka: 133 metera te roa, 22 metera te aano, 13 metera te teitei. Mea nainai roa ïa te mau pahi raau rahi roa ’‘e i hamanihia e tae roa mai i teie tau. Ua otohe anei Noa? Ua amuamu anei? Ua taui anei i te tahi mau mea no te faaohie i ta ’na ohipa? Te pahono ra te Bibilia: “Ua na reira hoi Noa i te mau mea atoa ta te Atua i faaue mai ia ’na ra, o ta ’na ïa i rave maite.”—Gen. 6:22.

12 Peneia‘e e 40 e tae atu e 50 matahiti ratou i te ohiparaa. Ua titauhia hoi ia tâpû, ia tari e ia tarai i te tumu raau, ia noaa mai te raau no te hamani i te araka. E toru tahua to te araka, mea rahi te piha e hoê uputa. E au ra e e haamaramarama atoa e ati a‘e te araka i raro a‘e mai i te tafare, e mea hipa rii na apaapa tafare ia hee mai te pape.—Gen. 6:14-16.

13. Eaha paha te ohipa fifi roa ’‘e tei faauehia ia Noa e rave, e ua aha te taata?

13 A mairi ai te mau matahiti, te oti mai ra te araka. Eita e ore e ua oaoa roa Noa i te tururaa mai to ’na utuafare ia ’na! Te vai ra râ te tahi atu ohipa fifi roa ’‘e paha i teie. Te parau mai ra te Bibilia e e taata poro i te parau-tia o Noa. (A taio i te Petero 2, 2:5.) Ua faaara o ’na ma te itoito i te taata e e fatata ratou i te haamouhia. Ua aha ratou? Ua parau Iesu Mesia i muri a‘e e aita ratou i tâu‘a noa ’‘e i te faaararaa a Noa. Ua haapao noa hoi tera mau taata i ta ratou i matau noa na i te rave: e tamaa, e inu, e faaipoipo. (Mat. 24:37-39) Mea papu e mea rahi tei faaooo ia ’na e i to ’na utuafare. Peneia‘e ua haamǎta‘u e ua patoi roa ino vetahi ia ’na, ua tamata atoa paha i te totoa i te araka e hamanihia ra.

Ua faaooo te taata ia Noa e aita i tâu‘a i ta ’na poroi, noa ’tu e te ite-maitai-hia ra ta Iehova haamaitairaa ia Noa

14. Eaha ta te mau utuafare Kerisetiano e nehenehe e haapii mai i te hi‘oraa o Noa e to ’na utuafare?

14 Aita Noa e to ’na utuafare i taora i te tauera. Ua tamau noa ratou i te hamani i te araka ma te taiva ore noa ’tu e i mana‘o na te taata e e mea faufaa ore e mea maamaa ta ratou ohipa e rave ra, e e mâu‘a noa to ratou taime. Tera te faaroo mau, a vaiiho mai ai Noa e to ’na utuafare i te hi‘oraa maitai no te mau utuafare Kerisetiano i teie mahana. Te ora nei hoi tatou i te “anotau hopea” o teie nei faanahoraa o te mau mea. (Tim. 2, 3:1) Ua faaau Iesu i to tatou tau i te tau i hamani ai Noa i te araka. Ia ore te taata e tâu‘a i ta tatou poroi no nia i te Basileia o te Atua, ia faaooo aore  ra ia hamani ino mai, e haamana‘o ana‘e ia Noa o tei faaruru atoa i te reira.

“A tomo . . . i roto i te araka”

15. A fatata ’i to Noa e 600 matahiti, eaha ta ’na i faaruru?

15 E rave rahi matahiti i muri a‘e, ua oti roa te araka. Fatata to Noa e 600 matahiti i pohe ai tei herehia e ana. To ’na papa o Lameha na mua. * E pae matahiti i muri a‘e, to ’na papa ruau ïa o Metusela i te 969raa o to ’na matahiti. I roto i te Bibilia, o ’na te taata tei ora maoro roa ’‘e. (Gen. 5:27) Ua ite Metusela raua Lameha ia Adamu, te taata matamua.

16, 17. (a) Eaha te poroi apî ta Noa i fana‘o i te 600raa o to ’na matahiti? (b) A faataa na i te mea maere mau ta Noa e to ’na utuafare i ite.

16 I te 600raa o to ’na matahiti, ua faatae te Atua ra o Iehova i teie poroi apî ia Noa: “A tomo na oe i roto i te araka, o oe e to utuafare atoa.” (Gen. 7:1, V.C.J.S.) Ua parau atoa ’tu te Atua ia ’na ia aratai i te mau huru animara atoa i roto i te araka. To te mau animara viivii ore atoa, e hitu ïa, e tano no te tusia. To te mau animara viivii atoa, e piti ïa.—Gen. 7:2, 3.

17 Mea maere mau â ia hi‘o i tera mau tausani animara e tae  mai ra! Te vai ra mea haere, mea rere, mea nee, mea tiopaopa. Te vai ra mea roa, mea poto, mea rata, mea taehae, e ua rau to ratou tarairaa. Aita Noa i auau i tera mau animara oviri atoa no te haaputuputu mai ia ratou, aita atoa i taparuparu ia ratou ia tomo i roto i te araka. Ia au i te faatiaraa, ua tomo ratou i roto i te araka ia Noa ra.—Gen. 7:9, V.C.J.S.

18, 19. (a) E nafea ia haaferuri i te feia e feaa ra i te aamu o Noa? (b) E nafea e itehia ’i to Iehova paari i roto i te ravea ta ’na i maiti no te faaora i te mau animara?

18 E uiui paha vetahi: ‘Mea nafea ïa tera ohipa i te tupuraa? Mea nafea tera mau animara atoa i nehenehe ai e ora amui i roto i te hoê vahi pirihao?’ A feruri na: Eita anei e tia i te Atua puai tei poiete i te ao nui ia haavî e ia faarata pauroa te animara? A haamana‘o, na Iehova i hamani i te mau animara. I muri a‘e roa, ua vahi o ’na i te miti Uteute e ua tapea i te mahana. Eita anei ïa ta ’na e nehenehe e rave i te mau mea atoa i faatiahia i roto i te aamu o Noa? Oia! E tera iho â ta ’na i rave!

19 E nehenehe ta te Atua e faaora i te mau animara na roto i te tahi atu ravea. Ma te paari râ, ua maiti oia i te hoê ravea o te haamana‘o mai i te ohipa ta ’na i horoa na te taata matamua: e haapao i te mau animara atoa. (Gen. 1:28) Te faaohipa nei e rave rahi metua i to Noa aamu no te haapii i ta ratou tamarii e mea faufaa mau no Iehova te mau animara e te mau taata ta ’na i poiete.

20. Eaha paha ta Noa e to ’na utuafare i rave i te hebedoma hopea hou te diluvi?

 20 Ua parau Iehova ia Noa e e tae mai te diluvi i roto hoê hebedoma. Eita e ore e haamata ’tura te utuafare taatoa i te horohoro no te aratai pauroa te animara i roto i te araka, no te faanaho i te maa na te animara e na te utuafare e no te tie i ta ratou mau taihaa. Te faanaho atoa ra paha ta Noa vahine e ta ’na na hunoa i te tahi taotoraa no ratou i roto i te araka.

21, 22. (a) No te aha eiaha ’i tatou e maere i te tâu‘a ore o te taata i te tau o Noa? (b) Afea te mau faaoooraa i te faaearaa?

21 Mai te aha te huru o te taata? Aita ratou i tâu‘a noa ’‘e, noa ’tu e te ite-maitai-hia ra ta Iehova haamaitairaa ia Noa. Mea papu e ua ite ratou i tera rahiraa animara e tae mai ra a tomo atu ai i roto i te araka. Eiaha râ tatou e maere i to ratou tâu‘a ore. Mai tera atoa te taata i teie mahana, noa ’tu te mau haapapuraa e te ora nei tatou i te mau mahana hopea o teie nei faanahoraa o te mau mea. E mai ta te aposetolo Petero i tohu, te faaooo nei te feia tâhitohito i te feia e haapao nei i ta te Atua faaararaa. (A taio i te Petero 2, 3:3-6.) Mea papu e ua faaooo-atoa-hia Noa e to ’na utuafare.

22 Afea teie mau faaoooraa i te faaearaa? Te faatia ra te aamu e tomo a‘era Noa e to ’na utuafare e te mau animara i roto i te araka, e ‘opani ihora Iehova i te uputa.’ Te feia faaooo tei ite atu i te reira, eita e ore e ua mamû roa. Aita ana‘e, na te ûa ïa i haamamû ia ratou. Tera ûaraa mai, mea topa maitai! Tera ûa-noa-raa e nina roa ’tura te fenua taatoa mai ta Iehova i parau.—Gen. 7:16-21.

23. (a) No te aha tatou e parau ai e aita Iehova i mauruuru i te poheraa te feia ino i te tau o Noa? (b) No te aha e haerea paari ai ia pee i te faaroo o Noa?

23 Ua mauruuru anei Iehova i te poheraa tera mau taata ino? Aita! (Ezk. 33:11) Ua vaiiho hoi oia i te taime ia taui ratou, a rave atu ai i te maitai. E ora mai anei ïa ratou ahani ratou i na reira? E. A hi‘o na ia Noa, ua ora mai o ’na no te mea ua au to ’na haerea i te Atua. Ua auraro maite o ’na ia ’na. Mea na reira ïa te faaroo o Noa i te faahaparaa i to te ao. Ua faaite roa mai to ’na faaroo i te ino o te taata o to ’na ra tau. E maoti taua faaroo ra i ora mai ai o ’na e to ’na utuafare. Ia pee oe i te faaroo o Noa, e faaora-atoa-hia oe e te feia ta oe e here ra. No reira, ia au atoa ïa to oe haerea i te Atua ra o Iehova, a riro noa ’tu ai oe ei hoa no ’na e a muri noa ’tu!

^ par. 7 I tera ra tau, e ora maoro na te taata. Mea fatata hoi ratou i te ora taata tia roa ta Adamu raua Eva i ere. Mea oraora maitai ïa ratou.

^ par. 15 Ua pii Lameha i ta ’na tamaroa ia Noa, “Mâha te rohirohi” aore ra “Tamahanahanaraa” paha te auraa. Ua tohu oia e na roto ia Noa, ia au i te auraa o to ’na i‘oa, e mâha ’i te rohirohi o te huitaata i te faaapuraa i te hoê fenua tei faainohia. (Gen. 5:28, 29) Ua pohe Lameha hou a tupu ai teie parau tohu. Ua pohe paha to Noa mama e to ’na mau taeae e tuahine i te diluvi.

No te ite atu â

Noa: Ua faaorahia o ’na e e hitu atu

Mea nafea Noa e to ’na utuafare i ora mai ai i te tau fifi roa ’‘e o te taata?