Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE PITI AHURU MA PITI

Ua tapea oia i to ’na taiva ore tei tamatahia

Ua tapea oia i to ’na taiva ore tei tamatahia

1, 2. Eaha paha ta Petero i mana‘o a paraparau noa ’i Iesu i Kaperenaumi, eaha râ tei tupu?

HI‘O noa ihora Petero i te hoho‘a mata o te feia e faaroo ra ia Iesu i roto i te sunago i Kaperenaumi. Tei te pae apatoerau o te miti no Galilea tera oire, i reira Petero i faaea ’i e tai‘a atoa ’i ei imiraa na ’na. Mea rahi to ’na hoa, fetii, e hoa ohipa i taua oire ra. Ua mana‘o paha Petero e e farii atoa to Kaperenaumi e o Iesu te Mesia, a oaoa roa ’i ratou i te faaroo i te orometua haapii rahi roa ’‘e ia paraparau mai no nia i te Basileia o te Atua. Mea ê roa te ohipa i tupu i tera mahana.

2 Mea rahi tei faaea i te faaroo ia Iesu. Ua faaino vetahi i ta ’na poroi. Te mea râ i huru ê roa ’i Petero, te huru ïa o te tahi mau pǐpǐ a Iesu. Aita ratou i mauruuru faahou i te pue parau mau apî ta ’na i haapii atu. Ua horuhoru ratou, ua riri atoa. Ua parau roa vetahi e e parau riaria ta Iesu. Aita ratou i hinaaro faahou e faaroo atu, faarue maira i te sunago e faaea ’tura i te pee ia Iesu.—A taio i te Ioane 6:60, 66.

3. Ua tauturu to Petero faaroo ia ’na ia aha?

3 E ere mea ohie no Petero e no te tahi atu mau aposetolo. Aita i taa maitai ia ’na ta Iesu i parau i tera mahana. Aita ana‘e e tatararaa, e au iho â ïa e mea huru ê roa ta Iesu mau parau. Ua nahea Petero? E ere a tahi ra a tamatahia ’i to ’na taiva ore i to ’na Fatu, e ere atoa teie i te tamataraa hopea. E hi‘o mai tatou mea nafea to Petero faaroo i te tautururaa ia ’na ia tapea i to ’na taiva ore noa ’tu tera mau fifi.

Taiva ore i to vetahi ê taivaraa

4, 5. Eaha ta Iesu i rave na i maere ai te taata?

4 E pinepine Petero i te maere ia Iesu. I rave na e i parau atoa na Iesu i te tahi mau mea i maere ai te taata. Hoê mahana na mua ’tu, i faatamaa semeio na o ’na e tausani taata. Hinaaro  a‘era taua nahoa ra e faaarii ia ’na. Aita râ oia i farii, e faaue atura i ta ’na mau pǐpǐ ia fano i Kaperenaumi. Mea rahi tei maere. A fano ai te mau pǐpǐ i taua po ra, ua maere atoa ratou i to Iesu haereraa na nia i te miti mataare no Galilea, a horoa ’tu ai ia Petero i te hoê haapiiraa faufaa no nia i te faaroo.

5 Ia poipoi a‘e, ite ihora te mau pǐpǐ e ua pee mai tera nahoa ia ratou na nia i te poti. No to ratou noa hinaaro ia faatamaa semeio Iesu ia ratou i haere mai ai ratou, e ere râ no te faaroo i ta ’na haapiiraa. Ua faahapa ’tu Iesu no to ratou nounou i te mau mea materia. (Ioa. 6:25-27) Tamau atura te aparauraa i te sunago i Kaperenaumi, i reira to Iesu haapiiraa ’tu i te hoê parau mau faufaa roa ta te taata i huru ê.

6. Ua faaau Iesu ia ’na i te aha, e eaha te huru o te feia e faaroo ra ia ’na?

6 Aita Iesu i hinaaro ia haere mai te taata ia ’na no te mea noa e nehenehe ta ’na e faatamaa ia ratou. Ua hinaaro râ oia ia taa ia ratou e e horoa ’tu te Atua i te ora mure ore ia faatupu ratou i te faaroo i te tusia o Iesu, a pee atu ai i to ’na hi‘oraa. No reira oia i faaau ai ia ’na i te mâna, te maa no te ra‘i mai i te tau o Mose. I to vetahi râ faainoraa mai, faataa ’tura oia e mea titauhia ia amu i to ’na tino e ia inu i to ’na toto e noaa ’i te ora. I reira iho, riri roa a‘era ratou. Na ô atura vetahi: “E parau riaria te[na].” Faaoti a‘era e rave rahi pǐpǐ a Iesu e faaea i te pee ia ’na. *Ioa. 6:48-60, 66.

7, 8. (a) Aita â i taa maitai atura ia Petero te aha? (b) Mea nafea to Petero pahonoraa ia Iesu?

7 E o Petero? Eaha ta ’na i rave? Eita e ore e ua huru ê atoa o ’na i ta Iesu parau. Aita â i taa maitai atura ia ’na e ia tupu te hinaaro o te Atua, ia pohe iho â Iesu. Ua hinaaro anei râ o ’na e faarue ia Iesu? Aita. E huru maitai faufaa to ’na i ore ai o ’na i pee i tera mau pǐpǐ e taui hanoa te mana‘o.

8 Fariu maira Iesu i ta ’na na 12 aposetolo e na ô maira: “E haere atoa anei outou?” (Ioa. 6:67) O Petero tei pahono atu. E pinepine o ’na te paraparau na mua, no te mea paha o ’na te mea paari a‘e. Noa ’tu eaha te tumu, o ’na te mea taiâ ore roa ’‘e ia faaite roa ’tu i to ’na mana‘o. I tera taime, e faahiti o ’na i to ’na mana‘o ma teie mau parau nehenehe e ore roa e moehia: “Fatu, e haere tia matou ia vai ra? tei ia oe hoi te parau o te ora mure ore.”—Ioa. 6:68.

9. No te aha tatou e parau ai e e taata taiva ore Petero?

 9 Parau putapû teie, e ere anei? Maoti to ’na faaroo ia Iesu, ua nehenehe Petero e faahotu i te hoê huru maitai faufaa roa: te taiva ore. Ua ite maitai oia e o Iesu ana‘e te Faaora ta Iehova i horoa mai, e e faaora Iesu maoti ta ’na mau parau, oia hoi ta ’na mau haapiiraa no nia i te Basileia o te Atua. Ua ite o ’na e noa ’tu e aita i taa ia ’na te tahi mau mea, maoti ana‘e Iesu e fana‘o ai o ’na i ta te Atua farii maitai e te ora mure ore.

Pee maite ana‘e i ta Iesu mau haapiiraa, noa ’tu e aita e tuati ra i to tatou mana‘o aore ra ta tatou e au a‘e

10. E nafea ia pee i to Petero taiva ore?

10 Mai tera atoa anei oe? Mea rahi i teie mahana e parau ra e mea here na ratou ia Iesu, te taiva nei râ ratou ia ’na. No te faahotu i te taiva ore mau ia ’na, e titauhia ia au tatou, mai ia Petero, i ta ’na mau haapiiraa. Oia atoa ia haapii mai, ia taa i te auraa e ia faaohipa i te reira, noa ’tu e aita tatou e taa ra aore ra aita e tuati ra i to tatou mana‘o aore ra ta tatou e au a‘e. Mea faufaa roa te taiva ore ia hinaaro tatou e ora e a muri noa ’tu. Tera hoi ta Iesu e hinaaro ra no tatou.—A taio i te Salamo 97:10 i roto i te nota i raro i te api. *

Taiva ore i to ’na a‘oraahia

11. Ihea to Iesu aratairaa i ta ’na mau pǐpǐ? (A hi‘o atoa i te nota i raro i te api.)

11 I muri rii a‘e i taua tupuraa ra, aratai ihora Iesu i ta ’na mau aposetolo e te tahi mau pǐpǐ i te pae apatoerau. Mea atea taua tere ra. Ua na nia ratou i te purumu e tae atu ai i nia, i te mau oire rii i pihai iho ia Kaisarea Philipi. * I te tahi taime, mai te miti no Galilea ’tu, e itehia ’tu te tupuai tapo‘ihia i te hiona o te mou‘a Heremona, i te otia o te Fenua tǎpǔhia i te pae apatoerau. A piri noa ’tu ai ratou, mea teitei atu â ïa te mou‘a. Ia hi‘o mai ratou i te pae apatoa, mea nehenehe roa te Fenua tǎpǔhia. I reira ïa to Iesu uiraa i te hoê uiraa faufaa i ta ’na mau pǐpǐ.

12, 13. (a) No te aha Iesu i hinaaro ai e ite i ta te taata e parau ra no ’na? (b) Mea nafea to Petero pahonoraa ia Iesu, ei faaiteraa i to ’na faaroo mau?

12 Ui maira Iesu: “O vai au nei i ta te taata nei parauraa?” A feruri na ia Petero e hi‘o ra i to Iesu mata, a ite atu ai i te hamani maitai e te ite rahi o to ’na Fatu! Ua hinaaro Iesu e ite  eaha ’tura te mana‘o o te taata ia ’na i muri a‘e i to ratou iteraa e faarooraa ia ’na. Pahono atura te mau pǐpǐ i ta ’na uiraa, ma te faahiti i te mau mana‘o hape e parauhia ra no ’na. Ua hinaaro râ Iesu e ite hau atu â. Ua hape atoa anei ta ’na mau pǐpǐ, mea piri roa hoi ia ’na? Ui maira oia: “O vai râ vau i ta outou na parauraa?”—Luka 9:18-20.

13 O Petero â tei pahono oioi atu. Ua parau roa o ’na i ta te tahi atu mau pǐpǐ i mana‘o i roto i to ratou aau, oia hoi: “O te Mesia oe, te Tamaiti a te Atua ora.” A feruri na ia Iesu e haapopou ra ia ’na ma te mauruuru! Haamana‘o ihora oia ia Petero e e ere na te taata, na Iehova râ i faataa maitai i taua parau mau faufaa roa ra i te feia e faaroo mau to ratou. Aua‘e Iehova i taa ’i ia Petero o vai te Mesia tei tiai-maoro-hia na!—A taio i te Mataio 16:16, 17.

14. Eaha te mau hopoia rahi ta Iesu i horoa na Petero?

14 Te faahiti ra te tahi mau parau tohu i tahito ra i te Mesia mai te hoê ofai tei faaruehia e te feia patu. (Sal. 118:22; Luka 20:17) Te mana‘o ra Iesu i taua mau parau tohu ra i to ’na faaiteraa e e patu Iehova i te hoê amuiraa i nia i te ofai, aore ra te pǎpǎ, oia hoi te Mesia ta Petero i parau mai nei. Horoa maira oia na Petero te tahi mau fana‘oraa taa ê i roto i taua amuiraa ra. Aita o ’na i faateitei ia Petero i nia a‘e i te tahi atu mau aposetolo, mai ta vetahi e mana‘o ra, ua horoa ’tu râ i te mau hopoia: “te mau taviri o te basileia.” (Mat. 16:18, 19) Na Petero ïa e iriti i te tiaturiraa e ô atu i roto i te Basileia o te Atua no e toru pǔpǔ taata: te ati Iuda na mua, to Samaria i muri iho, e i te pae hopea te feia e ere i te ati Iuda.

15. No te aha Petero i tama‘i ai ia Iesu, e eaha ta ’na i parau?

15 Ua parau râ Iesu i muri a‘e e mea rahi te titauhia i te feia mea rahi tei horoahia ’tu. (Luka 12:48) Te ohipa ïa i tupu i nia ia Petero. Ua tamau â Iesu i te faaite i te pue parau mau faufaa roa no nia i te Mesia, oia atoa fatata o ’na i te haere i Ierusalema, i reira oia e hamani-ino-hia ’i e e pohe ai. Horuhoru ihora Petero i te faarooraa i tera parau. Aratai rii ê ihora o ’na ia Iesu e tama‘i atura ia ’na, a na ô ai: “Eiaha roa ïa, e te Fatu, eiaha roa oe ia na reirahia.”—Mat. 16:21, 22.

16. (a) Eaha ta Iesu i parau no te a‘o ia Petero? (b) Eaha te haapiiraa faufaa e huti mai i ta Iesu a‘oraa?

 16 Ua hinaaro paha Petero e tamahanahana ia Iesu. Ua maere râ o ’na i ta Iesu pahonoraa. Fariu ê maira Iesu ia Petero, hi‘o maira i te tahi atu mau pǐpǐ, o te mana‘o atoa ra paha mai ia Petero, e na ô ihora: “Haere na muri mai ia ’u, e Satani! E turoriraa oe no ’u, e ere hoi to mana‘o i to te Atua, to te taata râ.” (Mat. 16:23, Traduction du monde nouveau; Mar. 8:32, 33, MN) E haapiiraa faufaa teie no tatou pauroa. Mea ohie roa ia vaiiho i te mana‘o taata ia na nia a‘e i to Iehova mana‘o. Ia na reira tatou, noa ’tu e no te hinaaro e tauturu, e riro tatou i te faaitoito i te hoê taata ia rave i te hinaaro o Satani, eiaha râ to te Atua. Ua nahea ’tura râ Petero?

17. Eaha te auraa o ta Iesu parau “haere na muri mai” ia ’na?

17 Aita Iesu e parau ra e o Satani iho â Petero. Eita e ore e ua taa ia Petero te reira. Mea ê hoi ta Iesu i pahono ia ’na i ta ’na i pahono ia Satani. Ua na ô oia ia Petero: “Haere na muri mai ia ’u.” Ia Satani râ: “E haere ê atu oe.” (Mat. 4:10) Aita Iesu e tiahi ra i ta ’na aposetolo, e maitai rahi hoi to ’na. Ua faaafaro noa râ o ’na i to Petero huru feruriraa tano ore. Ia faaea hoi Petero i te riro ei turoriraa i mua ia Iesu, ia na muri mai râ i to ’na Fatu ei pǐpǐ e turu ia ’na.

Ia farii tatou ma te haehaa i te a‘oraa e ia huti mai i te haapiiraa, e piri noa ’tu â ïa tatou ia Iesu e ia Iehova

18. (a) Mea nafea to Petero faaiteraa i te taiva ore? (b) E nafea ia pee i to Petero hi‘oraa?

18 Ua mârô anei Petero, ua riri, aore ra ua faariri anei? Aita. Ua farii oia ma te haehaa i te a‘oraa. Ua faaite faahou ïa oia i te taiva ore. I te tahi taime, mea tano iho â ia a‘ohia te mau Kerisetiano atoa. Ia farii tatou ma te haehaa i te a‘oraa e ia huti mai i te haapiiraa, e piri noa ’tu â ïa tatou ia Iesu Mesia e to ’na Metua te Atua ra o Iehova.—A taio i te Maseli 4:13.

Ua tapea Petero i to ’na taiva ore i to ’na a‘oraahia

Haamaitaihia to ’na taiva ore

19. Eaha te parau maere ta Iesu i faahiti, e eaha paha ta Petero i uiui?

19 Faahiti atura Iesu i te tahi atu parau maere: “Oia mau teie ta ’u e parau atu ia outou nei, O te tahi pae i teie nei feia e tia . . . nei, e ore ïa e ite i te pohe, e ite ai ratou i te Tamaiti a te taata i te taeraa mai i to ’na ra basileia.” (Mat. 16:28) Papu roa, ua  uiui Petero eaha ta Iesu e hinaaro ra e parau. Ua uiui paha oia e e fana‘o anei o ’na i tera haamaitairaa taa ê, no a‘o etaeta mai nei hoi Iesu ia ’na.

20, 21. (a) A faataa na i ta Petero i ite orama. (b) Eaha ’tura ïa ta Petero i taa?

20 Fatata hoê hebedoma i muri a‘e, ua aratai Iesu ia Iakobo, Ioane e Petero i nia i “te hoê mou‘a teitei,” peneia‘e te mou‘a Heremona e 25 kilometera te atea. E po paha taua taime ra, te faatoa noa ra hoi na toru aposetolo eiaha e taoto. A pure ai râ Iesu, tupu ihora te tahi ohipa, a pee atu ai to ratou varea taoto.—Mat. 17:1; Luka 9:28, 29, 32.

21 Haamata ihora to Iesu hoho‘a mata i te anaana, mai te anaana o te mahana. Uouo a‘era to ’na ahu e anaana roa ’tura. Fa maira e piti taata: te faahoho‘a ra hoê ia Mose, e te tahi atu ia Elia. Paraparau atura raua ia Iesu no nia i to ’na ‘faarueraa mai i teie nei ao, o te tupu i Ierusalema.’ Te parau ra ïa raua i to Iesu  poheraa e tia-faahou-raa mai. Taa ’tura ia Petero e ua hape roa o ’na i te mana‘oraa e e ore Iesu e hamani-ino-hia, a pohe atu ai.—Luka 9:30, 31MN.

22, 23. (a) Mea nafea to Petero faaiteraa i te aau tae e te hamani maitai? (b) Eaha te haamaitairaa ta Petero, Iakobo e Ioane i fana‘o â i taua po ra?

22 Mana‘o ihora Petero e faaô i roto i taua orama faahiahia roa ra. I to ’na hi‘oraa ’tu, e au ra e te reva ra Mose raua Elia. Ua imi paha o ’na i te tapea mai ia raua. Na ô atura ïa oia: “Orometua, e mea maitai ia parahi tatou i ǒ nei; e faatia matou i te fare autâ [aore ra fare ie] e toru a‘e, no oe e tahi, no Mose e tahi, e no Elia e tahi.” Parau mau, e orama teie, e ua pohe ê na tera na tavini a Iehova ahia ’tura maororaa. Aita ïa e faufaa te fare ie no raua. Ua paraparau ïa Petero ma te ore e feruri na mua. Tera râ, e taata aau tae o ’na e te hamani maitai. Eita anei oe e au i te hoê taata mai tera?—Luka 9:33.

Ua haamaitaihia Iakobo, Ioane, Petero, ua ite ratou i te hoê orama faahiahia roa

23 Ua fana‘o â Petero, Iakobo e Ioane i te tahi atu haamaitairaa i taua po ra. Fa maira te hoê ata e tapo‘i maira ia ratou. Faaroohia ’tura te hoê reo no roto mai i taua ata ra, te reo ïa o Iehova e na ô ra: “O tau Tamaiti here teie, a faaroo ia ’na.” Ore atura te orama, e vai noa ’tura na aposetolo e o Iesu, o ratou ana‘e, i nia i te mou‘a.—Luka 9:34-36.

24. (a) Mea nafea Petero i te faufaaraahia i te orama o te faahuru-ê-raa? (b) E nafea tatou e faufaahia ’i i te orama o te faahuru-ê-raa?

24 E ô taua orama ra piihia te faahuru-ê-raa no Petero e no tatou! E rave rahi matahiti i muri a‘e, ua papai oia e mea fana‘o o ’na i taua po ra i te ite-mata-raa i to Iesu hanahana ei Arii i te ra‘i a muri a‘e. Ua haapapu taua orama ra e e tupu iho â e rave rahi parau tohu o te Parau a te Atua, e ua haapuai i to Petero faaroo ia mau papu o ’na i mua i te mau tamataraa i muri mai. (A taio i te Petero 2, 1:16-19.) E haapuai atoa te reira i to tatou faaroo, ia tapea tatou mai ia Petero i to tatou taiva ore i te Fatu ta Iehova i faatoroa i nia ia tatou, ia haapii mai tatou ia ’na, ia farii i ta ’na a‘oraa e ia pee noa ia ’na ma te haehaa.

^ par. 6 Oioi roa te tauiraa te huru o te nahoa. Hoê mahana na mua ’tu, i parau na ratou ma te aau tae e e peropheta iho â Iesu na te Atua. I roto râ i te sunago, mea ê roa ïa te ta‘iraa reo.—Ioa. 6:14.

^ par. 10 Salamo 97:10: “Outou o tei hinaaro ia Iehova ra, ia riaria outou i te ino; te tiai ra oia i . . . to ’na feia mo‘a [aore ra taiva ore] ra; e te faaora ra oia ia ratou i te rima o te paieti ore.”

^ par. 11 Mai te miti no Galilea ’tu, e 210 metera i raro a‘e i te faito o te miti, i haamata ’i to ratou tere e 50 kilometera, na roto i te mau tuhaa fenua nehenehe roa, a tae atu ai i te hoê teiteiraa e 350 metera.