Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE AHURU MA VAU

‘Ua feruri maite oia i roto i to ’na aau’

‘Ua feruri maite oia i roto i to ’na aau’

1, 2. A faataa na i to Maria tere, e no te aha e ere ai mea ohie no ’na.

TE IMI noa ra Maria e nahea ia parahi maitai e to ’na opu rahi i nia i te asini e uta ra ia ’na ahia ’tura hora. To mua noa mai Iosepha e haere noa ra. Mea atea te vahi ta raua e haere ra, i Betelehema roa. I te tahi taime, e hauti te pêpe i roto i te opu o Maria.

2 I tera taime, ia au i te Bibilia, ua fatata roa Maria i te fanau. (Luka 2:5, 6) A na pihai iho atu ai Iosepha raua Maria i te mau faaapu, peneia‘e ua faaea te tahi mau taata faaapu i te utaru aore ra i te ueue i te huero, e ua uiui e te haere ra tera vahine hapû ihea. No te aha Maria i faarue ai i to ’na oraraa i Nazareta?

3. Eaha te haamaitairaa ta Maria i fana‘o, e eaha ta tatou e hi‘o mai?

3 Tau ava‘e na mua ’tu, ua fana‘o tera potii ati Iuda i te hoê haamaitairaa otahi i roto i te aamu: e fanau mai i te tamarii o te riro mai ei Mesia, te Tamaiti ïa a te Atua! (Luka 1:35) Fatata roa râ oia i te fanau i titauhia ’i ia rave oia i taua tere ra. I reira oia i û ai i te tahi mau tupuraa o tei tamata i to ’na faaroo. E hi‘o mai tatou eaha tei tauturu ia ’na ia tapea i te hoê faaroo puai.

Tere i Betelehema

4, 5. (a) No te aha Iosepha raua Maria i haere ai i Betelehema? (b) Ua faatupu ta Kaisara faaueraa mana i teihea parau tohu?

4 E ere o Iosepha raua Maria ana‘e tei rave i taua tere ra. I faaue noa a‘enei o Kaisara Auguso i te taata atoa ia haere i to ratou oire fanauraa e tapao i to ratou i‘oa. Eaha ta Iosepha i rave? Te na ô ra te faatiaraa e ua ‘haere atoa ’tura Iosepha mai roto atu i te oire o Nazareta i Galilea, i te oire o Davida i Iudea parauhia Betelehema, no te mea no te huaai e no te fetii oia no Davida.’—Luka 2:1-4.

5 E ere i te hoê tupuraa maere i horoa ’i Kaisara i ta ’na faaueraa mana i tera taime. I faaite atea na te hoê parau tohu papaihia e 700 matahiti na mua ’tu e e fanauhia te Mesia i Betelehema.  Teie râ, te vai ra te hoê oire tera atoa to ’na i‘oa, 11 noa kilometera i te atea ia Nazareta. Ua haapapu râ te parau tohu e e fanauhia te Mesia i Betelehema Epherata. (A taio i te Mika 5:2.) Na Samaria ’tu, mai Nazareta e tae roa i taua oire iti ra, 130 ïa kilometera te atea na nia i te mau aivi. I tera Betelehema i titauhia ’i ia haere Iosepha. Tera hoi te oire tumu o te opu fetii o te arii Davida, to Iosepha atoa ïa raua Maria.

6, 7. (a) No te aha e ere ai mea ohie no Maria ia haere i Betelehema? (b) Ei vahine faaipoipo, eaha ta Maria i faaoti e rave? (A hi‘o atoa i te nota i raro i te api.)

6 Ua faaoti Iosepha e auraro i te faaueraa mana a Kaisara. E pee atoa anei Maria ia ’na? Mea fifi hoi taua tere ra e rave rahi mahana no ’na. Tei te omuaraa o Atopa paha, e riro ïa i te ûa a fatata ’i te hope te tau mǎrô. Hau atu â, mea haapauma te vahi ta raua e haere. Peneia‘e e titauhia ia faafaaea pinepine Maria. Mea hinaaro a‘e atoa na te hoê vahine apî ua fatata i te fanau e faaea i te fare. E nehenehe ïa to ’na fetii e to ’na mau hoa e tauturu ia ’na ia haamata te mauiui fanau. Papu roa, ua hinaaro mau â Maria i te itoito no taua tere ra.

E ere mea ohie to raua haereraa i Betelehema

7 Noa ’tu râ, ua papai Luka e “haere a‘era Iosepha raua Maria . . . e tapao i to raua i‘oa.” Ua haapapu atoa oia: “Iosepha raua Maria ta ’na vahine faaipoipo.” (Luka 2:4, 5, Traduction du  monde nouveau) Ei vahine faaipoipo, eita ta ’na e nehenehe e faaoti mai ta ’na e hinaaro. * O Iosepha te upoo o te utuafare, e ua turu Maria ia ’na i roto i ta ’na mau faaotiraa, a riro atu ai ei tauturu no ta ’na tane. Te hopoia ïa ta te Atua i horoa na te vahine. Ua auraro Maria i ta ’na tane ma te aau tae. E faaiteraa te reira i to ’na faaroo.

8. (a) Eaha paha te tahi atu tumu i pee ai Maria ia Iosepha i Betelehema? (b) No te aha e faaitoitoraa ’i to Maria hi‘oraa no tatou?

8 Eaha paha te tahi atu tumu i auraro ai Maria? Aita te Bibilia e parau ra e ua ite anei o ’na i te parau tohu no nia i te fanauraa mai o te Mesia i Betelehema. Peneia‘e ua ite o ’na, i te mea e ua ite te mau aratai haapaoraa e te taata atoa. (Mat. 2:1-7; Ioa. 7:40-42) Ua ite maitai atoa Maria i te mau Papai. (Luka 1:46-55) Noa ’tu eaha te tumu i faaoti ai Maria e haere i Betelehema, no te auraro anei i ta ’na tane, no te hoê faaueraa mana, no ta Iehova parau tohu, aore ra no teie mau tumu atoa, e hi‘oraa maitai roa ta ’na i vaiiho mai. Mea faufaa roa no Iehova te mau tane e te mau vahine haehaa e te auraro. E faaitoitoraa ïa te hi‘oraa o Maria no  tatou, te mana‘o ra hoi te rahiraa i teie mahana e aita e faufaa ia auraro.

Te fanauraa o te Mesia

9, 10. (a) A piri atu ai raua ia Betelehema, ua feruri paha Maria raua Iosepha i te aha? (b) Ihea to Iosepha raua Maria faaearaa, e no te aha?

9 Eita e ore e ua topa te hau o Maria i to ’na iteraa ’tu ia Betelehema. A na nia ’i raua i te mau aivi, a na pihai iho atu ai i te mau tumu olive, o te horoa mai i te mau maa hotu hopea o te matahiti, ua feruri paha Maria raua Iosepha i te aamu o Betelehema. E oire iti haihai roa teie ia amuihia i roto i te mau oire i Iuda, mai ta Mika te peropheta i parau. I taua râ oire ra i fanauhia ’i Boaza, Naomi, e Davida hau atu i te 1 000 matahiti na mua ’tu.

10 I to Maria raua Iosepha taeraa ’tu, mea taata roa. Ua tae ê na mai vetahi no te tapao i to ratou i‘oa, ua î ê na ïa te fare tipaeraa. * Aita ’tu ïa e ravea maori râ te faaearaa i roto i te hoê fare vairaa animara no taua po ra. A feruri na ïa ia Iosepha e haapeapea ra a ite ai oia e te haamata ra te mauiui fanau o Maria, a tahi ra hoi, e te u‘ana noa ’tu ra. I roto ïa i taua fare vairaa animara ra e fanau mai ai Maria i ta ’na pêpe.

11. (a) No te aha e taa oioi ai i te mau mama ta Maria i faaruru? (b) E “matahiapo” Iesu i roto i teihea auraa?

11 E taa oioi i te mau mama ta Maria i faaruru. Hau rii i te 4 000 matahiti na mua ’tu, i faaite ê na Iehova e e fanau mai te vahine ma te mauiui no te hara no ǒ mai ia Adamu ra. (Gen. 3:16) Eita e ore e ua mauiui atoa Maria. Aita Luka i faataa mai i te reira. Teie noa ta ’na i papai: “Fanau ihora oia i ta ’na tamaiti matahiapo.” (Luka 2:7) Ta ’na tamaiti matahiapo? E, o ’na te matahiapo o na hitu tamarii a Maria. (Mar. 6:3) Mea taa ê râ teie tamaiti. E ere noa o ’na ta Maria matahiapo, o ’na atoa râ ta Iehova “matahiapo o tei poietehia,” te Tamaiti otahi ta te Atua iho i poiete!—Kol. 1:15MN.

12. Ihea Maria i te tuuraa ’tu i ta ’na pêpe, e eaha te taa-ê-raa i rotopu i te mau hoho‘a no nia i te fanauraa o Iesu e te tupuraa mau?

12 I taua taime ra o te faatiaraa, hiti maira te hoê parau matau-maitai-hia: “Vehî ihora [Maria i ta ’na pêpe] i te ahu, tuu atura i roto i te Phatene.” (Luka 2:7) Ia hi‘ohia te mau hoho‘a no nia i te fanauraa o Iesu, ua faanehenehe-roa-hia te aamu. Te tanoraa râ, e farii maa te phatene i roto e paruhia ’i te animara. A  haamana‘o e to roto Iosepha, Maria e te pêpe i te hoê fare vairaa animara. Ua ite tatou pauroa e mea hau‘a roa teie vahi e mea repo. O vai ïa metua e hinaaro ia fanauhia mai ta ratou pêpe i te hoê vahi mai tera? E hinaaro iho â te rahiraa o te mau metua i te mea maitai roa ’‘e no ta ratou mau tamarii. Hau atu â ïa no Maria raua Iosepha i nia i te Tamaiti a te Atua!

13. (a) No te aha tatou e parau ai e ua rave Maria raua Iosepha i te mea maitai roa ’‘e? (b) E nafea te mau metua e pee ai i te hi‘oraa o Iosepha raua Maria?

13 Aita râ Maria raua Iosepha i toaruaru no teie mau tupuraa. Ua rave noa râ raua i te mea maitai roa ’‘e e maraa ia raua. A tapao na, ei hi‘oraa, mea nafea to Maria raveraa i ta ’na pêpe. Ua vehî maitai oia ia ’na i te ahu e ua tuu mǎrû noa ’tu i roto i te phatene ia taoto o ’na, a hi‘o maitai ai e ua po‘i maitai o ’na ia ore oia ia putahia i te toetoe. I roto atoa i teie huru tupuraa, ua haapao maitai roa o ’na i ta ’na tamaiti. Ua ite atoa râ raua Iosepha e te mea faufaa roa ’‘e ta raua e nehenehe e rave no teie tamarii, te haapiiraa ïa ia ’na ia here ia Iehova. (A taio i te Deuteronomi 6:6-8.) Tera atoa te fa matamua roa a te mau metua i teie mahana, a rave ai ratou i ta ratou mau tamarii i roto i teie nei ao tei atea ê i te Atua.

Ua faaitoito te mau tiai mamoe ia Maria raua Iosepha

14, 15. (a) No te aha te mau tiai mamoe i hinaaro ru ai e ite i te pêpe? (b) Eaha ta te mau tiai mamoe i rave i muri a‘e i to ratou iteraa i te pêpe no fanau-noa-hia mai ra?

14 Maniania taue ihora i roto i te fare vairaa animara. Ua tomo ru atu te tahi mau tiai mamoe no to ratou hinaaro iti rahi e ite ia Iosepha, ia Maria, te pêpe iho â râ. Ua oaoa roa ratou, e ite-roa-hia ’tu i nia i to ratou hoho‘a mata. Na te aivi mai ratou i te haere-ru-raa mai, i tiai na hoi ratou i ta ratou mau nǎnǎ. * Faatia maira ratou i na metua, tei maere roa, i te ohipa faahiahia roa i tupu noa a‘enei. I te tuiraa po, ua fa mai te hoê melahi ia ratou. Anaana maira to Iehova hanahana e ati a‘e ia ratou, e parau maira te melahi e no fanau-noa-hia mai ra te Mesia i Betelehema. E ite ratou i te aiû i roto i te hoê phatene, ua vehîhia oia i te ahu. Tupu atura te tahi mea faahiahia ’tu â: fa atoa maira e rave rahi melahi e arue atura i te Atua!—Luka 2:8-14.

 15 E ere ïa mea maere i haere ru mai ai taua mau tiai mamoe haehaa ra i Betelehema! Eita e ore e ua faahiahia roa ratou i te iteraa i te pêpe no fanau-noa-hia mai ra e taoto ra, mai ta te melahi i parau. Aita ratou i tapea i teie parau apî oaoa na ratou noa. “Faaite hua ’tura ratou i tei parauhia mai ia ratou . . . E te feia atoa i faaroo ra, maere ana‘e ihora i te mau parau i parauhia mai e te mau tiai mamoe.” (Luka 2:17, 18) Mea hi‘o ino te mau aratai haapaoraa i tera tau i te mau tiai mamoe. O Iehova râ, ua haafaufaa ïa i taua mau taata haehaa e te faaroo ra. E o Maria, eaha to ’na huru?

Ua haafaufaa Iehova i tera mau tiai mamoe haehaa e te faaroo

16. No te aha i puai noa ’i to Maria faaroo?

16 Papu maitai e ua rohirohi roa Maria no to ’na fanauraa mai i ta ’na pêpe. Noa ’tu râ, ua faaroo maite oia. Hau atu â, “haapao maite atura . . . Maria i taua mau parau ra, i te feruri-maite-raa i roto i to ’na aau.” (Luka 2:19) Ua feruri hohonu iho â teie vahine apî, ua ite oia e e poroi faufaa roa ta taua mau melahi ra. Ua hinaaro to ’na Atua ra o Iehova ia ite e ia taa ia ’na o vai ta ’na tamaiti e eaha ta ’na e rave. No reira ïa Maria i faaroo ai e i tapea maite atoa ’i i ta ’na i faaroo mai no te feruriruri â i te reira a mairi ai te mau ava‘e e te mau matahiti. Tera te hoê tumu rahi i puai noa ’i to Maria faaroo i te roaraa o to ’na oraraa.—A taio i te Hebera 11:1.

Ua faaroo maitai Maria i te mau tiai mamoe e ua tapea maite i ta ratou mau parau i roto i to ’na aau

17. E nafea ia pee i to Maria hi‘oraa?

17 E pee anei oe i to Maria hi‘oraa? Ua haapapai Iehova i roto i ta ’na Parau i te pue parau mau faufaa roa. E faufaahia râ oe i te reira mai te peu noa e e haapao maite atu oe. A taio tamau ïa i te Bibilia, eiaha mai te hoê buka aamu, mai te Parau faaurua râ a te Atua. (Tim. 2, 3:16) Ia oti, a tapea maite e a feruri maite mai ia Maria i te pue parau mau no nia ia Iehova i roto i to oe aau. Ia feruriruri oe i ta oe i taio i roto i te Bibilia e ia feruri oe e nafea ia faaohipa maitai atu â i ta Iehova mau a‘oraa, e atuatu ïa oe i to oe faaroo o te rahi mai.

Te tahi atu â mau parau e tapea maite

18. (a) Eaha ta Maria raua Iosepha i rave i te 8raa o te mahana o te aiû? (b) Eaha ta te tusia a Iosepha raua Maria i pûpû i te hiero e faaite ra?

18 I te 8raa o te mahana o te aiû, ua haaperitome Maria raua Iosepha ia ’na, ia au i te ture a Mose, e mairi atura ia ’na i te i‘oa  ra Iesu, mai tei faauehia ’tu. (Luka 1:31) E i te 40raa o te mahana, afai atura raua ia ’na i te hiero i Ierusalema fatata 10 kilometera ia Betelehema. Afai atoa maira raua i te tusia tamâraa faataahia e te ture a Mose. Mea veve râ raua, e piti ïa uupa aore ra e piti uuairao ta raua i hopoi mai. Ua haama anei raua i te oreraa e nehenehe e pûpû, mai te tahi atu mau metua, hoê mamoe oni e hoê uupa? Mai te peu e e, ua tuu ïa raua i to raua haama i te hiti. Teie râ, e faaitoitoraa rahi ta raua i fana‘o i te hiero.—Luka 2:21-24.

19. (a) Teihea mau parau a Simeona ta Maria i tapea â i roto i to ’na aau? (b) Eaha ta Ana i rave i to ’na iteraa ia Iesu?

19 Tapiri maira te hoê tane ruhiruhia o Simeona te i‘oa e parau maira ia Maria i te tahi atu â mau parau ta ’na i tapea â i roto i to ’na aau. I fafauhia na ia ’na e e ite oia i te Mesia hou oia a pohe ai, e ua faaite atu to Iehova varua mo‘a e o Iesu te Faaora tohuhia. Faaara atoa ’tura Simeona ia Maria e e roohia oia i te mauiui ia tae i te hoê mahana, mai te huru ra e e puta roa to ’na aau i te ‘o‘e. (Luka 2:25-35) E ere i te parau oaoa teie, ua tauturu râ te reira ia Maria ia mau papu ia tae mai taua taime mauiui mau ra, e 33 matahiti i muri a‘e. I muri iho, o te hoê peropheta vahine o Ana te i‘oa tei ite ia Iesu, e tei faaite i te parau o taua tamarii ra i te feia atoa e tiai ra ia tiamâ mai Ierusalema.—A taio  i te Luka 2:36, 37; e te irava 38 i roto i te nota i raro i te api. *

Ua faaitoito-rahi-hia Maria raua Iosepha i te hiero i Ierusalema

20. No te aha e faaotiraa maitai ai to Iesu afairaahia i te hiero i Ierusalema?

20 E faaotiraa maitai ta Iosepha raua Maria i rave i to raua afairaa i ta raua aiû i te hiero o Iehova i Ierusalema! Ua haamatau ïa raua ia ’na ia haere i te hiero o Iehova. I reira, ua horoa raua i te mea maitai roa ’‘e na Iehova ia au i tei maraa ia raua, e ua fana‘o i te aratairaa e te faaitoitoraa. Papu maitai, ua faarue mai Maria i te hiero i tera mahana ma te faaroo puai atu â, ua î roa to ’na aau i te pue parau mau faufaa e feruriruri, e faaite atoa ia vetahi ê.

21. E nafea to tatou faaroo e puai atu â ’i mai to Maria?

21 I teie mahana, mea nehenehe mau â ia ite i te mau metua e pee ra i taua hi‘oraa ra. Te afai tamau nei ratou i ta ratou mau tamarii i te mau putuputuraa Kerisetiano. Te horoa nei ratou i te mea maitai roa ’‘e na Iehova, ma te faaitoito i to ratou mau hoa Kerisetiano. E ia faarue mai ratou i te mau putuputuraa, mea puai atu â ïa ratou, mea oaoa ’tu â e mea rahi te parau maitatai e faaite ia vetahi ê. Mea au roa ïa ia putuputu e o ratou atoa! Ia na reira tatou, e puai atu â ïa to tatou faaroo mai to Maria.

^ par. 7 Mea taa ê teie irava e te irava e faatia ra i te tere o Maria na mua ’tu. “Tia a‘era Maria i reira, haere oioi atura” i ǒ Elisabeta. (Luka 1:39) I taua taime ra, e vahine momo‘a-noa-hia Maria, aita â i faaipoipo atura. Peneia‘e aita o ’na i ani i te mana‘o o Iosepha. I muri a‘e râ i to raua faaipoiporaa, na Iosepha i rave i te faaotiraa no to raua tere, e ere na Maria.

^ par. 10 I tera tau, e nohoraa iho â tei faataahia i roto i te mau oire no te mau ratere.

^ par. 14 To rapaeau tera mau tiai e ta ratou mau nǎnǎ. Te haapapu ra ïa te reira i te tuatapaparaa tau o te Bibilia. Aita te Mesia i fanauhia i Titema, ava‘e e tuuhia ’i te mau mamoe i roto i te mau fare piri a‘e i te nohoraa o te fatu o teie mau animara. Ua fanauhia râ o ’na i te omuaraa o Atopa.

^ par. 19 Luka 2:38 (Te Faufaa Api): “Tae maira oia, i reira ra, haamaitai atura i te Fatu, ’e ua haamata ihora i te ta’o i te parau no taua tamaiti iti ra i te feia atoa e tiai i te faaoraraahia o Ierusalema.”