Eaha to roto?

Tapura tumu parau

PENE HOÊ

“Pohe noâ oia, te parau noa mairâ”

“Pohe noâ oia, te parau noa mairâ”

1. (a) No te aha Adamu raua Eva e ta raua mau tamarii i ore ai i nehenehe e tomo i roto i te ô i Edene? (b) Eaha ta Abela e hinaaro mau ra?

 TE HIˈO ra Abela i ta ˈna nǎnǎ mamoe e amu haere ra i te aihere ma te hau i te pae aivi. I te atea roa, te anaana ra te tahi mea. Ua ite Abela e e ˈoˈe ura tera e ohu noa ra no te opani i te taata ia tomo i roto i te ô i Edene. I ora na to ˈna na metua i reira na mua ˈˈe, eita râ raua e ta raua mau tamarii e nehenehe e tomo atu. A feruri na ia Abela o te hiˈo ra i te raˈi i te ahiahi, a puihau mai ai te mataˈi i roto i to ˈna rouru. Te manaˈo ra oia i to ˈna Atua poiete. E piri faahou anei te taata i te Atua? O ta Abela ïa e hinaaro mau ra.

2-4. “Te parau noa mairâ” Abela i roto i teihea auraa?

2 Te paraparau mai ra Abela ia oe i teie mahana. Te faaroo ra oe i to ˈna reo? E na ô paha oe: ‘Eaha ïa huru! Mea maoro hoi te poheraa tera tamaiti a Adamu.’ Tera iho â, ua riro to ˈna tino ei repo a fatata e 6 000 matahiti i teie nei. Te haapii mai ra te Bibilia e ‘aita a te feia pohe e parau itea.’ (Koh. 9:5, 10) Aita atoa i papaihia i roto i te Bibilia te tahi noa ˈˈe parau ta Abela i faahiti. E nafea ïa o ˈna e nehenehe ai e paraparau mai?

3 No nia ia Abela, ua haapapai te Atua i te aposetolo Paulo: “Pohe noâ oia, te parau noa mairâ ïa, i taua faaroo ra.” (A taio i te Hebera 11:4.) Te paraparau nei ïa Abela maoti te faaroo. O ˈna te taata matamua tei faatupu i tera huru maitai faahiahia mau. I te mea e ua faaite oia i te hoê faaroo puai mau, mea ora ïa to ˈna hiˈoraa a nehenehe atu ai tatou e pee i te reira. E faaroo iho â tatou ia Abela ia paraparau mai ia huti mai tatou i te haapiiraa o to ˈna faaroo e ia faaitoito i te pee i to ˈna hiˈoraa.

4 Teie râ, aita i rahi te parau o Abela i roto i te Bibilia. E nafea ïa tatou e haapii mai ai no nia ia ˈna e to ˈna faaroo?

“Te matamua mai â o teie nei ao”

5. No te aha Iesu i faatuati ai i “te matamua mai â o teie nei ao” ia Abela? (A hiˈo atoa i te nota i raro i te api.)

5 Ua fanauhia Abela i muri noa ˈˈe i te poieteraahia na taata matamua. I muri aˈe, ua faatuati Iesu ia Abela i “te matamua mai â o teie nei ao.” (A taio i te Luka 11:50, 51.) O te ao taata e nehenehe e tiamâ mai i te hara ta Iesu i manaˈo. Noa ˈtu e no muri mai Abela ia Adamu, ia Eva e ia Kaina, e au ra e o ˈna te taata matamua ta te Atua i hiˈo e e nehenehe e faatiamâ mai i te hara. a Mea papu e aita hoê aˈe taata hiˈoraa maitai ta Abela e nehenehe e pee a paari mai ai oia.

6. Mai te aha te huru o na metua o Abela?

6 No haamata noa ˈtura hoi te oraraa o te taata, mea peapea roa râ to ratou oraraa. Mea nehenehe hoi Adamu raua Eva e mea peepee atoa. E taata tia roa raua i te omuaraa, a nehenehe atu ai e ora e a muri noa ˈtu. Teie râ, e hara rahi ta raua i rave e ua ite raua i te reira. Ua orure hau raua i te Atua ra o Iehova e ua tiahihia i rapae i to raua nohoraa paradaiso, te ô i Edene. Ua ere atura raua i te ora taata tia roa e te ora mure ore, no te mea ua haapao noa raua ia raua iho, aita râ i tâuˈa i te tahi atu mau mea atoa, tae noa ˈtu to raua huaai.—Gen. 2:15–3:24.

7, 8. Eaha ta Eva i parau a fanau mai ai oia ia Kaina? Eaha paha ta ˈna i manaˈo?

7 I rapaeau mai i te ô, e oraraa fifi mau to Adamu raua Eva. Ua pii raua i ta raua tamarii matahiapo o Kaina e ua parau Eva: “E taata ta ˈu i noaa iho nei ia Iehova.” Ua manaˈo paha Eva i taua taime ra i te parau ta Iehova i fafau i roto i te ô, oia hoi e fanau mai te hoê vahine i te hoê “huaai” o te haamou ia tae i te hoê mahana i te varua ino i hara ˈi raua Adamu. (Gen. 3:15; 4:1) Ua manaˈo anei Eva e o ˈna tera vahine e o Kaina te “huaai” fafauhia?

8 Mai te peu e e, ua hape roa ïa o ˈna. E mai te peu e ua tuu noa raua Adamu i tera manaˈo i roto i te feruriraa o Kaina, aita ïa raua i tauturu ia ˈna ia tinai i to ˈna teoteo. I muri aˈe, fanau maira Eva i te piti o te tamaiti, aita râ i faahiti i te tahi parau faatietie no ˈna. Ua pii raua Adamu ia ˈna o Abela, “Faufaa ore” paha te auraa. (Gen. 4:2) Te faaite ra anei tera iˈoa ta raua i maiti e ua rahi aˈe to raua tiaturi ia Kaina ia Abela? Peneiaˈe.

9. Eaha te haapiiraa ta te mau metua e nehenehe e huti mai?

9 Mea rahi te haapiiraa e huti mai. Outou te mau metua, ta outou mau parau e ta outou mau ohipa, te faaara ra anei i te teoteo, te nounou e te miimii o ta outou mau tamarii? Aore ra te haapii ra outou ia ratou ia here i te Atua ra o Iehova e ia riro ei hoa no ˈna? Aita na metua matamua i amo maitai i ta raua hopoia. E ere râ i te auraa e aita e ravea faahou no to raua huaai.

Mea nafea to Abela faatupuraa i te faaroo?

10, 11. Eaha te ohipa a Kaina e a Abela, e eaha te huru maitai ta Abela i faatupu?

10 A paari mai ai na tamaroa e piti, ua haapii Adamu ia raua ia rave i te ohipa no te faatamaa i te utuafare. Ua riro mai Kaina ei taata faaapu e Abela ei tiai mamoe.

11 Ua rave râ Abela i te tahi mea faufaa roa. A mairi ai te tau, ua faatupu oia i te faaroo, te hoê huru maitai nehenehe mau ta Paulo i faahiti i roto i ta ˈna rata i te mau Hebera. A feruri na, aita hoê aˈe taata hiˈoraa maitai ta Abela e nehenehe e pee. Mea nafea ïa to ˈna faatupuraa i te faaroo i te Atua ra o Iehova? E hiˈo mai tatou e toru ravea faufaa mau tei tauturu ia Abela ia faatupu i te faaroo puai.

12, 13. Mea nafea ta Iehova i poiete i tauturu ai ia Abela ia haapuai atu â i to ˈna faaroo?

12 Ta Iehova i poiete. Parau mau, ua faaino Iehova i te fenua, a fifi atu ai te ohipa faaapu no te mau raau taratara. Noa ˈtu râ, mea rahi te hotu o te fenua ta te utuafare o Abela i nehenehe e amu. Aita te ino i topa i nia i te animara, te mouˈa, te roto, te anavai, te miti, te raˈi, te ata, te mahana, te avaˈe e te fetia. I te mau vahi atoa e hiˈo ai Abela, ua ite o ˈna i te here rahi, te paari e te maitai o te Atua ra o Iehova, tei poiete i te mau mea atoa. (A taio i te Roma 1:20.) Ua puai noa ˈtu â to Abela faaroo a feruri maite ai oia ma te mauruuru i ta Iehova i poiete.

I roto i te mau mea i poietehia, ua ite Abela i te hoê niu papu no te faatupu i te faaroo i te hoê Atua poiete î i te here

13 Mea papu e ua faataa Abela i te taime no te feruri no nia ia Iehova. Te ite ra oe ia ˈna e tiai ra i ta ˈna mau mamoe? Mea hahaere roa hoi te hoê tiai mamoe. E aratai oia i ta ˈna mau mamoe na nia i te mau aivi, na roto i te mau faa e te mau anavai, a imi tamau ai i te mau vahi te vai ra te aihere matie maitai, te pape mâ e te mǎrǔmǎrǔ no te faafaaea. I rotopu i te mau animara atoa ta te Atua i poiete, e au ra e o te mamoe te hinaaro mau â i te tauturu, ia arataihia e ia paruruhia ratou. Ua ite anei Abela e o ˈna atoa tei hinaaro mau â i te aratairaa, te parururaa e te aupuru a te Atua, tei rahi aˈe te paari e te puai i te taata? Papu maitai e ua faahiti pinepine oia i te reira i roto i ta ˈna mau pure e ua puai atu â to ˈna faaroo.

14, 15. Ua feruri maite Abela i teihea mau parau fafau a Iehova?

14 Ta Iehova i fafau. Eita e ore e ua faataa Adamu raua Eva i ta raua na tamaiti no te aha raua i tiahihia ˈi i rapae i te ô i Edene. E rave rahi ïa mea ta Abela i feruri maite.

15 Ua parau Iehova e e ino roa te fenua. Tera iho â ta Abela i ite, te mau raau taratara. Ua tohu atoa Iehova e e mauiui Eva ia hapû e ia fanau mai o ˈna. Ta Abela iho â ïa i ite a fanauhia mai ai to ˈna mau taeae e tuahine. Ua faaara atoa Iehova e e hinaaro roa ino Eva ia here e ia haapao ta ˈna tane ia ˈna, area Adamu, ei fatu ïa o ˈna no Eva. Ua ite roa atoa Abela i te reira. Taa aˈera ia ˈna e e tupu iho â ta Iehova parau. Mea tano ïa ia tiaturi Abela i te parau ta te Atua i fafau, oia hoi ia tae i te hoê mahana na te hoê “huaai” e faaafaro i te mau fifi atoa i haamata i Edene.—Gen. 3:15-19.

16, 17. Eaha ta Abela i haapii mai i te hiˈoraa o te mau kerubi a Iehova?

16 Ta Iehova mau tavini. Aita Abela i ite i te tahi noa ˈˈe taata hiˈoraa maitai i te fenua nei. E ere râ te taata anaˈe tei te fenua i tera tau. I to Iehova tiahiraa ia Adamu raua Eva i rapae i te ô, ua rave oia i te tahi faanahoraa ia ore raua e to raua huaai ia tomo atu i roto. Ua tuu o ˈna i te mau kerubi, oia hoi te mau melahi tiaraa teitei roa, e te ˈoˈe ura e ohu noa no te tiai i te uputa.—A taio i te Genese 3:24.

17 A feruri na ia Abela, e tamarii noa hoi, o te hiˈo noa ra i tera mau kerubi tei rave mai i te tino taata, papu maitai ïa e mea puai roa ratou. E tera “ˈoˈe” ura e ohu noa ra, e tupu mai ïa te mǎtaˈu. A paari mai ai oia, ua ite anei Abela i tera mau kerubi i te fiuraa e te vaiihoraa i ta ratou ohipa? Aita roa ˈtu. I te po e te ao, i tera e tera matahiti, ua tiai noa iho â tera mau kerubi puai mau i te uputa. Taa aˈera ïa ia Abela e e tavini taiva ore e te parau-tia ta Iehova. Ua ite roa Abela i te haapao maitai e te auraro o taua mau kerubi ra ia Iehova, aita râ te reira i roto i to ˈna iho utuafare. Mea papu e ua haapuai te hiˈoraa o tera mau melahi i to ˈna faaroo.

I te roaraa o to ˈna oraraa, ua ite Abela e e tavini taiva ore te mau kerubi e te auraro ia Iehova

18. I teie mahana, e nehenehe tatou e niu i to tatou faaroo i nia i te aha?

18 Na roto i ta ˈna i poiete, ta ˈna mau parau fafau e te mau hiˈoraa o ta ˈna mau tavini melahi, ua faaite Iehova o vai oia. Ma te feruri maite i te reira, ua puai noa ˈtu â to Abela faaroo. Mea rahi te haapiiraa e huti mai. Outou te feia apî, e nehenehe outou e faatupu i te faaroo mau ia Iehova, noa ˈtu e aita to outou utuafare e horoa ra i te hiˈoraa maitai. I teie mahana, e nehenehe tatou e niu i to tatou faaroo i nia i te mau mea faahiahia atoa i poietehia, te Bibilia e te hiˈoraa e rave rahi o te feia tei faahotu i te faaroo.

Te hoê tusia maitai aˈe

19. Eaha te parau mau faufaa ta Abela i taa i muri aˈe?

19 A puai noa ˈi to Abela faaroo ia Iehova, ua hinaaro oia e faaite i te reira. Eaha hoi ta te hoê taata haihai e nehenehe e horoa na te Atua poiete o te ao taatoa? Mea papu, eita te Atua e hinaaro mai i te tahi ô aore ra te tauturu a te taata. I muri aˈe râ, taa aˈera ia Abela te hoê parau mau faufaa: Ia pûpû oia ma te aau tae i te mea maitai roa ˈˈe ia Iehova, e oaoa to ˈna Metua î i te here i te raˈi.

Taa ê atu ia Kaina, ua pûpû Abela i ta ˈna tusia ma te faaroo

20, 21. Eaha ta Kaina e ta Abela i pûpû ia Iehova, e ua nafea te Atua?

20 Ua faaoti Abela e pûpû i te tahi mau mamoe o ta ˈna nǎnǎ. Ua maiti oia i te mea maitai roa ˈˈe, oia hoi te mau pinia matamua, e te mau tuhaa maitai roa ˈˈe o taua animara ra i to ˈna manaˈo. O Kaina atoa, ua hinaaro oia i te haamaitairaa e te farii maitai a te Atua e ua maiti oia i te maa o ta ˈna faaapu. E ere râ to ˈna mau manaˈo turai mai to Abela. Ua ite-maitai-hia taua taa-ê-raa ra a pûpû ai na taeae i ta raua ô.

21 Peneiaˈe ua faaohipa raua taitahi i te hoê fata e te auahi no ta raua ô, i mua atoa paha i te aro o te mau kerubi. O ratou anaˈe hoi te mau tia no Iehova i te fenua i tera tau. Ua aha mai Iehova? “Ite [aore ra farii] maira Iehova ia Abela e ta ˈna ô.” (Gen. 4:4) Aita te Bibilia e parau ra mea nafea to Iehova faaiteraa i ta ˈna farii maitai.

22, 23. No te aha te Atua i farii ai i ta Abela ô?

22 No te aha te Atua i farii maitai ai ia Abela? No ta ˈna ô anei? Ua pûpû Abela i te mau animara ora e ua haamanii i to ratou toto faufaa roa. Ua taa anei ia Abela te faufaa rahi o taua tusia ra? E rave rahi hanere matahiti i muri aˈe, ua faaohipa te Atua i te tusia o te hoê pinia mamoe ino ore no te faahohoˈa i te tusia o ta ˈna iho Tamaiti tia roa, “te Arenio a te Atua,” a haamaniihia ˈi to ˈna toto hapa ore. (Ioa. 1:29; Exo. 12:5-7) Eita e ore e aita Abela i ite aore ra i taa pauroa teie mau mea.

23 Teie râ ta tatou i papu maitai: Ua pûpû Abela i te mau mamoe maitai roa ˈˈe o ta ˈna nǎnǎ. Ua farii maitai Iehova i taua tusia ra e ia Abela atoa. No to ˈna here e to ˈna faaroo mau ia Iehova i na reira ˈi Abela.

24. (a) O te ô a Kaina anei te fifi? A faataa. (b) Mai ia Kaina, eaha ta te taata e rave rahi e manaˈo nei?

24 “Area o Kaina e ta ˈna ô, aore ïa [Iehova] i ite mai,” aore ra i farii mai. (Gen. 4:5) E ere o te ô a Kaina te fifi. I raro aˈe hoi i te ture a Mose, e nehenehe e pûpû ei tusia i te hotu o te fenua. (Lev. 6:14, 15) Te parau nei râ te Bibilia e mea ino ta Kaina mau ohipa. (A taio i te Ioane 1, 3:12.) Ua manaˈo ïa Kaina, mai e rave rahi i teie mahana, e e navai noa te hohoˈa paieti. Ua faaite oioi ta ˈna mau ohipa e aita to ˈna e faaroo mau e aita o ˈna e here ra i te Atua.

25, 26. Eaha ta Iehova i faaara ia Kaina? Eaha râ ta Kaina i rave?

25 Ua ite Kaina e aita Iehova i farii maitai ia ˈna. Ua huti mai anei râ o ˈna i te haapiiraa i te hiˈoraa o Abela? Aita. Ua hae roa o ˈna i to ˈna teina. Ua ite Iehova i te mea e tupu ra i roto i to Kaina aau e ua haaferuri ia ˈna ma te mǎrû. Ua faaara ˈtu oia e ia ore o ˈna e taui, e hara rahi ïa ta ˈna e rave. Ia taui râ Kaina, ua haapapu atu Iehova e e “itehia mai” oia.—Gen. 4:6, 7.

26 Aita Kaina i tâuˈa i ta te Atua faaararaa. Ua parau râ oia i to ˈna teina ia haere raua i te aua. Tei nia maira Kaina ia Abela e taparahi pohe roa ihora ia ˈna. (Gen. 4:8) E nehenehe ïa e parau e o Abela te taata matamua tei hamani-ino-hia e tei pohe no to ˈna faaroo. Noa ˈtu e ua pohe oia, aita Iehova i haamoe ia Abela.

27. (a) No te aha e papu ai e e faatia-faahou-hia mai Abela? (b) Nafea e papu ai e e farerei tatou ia Abela i te hoê mahana?

27 Ei auraa parau, te pii ra te toto o Abela i te Atua ra o Iehova ia tahoo ia ˈna. Ua itehia ta te Atua parau-tia a faautua ˈi oia ia Kaina no ta ˈna hara. (Gen. 4:9-12) Te mea faufaa roa râ, te paraparau noa mai ra te aamu o te faaroo o Abela ia tatou. Noa ˈtu e aita oia i ora maoro, ua faaohipa maitai Abela i to ˈna oraraa. Ua pohe oia ma te ite e ua here e ua farii maitai to ˈna Metua i te raˈi ra o Iehova ia ˈna. (Heb. 11:4) Papu roa e e haamanaˈo iho â Iehova ia Abela ia faahoˈi mai o ˈna i te feia pohe i te ora i roto i te paradaiso i te fenua nei. (Ioa. 5:28, 29) E nehenehe oe e haamatau ia Abela i roto i te paradaiso. A faaroo ïa ia ˈna ia paraparau mai e a pee i to ˈna faaroo rahi.

a Na roto i te parau “te matamua mai â o teie nei ao,” e matara mai te manaˈo o te fanauraa. Ua taaihia ïa te reira i te tamarii matamua i fanauhia mai. O Kaina te tamarii matahiapo a Adamu raua Eva. Teie râ, o Abela ta Iesu i faatuati i “te matamua mai â o teie nei ao.” No te aha? No te mea ua faaite Kaina na roto i ta ˈna mau faaotiraa e ta ˈna mau haaraa e ua maiti oia e orure hau i te Atua ra o Iehova. Mea tano ïa ia manaˈo e eita Kaina, mai to ˈna na metua, e faatia-faahou-hia mai. Eita atoa ta ˈna mau hara e faaorehia.