Exodo 12:1-51
12 Na ô maira Iehova ia Mose raua Aarona i te fenua o Aiphiti:
2 “E riro teie avaˈe ei avaˈe matamua o te matahiti no outou.+
3 A parau atu i te amuiraa taatoa o Iseraela: ‘I te ahuru o te mahana o teie avaˈe, ia rave ratou tataitahi no ratou i te hoê mamoe+ no te utuafare o to ratou metua tane, hoê mamoe no hoê utuafare.
4 Mai te peu râ mea iti roa te utuafare e ore e pau ia ratou te mamoe, ia tufa ïa ratou e te feia* to pihai iho noa mai ia ratou* i roto i to ratou fare ia au i te rahiraa taata. Ia numerahia, a faaoti ehia iˈo mamoe ta te taata tataitahi e amu.
5 Ei mamoe oni oraora maitai+ hoê matahiti ta outou. E nehenehe outou e maiti i rotopu i te mamoe oni apî aore ra te puaaniho oni apî.
6 E haapao outou i te reira e tae roa i te 14 o te mahana o teie avaˈe,+ e e tupai te amuiraa taatoa o Iseraela i te reira i te ahiahi.+
7 E rave ratou maa toto a pîpî atu ai i nia i na pou opani e te teˈa o te tomoraa o te mau fare e amu ai ratou i te reira.+
8 “‘E amu ratou i te iˈo mamoe i tera po.+ E tunu paa ratou i te reira i nia i te auahi, a amu atu ai i te reira e te pane hopue ore+ e te pota avaava.+
9 Eiaha e amu ota i te reira aore ra e vaipâ, e tunu pape, e tunu-paa-hia râ te reira i nia i te auahi, to ˈna afii, to ˈna huha e to ˈna aau.
10 Eiaha e faaherehere i te tahi e poipoi noa ˈtu, ia taninahia râ te toe mai i te poipoi.+
11 E mai teie outou e amu ai i te reira: ma te taamu i to outou hatua,* te tiaa i nia i to outou avae e te raau i roto i to outou rima. E ru outou i te amu i te reira. O te Pasa* a Iehova teie.
12 E haere hoi au na roto i te fenua o Aiphiti i tera po a tairi atu ai pauroa te matahiapo i te fenua o Aiphiti e tae noa ˈtu i te fanauˈa matamua a te animara.+ E e faautua vau i te mau atua atoa o Aiphiti.+ O vau o Iehova.
13 Ei tapao no outou te toto i nia iho i te mau fare to reira outou. E ite au i te toto e e na nia ˈˈe au ia outou, e eita te ati e tae i nia ia outou no te haamou ia outou ia tairi au i te fenua o Aiphiti.+
14 “‘E riro tera mahana ei haamanaˈoraa no outou, e faatupu outou i te reira ei oroa no Iehova e hope noa ˈtu to outou mau uˈi. E faatupu outou i te reira ei faatureraa vai maoro.
15 E hitu mahana e amu ai outou i te pane hopue ore.+ Oia hoi i te mahana matamua, e tatara outou i te faraoa ôihia tei hopue mai roto i to outou mau fare, no te mea te taata o te amu i tei hopue mai te mahana matamua e tae roa i te hitu, e haapohehia tera taata mai roto ia Iseraela.
16 I te mahana matamua, e faatupu outou i te hoê tairururaa moˈa, e i te hitu o te mahana, i te tahi atu tairururaa moˈa. Aita e raveraa ohipa i taua na mahana ra.+ O ta te taata noa râ e hinaaro mau ra e amu te nehenehe e faaineinehia no outou.
17 “‘E haapao outou i te Oroa pane hopue ore,+ i tera hoi mahana, e hopoi ê au i to outou mau taata e rave rahi* i rapae i te fenua o Aiphiti. E haapao outou i tera mahana e hope noa ˈtu to outou mau uˈi ei faaueraa mana vai maoro.
18 Mai te 14 o te mahana o te avaˈe matamua i te ahiahi tae roa i te 21 o te mahana i te ahiahi, e amu outou i te pane hopue ore.+
19 Eiaha ia itehia te faraoa ôihia tei hopue i roto i to outou mau fare e hitu mahana, ia amu noa ˈtu hoi te tahi i tei hopue, e taata ê anei aore ra e taata tumu o te fenua,+ e haapohehia ïa oia mai roto mai i te amuiraa o Iseraela.+
20 Eiaha outou e amu i tei hopue. I roto i to outou mau fare atoa, e amu outou i te pane hopue ore.’”
21 Titau ru ihora Mose pauroa te matahiapo o Iseraela+ e parau atura: “A haere e a maiti i te mau animara* apî no te mau utuafare tataitahi, e a tupai i te tusia no te Pasa.
22 E tutau outou i te hoê ruru hisopa i roto i te toto e vai ra i roto i te hoê farii, a parai atu ai i te toto i nia i te teˈa o te tomoraa e na pou opani. Eiaha hoê o outou e haere i rapae i to ˈna fare e poipoi noa ˈtu.
23 E ia haere Iehova na roto i te fenua no te tairi i to Aiphiti a ite atu ai i te toto i nia i te teˈa o te tomoraa e na pou opani, e na nia ˈˈe mau â Iehova i te tomoraa, e eita oia e vaiiho i te ati pohe* ia ô i roto i to outou mau fare.+
24 “E haapao outou i teie oroa ei faaueraa vai maoro no outou e ta outou mau tamarii.+
25 E ia tomo outou i te fenua ta Iehova e horoa no outou mai ta ˈna iho â i parau, e faatupu noa outou i teie oroa.+
26 E ia ani mai ta outou mau tamarii: ‘Eaha te auraa o tera oroa no outou?,’+
27 e parau atu outou: ‘O te tusia no te Pasa a Iehova, tei na nia ˈˈe i te mau fare o te ati Iseraela i Aiphiti i to ˈna tairiraa i to Aiphiti, ua faaherehere râ oia i to tatou mau utuafare.’”
Piˈo ihora te nunaa e tipapa ihora.
28 Haere atura ïa te ati Iseraela e rave aˈera mai ta Iehova i faaue ia Mose raua Aarona.+ Ua na reira mau â ratou.
29 I te tuiraa po, tairi ihora Iehova pauroa te matahiapo i te fenua o Aiphiti,+ mai te matahiapo a Pharao o te parahi ra i nia i to ˈna terono e tae noa ˈtu i te matahiapo a te tîtî i roto i te fare tapearaa,* e pauroa te fanauˈa matamua a te mau animara.+
30 Tia aˈera Pharao i nia i tera po e pauroa ta ˈna tavini e pauroa to Aiphiti, e auê rahi aˈera to Aiphiti, no te mea aita hoê aˈe fare aita e taata i pohe.+
31 Titau ru ihora oia ia Mose raua Aarona+ i te po, e parau atura: “A tia i nia, a haere ê atu mai rotopu i to ˈu mau taata, orua e te tahi atu mau ati Iseraela. A haere e a tavini ia Iehova, mai ta orua iho â i parau.+
32 A rave atoa i ta outou mau nǎnǎ mamoe e puaaniho e ta outou mau nǎnǎ puaatoro e a haere, mai ta orua iho â i parau.+ Tera râ, ia haamaitai atoa mai orua ia ˈu.”
33 Parau onoono aˈera to Aiphiti i te nunaa ia faarue oioi+ i te fenua “no te mea,” mai ta ratou i parau, “mai te huru ra e ua pohe tatou pauroa!”+
34 Hopoi aˈera ïa te nunaa i ta ratou faraoa ôihia aita â i hopue atura ma te amo i nia i to ratou tapono i ta ratou mau farii* ôiraa tei puohuhia i roto i to ratou mau ahu.
35 Rave aˈera te ati Iseraela i ta Mose i parau ia ratou e ani aˈera i to Aiphiti i te taoˈa ario e auro, e te ahu atoa.+
36 Rave ihora Iehova ia hamani maitai to Aiphiti i to ˈna nunaa, a horoa mai ai ratou i ta te ati Iseraela i ani atu, e pau ihora te taoˈa a to Aiphiti ia ratou.+
37 Reva aˈera ïa te ati Iseraela mai Ramese+ no te haere i Sukota,+ hau i te 600 000 tane,* e te mau tamarii.+
38 Haere maira te hoê nahoa taata ěê*+ na muri ia ratou, e te mau nǎnǎ mamoe e puaaniho e te mau nǎnǎ puaatoro, e rave rahi ïa animara.
39 Tunu aˈera ratou i te faraoa ôihia ta ratou i hopoi mai Aiphiti mai ei pane menemene hopue ore. Aita te reira i hopue, no te mea oioi roa ratou i te tiahiraahia i rapae i Aiphiti, aita ïa ratou i faaineine i te maa na ratou.+
40 E 430 matahiti+ to te ati Iseraela parahiraa i Aiphiti.+
41 I te hoperaa na 430 matahiti, i taua mahana mau ra, haere pauroa ˈtura te mau taata e rave rahi o* Iehova i rapae i te fenua o Aiphiti.
42 I taua po ra e faatupu ai ratou i te hoê oroa no to Iehova aratairaa ia ratou i rapae i te fenua o Aiphiti. Ia haamanaˈohia taua po ra e te nunaa taatoa o Iseraela no Iehova e hope noa ˈtu to ratou mau uˈi.+
43 Na ô maira ïa Iehova ia Mose raua Aarona: “Teie te faatureraa o te Pasa: Eiaha te taata ê e amu i te reira.+
44 Te tavini tane râ ta te tahi i hoo mai i te moni, e peritome ïa oe ia ˈna.+ I reira noa oia e nehenehe ai e amu i te reira.
45 Eiaha te purutia e te rave ohipa tarahuhia e amu i te reira.
46 E amuhia te reira i roto hoê noa fare. Eiaha e hopoi i te tahi iˈo i rapae i te fare, e eiaha oe e ofati hoê aˈe o to ˈna mau ivi.+
47 E faatupu pauroa te amuiraa o Iseraela i te reira.
48 E faaea te hoê taata ê i ǒ oe e ia hinaaro oia e faatupu i te Pasa no Iehova, e peritomehia pauroa te tane o to ˈna utuafare. I reira noa e nehenehe ai oia e faatupu i te reira, e e riro oia mai te hoê taata tumu o te fenua. Eiaha râ te hoê taata peritome-ore-hia e amu i te reira.+
49 Hoê â ture no te taata tumu o te fenua e no te taata ê e faaea ra i rotopu ia outou.”+
50 Rave aˈera ïa pauroa te ati Iseraela mai ta Iehova i faaue ia Mose raua Aarona. Ua na reira mau â ratou.
51 I taua mahana mau ra i aratai ai Iehova i te ati Iseraela e to ratou mau taata e rave rahi* i rapae i te fenua o Aiphiti.
Nota i raro i te api
^ Heb: “oia.”
^ Heb: “ia ˈna.”
^ Heb: “hatua i to outou tauupu.”
^ “Na nia ˈˈe” te auraa.
^ Heb: “ta outou mau nuu.”
^ Oia hoi te mamoe aore ra te puaaniho.
^ Heb: “haamouraa.”
^ Heb: “te fare o te apoo pape.”
^ Aore ra “auˈa.”
^ Te mau tane e nehenehe e riro ei faehau.
^ Oia hoi te taata e ere i te ati Iseraela, te taata Aiphiti atoa.
^ Heb: “nuu a.”
^ Heb: “ta ratou mau nuu.”
