Exodo 22:1-31
22 “Ia eiâ te tahi taata i te hoê puaatoro aore ra te hoê mamoe, e ia tupai aore ra ia hoo atu i te reira, e faahoˈi oia e pae puaatoro no te hoê puaatoro, e e maha mamoe no te hoê mamoe.+
2 (“Ia itehia te hoê taata e eiâ ra+ e ia tairi te tahi ia ˈna a pohe atu ai, eita ïa taua taata ra e parihia i te taparahiraa taata.
3 Ia tupu râ te reira i muri mai i te hitiraa mahana, e parihia ïa oia no te haamaniiraa toto.)
“E horoa oia i te hoê faahoˈiraa. Aita anaˈe ta ˈna e faufaa, e hoohia oia no ta ˈna i eiâ.
4 Ia itehia e te ora noa ra ta ˈna i eiâ, e puaatoro anei, e asini aore ra e mamoe, e tataipiti ta ˈna e faahoˈi.
5 “Ia tuu te tahi taata i ta ˈna mau animara ia amu i roto i te tahi faaapu aore ra faaapu vine a vaiiho atu ai ia ratou ia amu i roto i ta te tahi atu faaapu, e horoa oia ei faahoˈiraa i te mau hotu maitai roa ˈˈe o ta ˈna faaapu aore ra te mau vine maitai roa ˈˈe o ta ˈna faaapu vine.
6 “Ia ama te hoê auahi e ia parare i nia i te raau taratara, a paapaa ˈtu ai te mau ruru aore ra te amaa huero maa aore ra te hoê faaapu, e faahoˈi te taata tei tutui i tei paapaa.
7 “Ia horoa te tahi taata i te moni aore ra i te tahi mau taoˈa i to ˈna ra taata tupu ia tiai oia, a eiâhia ˈtu ai te reira i roto i te fare o te taata tupu, ia itehia mai te taata eiâ, e tataipiti ta ˈna e faahoˈi.+
8 Ia ore te taata eiâ ia itehia mai, e hopoihia te fatu fare i mua i te Atua mau+ ia itehia e ua tuu anei oia i to ˈna rima i nia i te faufaa a to ˈna taata tupu.
9 Ia fatuhia ma te tano ore te tahi mau faufaa eiâhia, e puaatoro anei, e asini, e mamoe, e ahu aore ra te tahi faufaa i moˈe e ia parau to ˈna fatu mau: ‘Na ˈu teie!,’ e hopoi na taata e piti i to raua fifi i mua i te Atua mau.+ Te taata ta te Atua e parau ua hara, e tataipiti oia i te faahoˈi i ta to ˈna taata tupu.+
10 “Ia horoa te tahi taata i te hoê asini aore ra te hoê puaatoro aore ra te hoê mamoe aore ra te hoê animara rata ia tiai oia, e ia pohe aore ra ia pepe ino roa aore ra ia ora aita e taata i ite,
11 e horeo te tahi i te tahi i mua ia Iehova, a parau ai e aita iho â oia i tuu i to ˈna rima i nia i te faufaa a to ˈna taata tupu, e e farii te fatu. Eita te tahi atu e horoa i te tahi faahoˈiraa.+
12 Ia eiâhia râ te animara i roto i to ˈna fare, e horoa oia i te tahi faahoˈiraa i to ˈna fatu.
13 Ia hahaehia tera animara e te tahi animara taehae, e hopoi mai oia i te reira ei haapapuraa. Eita oia e horoa i te hoê faahoˈiraa no tei hahaehia e te tahi animara taehae.
14 “Ia tipee râ te tahi taata i te animara a to ˈna taata tupu, e ia pepe ino roa aore ra ia pohe tera animara aita to ˈna fatu i pihai iho, e horoa te taata tipee i te hoê faahoˈiraa.
15 Mai te peu e tei pihai iho te fatu, eita oia e horoa i te hoê faahoˈiraa. Mai te peu ua tarahuhia, o te moni tarahu te faahoˈiraa.
16 “Ia arapae te tahi tane i te hoê vahine aita i taoto aˈenei i te tane, tei ore atoa hoi i momoˈahia, a taoto atu ai ia ˈna, e aufau oia i te moni faaipoiporaa ia riro oia ei vahine faaipoipo na ˈna.+
17 Ia ore roa to ˈna metua tane ia farii i te horoa ia ˈna na ˈna, e aufau oia i te faito moni o te moni faaipoiporaa.
18 “Eiaha roa oe e vaiiho i te hoê vahine tahutahu ia ora.+
19 “Te taata e taoto i te hoê animara, ia haapohehia oia.+
20 “Te taata e pûpû i te tusia i te tahi atu atua, eiaha râ ia Iehova anaˈe, ia faataahia oia no te haamouraa.+
21 “Eiaha roa oe e rave ino i te hoê taata ê e noho ra i rotopu ia outou aore ra e faahepo ia ˈna,+ i parahi atoa na hoi outou ei taata ěê i te fenua o Aiphiti.+
22 “Eiaha outou e hamani ino i te vahine ivi aore ra te tamarii aita e metua tane.*+
23 Ia hamani ino outou ia ˈna, a tiaoro mai ai oia ia ˈu, e faaroo mau â vau i ta ˈna tiaoro,+
24 e ura to ˈu riri, e haapohe au ia outou i te ˈoˈe, e riro ta outou mau vahine faaipoipo ei vahine ivi, e e ere ta outou mau tamarii i te metua tane.
25 “Ia horoa tarahu outou i te moni na te feia riirii* o to ˈu nunaa, o te parahi ra i ǒ outou, eiaha roa outou e riro mai te taata titau moni tarahu ia ratou. Eiaha roa outou e titau ia ratou i te moni taime.+
26 “Ia haru oe i te ahu o to oe taata tupu ei haapapuraa no te hoê tarahu,*+ e faahoˈi oe i te reira ia ˈna i te toparaa mahana.
27 Tera anaˈe hoi to ˈna tapoˈi, to ˈna ahu no te tapoˈi i to ˈna tino.* I roto i te aha o ˈna e taoto ai?+ Ia tiaoro mai oia ia ˈu, e faaroo mau â vau, mea aumihi* hoi au.+
28 “Eiaha roa oe e faaino i te Atua,+ eiaha atoa e faaino i te hoê raatira i rotopu i to oe nunaa.+
29 “Eiaha roa oe e faataupupu i te pûpû i te tusia no roto i te rahi o ta oe mau hotu e ta oe uaina e hinu.+ Te matahiapo o ta oe mau tamaiti, e horoa mai oe na ˈu.+
30 E na reira oe i ta oe puaatoro e ta oe mamoe:+ E faaea oia e te maiaa e hitu mahana. I te vaˈu râ o te mahana, e horoa mai oe ia ˈna ia ˈu.+
31 “Ia faaite outou e nunaa moˈa outou no ˈu,+ e eiaha roa outou e amu i te iˈo o te hoê animara hahaehia e te tahi animara taehae.+ E taora outou i te reira na te mau urî.
Nota i raro i te api
^ Aore ra “otare.”
^ Aore ra “e mauiui ra.”
^ Aore ra “ei piri taoˈa.”
^ Heb: “iri.”
^ Aore ra “aroha hamani maitai.”
