Exodo 13:1-22
13 Paraparau faahou maira Iehova ia Mose:
2 “A haamoˈa* no ˈu pauroa te tamaroa matahiapo i rotopu i te ati Iseraela. Na ˈu te tamaroa matahiapo e te fanauˈa oni matamua e fanauhia mai.”+
3 Parau atura Mose i te nunaa: “A haamanaˈo i teie mahana i haere ai outou i rapae i Aiphiti,+ te fenua* o te faatîtîraa, i te rima puai hoi i aratai ai Iehova ia outou i rapae i teie vahi.+ Eiaha ïa e amu i tei hopue.
4 E haere outou i rapae i teie mahana, i te avaˈe o Abiba.*+
5 Ia aratai Iehova ia outou i te fenua o te ati Kanaana, te ati Heta, te ati Amori, te ati Hevi e te ati Iebusi,+ ta ˈna i horeo i to outou mau tupuna e horoa no outou,+ te hoê fenua e tahe noa te û e te meri,+ e haapao ïa outou i teie oroa i teie avaˈe.
6 E hitu mahana e amu ai outou i te pane hopue ore,+ e i te hitu o te mahana, e oroa ïa no Iehova.
7 E amuhia te pane hopue ore i na hitu mahana,+ e eiaha tei hopue ia itehia i ǒ outou,+ e eiaha te faraoa ôihia tei hopue ia itehia i ǒ outou i to outou tuhaa fenua* taatoa.
8 E parau outou tataitahi i ta outou mau tamarii i taua mahana ra: ‘No ta Iehova hoi i rave no ˈu i to ˈu haereraa mai i rapae i Aiphiti.’+
9 Ei tapao te reira no outou i nia i to outou rima e ei haamanaˈoraa i nia i to outou rae,*+ a nehenehe atu ai ta Iehova ture e vai i roto i to outou vaha, i te rima puai hoi i aratai ai Iehova ia outou i rapae i Aiphiti.
10 E haapao outou i teie faatureraa i to ˈna taime faataahia i tera e tera matahiti.+
11 “Ua aratai anaˈe Iehova ia outou i te fenua o te ati Kanaana, ta ˈna i horeo ia outou e i to outou mau tupuna e horoa no outou,+
12 e faataa outou na Iehova pauroa te tamaroa matahiapo, e pauroa te fanauˈa oni matamua a te mau animara i noaa mai ia outou. Na Iehova ratou.+
13 E hoo mai outou pauroa te fanauˈa asini matamua i te hoê mamoe, e ia ore outou e hoo mai i te reira, e ofati ïa outou i to ratou aˈî. E hoo mai outou pauroa te tamaroa matahiapo a ta outou mau tamaiti.+
14 “Ia ui noa mai ta outou mau tamarii i muri aˈe: ‘Eaha te auraa o te reira?,’ e parau atu outou: ‘I te rima puai i aratai ai Iehova ia tatou i rapae i Aiphiti, te fenua* o te faatîtîraa.+
15 I to Pharao onoono-noa-raa eiaha e tuu ia tatou ia haere,+ ua haapohe Iehova pauroa te matahiapo a te taata i te fenua o Aiphiti e pauroa te fanauˈa matamua a te mau animara.+ No reira vau e pûpû ai i te mau fanauˈa matamua atoa ei tusia ia Iehova, e e hoo mai ai pauroa te matahiapo o ta ˈu mau tamaiti.’
16 Ei tapao te reira no outou i nia i to outou rima e ei taamu upoo i nia i to outou rae,*+ i te rima puai hoi i aratai ai Iehova ia tatou i rapae i Aiphiti.”
17 I to Pharao tuuraa i te nunaa ia haere, aita te Atua i aratai ia ratou na te eˈa o te fenua o te mau Philiseti, noa ˈtu mea fatata. Ua parau hoi te Atua: “Aˈunei te nunaa e taui ai i te manaˈo ia û ratou i te tamaˈi, a hoˈi atu ai ratou i Aiphiti.”
18 Faatioi ihora ïa te Atua i te nunaa na te eˈa o te medebara o te miti Uteute.+ Mea naho maitai râ, mai te mau pǔpǔ faehau, to te ati Iseraela haereraa mai i rapae i te fenua o Aiphiti.
19 Rave atoa maira Mose i to Iosepha mau ivi, no te mea ua faahoreo Iosepha i te mau tamaiti a Iseraela: “E haapao mai iho â te Atua ia outou, e ia hopoi outou i to ˈu mau ivi i rapae i teie vahi.”+
20 Faareva ˈtura ratou mai Sukota e puhapa ihora i Êtama, i te hiti o te medebara.
21 Te haere ra Iehova na mua ia ratou i te ao na roto i te hoê pou ata no te aratai ia ratou i to ratou haereraa,+ e i te po na roto i te hoê pou auahi no te turama ia ratou, a nehenehe atu ai ratou e haere i te ao e i te po.+
22 Eita te pou ata e faaatea ˈtu mai mua i te nunaa i te ao, e te pou auahi i te po.+
Nota i raro i te api
^ Aore ra “faataa.”
^ Heb: “fare.”
^ Hiˈo i te tuhaa hau B15.
^ Heb: “mau otia.”
^ Heb: “i ropu i to outou na mata.”
^ Heb: “fare.”
^ Heb: “i ropu i to outou na mata.”
