Exodo 20:1-26
20 Parau maira te Atua i teie mau parau atoa:+
2 “O vau o Iehova to oe Atua, tei aratai ia oe i rapae i Aiphiti, te fenua* o te faatîtîraa.+
3 Eiaha roa to oe ei atua ê atu ia ˈu nei.*+
4 “Eiaha roa oe e hamani na oe i te hoê tii taraihia, aore ra te hoê hohoˈa no te tahi mea i nia i te raˈi, i raro i te fenua nei aore ra i roto i te mau pape i raro aˈe i te fenua.+
5 Eiaha roa oe e piˈo i raro i mua ia ratou aore ra e umehia e tavini ia ratou,+ no te mea o vau, o Iehova to oe Atua, e Atua ïa o te titau ra ia haamori ia ˈu anaˈe,+ o te faatae ra i te utua no te hape a te metua i nia i te tamarii, te mootua e te hina a te feia mea hae ia ˈu,
6 o te faaite râ i te here taiva ore e tausani noa ˈtu te uˈi o te feia mea here ia ˈu e o te haapao ra i ta ˈu mau faaueraa.+
7 “Eiaha roa oe e faahiti faufaa ore i te iˈoa o Iehova to oe Atua,+ e faautua hoi Iehova i te taata o te faahiti faufaa ore i to ˈna iˈoa.+
8 “A haamanaˈo i te mahana Sabati no te haamoˈa i te reira.+
9 E haa e e rave oe i ta oe mau ohipa atoa e ono mahana,+
10 area te hitu o te mahana, e Sabati ïa no Iehova to oe Atua. Eiaha roa oe e rave i te tahi ohipa, o oe e ta oe tamaiti, e ta oe tamahine, e ta oe tavini tane, e ta oe tavini vahine, e ta oe animara rata e te taata ê e faaea ra i to oe nohoraa.*+
11 E ono hoi mahana to Iehova hamaniraa i te raˈi e te fenua, te miti, e pauroa to reira, e faafaaea ihora oia i te hitu o te mahana.+ No reira Iehova i haamaitai ai i te mahana Sabati e i haamoˈa ˈi i te reira.
12 “A faatura i to metua tane e to metua vahine+ ia ora maoro oe i te fenua ta Iehova to Atua e horoa nei no oe.+
13 “Eiaha roa oe e taparahi pohe i te taata.+
14 “Eiaha roa oe e faaturi.+
15 “Eiaha roa oe e eiâ.+
16 “Eiaha roa oe e riro ei ite haavare i te pariraa i to oe taata tupu.+
17 “Eiaha roa oe e nounou i te fare o to oe taata tupu. Eiaha roa oe e nounou i te vahine faaipoipo a to oe taata tupu,+ e ta ˈna tavini tane, e ta ˈna tavini vahine, e ta ˈna puaatoro e ta ˈna asini e te tahi atu faufaa a to oe taata tupu.”+
18 O te nunaa taatoa te ite ra i te patiri e te uira, te taˈi o te pu, e te mouˈa au auahi, e rûrû aˈera ratou i te iteraa i te reira e tia noa ˈtura i te atea ê.+
19 Parau maira ïa ratou ia Mose: “Na oe e paraparau ia matou, e e faaroo atu matou, eiaha râ e vaiiho na te Atua e paraparau ia matou, aˈunei matou e pohe ai.”+
20 Parau atura Mose i te nunaa: “Eiaha e mǎtaˈu, ua haere mai hoi te Atua mau no te tamata ia outou,+ ia vai noa hoi te mǎtaˈu ia ˈna ia outou ra a ore atu ai outou e hara.”+
21 Tia noa ˈtura ïa te nunaa i te atea ê, tapiri atura râ Mose i te ata poiri to reira te Atua mau.+
22 Na ô maira ïa Iehova ia Mose: “Teie ta oe e parau i te ati Iseraela: ‘Na outou iho i ite e te paraparau ra vau ia outou mai te raˈi mai.+
23 Eiaha roa outou e hamani i te atua ario hau atu ia ˈu nei, e eiaha roa outou e hamani i te atua auro no outou.+
24 E fata repo ta oe e hamani na ˈu, e e pûpû oe i nia iho i ta oe mau tusia taauahi, ta oe mau tusia no te hau, ta oe nǎnǎ mamoe e puaaniho e ta oe nǎnǎ puaatoro. I te mau vahi atoa e rave ai au ia haamanaˈohia to ˈu iˈoa,+ e haere au ia oe ra e e haamaitai au ia oe.
25 Ia hamani noa ˈtu oe i te fata ofai na ˈu, eiaha roa oe e patu i te reira ma te faaohipa i te ofai taraihia i te tahi mauhaa.*+ Ia tarai hoi oe i te ofai i ta oe paoti, e haaviivii ïa oe i te reira.
26 E eiaha roa oe e haere i nia iho i ta ˈu fata na nia i te eˈa paumaraa, ia ore to oe vai-tahaa-raa ia itehia i nia iho i te fata.’
Nota i raro i te api
^ Heb: “fare.”
^ Aore ra “no te aa ia ˈu.” Heb: “i mua i to ˈu aro.”
^ Heb: “uputa.”
^ Aore ra “ofai oi.”
