Exodo 28:1-43

  • Ahu o te mau tahuˈa (1-5)

  • Te tiputa (6-14)

  • Te tapoˈi ouma (15-30)

    • Urima e Tumima (30)

  • Te ahu aita e rima (31-35)

  • Te taamu upoo e te auro tamâhia tupaipaihia (36-39)

  • Te tahi atu ahu o te tahuˈa (40-43)

28  “E haaputuputu mai oe no rotopu i te ati Iseraela i to tuaana o Aarona, e ta ˈna mau tamaiti, ia tavini oia ia ˈu ei tahuˈa,+ o Aarona+ e o Nadaba raua Abihu,+ o Eleazara raua Itamara,+ na tamaiti a Aarona.+  E hamani oe i te ahu moˈa no Aarona to tuaana, no te hanahana e no te nehenehe.+  E paraparau oe i te feia aravihi* atoa, te feia tei î ia ˈu i te paari,+ e e hamani ratou i to Aarona mau ahu no to ˈna haamoˈaraa, ia tavini oia ia ˈu ei tahuˈa.  “Teie te mau ahu ta ratou e hamani: hoê tapoˈi ouma,+ hoê tiputa,+ hoê ahu aita e rima,+ hoê ahu roa taa ê,* hoê taamu upoo taa ê,+ e hoê hatua.+ E hamani ratou i teie mau ahu moˈa no to tuaana o Aarona e ta ˈna na tamaiti, ia tavini oia ia ˈu ei tahuˈa.  E faaohipa na rimaî aravihi i te auro, te taura ninamu, te huruhuru mamoe vareau, te ahu uteute e te lino maitai roa.  “E hamani ratou i te tiputa i te auro, te taura ninamu, te huruhuru mamoe vareau, te ahu uteute e te lino maitai roa tavirihia, e e nira-faanehenehe-hia te reira.+  Ei piti tapoˈi tapono o te taatihia i na hiti e piti.  Te hatua raraahia,+ tei taamuhia i nia i te tiputa no te tapea maitai i te reira, ei hoê â ïa taoˈa: te auro, te taura ninamu, te huruhuru mamoe vareau, te ahu uteute e te lino maitai roa tavirihia.  “E rave oe e piti ofai sema+ e e nanaˈo oe i nia iho i te iˈoa o na tamaiti a Iseraela,+ 10  e ono iˈoa i nia iho hoê ofai e na ono iˈoa e toe ra i nia iho i te tahi atu ofai, ia au i to ratou fanauraa. 11  E nanaˈo te hoê taata nanaˈo ofai i te iˈoa o na tamaiti a Iseraela i nia iho i na ofai e piti mai ta ˈna e nanaˈo i te hoê titiro.+ I muri iho, e tamauhia te reira i roto i te mau tapea auro. 12  E tuu oe i na ofai e piti i nia iho i na tapoˈi tapono o te tiputa ei ofai haamanaˈoraa i te mau tamaiti a Iseraela,+ e e amo Aarona i to ratou iˈoa i mua ia Iehova i nia iho i to ˈna na tapoˈi tapono e piti ei haamanaˈoraa. 13  E hamani oe i te tapea auro 14  e e piti fifi auro tamâhia tavirihia mai te hoê taura,+ e e taamu oe i na fifi i na tapea.+ 15  “E faaue oe i te hoê taata nira faanehenehe ia hamani i te tapoˈi ouma o te haavaraa.+ E hamanihia te reira mai te tiputa, i te auro, te taura ninamu, te huruhuru mamoe vareau, te ahu uteute e te lino maitai roa tavirihia.+ 16  Hoê â roa e hoê â aano to ˈna ia tufetuhia, hoê tiapana* te roa e hoê tiapana te aano. 17  Ia tamau oe i te mau ofai maitai roa i nia iho, e maha anairaa ofai maitai roa. Te anairaa matamua, te adama ïa, te phetade e te semaradino. 18  Te piti o te anairaa, te nepheka ïa, te saphira e te ieloma. 19  Te toru o te anairaa, te ofai lesema* ïa, te sebu e te aheleme. 20  Te maha o te anairaa, te tarisisa ïa, te sema e te isephe. E tamauhia te reira i nia i te mau tapea auro. 21  Hoê ofai maitai roa no na 12 tamaiti tataitahi a Iseraela. E nanaˈohia te ofai tataitahi mai te hoê titiro, i te iˈoa o na 12 opu tataitahi. 22  “E hamani oe i te fifi tavirivirihia i nia iho i te tapoˈi ouma, mai te taura auro tamâhia.+ 23  E hamani oe e piti potaa auro no te tapoˈi ouma e e taamu oe i na potaa e piti i na hiti e piti o te tapoˈi ouma. 24  E oomo oe i na taura auro e piti i roto i na potaa e piti i na hiti o te tapoˈi ouma. 25  E oomo oe i na hopea o na taura e piti i roto i na tapea e piti, e e taamu oe ia raua i te tapoˈi tapono o te tiputa, i te muaraa. 26  E hamani oe e piti potaa auro e e tamau oe ia raua i na hiti e piti o te rotoraa o te tapoˈi ouma, piri atu i te tiputa.+ 27  E hamani â oe e piti potaa auro i nia iho i te muaraa o te tiputa, i raro mai i na tapoˈi tapono, piri atu i te vahi i taatihia ˈi te tiputa, i nia mai i te hatua raraahia o te tiputa.+ 28  Ia tapeahia te tapoˈi ouma i to ˈna vairaa i te hoê taura ninamu, ma te taati i to ˈna na potaa i na potaa o te tiputa. E tapea te reira i te tapoˈi ouma i to ˈna vairaa i nia iho i te tiputa, i nia mai i te hatua raraahia. 29  “E amo Aarona i nia i to ˈna ouma* i te iˈoa o na tamaiti a Iseraela i nia iho i te tapoˈi ouma o te haavaraa, ia tomo oia i roto i te Vahi Moˈa ei haamanaˈoraa tamau i mua ia Iehova. 30  E tuu oe i te Urima e te Tumima*+ i roto i te tapoˈi ouma o te haavaraa, e ei nia i te ouma* o Aarona raua e vai ai ia tomo oia i mua ia Iehova, e ia amo tamau o Aarona i na ravea no te haava i te ati Iseraela i nia i to ˈna ouma* i mua ia Iehova. 31  “E hamani oe i te ahu aita e rima no te tiputa i te taura ninamu anaˈe.+ 32  E apoo no te upoo to ropu i taua ahu ra. Ia raraahia te hiti o to ˈna apoo ati aˈe e te hoê taata raraa. Ia hohoˈa te reira i te apoo no te upoo o te ahu paruru o te hoê faehau, ia ore tera ahu ia mutu. 33  E hamani oe i te remuna i te taura ninamu, te huruhuru mamoe vareau e te ahu uteute ati aˈe te hiti o taua ahu ra, e te ôe auro na roto roto. 34  Ia tamau oe i te ôe auro e te remuna te tahi i muri iho i te tahi, hoê ôe auro e hoê remuna, ati aˈe te hiti o te ahu aita e rima. 35  E oomo Aarona i te reira, ia nehenehe oia e rave i ta ˈna taviniraa, e ia faaroohia te taˈi o te ôe ia tomo oia i roto i te nao* i mua ia Iehova e ia haere mai oia i rapae, ia ore oia ia pohe.+ 36  “E tupaipai oe i te tahi auro tamâhia anaana e e nanaˈo oe i nia iho mai tei nanaˈo i te hoê titiro: ‘Na Iehova te moˈaraa.’+ 37  E tamau oe i te reira i nia i te taamu upoo taa ê+ i te hoê taura ninamu. E vai noa te reira i nia i te muaraa o te taamu upoo taa ê. 38  I nia i to Aarona rae te reira e vai ai, e na Aarona e amo i te utua ia ravehia te tahi hara i te mau mea moˈa,+ ta te ati Iseraela e haamoˈa ia pûpû ratou i te reira ei ô moˈa. E vai noa te reira i nia i to ˈna rae, ia fanaˈo ratou i te farii maitai a Iehova. 39  “E raraa oe i te ahu roa lino maitai roa, e hamani oe i te hoê taamu upoo taa ê lino maitai roa e e hamani oe i te hoê hatua raraahia.+ 40  “E hamani atoa oe i te ahu roa e te hatua, e te taamu upoo no na tamaiti a Aarona,+ no te hanahana e te nehenehe.+ 41  E faaahu oe i to tuaana o Aarona e ta ˈna na tamaiti na muri ia ˈna, e faatavai,+ e faatoroa,*+ e haamoˈa oe ia ratou, e e tavini ratou ia ˈu ei tahuˈa. 42  A hamani atoa i te piripou poto lino no te tapoˈi ia ratou i to ratou vai-tahaa-raa.+ E haere te reira mai te tauupu e tae roa i te huha. 43  E oomohia te reira e Aarona e ta ˈna na tamaiti ia tomo ratou i roto i te tiahapa o te amuiraa aore ra ia tapiri atu i te fata no te tavini i roto i te vahi moˈa, ia ore ratou ia hara a pohe atu ai. E faatureraa vai tamau te reira no ˈna e to ˈna huaai i muri mai ia ˈna.

Nota i raro i te api

Heb: “aau î i te paari.”
E hohoˈa taimana to te ahu i hamanihia ˈi te ahu roa.
1 tiapana: 22,2 cm. Hiˈo i te tuhaa hau B14.
Aita i itehia eaha tera ofai maitai roa.
Heb: “mafatu.”
Hiˈo i te titionare.
Heb: “mafatu.”
Heb: “mafatu.”
Hiˈo i te titionare.
Heb: “faaî oe i to ratou rima.”