Exodo 34:1-35

  • Faaineineraa i te mau pǎpǎ ofai apî (1-4)

  • Iteraa Mose i te hanahana o Iehova (5-9)

  • Faahiti maite i te faufaa (10-28)

  • Anaana te iri o to Mose hohoˈa mata (29-35)

34  Na ô maira Iehova ia Mose: “A tarai na oe e piti pǎpǎ ofai mai na pǎpǎ ofai matamua,+ e e papai au i nia iho i na pǎpǎ i te mau parau i vai na i nia i na pǎpǎ matamua,+ tei parari ia oe.+  A faaineine ia oe no te poipoi aˈe, e pauma hoi oe i nia i te mouˈa Sinai e e tia oe i mua ia ˈu i te tupuai mouˈa.+  Aita râ hoê aˈe e nehenehe e pauma na muri ia oe, e eiaha te tahi atu ia itehia i nia i te mouˈa e ati aˈe. Eiaha atoa te mau nǎnǎ mamoe e puaaniho e te mau nǎnǎ puaatoro ia amu i te aihere i mua i taua mouˈa ra.”+  Tarai ihora Mose e piti pǎpǎ ofai mai na pǎpǎ ofai matamua, tia aˈera oia i nia i te poipoi roa e pauma aˈera i nia i te mouˈa Sinai, mai ta Iehova i faaue ia ˈna, e rave maira oia i na pǎpǎ ofai e piti i roto i to ˈna rima.  Pou ihora Iehova+ na roto i te ata, tia aˈera i pihai iho ia ˈna i reira, e faaite ihora i te iˈoa ra o Iehova.+  Te haere noa ra Iehova na mua ia ˈna a na ô ai: “Iehova, Iehova, e Atua aroha hamani maitai+ e te aumihi,+ o te ore e riri oioi,+ o tei rahi i te here taiva ore*+ e te parau mau,*+  o te faaite i te here taiva ore e tausani noa ˈtu te uˈi,+ o te faaore i te hape e te hapa e te hara,+ e faautua iho â râ oia i tei hapa,+ a faatae ai i te utua no te hape a te mau metua i nia i te mau tamarii e te mau mootua, i nia i te toru o te uˈi e te maha o te uˈi.”+  Ru ihora Mose i te piˈo e te tipapa i raro i te fenua.  Parau atura oia: “Mai te peu e ua fariihia vau i mua i to aro, e Iehova, a haere na, e Iehova, na muri ia matou e na rotopu ia matou,+ noa ˈtu e nunaa mârô* matou,+ e a faaore i ta matou hape e ta matou hara,+ e ia fatu oe ia matou.” 10  Na ô maira oia: “Teie au e faaau nei i te hoê faufaa: I mua i to oe nunaa taatoa, e faatupu vau i te mau ohipa faahiahia tei ore i tupu* aˈenei na te fenua atoa nei e i rotopu i te mau nunaa atoa,+ e pauroa te taata i rotopu ia outou te ite i te ohipa a Iehova, e ohipa maere rahi hoi ta ˈu e rave ia outou.+ 11  “A haapao maitai i ta ˈu e faaue nei ia oe i teie mahana.+ Teie au e tiahi nei mai mua ia oe i te ati Amori, te ati Kanaana, te ati Heta, te ati Perizi, te ati Hevi e te ati Iebusi.+ 12  A haapao maitai eiaha e faaau i te faufaa i te mau taata o te fenua ta oe e haere ra,+ aˈunei te reira e riro ai ei marei i rotopu ia outou.+ 13  Ia huri râ outou i ta ratou mau fata i raro, ia faahuˈahuˈa roa i ta ratou mau pou haamoriraa, e ia tâpû outou i ta ratou mau raau haamoriraa.*+ 14  Eiaha roa oe e piˈo i raro i mua i te tahi atu atua,+ ua matauhia hoi Iehova mai* tei titau ra ia haamorihia o ˈna anaˈe.* Oia mau, e Atua oia o te titau ra ia haamorihia o ˈna anaˈe.+ 15  A haapao maitai eiaha e faaau i te faufaa i te mau taata o tera fenua, no te mea ia rave ratou i te peu taiata e to ratou mau atua e ia pûpû i te tusia i to ratou mau atua,+ e titau mai te tahi ia oe, e e amu oe i ta ˈna tusia.+ 16  I muri iho, e rave mau â oe vetahi o ta ratou mau tamahine na ta oe mau tamaiti,+ e rave ta ratou mau tamahine i te peu taiata e to ratou mau atua e e faarave ratou i ta outou mau tamaiti i te peu taiata e to ratou mau atua.+ 17  “Eiaha roa oe e hamani i te atua faatôhia.*+ 18  “E haapao oe i te Oroa pane hopue ore.+ E amu oe i te pane hopue ore, mai ta ˈu i faaue ia oe. E na reira oe e hitu mahana i te taime faataahia i te avaˈe no Abiba,*+ no te mea i te avaˈe no Abiba i haere mai ai oe i rapae i Aiphiti. 19  “Na ˈu te mau tamaroa matahiapo atoa,+ e ta oe mau animara atoa, te fanauˈa oni matamua o te puaatoro aore ra te mamoe.+ 20  E hoo mai oe i te fanauˈa matamua o te asini i te hoê mamoe. Ia ore râ oe e hoo mai i te reira, e ofati oe i to ˈna aˈî. E hoo mai oe pauroa te matahiapo a ta oe mau tamaiti.+ Eiaha hoê ia tia i mua ia ˈu aita e faufaa i roto i te rima. 21  “E ono mahana oe e rave ai i te ohipa, i te hitu râ o te mahana e faafaaea oe.*+ Oia atoa i te tau ueueraa e i te tau ootiraa, e faafaaea oe. 22  “E e faatupu oe i te Oroa hebedoma i te mau huero maa paari o te ootiraa sitona, e te Oroa haapueraa* i te hopea o te matahiti.+ 23  “E toru taime i te matahiti te mau tane atoa i rotopu ia outou e tia ˈi i mua i te Fatu mau, o Iehova, te Atua o Iseraela.+ 24  E tiahi hoi au i te mau nunaa mai mua ia oe,+ e e faaaano vau i to oe tuhaa fenua, e aita e taata e hinaaro i to oe fenua a pauma ˈi oe no te ite i te aro o Iehova to oe Atua e toru taime i te matahiti. 25  “Eiaha roa oe e pûpû i te toto o ta ˈu tusia e tei hopue atoa.+ Eiaha te tusia no te Oroa Pasa ia faahereherehia i te po e poipoi noa ˈtu.+ 26  “E hopoi oe i te mau hotu paari matamua maitai roa ˈˈe o to oe fenua i te fare o Iehova to oe Atua.+ “Eiaha oe e tunu i te tahi fanauˈa puaaniho i roto i te û o te maiaa.”+ 27  Na ô faahou maira Iehova ia Mose: “E papai oe i teie mau parau,+ no te mea te faaau nei au i te hoê faufaa ia oe e ia Iseraela ia au i teie mau parau.”+ 28  Ua faaea oia i reira ia Iehova ra e 40 ao e 40 po. Aita oia i amu i te maa e i inu i te pape.+ Ua papai Oia i te parau o te faufaa, na Ture Ahuru,* i nia iho i na pǎpǎ ofai.+ 29  Pou maira ïa Mose mai nia mai i te mouˈa Sinai e na pǎpǎ ofai o te Haamanaˈoraa i roto i to ˈna rima.+ I to ˈna pouraa mai, mai nia mai i te mouˈa, aita Mose i ite e te anaana ra te iri o to ˈna hohoˈa mata no te mea i paraparau na oia e te Atua. 30  I te iteraa Aarona e pauroa te ati Iseraela ia Mose, ite aˈera ratou e te anaana ra te iri o to ˈna hohoˈa mata e mǎtaˈu ihora ratou i te tapiri atu ia ˈna.+ 31  Pii atura râ Mose ia ratou, haere maira ïa Aarona e pauroa te raatira o te nahoa ia ˈna ra, e paraparau atura Mose ia ratou. 32  I muri iho, tapiri maira pauroa te ati Iseraela ia ˈna, e horoa ˈtura oia i te faaueraa atoa ta Iehova i horoa ia ˈna i nia i te mouˈa Sinai.+ 33  Ia oti ta Mose paraparauraa ia ratou, e tapoˈi oia i to ˈna hohoˈa mata i te puroˈu.+ 34  Ia tomo râ Mose i mua ia Iehova no te paraparau ia ˈna, e tatara oia i te puroˈu e haere noa ˈtu oia i rapae.+ E haere ïa oia i rapae e e faaite i te ati Iseraela i te mau faaueraa tei horoahia mai ia ˈna.+ 35  E e ite te ati Iseraela e ua anaana te iri o te hohoˈa mata o Mose, e tuu faahou mai ïa Mose i to ˈna puroˈu e tomo noa ˈtu oia no te paraparau e te Atua.*+

Nota i raro i te api

Aore ra “hamani maitai.”
Aore ra “te nehenehe e tiaturi.”
Heb: “aˈî etaeta.”
Aore ra “poietehia.”
Hiˈo i te titionare.
Heb: “Iehova, to ˈna iˈoa o.”
Aore ra “mea riri na ˈna to ˈna mau enemi.”
Aore ra “faatahehia.”
Hiˈo i te tuhaa hau B15.
Aore ra “e haapao oe i te Sabati.”
Matau-atoa-hia ei Oroa patiaraa tiahapa.
Heb: “na parau ahuru.”
Heb: “o ˈna.”