Exodo 4:1-31
4 Tera râ, pahono atura Mose: “E ia ore râ ratou e tiaturi mai ia ˈu, a ore atu ai e faaroo mai i to ˈu reo,+ e parau hoi ratou: ‘Aita Iehova i fa mai ia oe.’”
2 Na ô maira ïa Iehova: “Eaha tena i roto i to rima?” Pahono atura oia: “E raau.”
3 Na ô maira oia: “A taue i te reira i raro.” Taue ihora ïa oia i te raau i raro, e riro maira te raau ei ophi,+ e faaatea ihora Mose.
4 Na ô maira râ Iehova ia Mose: “A toro i to rima e a haru i te ophi i to ˈna aero.” Toro ihora ïa oia i to ˈna rima e haru atura i te ophi, e riro maira ïa ei raau i roto i to ˈna rima.
5 Na ô maira ïa te Atua: “Mea na reira ïa ratou e tiaturi ai e ua fa mai Iehova te Atua o to ratou mau tupuna, te Atua o Aberahama, te Atua o Isaaka e te Atua o Iakoba+ ia oe.”+
6 Na ô faahou maira Iehova: “A tuu na i to rima i roto i te opiraa o to ahu i nia i to ouma.” Tuu ihora ïa oia i to ˈna rima i roto i te opiraa o to ˈna ahu. I to ˈna iritiraa mai i to ˈna rima, inaha ua leperahia to ˈna rima mai te hiona te uouo!+
7 Na ô maira oia: “A tuu faahou i to rima i roto i te opiraa o to ahu i nia i to ouma.” Tuu faahou ihora ïa oia i to ˈna rima i roto i to ˈna ahu. I to ˈna iritiraa mai i to ˈna rima mai roto mai i te ahu, ua maitai faahou mai to ˈna rima mai na mua ˈˈe!
8 Na ô maira oia: “Ia ore ratou e tiaturi ia oe aore ra e haapao i te tapao matamua, e tâuˈa iho â ratou i to muri iho tapao.+
9 Teie râ, noa ˈtu e eita ratou e tiaturi i teie na tapao e piti, a ore atu ai ratou e faaroo i to reo, e rave oe maa pape o te anavai Nile, a ninii atu ai i nia i te repo mǎrô, e e riro te pape ta oe i rave no roto mai i te anavai Nile ei toto i nia i te repo mǎrô.”+
10 Parau atura Mose ia Iehova: “Eiaha na oe e inoino mai, e Iehova, e ere hoi au i te taata ite i te paraparau, mai mua mai e tae roa mai i to oe paraparauraa mai i to tavini, mea maumau hoi ta ˈu parau e e tafifi to ˈu arero.”+
11 Na ô maira Iehova: “Na vai i hamani i te vaha no te taata, aore ra e faariro ia ratou ei vava, tariˈa turi, feia mata marama maitai, aore ra matapo? E ere anei na ˈu, o Iehova?
12 A haere ïa i teie nei, e ei pihai iho vau ia oe ia paraparau atu oe,* e e haapii au ia oe eaha ta oe e parau atu.”+
13 Tera râ, parau atura oia: “Eiaha na oe e inoino mai, e Iehova, a tono na i te tahi atu taata ta oe e hinaaro e tono.”
14 Ura ihora Iehova i te riri ia Mose, e na ô maira: “Eaha to oe manaˈo i to tuaana o Aarona+ te ati Levi? Ua ite au mea ite roa oia i te paraparau. E te haere mai nei oia e farerei ia oe. Ia ite mai oia ia oe, e oaoa to ˈna aau.+
15 No reira, ia paraparau oe ia ˈna e ia tuu atu i ta ˈu mau parau i roto i to ˈna vaha,+ e ei pihai iho vau ia oe e ia ˈna ia paraparau orua,+ e e haapii au ia orua eaha te rave.
16 Na ˈna e paraparau i te nunaa no oe, e ei auvaha oia no oe, e e mono oe i* te Atua i mua ia ˈna.+
17 E e rave oe i teie raau i roto i to rima a faatupu atu ai i te mau tapao.”+
18 Hoˈi atura ïa Mose ia Ietero to ˈna metua hoovai+ e parau atura: “Te hinaaro nei au e haere e e hoˈi i to ˈu mau taeae i Aiphiti e hiˈo e te ora noa ra anei ratou.” Parau maira Ietero ia Mose: “A haere ma te hau.”
19 I muri iho i te reira, na ô maira Iehova ia Mose i Midiana: “A haere, a hoˈi i Aiphiti, no te mea ua pohe pauroa te taata i imi e haapohe ia oe.”+
20 Rave ihora ïa Mose i ta ˈna vahine faaipoipo e ta ˈna na tamaiti, tuu atura i nia i te asini, e hoˈi atura i te fenua o Aiphiti. Rave atoa ihora Mose i te raau a te Atua mau i roto i to ˈna rima.
21 E na ô maira Iehova ia Mose: “Ua hoˈi anaˈe oe i Aiphiti, ia faatupu oe i mua ia Pharao i te mau semeio atoa i horoa ˈtu ai au i te mana.+ Tera râ, e vaiiho vau i to ˈna aau ia etaeta,+ e eita oia e tuu i to ˈu nunaa ia haere.+
22 Ia parau oe ia Pharao: ‘Teie ta Iehova e parau ra: “E tamaiti na ˈu o Iseraela, ta ˈu matahiapo.+
23 Te parau atu nei au ia oe: A tuu i ta ˈu tamaiti ia haere ia nehenehe oia e tavini ia ˈu. Ia ore râ oe e tuu mai ia ˈna, e haapohe au i to tamaiti, to matahiapo.”’”+
24 E tei te purumu ratou e tae atu ai i te vahi nohoraa, farerei maira Iehova+ ia ˈna e imi ihora i te haapohe ia ˈna.+
25 Rave ihora ïa Zipora+ i te tahi ofai oi e peritome ihora i ta ˈna tamaiti e topa ihora to ˈna iri i mua i nia i to ˈna avae e parau atura: “No te mea e tane faaipoipo o te toto oe na ˈu.”
26 Tuu ihora ïa Oia ia ˈna ia haere. I tera taime, no te peritomeraa oia i parau ai “e tane faaipoipo o te toto.”
27 Na ô maira Iehova ia Aarona: “A haere i te medebara e farerei ia Mose.”+ Haere atura ïa oia, farerei atura ia ˈna i te mouˈa o te Atua mau,+ e aroha ˈtura ia ˈna ma te apa ˈtu.
28 Faatia maira Mose ia Aarona i te mau parau atoa a Iehova, tei tono ia ˈna,+ e te mau tapao atoa ta ˈna i faaue ia ˈna ia faatupu.+
29 I muri iho i te reira, haere atura Mose raua Aarona e haaputuputu maira i te mau matahiapo atoa o te ati Iseraela.+
30 Faatia ˈtura Aarona ia ratou i te mau parau atoa ta Iehova i parau ia Mose, e faatupu ihora oia i te mau tapao+ i mua i te mata o te nunaa.
31 Tiaturi ihora te nunaa ia Mose.+ I to ratou faarooraa e ua haapao Iehova i te ati Iseraela+ e ua ite mai i to ratou ahoaho,+ tuturi ihora ratou e tipapa ihora.
