Exodo 35:1-35
35 I muri aˈe, haaputuputu maira Mose i te amuiraa taatoa o te ati Iseraela e parau atura ia ratou: “Teie ta Iehova i faaue mai ia ravehia:+
2 E ravehia te ohipa e ono mahana, e riro râ te hitu o te mahana ei mea moˈa na outou, e mahana Sabati, e mahana faafaaearaa no Iehova.+ Te taata e rave i te ohipa i taua mahana ra, e haapohehia ïa.+
3 Eiaha roa outou e tahu i te auahi i to outou mau nohoraa i te mahana Sabati.”
4 Parau atura Mose i te amuiraa taatoa o te ati Iseraela: “Teie ta Iehova i faaue:
5 ‘A rave mai i te ô na Iehova no rotopu ia outou.+ E hopoi mai te taata tataitahi ua tae te aau+ i te hoê ô na Iehova: te auro, te ario, te veo,
6 te taura ninamu, te huruhuru mamoe vareau, te ahu uteute, te lino maitai roa, te huruhuru puaaniho,+
7 te iri mamoe oni faauteutehia, te iri humi, te raau sitima,
8 te hinu no te mori, te zuri no te monoˈi faatavai e no te mea noˈanoˈa,+
9 te ofai sema, e te tahi atu mau ofai no te apǎpǎ i nia iho i te tiputa+ e te tapoˈi ouma.+
10 “‘E haere pauroa mai te taata aravihi*+ i rotopu ia outou e e hamani ratou i te mau mea atoa ta Iehova i faaue,
11 oia hoi te sekene e to ˈna tapoˈi tiahapa e te tahi atu tapoˈi, to ˈna mau pine e to ˈna mau iri pǎpai, to ˈna mau raau tarava, to ˈna mau pou, e to ˈna mau niu,
12 te Afata+ e to ˈna na raau amoraa,+ te tapoˈi,+ e te paruru+ no te paruai,
13 te iri vairaa pane+ e to ˈna na raau amoraa e pauroa te taihaa e te pane pûpûhia,+
14 te vairaa mori+ no te turama e to ˈna mau taihaa e to ˈna mau mori e te hinu no te mori,+
15 te fata mea noˈanoˈa+ e to ˈna na raau amoraa, te monoˈi faatavai e te mea noˈanoˈa,+ te paruai* no te tomoraa o te sekene,
16 te fata tusia taauahi+ e to ˈna upeˈa veo, to ˈna na raau amoraa e pauroa to ˈna taihaa, te tura e to ˈna vairaa,+
17 te paruru o te aua,+ to ˈna mau pou e to ˈna mau niu, te paruai* o te tomoraa o te aua,
18 te mau naero rahi o te sekene e te mau naero rahi o te aua e te mau taura no te reira,+
19 te mau ahu raraa-maitai-hia+ no te tavini i roto i te nao,* te mau ahu moˈa no Aarona+ te tahuˈa e te mau ahu o ta ˈna mau tamaiti no te taviniraa ei tahuˈa.’”
20 Haere atura ïa te amuiraa taatoa o te ati Iseraela i rapaeau mai mua ˈtu ia Mose.
21 Haere maira pauroa te taata tei turaihia te aau+ e tei hinaaro, e hopoi maira na Iehova i ta ratou ô ia faaohipahia no te tiahapa o te amuiraa, no te mau taihaa atoa hinaaro-mau-hia no te haamoriraa, e no te mau ahu moˈa.
22 Haere noa maira ratou, te tane e te vahine aau tae, e hopoi maira i te pine faanehenehe, te tapea tariˈa, te potaa, e te tahi atu mau taoˈa faanehenehe e te taoˈa auro ua rau te huru. Hopoi maira ratou pauroa i ta ratou mau tusia auro* na Iehova.+
23 Te taata atoa te vai ra ta ˈna taura ninamu, huruhuru mamoe vareau, ahu uteute, lino maitai roa, huruhuru puaaniho, iri mamoe oni faauteutehia, e iri humi, ua hopoi mai ratou i te reira.
24 Hopoi maira pauroa te taata tei pûpû i te ario e te veo i te ô na Iehova, e te taata atoa te vai ra ta ratou raau sitima no te ohipa taatoa, ua afai mai ratou i te reira.
25 Hamani aˈera te mau vahine aravihi+ i te taura i to ratou rima, e hopoi maira i ta ratou i hamani: te taura ninamu, te huruhuru mamoe vareau, te ahu uteute e te lino maitai roa.
26 Hamani aˈera pauroa te vahine aravihi tei turaihia te aau i te taura i te huruhuru puaaniho.
27 Hopoi maira te mau raatira i te ofai sema e te tahi atu mau ofai e tamauhia i nia i te tiputa e te tapoˈi ouma,+
28 e te zuri, e te hinu no te mori e no te monoˈi faatavai+ e no te mea noˈanoˈa.+
29 Hopoi maira pauroa te tane e te vahine tei turaihia te aau i te tahi mea no te ohipa ta Iehova i faaue na roto ia Mose ia ravehia. Hopoi maira te ati Iseraela i te reira ei ô horoa noa na Iehova.+
30 Parau atura Mose i te ati Iseraela: “Inaha, ua maiti Iehova ia Bezaleela te tamaiti a Uri, te tamaiti a Hura o te opu o Iuda.+
31 Ua faaî oia ia ˈna i te varua o te Atua, a horoa ˈi no ˈna i te paari, te maramarama e te ite i te mau ohipa rimaî e rave rau atoa
32 no te hamani i te hohoˈa o te mau ohipa rii nehenehe, no te faaohipa i te auro, te ario e te veo,
33 no te tarai e te tamau i te ofai, e no te hamani i te mau taoˈa raau nehenehe atoa.
34 Ua tuu oia i roto i to ˈna aau i te aravihi e haapii ia vetahi ê, o raua Oholiaba+ te tamaiti a Ahisemaka o te opu o Dana.
35 Ua faaî oia ia raua i te aravihi*+ e rave i te mau ohipa rimaî atoa, te nira-faanehenehe-raa e te raraa ma te faaohipa i te taura ninamu, te huruhuru mamoe vareau, te ahu uteute, e te lino maitai roa e te ohipa raraa. Na teie nau tane e rave i te mau ohipa e rave rau atoa e e faaineine i te mau hohoˈa e rave rau atoa.
Nota i raro i te api
^ Heb: “aau î i te paari.”
^ Aore ra “paruru.”
^ Aore ra “paruru.”
^ Aore ra “tusia auro taueuehia.”
^ Heb: “paari o te aau.”
