Exodo 19:1-25
19 I te toru o te avaˈe i muri aˈe i to te ati Iseraela haereraa i rapae i te fenua o Aiphiti, i taua mahana mau ra, tae atura ratou i te medebara o Sinai.
2 Faarue ihora ratou i Rephidima,+ tae atura i te medebara o Sinai e puhapa ihora i te medebara. Puhapa ihora Iseraela i reira i mua i te mouˈa.+
3 Pauma ˈtura Mose i nia i te mouˈa no te tia i mua i te Atua mau, e pii maira Iehova ia ˈna mai te mouˈa mai,+ a na ô ai: “Teie ta oe e parau i te utuafare o Iakoba, e ta oe e faaite i te ati Iseraela:
4 ‘Ua ite outou eaha ta ˈu i rave i to Aiphiti,+ no te amo ia outou i nia i te pererau o te aeto a hopoi mai ai ia outou ia ˈu nei.+
5 No reira, ia auraro maite outou i to ˈu reo e ia haapao i ta ˈu faufaa, e riro mau â outou ei faufaa taa ê* na ˈu i rotopu i te mau nunaa atoa,+ no ˈu hoi te fenua atoa nei.+
6 E riro outou ei faatereraa arii tahuˈa na ˈu e ei nunaa moˈa no ˈu.’+ Tera ta oe e parau i te ati Iseraela.”
7 Haere ihora ïa Mose e haaputuputu maira i te mau matahiapo o te nunaa e parau atura ia ratou i taua mau parau atoa ra ta Iehova i faaue ia ˈna.+
8 I muri iho, pahono paatoa maira te nunaa ma te reo hoê: “Pauroa ta Iehova i parau, e hinaaro matou e rave.”+ I reira iho, hopoi atura Mose i te pahonoraa a te nunaa i mua ia Iehova.
9 Na ô maira Iehova ia Mose: “Inaha, te haere atu nei au ia oe ra na roto i te hoê ata poiri, ia nehenehe te nunaa ia faaroo ia paraparau vau ia oe, a tiaturi noa ˈi ratou ia oe.” Faaite atura ïa Mose ia Iehova i te parau a te nunaa.
10 Na ô maira Iehova ia Mose: “A haere i te nunaa ra e a haamoˈa ia ratou i teie mahana e no ananahi, e ia tamâ ratou i to ratou ahu.
11 E ia ineine ratou no te toru o te mahana, no te mea i te toru o te mahana e pou mai ai Iehova i nia iho i te mouˈa Sinai i mua i te mata o te nunaa taatoa.
12 A tuu i te otia no te nunaa ati aˈe te mouˈa e a parau ia ratou: ‘A haapao maitai eiaha e pauma i nia i te mouˈa aore ra e tapea i te hiti mouˈa. Te taata e tapea i te mouˈa, e haapohe-mau-hia ïa.
13 Eiaha te hoê rima ia tapea i te reira, aˈunei oia e pehihia ˈi i te ofai aore ra e puta ˈi i te tahi mea* a pipiha roa ˈtu ai. E animara anei aore ra e taata, eita o ˈna e ora.’+ Ia taˈi râ te pu,*+ e nehenehe ratou e pauma i nia i te mouˈa.”
14 Pou ihora ïa Mose i te nunaa ra mai nia mai i te mouˈa, haamoˈa ˈtura i te nunaa, e tamâ aˈera ratou i to ratou ahu.+
15 Parau atura oia i te nunaa: “A faaineine ia outou no te toru o te mahana. Eiaha e taoto i ta outou vahine faaipoipo.”*
16 I te toru o te mahana i te poipoi, haruru maira te patiri e anapa maira te uira, e ata rahi+ to nia i te mouˈa, faaroohia ihora te hoê taˈi puai o te pu tara, e rûrû aˈera pauroa te taata i roto i te puhapa.+
17 Aratai atura Mose i te nunaa i rapae i te puhapa ia tia ˈtu i mua i te Atua mau, e putuputu ihora ratou i te tumu mouˈa.
18 Au auahi ihora te mouˈa Sinai, no te mea ua pou Iehova i nia iho na roto i te auahi,+ e te pee ra to ˈna au auahi mai te au auahi o te hoê umu, e te mouˈa taatoa te aueue uˈana ra.+
19 A puai noa ˈtu ai te taˈi o te pu tara, paraparau ihora Mose, e pahono maira te reo o te Atua mau ia ˈna.
20 Pou maira ïa Iehova i nia iho i te mouˈa Sinai, i nia iho hoi i te tupuai mouˈa. Pii maira Iehova ia Mose ia pauma mai i nia i te tupuai mouˈa, e pauma aˈera Mose.+
21 Na ô maira Iehova ia Mose: “A pou atu a faaara i te nunaa eiaha ia tamata i te tapiri atu ia Iehova no te hiˈo ia ˈna, aˈunei e pohe ai e rave rahi.
22 E te mau tahuˈa e faafatata tamau ra ia Iehova, e haamoˈa ratou ia ratou, ia ore Iehova e tairi* ia ratou.”+
23 Parau atura Mose ia Iehova: “Eita te nunaa e nehenehe e pauma i nia i te mouˈa Sinai no te mea ua faaara ê na oe ia matou, a na ô mai ai: ‘A tuu i te otia ati aˈe te mouˈa, e a haamoˈa i te reira.’”+
24 Tera râ, na ô maira Iehova ia ˈna: “A haere, a pou, e a pauma faahou mai i nia nei, o oe e o Aarona na muri ia oe, eiaha râ e vaiiho i te mau tahuˈa e te nunaa ia tapiri mai ia Iehova a pauma mai ai ia ˈna ra, ia ore oia ia tairi ia ratou.”+
25 Pou ihora ïa Mose i te nunaa ra e faaara ˈtura ia ratou.
Nota i raro i te api
^ Aore ra “poiherehia.”
^ Heb: “tara mamoe.”
^ Peneiaˈe i te hoê teˈa.
^ Heb: “Eiaha e tapiri i te hoê vahine.”
^ Heb: “vavahi.”
