Exodo 36:1-38
36 “E rave Bezaleela i te ohipa e o Oholiaba e pauroa te tane aravihi* ta Iehova i horoa i te paari e te maramarama no te ite e nafea ia rave i te mau ohipa atoa o te taviniraa moˈa mai ta Iehova iho â i faaue.”+
2 Titau ihora Mose ia Bezaleela e ia Oholiaba e pauroa te tane aravihi ta Iehova i tuu i roto i te aau i te paari,+ te tane atoa tei turaihia te aau ia turu i te ohipa.+
3 Rave maira ratou ia Mose ra i te mau ô atoa+ ta te ati Iseraela i hopoi mai no te ohipa o te taviniraa moˈa. Tera râ, tamau noa ˈtura ratou i te hopoi mai ia ˈna i te ô horoa noa, i tera e tera poipoi.
4 I muri iho i to raua haamataraa i te ohipa moˈa, te tae mai ra pauroa te rave ohipa aravihi te tahi i muri iho i te tahi,
5 e te parau ra ratou ia Mose: “Te hopoi mai ra te nunaa hau aˈe i tei hinaarohia no te ohipa ta Iehova i faaue mai e rave.”
6 Faaue atura ïa Mose ia faaarahia na te puhapa atoa: “Te mau tane e te mau vahine, eiaha e hopoi faahou mai i te mau ô no te sekene moˈa.” Tapeahia ˈtura te nunaa ia hopoi mai i te tahi ô.
7 Ua navai te mau ô no te ohipa atoa e ravehia, e ua hau aˈe.
8 Hamani aˈera ïa pauroa te rave ohipa aravihi+ i te sekene+ i na ahuru tapoˈi tiahapa lino maitai roa tavirihia, te taura ninamu, te huruhuru mamoe vareau e te ahu uteute. Nira faanehenehe ihora oia* i te kerubi i nia iho.+
9 E 28 kubiti* te roa o na tapoˈi tiahapa tataitahi e e 4 kubiti te aano. Hoê â faito to te mau tapoˈi tiahapa atoa.
10 Puoi atura oia e pae tapoˈi tiahapa te tahi i te tahi, e puoi atura i te tahi atu na pae tapoˈi tiahapa te tahi i te tahi.
11 I muri iho, hamani ihora oia i te tapona taura ninamu i te hiti o te tapoˈi tiahapa e puoi ai i te reira. Na reira atoa ˈtura oia i te hiti o te tapoˈi hopea i te vahi mau e tuati ai te reira.
12 Hamani ihora oia e 50 tapona i nia hoê tapoˈi tiahapa e e 50 tapona i te tahi atu hiti o te tapoˈi tiahapa, i te vahi e tuati ai te tahi e te tahi hiti i taua mau tapona ra.
13 Hamani atura oia e 50 pine auro e puoi atura i na tapoˈi tiahapa i te pine, a riro atu ai ei hoê noa tapoˈi no te sekene.
14 Hamani ihora oia i te tapoˈi tiahapa huruhuru puaaniho ei tapoˈi na nia iho i te sekene. Hamani ihora oia 11 tapoˈi tiahapa.+
15 E 30 kubiti te roa o te tapoˈi tiahapa tataitahi e e 4 kubiti te aano. Hoê â faito to na 11 tapoˈi tiahapa.
16 Puoi atura oia e pae tapoˈi tiahapa te tahi i te tahi, e puoi atura oia i na ono tapoˈi tiahapa e toe ra te tahi i te tahi.
17 I muri iho, hamani atura oia e 50 tapona na te hiti o te tapoˈi tiahapa hopea i te puoiraa, e hamani ihora oia e 50 tapona na te hiti o te tahi atu tapoˈi tiahapa e puoi ai i te reira.
18 E hamani ihora oia e 50 pine veo no te puoi i te tiahapa ia riro ei hoê noa tapoˈi.
19 Hamani ihora oia i te hoê tapoˈi no te tiahapa i te iri mamoe oni faauteutehia, e te hoê tapoˈi i te iri humi no te tuu na nia iho.+
20 Hamani atura oia i te mau iri pǎpai o te sekene i te raau sitima,+ o te faatiahia i nia.+
21 Hoê ahuru kubiti te teitei o na iri pǎpai tataitahi, e hoê kubiti e te afa te aano.
22 E piti tuatiraa niu to na iri pǎpai tataitahi ia puoihia te tahi i te tahi. Mea na reira to ˈna hamaniraa i te mau iri pǎpai atoa o te sekene.
23 Hamani ihora ïa oia i te mau iri pǎpai no te pae apatoa o te sekene, e 20 iri pǎpai.
24 Hamani ihora oia e 40 niu ario no te tuu i raro aˈe i na 20 iri pǎpai, e piti niu i raro aˈe te iri pǎpai matamua no to ˈna na tuatiraa niu e piti, e e piti niu i raro aˈe i to muri mai iri pǎpai no to ˈna na tuatiraa niu e piti.+
25 No te tahi atu pae o te sekene, i te pae apatoerau, hamani ihora oia e 20 iri pǎpai
26 e to ratou na 40 niu ario, e piti niu i raro aˈe hoê iri pǎpai, e e piti niu i raro aˈe i te tahi atu na iri pǎpai tataitahi.
27 No te muriraa o te sekene i tooa o te râ, hamani ihora oia e ono iri pǎpai.+
28 Hamani ihora oia e piti iri pǎpai ei poro o te sekene i na piti poro o te muriraa.
29 E piti iri pǎpai mai raro e haere roa i nia, i reira raua e tuati ai i te hoê potaa. Mai tera to ˈna hamaniraa i na poro e piti.
30 E vaˈu ïa iri pǎpai e to ratou na 16 niu ario, e piti niu i raro aˈe i na iri pǎpai tataitahi.
31 Hamani ihora oia i te mau raau tarava i te sitima, e pae raau tarava no te mau iri pǎpai o te hoê pae o te sekene,+
32 e pae raau tarava no te mau iri pǎpai o te tahi atu pae o te sekene, e e pae no te mau iri pǎpai o te sekene no te muriraa i tooa o te râ.
33 Hamani ihora oia i te raau tarava o te patiahia i ropu i te mau iri pǎpai e ia pipiha roa ˈtu.
34 Tapiri atura oia i te mau iri pǎpai i te auro, hamani ihora i to ratou mau potaa i te auro no te tapea i te mau raau tarava, e tapiri atura i te mau raau tarava i te auro.+
35 E hamani ihora oia i te hoê paruru+ i te taura ninamu, te huruhuru mamoe vareau, te ahu uteute e te lino maitai roa tavirihia. Ua hamani oia i te reira ma te nira faanehenehe i te hohoˈa o te kerubi+ i nia iho.+
36 Hamani ihora oia e maha pou raau sitima no te paruru, oia atoa te mau tapea auro, e tapiri atura i na pou i te auro e faatô ihora oia e maha niu ario no te reira.
37 I muri iho, hamani atura oia i te hoê paruai* no te tomoraa o te tiahapa i te taura ninamu, te huruhuru mamoe vareau, te ahu uteute e te lino maitai roa tavirihia tei raraahia te tahi i te tahi,+
38 e to ˈna na pou e pae e te mau tapea no te reira. Tapiri atura oia i te auro i nia i to ratou niaraa e to ratou mau taihaa* no te tamauraa, e veo râ to ratou na niu e pae.
Nota i raro i te api
^ Heb: “aau î i te paari.”
^ Oia hoi Bezaleela.
^ 1 kubiti: 44,5 cm. Hiˈo i te tuhaa hau B14.
^ Aore ra “paruru.”
^ Aore ra “potaa,” “taura” no te taamuraa.
