Exodo 2:1-25
2 I taua taime ra, ua faaipoipo te tahi tane o te opu o Levi i te hoê tamahine a Levi.+
2 E hapû maira te vahine e fanau maira i te hoê tamaiti. I to ˈna iteraa e aiû nehenehe roa, huna ihora oia ia ˈna e toru avaˈe.+
3 Aita faahou atura oia i nehenehe e huna ia ˈna,+ rave maira oia i te hoê ete* môˈu e parai ihora i te tâ e te tapau. Tuu ihora oia i te aiû i roto e vaiiho atura i rotopu i te mau opaero o te hiti anavai Nile.
4 Tera râ, te tia ra to ˈna tuahine+ i te atea rii no te ite eaha te tupu no ˈna.
5 I to te tamahine a Pharao pouraa e hopu i te pape Nile, te hahaere ra ta ˈna mau tavini vahine na te hiti Nile. Ite ihora oia i te ete i rotopu i te mau opaero. Faaue ihora oia i ta ˈna tîtî tamahine e tii i te reira.+
6 I to ˈna tatararaa i te reira, ite ihora oia i te aiû, e te taˈi ra te tamaroa. Aroha ihora oia ia ˈna, ua parau râ oia: “E tamarii Hebera teie.”
7 Parau maira to ˈna tuahine i te tamahine a Pharao: “E haere anei au e titau mai i te tahi vahine no roto i te mau Hebera no te hii i te aiû no oe?”
8 Parau atura te tamahine a Pharao: “A haere!” Haere ihora te tamahine e tii i te metua vahine o te aiû.+
9 Parau atura te tamahine a Pharao ia ˈna: “A rave i teie aiû ia oe ra e a hii ia ˈna no ˈu, na ˈu e aufau ia oe.” Rave maira ïa te vahine i te aiû e hii atura ia ˈna.
10 I te paariraa mai te tamarii, aratai atura oia ia ˈna i te tamahine a Pharao, e riro maira oia ei tamaiti na ˈna.+ Mairi ihora oia ia ˈna i te iˈoa o Mose* e parau atura: “No te mea no roto i te pape to ˈu umeraa mai ia ˈna i rapae.”+
11 E i te riroraa mai Mose ei taata paari,* ua haere oia i to ˈna mau taeae Hebera e hiˈo i te mau ohipa teimaha ta ratou e rave ra,+ e ite atura oia i te hoê tane Aiphiti e tairi ra i te hoê o to ˈna mau taeae.
12 Hiˈo aˈera ïa oia i tera e tera pae, inaha aita e taata, haapohe atura oia i te tane Aiphiti e huna ˈtura ia ˈna i roto i te one.+
13 Tera râ, haere faahou ihora oia i to muri iho mahana, e e piti tane Hebera te taputô ra. Parau atura ïa oia i te tane no ˈna te hape: “Eaha oe e tairi ai i to oe taata tupu?”+
14 Parau maira oia: “Na vai i faatoroa ia oe ei tamaiti huiarii e ei haava i nia ia mâua? Te opua ra anei oe e haapohe ia ˈu mai ta oe i haapohe i te tane Aiphiti?”+ Mǎtaˈu ihora Mose, e na ô ihora: “Papu, ua itehia taua ohipa ra!”
15 Faaroo ihora Pharao i taua ohipa ra, e opua ˈtura e haapohe ia Mose. Tera râ, horo ihora Mose i te atea ê ia Pharao e haere atura e faaea i te fenua o Midiana,+ e parahi ihora i pihai iho i te tahi apoo pape.
16 E hitu hoi tamahine ta te hoê tahuˈa no Midiana,+ e ua haere mai ratou e huti i te pape no te faaî i te mau farii pape ia inu te nǎnǎ mamoe a to ratou metua tane.
17 Mai tei matauhia râ, haere maira te mau tiai mamoe e tiahi atura ia ratou. Tia aˈera ïa Mose i nia e tauturu* atura i te mau vahine e faainu atura i ta ratou nǎnǎ mamoe.
18 I to ratou hoˈiraa i te fare i to ratou metua tane ra o Reuela,*+ ui atura oia ia ratou ma te maere: “Mea nafea outou i tae oioi mai ai i te fare i teie mahana?”
19 Pahono aˈera ratou: “Na te tahi tane Aiphiti+ i faaora ia matou i te mau tiai mamoe, e ua huti atoa oia i te pape na matou e ua faainu i ta matou nǎnǎ mamoe.”
20 Parau atura oia i ta ˈna mau tamahine: “Teihea hoi o ˈna? Eaha outou i vaiiho ai i tera tane i ǒ? A tii ia ˈna, ia tamaa o ˈna e tatou.”
21 I muri aˈe, farii atura Mose e faaea i ǒ tera tane, e horoa ˈtura oia i ta ˈna tamahine o Zipora+ ei vahine faaipoipo na Mose.
22 I muri aˈe, fanau maira oia i te hoê tamaiti, e mairi ihora Mose ia ˈna i te iˈoa o Geresoma,*+ ua na ô hoi oia: “Ua riro vau ei taata ê e noho ra i te hoê fenua ê.”+
23 E maoro aˈera,* pohe ihora te arii o Aiphiti,+ tera râ autâ noa ˈtura te ati Iseraela no to ratou faatîtîraahia e auê noa ˈtura ratou no te mauiui, e tae noa ˈtura i te Atua mau ra ta ratou taparuraa i te tauturu no to ratou faatîtîraahia.+
24 E faaroo ihora te Atua i to ratou autâ,+ e haamanaˈo ihora te Atua i ta ˈna faufaa ia Aberahama, Isaaka e Iakoba.+
25 Hiˈo maira ïa te Atua i te ati Iseraela, e haapao maira te Atua i to ratou tupuraa.
Nota i raro i te api
^ Aore ra “araka,” “afata.”
^ “Umehia i rapae” te auraa, oia hoi faaorahia mai roto mai i te pape.
^ Aore ra “puai.”
^ Aore ra “paruru.”
^ Oia hoi Ietero.
^ “E taata ê i ǒ” te auraa.
^ Heb: “I muri aˈe e rave rahi mahana.”
