Exodo 29:1-46
29 “Teie ta oe e rave no te haamoˈa ia ratou ia tavini ratou ia ˈu ei tahuˈa: A rave i te hoê puaatoro oni apî, e piti mamoe oni oraora maitai,+
2 te pane hopue ore, te pane mai te hei ra e tei ôihia e te hinu, e te pai hopue ore paraihia i te hinu.+ E hamani oe i te reira i te faraoa ota sitona maitai roa
3 e e tuu oe i te reira i roto i te hoê farii,+ a pûpû atu ai e te puaatoro oni e na mamoe oni e piti.
4 “E aratai mai oe ia Aarona e ta ˈna mau tamaiti i te tomoraa o te tiahapa o te amuiraa+ e e horoi oe ia ratou i te pape.+
5 I muri iho, e rave oe i te mau ahu+ e e faaoomo oe ia Aarona i te ahu roa, te ahu o te tiputa aita e rima, te tiputa e te tapoˈi ouma, e e taamu maitai oe i te hatua raraahia o te tiputa i nia i to ˈna tauupu.+
6 E tuu oe i te taamu upoo taa ê i nia i to ˈna upoo e te tapao moˈa* no te pûpûraa i nia iho i te taamu upoo taa ê,+
7 e rave oe i te monoˈi faatavai,+ e ninii atu i nia iho i to ˈna upoo e e faatavai oe ia ˈna.+
8 “I muri iho, a haafatata mai i ta ˈna mau tamaiti e a faaoomo ia ratou i te ahu roa.+
9 A taamu i te hatua ati aˈe to ratou tauupu, o Aarona e ta ˈna mau tamaiti, a tuu i to ratou mau taamu upoo, e e riro te autahuˈaraa ia ratou ei faatureraa mure ore.+ Mea na reira oe ia faatoroa ia* Aarona e ta ˈna mau tamaiti no te tavini ia ˈu ei tahuˈa.+
10 “I muri iho, e putô mai oe i te puaatoro oni i mua i te tiahapa o te amuiraa, e e tuu Aarona e ta ˈna mau tamaiti i to ratou rima i nia i te afii o te puaatoro oni.+
11 A tupai i te puaatoro oni i mua ia Iehova, i te tomoraa o te tiahapa o te amuiraa.+
12 A rave maa toto puaatoro oni i to manimani rima, a parai i nia iho i te mau tara o te fata,+ e a manii i te toea o te toto i te raroraa o te fata.+
13 I muri iho, a rave pauroa te mii+ i nia iho i te aau, te puu o te upaa, e na mape e te mii i nia iho, e a tutui i te reira ia au auahi mai nia mai i te fata.+
14 Area te iˈo o te puaatoro oni, to ˈna iri e to roto i to ˈna aau, e tanina oe i rapae i te puhapa. E tusia no te hara te puaatoro oni.
15 “I muri iho, e rave mai oe i te hoê mamoe oni, e e tuu Aarona e ta ˈna mau tamaiti i to ratou rima i nia i te afii o te mamoe oni.+
16 A tupai i te mamoe oni e a rave i to ˈna toto, a pîpî atu ai i te reira ati aˈe te fata.+
17 A tâpûpû i te mamoe oni, a horoi i to ˈna aau+ e to ˈna na avae, e a faanaho i tei tâpûpûhia e to ˈna afii.
18 E tutui oe i te mamoe oni taatoa, a au auahi atu ai i nia i te fata. E tusia taauahi tera ia Iehova, e hauˈa noˈanoˈa au maitai.*+ E tusia te reira te pûpûhia ia Iehova na roto i te auahi.
19 “I muri iho, e rave oe i te tahi atu mamoe oni, e e tuu Aarona e ta ˈna mau tamaiti i to ratou rima i nia i te afii o te mamoe oni.+
20 A tupai i te mamoe oni, e a rave maa toto to ˈna e a parai i nia iho i te hiti o te tariˈa atau o Aarona e te hiti o te tariˈa atau o ta ˈna mau tamaiti, e i nia iho i to ratou manimani rima rahi atau e manimani avae rahi atau, e a pîpî i te toto ati aˈe te fata.
21 I muri iho, a rave mai maa toto i nia iho i te fata e maa monoˈi faatavai+ e a pîpî atu i nia iho ia Aarona e to ˈna mau ahu e i nia iho i ta ˈna mau tamaiti e to ratou mau ahu, ia moˈa oia e to ˈna mau ahu e ta ˈna mau tamaiti e to ratou mau ahu.+
22 “I muri iho, a rave i te mii o te mamoe oni, te aero mii, te mii i nia iho i te aau, te puu o te upaa, na mape e piti e te mii i nia iho,+ e te huha atau, e mamoe oni hoi tera no te faatoroaraa.+
23 A rave atoa mai i te hoê pane menemene, te hoê pane hinu mai te hei ra, e te hoê pai no roto i te farii pane hopue ore e vai ra i mua ia Iehova.
24 E tuu pauroa oe i te reira i roto i te rima o Aarona e i roto i te rima o ta ˈna mau tamaiti, e e taueue oe i te reira ei tusia taueuehia i mua ia Iehova.
25 I muri iho, e rave oe i te reira mai roto mai i to ratou rima a tutui atu ai i nia i te fata, i nia iho i te tusia taauahi, ei hauˈa noˈanoˈa au maitai* i mua ia Iehova. E tusia te reira te pûpûhia ia Iehova na roto i te auahi.
26 “I muri iho, a rave i te ouma o te mamoe oni no te faatoroaraa,+ o te pûpûhia ra no Aarona, e a taueue i te reira ei tusia taueuehia i mua ia Iehova, e e riro te reira ei tuhaa na oe.
27 E haamoˈa oe i te ouma o te tusia taueuehia e te huha o te tuhaa moˈa tei taueuehia e tei ravehia i te mamoe oni o te faatoroaraa,+ i tei pûpûhia no Aarona e no ta ˈna mau tamaiti.
28 E riro te reira ia Aarona e ta ˈna mau tamaiti na roto i te hoê faaueraa mure ore ia haapaohia e te ati Iseraela, e tuhaa moˈa hoi te reira, e e riro te reira ei tuhaa moˈa ia horoahia e te ati Iseraela.+ O ta ratou tuhaa moˈa tera no Iehova no roto mai i ta ratou mau tusia no te hau.+
29 “E oomohia to Aarona mau ahu moˈa+ e ta ˈna mau tamaiti+ i muri mai ia ˈna ia faatavaihia e ia faatoroahia ratou ei tahuˈa.
30 Te tahuˈa no roto i ta ˈna mau tamaiti e mono ia ˈna e e tomo i roto i te tiahapa o te amuiraa no te tavini i roto i te vahi moˈa, e hitu ïa mahana oia e oomo ai i tera mau ahu.+
31 “E rave oe i te mamoe oni o te faatoroaraa e e vaipâ oe i to ˈna iˈo i te hoê vahi moˈa.+
32 E amu+ Aarona e ta ˈna mau tamaiti i te iˈo o te mamoe oni e te pane e vai ra i roto i te farii i te tomoraa o te tiahapa o te amuiraa.
33 E amu ratou i tei ravehia ei tusia tei tapoˈi i ta ratou mau hara no te faatoroa ia ratou ei tahuˈa* e no te haamoˈa ia ratou. Eita râ ta te hoê taata e ere i te tahuˈa* e nehenehe e amu i te reira, mea moˈa hoi.+
34 Ia toe te iˈo o te tusia no te faatoroaraa e te pane e poipoi noa ˈtu, e tanina oe i te reira.+ Eiaha te reira ia amuhia, mea moˈa hoi.
35 “E na reira oe ia Aarona e ta ˈna mau tamaiti, ia au i te mau parau atoa ta ˈu i faaue ia oe. E hitu mahana oe e faatoroa ˈi ia ratou ei tahuˈa.*+
36 E pûpû oe i te puaatoro oni o te tusia no te hara i te mau mahana atoa no te tapoˈi i te hara, e tamâ oe i te fata i te hara na roto i te pûpûraa i te tusia no te tapoˈi i te hara, e e faatavai oe i te reira no te haamoˈa i te reira.+
37 E hitu mahana e pûpû ai oe i te tusia no te fata no te tapoˈi i te hara,* e e haamoˈa oe i te reira ia riro ei fata moˈa roa.+ Ia moˈa te taata atoa e tapea i te fata.
38 “Teie ta oe e pûpû i nia i te fata: e piti mamoe oni hoê matahiti i te mau mahana atoa, aita e faaearaa.+
39 A pûpû i te hoê mamoe oni apî i te poipoi, e te tahi atu i te ahiahi.+
40 Hoê tuhaa i nia ahuru o te faito epha* o te faraoa ota oro-maitai-hia, anoihia e hoê tuhaa i nia e maha hina* o te hinu anoi-ore-hia, e hoê tuhaa i nia e maha hina o te uaina ei tusia uaina, te hopoihia no te mamoe oni apî matamua.
41 E pûpû oe i te piti o te mamoe oni apî i te ahiahi, e te hoê â huero maa e tusia uaina i to te poipoi. E pûpû oe i te reira ei hauˈa noˈanoˈa au maitai,* te hoê tusia pûpûhia ia Iehova na roto i te auahi.
42 Ei tusia taauahi tamau te reira e hope noa ˈtu to outou mau uˈi i te tomoraa o te tiahapa o te amuiraa i mua ia Iehova, i reira vau e fa ˈtu ai ia oe no te paraparau ia oe.+
43 “I reira vau e fa ˈtu ai i te ati Iseraela, e e haamoˈahia te reira i to ˈu hanahana.+
44 E haamoˈa vau i te tiahapa o te amuiraa e te fata, e e haamoˈa vau ia Aarona e ta ˈna mau tamaiti+ ia tavini ratou ia ˈu ei tahuˈa.
45 E faaea* vau i rotopu i te nunaa o Iseraela, e e riro vau ei Atua no ratou.+
46 E ite mau â ratou e o vau o Iehova to ratou Atua, tei aratai ia ratou i rapae i te fenua o Aiphiti, ia parahi au i rotopu ia ratou.+ O vau o Iehova to ratou Atua.
Nota i raro i te api
^ Aore ra “hei moˈa.”
^ Heb: “faaî i te rima o.”
^ Aore ra “tamǎrû.” Heb: “faahau.”
^ Aore ra “tamǎrû.” Heb: “faahau.”
^ Heb: “faaî i to ratou rima.”
^ Heb: “taata ê,” oia hoi e ere i te huaai o Aarona.
^ Heb: “faaî ai i to ratou rima.”
^ Aore ra “te tusia faahau no te fata.”
^ 1 epha: 22 L. Hiˈo i te tuhaa hau B14.
^ 1 hina: 3,67 L. Hiˈo i te tuhaa hau B14.
^ Aore ra “tamǎrû.” Heb: “faahau.”
^ Aore ra “puhapa.”
