Eaha to roto?

Tapura tumu parau

 A4

Te iˈoa o te Atua i roto i te mau Papai Hebera

Na reta Hebera tahito o te iˈoa o te Atua faaohipahia hou te hopoi-ê-raa i Babulonia

Na reta Hebera o te iˈoa o te Atua faaohipahia i muri aˈe i te hopoi-ê-raa i Babulonia

Piri i te 7 000 taime e itehia ˈi te iˈoa o te Atua i roto i te mau Papai Hebera, papaihia יהוה, e maha piri vauera o te piapa Hebera. Ua hurihia teie na maha reta Hebera na roto i te iˈoa ra “Iehova” i roto i teie huriraa. Teie te iˈoa faahiti-roa-hia i roto i te Bibilia i te tahi atu. Parau mau, a aratai ai te varua moˈa o te Atua i te taata ia papai i ta ˈna parau, ua faaohipa ratou i te mau tiaraa aore ra faataaraa no te Atua, mai “te Manahope,” “Tei Teitei Roa ˈˈe” e “te Fatu.” Noa ˈtu râ, o taua na reta e maha ra te faahiti i te Atua na roto i to ˈna iho iˈoa.

Na te Atua ra o Iehova iho i aratai i te feia papai Bibilia ia faaohipa i to ˈna iˈoa. Ei hiˈoraa, ua aratai oia i te peropheta ra o Ioela ia papai: “E faaorahia te taata atoa o te tiaoro i te iˈoa o Iehova.” (Ioela 2:32) E ua haapapai te Atua i te hoê papai Salamo ia parau: “Ia ite te taata atoa e o Iehova to oe iˈoa, o oe anaˈe Tei Teitei Roa ˈˈe i nia i te fenua taatoa.” (Salamo 83:18) Tau 700 taime e itehia ˈi te iˈoa o te Atua i roto noa i te buka Salamo, e buka pehepehe o te himenehia e te faahitihia e te nunaa o te Atua. No te aha ïa aita te iˈoa o te Atua i roto e rave rahi huriraa Bibilia? No te aha teie huriraa e faaohipa ˈi i te iˈoa ra “Iehova”? E eaha te auraa o te iˈoa o te Atua ra o Iehova?

Tuhaa o te mau Salamo i roto hoê o te mau otaro o te miti Pohe o te afaraa matamua o te senekele matamua. Ua papaihia te reira ma te faaohipa i te mau reta Hebera faaohipahia i muri aˈe i te hopoi-ê-raa i Babulonia, area na reta e maha o te iˈoa o te Atua, ua papaihia ïa e na reta Hebera tahito

No te aha aita te iˈoa o te Atua i roto e rave rahi huriraa Bibilia? Ua rau te tumu. No vetahi, aita e faufaa no te Atua Manahope te hoê iˈoa taa noa no te faahiti ia ˈna. Area vetahi atu, e au ra e ua pee ratou i te peu tumu ati Iuda e opani ra i te faahitiraa i teie iˈoa, aˈunei e faahiti faufaa ore ai i te reira. No te tahi atu, te manaˈo ra e mea au aˈe te mau tiaraa mai “te Fatu” anei aore ra “te Atua,” inaha, aita i papu e nafea mau ia parau i te iˈoa o te Atua. Tera râ, aita e tumu papu to tera mau manaˈo, mai ta tatou e ite mai:

  •   Te feia e parau ra aita e faufaa no te Atua Manahope te hoê iˈoa taa noa, aita ratou i ite e te vai ra te iˈoa o te Atua i roto i te mau papai tahito roa ˈˈe o ta ˈna Parau, hou aˈe i te tau o Iesu no vetahi, tei tae roa mai ia tatou. Mai te parauhia i nia ˈtu, na te Atua i haapapai i to ˈna iˈoa i roto i ta ˈna Parau piri i te 7 000 taime. Papu maitai, te hinaaro ra oia ia ite e ia faahiti tatou i to ˈna iˈoa.

  • Te feia huri Bibilia tei tatara i te iˈoa o te Atua no te pee i te peu tumu ati Iuda, ua moˈe ia ratou i te tahi parau faufaa roa. Noa ˈtu aita vetahi mau papai parau ati Iuda i hinaaro e faahiti i taua iˈoa ra, aita ratou i tatara i te reira i roto i te Bibilia. Mea rahi te mau vahi e faahitihia ˈi te iˈoa o te Atua i roto i te mau otaro tei itehia mai i Kumerana, piri i te miti Pohe. Area vetahi feia huri Bibilia, ua faaoti ratou e faaohipa i te tiaraa “TE FATU” e te reta rarahi ei mono i te iˈoa o te Atua. Tera râ, no te aha tera mau taata huri Bibilia i mono aore ra i faaore ai i te iˈoa o te Atua i roto i te Bibilia a farii ai ratou e e itehia taua iˈoa ra i roto i te papai Bibilia e rave rahi tausani taime? Na vai i horoa ia ratou i te mana e na reira? O ratou anaˈe tei ite.

  • Te parau nei vetahi eiaha e faahiti i te iˈoa o te Atua no te mea aita i papu e nafea mau ia faahiti i te reira, te faahiti pinepine nei râ ratou i te iˈoa o Iesu. Tera râ, mea taa ê te faahitiraa a te mau pǐpǐ matamua a Iesu i to ˈna iˈoa i ta te rahiraa o te mau Kerisetiano i teie mahana. Peneiaˈe o Iesua ta te mau Kerisetiano ati Iuda i tera ra tau ia pii ia Iesu. E te tiaraa “Mesia” ra, e parau ratou Masia aore ra “Mesia.” E pii te mau Kerisetiano reo Heleni ia ˈna Iesou Keriseto, e te mau Kerisetiano reo Latino, o Iesu Kerisetu. Maoti te aratairaa a te varua moˈa, o te huriraa Heleni o to ˈna iˈoa tei tapeahia i roto i te Bibilia, faaiteraa ïa e ua pee te mau Kerisetiano matamua ma te paari i te huru faahitiraa i taua iˈoa ra matauhia na roto i to ratou reo. Oia atoa, ua manaˈo te Tomite huriraa i te Bibilia o te ao apî e mea tano ia faaohipa i te iˈoa ra “Iehova,” noa ˈtu e ere mai tera roa te iˈoa o te Atua i faahitihia ˈi na roto i te reo Hebera tahito.

No te aha teie huriraa e faaohipa ˈi i te iˈoa ra “Iehova”? E papaihia na reta Hebera e maha o te iˈoa o te Atua (יהוה) na roto i te mau piri vauera YHWH ei reo Tahiti. Mai te mau taˈo atoa tei papaihia na roto i te reo Hebera tahito, aita e vauera. I te tau a paraparau-noa-hia ˈi te reo Hebera tahito, ua ite te feia taio eaha te mau vauera e faaô ia tano ta ratou faahitiraa.

 Piri i te tausani matahiti i muri aˈe i te otiraa te mau Papai Hebera i te papaihia, ua faanaho te tahi mau aivanaa ati Iuda i te hoê ravea e tuu ai i te tahi mau tapao ia taa i te taata taio i te reo Hebera eaha te vauera e tano. Tera râ i tera area tau, mea rahi te ati Iuda i mehameha na no te mea no ratou, e ere i te mea tano ia faahiti ma te reo puai i te iˈoa o te Atua, mono atura ïa ratou i taua iˈoa ra i te tahi atu mau parau. E au ra e, i to ratou papairaa i na reta Hebera e maha ra, ua rave ratou i te mau vauera o te parau mono, e ua amui atu i na piri vauera e maha o te iˈoa o te Atua. Tera râ, aita te mau tapao no te taa eaha te vauera e tano e tauturu mau ra ia faahiti i taua iˈoa ra na roto i te reo Hebera. No vetahi, o “Yahweh” paha te iˈoa, no tahi atu, e iˈoa ê ïa. I roto hoê o te mau otaro o te miti Pohe e faatia ra i te hoê tuhaa o Levitiko na roto i te reo Heleni, ua hurihia te iˈoa o te Atua ei Iao. Area no te tahi mau taata papai Heleni no tahito, o Iae, Iabe e Iaoue te faahitiraa tano. Eiaha râ tatou e feaa. Aita tatou i ite e nafea te mau tavini a te Atua no tahito ra i faahiti ai i teie iˈoa na roto i te reo Hebera. (Genese 13:4; Exodo 3:15) Tera râ, te mea papu ia tatou, ua faaohipa pinepine te Atua i to ˈna iˈoa a paraparau ai oia i to ˈna nunaa, ua tiaoro ratou ia ˈna ma te faaohipa i taua iˈoa ra e ua faahiti noa atoa ratou i te reira a paraparau ai te tahi i te tahi.—Exodo 6:2; Te mau arii 1, 8:23; Salamo 99:9.

No te aha ïa teie huriraa e faaohipa ˈi i te iˈoa ra “Iehova”? No te mea e ere no teie nei te iˈoa o te Atua i te faaohiparaahia na roto e rave rahi reo, oia atoa te reo Tahiti.

To te Atua iˈoa i roto i te Genese 15:2 i roto i te huriraa a William Tyndale o na buka e pae a Mose i 1530

No roto i te huriraa a William Tyndale i na buka e pae a Mose no 1530 te ite-matamua-raahia te iˈoa o te Atua i roto i te hoê Bibilia reo Beretane. Ua papai oia i taua iˈoa ra “Iehouah.” I  1838, i roto i te Bibilia matamua hurihia na roto i te reo Tahiti, e 7 039 taime to Henry Nott faahitiraa i te iˈoa ra “Iehova” i roto i te taatoaraa o Te Bibilia Moˈa. Area i roto i te huriraa Katolika reo Tahiti (V.C.J.S., 1976), e ono taime e itehia ˈi te iˈoa o te Atua i roto i te mau Salamo.

Te faataa ra te aivanaa Bibilia faaturahia ra o Joseph Bryant Rotherham no te aha oia i faaohipa ˈi i te iˈoa ra “Iehova,” eiaha râ “Yahweh,” i roto i ta ˈna buka piahia i 1911 Maimiraa no nia i te mau Salamo. Te na ô ra oia e ua hinaaro oia e faaohipa i “te iˈoa matau-roa-hia (e te farii-atoa-hia) e te taata atoa e taio i te Bibilia.” I 1930, tera atoa te manaˈo o te aivanaa ra o Alexander Kirkpatrick no nia i te iˈoa ra “Iehova.” Te parau ra oia: “Te manaˈo ra te mau aivanaa i te pae o te tarame e o Yahveh aore ra Yahaveh te faahitiraa tano, mea matau râ aˈe na te taata o IEHOVA na roto i te reo Beretane, e te mea faufaa roa, e ere ïa mea nafea tera iˈoa i faahiti-mau-hia, o te fariiraa râ e o te iˈoa teie o te Atua, eiaha noa râ te hoê tiaraa mai ‘te Fatu.’”

Na reta Hebera e maha, YHWH: “Na ˈna e faariro”

Te taˈo HWH: “e riro”

Eaha te auraa o te iˈoa ra Iehova? I roto i te reo Hebera, no roto mai te iˈoa ra Iehova i te hoê taˈo “e riro” te auraa, e e rave rahi aivanaa te manaˈo ra “e faariro” te auraa mau. No reira, te taa ra i te Tomite huriraa i te Bibilia o te ao apî “Na ˈna e faariro” te auraa o te iˈoa o te Atua. Ua rau te manaˈo o te mau aivanaa, eita ïa e nehenehe e haapapu roa ˈtu tera anei te auraa. Tera râ, e tano maitai teie tatararaa i to Iehova tiaraa ei Atua Poiete e ei Atua o te faatupu i ta ˈna opuaraa. Eita oia e faatupu noa i te mau mea atoa i roto i te ao nui e te mau mea ora maramarama, a mairi ai râ te tau, e tamau oia i te faatupu i to ˈna hinaaro e ta ˈna opuaraa.

No reira, te auraa o te iˈoa ra Iehova, e ere noa ïa tera e itehia ra i roto i te Exodo 3:14 o te na ô ra: “E riro vau i ta ˈu e maiti i te riro.” Eita teie mau parau e tatara hohonu ra i te iˈoa o te Atua. E tuhaa noa râ tera o to te Atua huru, o te faaite ra e, tei te huru te tupuraa, e riro oia i ta ˈna e maiti i te riro no te faatupu i ta ˈna opuaraa. Parau mau, tera iho â te auraa o te iˈoa ra Iehova, e ere noa râ i ta ˈna e maiti e riro, oia hoi o ˈna iho. Tera râ, e faariro atoa oia i te mau mea ta ˈna i poiete e e faariro oia i te tupu mai ta ˈna e au no te faatupuraa i ta ˈna opuaraa.