Exodo 8:1-32
8 Na ô maira Iehova ia Mose: “A tomo i ǒ Pharao e a parau atu: ‘Teie ta Iehova e parau mai ra: “A tuu i to ˈu nunaa ia haere ia nehenehe ratou e tavini ia ˈu.+
2 Ia ore â oe e farii e tuu ia ratou ia haere, e tairi au i to fenua taatoa i te rana.+
3 E aere te rana i roto i te anavai Nile, e haere mai ratou i rapae e e tomo i roto i to oe aorai, i to oe piha taotoraa, i nia iho i to oe roˈi, i roto i te fare o ta oe mau tavini e i nia iho i to oe mau taata, i roto i ta oe mau umu e ta oe mau farii* ôiraa faraoa.+
4 I nia iho ia oe, to oe mau taata e ta oe mau tavini atoa te rana e haere mai ai.”’”
5 I muri aˈe, na ô maira Iehova ia Mose: “A parau ia Aarona: ‘A rave i to raau e a toro atu na nia i te mau anavai, te mau taheraa pape rahi o Nile e te mau pape hopuna, e a faahaere mai i te mau rana i rapae i nia i te fenua o Aiphiti.’”
6 Toro atura ïa Aarona i ta ˈna raau na nia i te mau pape o Aiphiti, haamata ihora te mau rana i te haere mai i rapae e parare aˈera na te fenua o Aiphiti.
7 Tera râ, na reira atoa aˈera te mau tahuˈa manamana ma ta ratou mau peu huna, e faahaere atoa maira i te rana i rapae i nia i te fenua o Aiphiti.+
8 Titau atura Pharao ia Mose raua Aarona e parau atura: “A taparu ia Iehova ia faaore i te rana i nia ia ˈu e to ˈu mau taata,+ ua ineine hoi au i te tuu i te nunaa ia haere ia nehenehe ratou e pûpû i te tusia ia Iehova.”
9 Parau maira ïa Mose ia Pharao: “Na oe e faaoti afea vau e taparu ai ia faaorehia te rana i nia ia oe, ta oe mau tavini, to oe mau taata e to oe mau fare. I roto noa râ i te anavai Nile e vai noa ˈi te rana.”
10 Na ô atura Pharao: “Ananahi.” Parau maira ïa Mose: “Na reira ïa mai ta oe i parau, ia ite hoi oe e aita ˈtu mai ia Iehova to matou Atua.+
11 E faarue te mau rana ia oe, to oe mau fare, ta oe mau tavini e to oe mau taata. E vai noa râ te reira i roto i te anavai Nile.”+
12 Haere atura ïa Mose raua Aarona i rapae mai mua ˈtu ia Pharao, e taparu atura Mose ia Iehova no nia i te mau rana ta ˈna i hopoi mai i nia ia Pharao.+
13 Rave ihora Iehova mai ta Mose i ani, e haamata ihora te mau rana i te pohe i roto i te mau fare, te mau aua e na te fenua.
14 Haapue atura ratou i te mau rana e rave rahi haapueraa, e hauˈa neoneo ihora te fenua.
15 I to Pharao iteraa e ua ore te ati, faaetaeta ihora oia i to ˈna aau+ e aita ˈtura i faaroo ia raua, mai ta Iehova iho â i parau.
16 Na ô maira Iehova ia Mose: “A parau ia Aarona: ‘A toro i to raau e a tairi i te repo fenua, e ia riro te reira ei naonao i te fenua taatoa o Aiphiti.’”
17 Na reira ˈtura raua. Toro atura Aarona i ta ˈna raau, tairi ihora i te repo fenua, e haere maira te mau naonao i nia iho i te taata e te animara. Riro maira pauroa te repo fenua ei naonao i te fenua taatoa o Aiphiti.+
18 Tamata ˈtura te mau tahuˈa manamana i te na reira atoa a faatupu ai i te naonao ma ta ratou mau peu,+ aita râ i manuïa. Haere maira te mau naonao i nia iho i te taata e te animara.
19 Parau maira ïa te mau tahuˈa manamana ia Pharao: “O te mana* o te Atua teie!”+ Tera râ, etaeta noa ˈtura to Pharao aau e aita ˈtura i faaroo ia raua, mai ta Iehova iho â i parau.
20 Na ô maira Iehova ia Mose: “A tia i nia i te poipoi roa e a tia ˈtu i mua ia Pharao. Inaha, te haere mai ra oia i rapae i te pape! E parau oe ia ˈna: ‘Teie ta Iehova i parau: “A tuu i to ˈu nunaa ia haere ia nehenehe ratou e tavini ia ˈu.
21 Ia ore râ oe e tuu i to ˈu nunaa ia haere, e faatae atu vau i te raˈo patia i nia ia oe, ta oe mau tavini e to oe mau taata e i roto i to oe mau fare, e e î te mau fare i Aiphiti i te raˈo patia, e e poˈi roa atoa te fenua e tiahia ra e ratou* i te reira.
22 I tera mahana e faataa ê mau â vau i te fenua o Gosena, o te parahihia ra e to ˈu nunaa. Aita e raˈo patia e itehia i reira.+ Mai teie oe e ite ai e tei nia vau o Iehova i teie fenua.+
23 E faataa ê au i to ˈu nunaa i to oe mau taata. Ananahi e tupu ai teie tapao.”’”
24 Na reira ihora Iehova, e purara ˈtura te mau aere raˈo patia na roto i te aorai o Pharao e te fare o ta ˈna mau tavini e ati aˈe te fenua o Aiphiti.+ Ino atura to te fenua i te raˈo patia.+
25 I muri aˈe, titau atura Pharao ia Mose raua Aarona e parau atura: “A haere, a pûpû i te tusia i to outou Atua i teie fenua.”
26 Tera râ, parau maira Mose: “Eita e tano ia na reira, no te mea eita to Aiphiti e au i ta matou e pûpû ei tusia ia Iehova to matou Atua.+ Ia pûpû matou i te hoê tusia au-ore-hia e to Aiphiti i mua i to ratou mata, eita anei ratou e pehi ia matou i te ofai?
27 E haere matou i to matou tere e toru mahana i te medebara, e i reira matou e pûpû ai ia Iehova to matou Atua i te tusia, mai ta ˈna iho â i parau ia matou.”+
28 Parau maira ïa Pharao: “E tuu vau ia outou ia haere e pûpû i te tusia ia Iehova to outou Atua i te medebara. Tera noa râ, eiaha e faaatea roa. A taparu no ˈu.”+
29 Parau atura Mose: “Te vaiiho nei au ia oe, e e taparu vau ia Iehova, a faarue atu ai te mau raˈo patia ia Pharao, ta ˈna mau tavini e to ˈna mau taata ananahi. Tera râ, ia faaea Pharao i te haavare* ia matou ma te ore e farii e tuu i te nunaa ia haere e pûpû i te tusia ia Iehova.”+
30 Haere atura Mose i rapae mai mua ˈtu ia Pharao e taparu atura ia Iehova.+
31 Rave ihora ïa Iehova mai ta Mose i parau, e faarue maira te mau raˈo patia ia Pharao, ta ˈna mau tavini e to ˈna mau taata. Aita hoê aˈe faahou.
32 Tera râ, faaetaeta faahou atura Pharao i to ˈna aau e aita ˈtura i tuu i te nunaa ia haere.
Nota i raro i te api
^ Aore ra “auˈa.”
^ Heb: “manimani rima.”
^ Oia hoi to Aiphiti.
^ Aore ra “haamaau.”
