Exodo 16:1-36
16 I to ratou faarueraa i Elima, tae maira te amuiraa taatoa o te ati Iseraela i te medebara o Sini,+ i ropu i Elima e Sinai, i te 15 o te mahana o te piti o te avaˈe i muri aˈe i to ratou faarueraa i te fenua o Aiphiti.
2 Haamata aˈera ïa te amuiraa taatoa o te ati Iseraela i te amuamu ia Mose raua Aarona i te medebara.+
3 Tamau atura te ati Iseraela i te parau ia raua: “Ahani iho â matou i pohe i te rima o Iehova i te fenua o Aiphiti i pihai iho i te mau pani ua î i te iˈo,+ a amu noa ˈi i te faraoa e paia noa ˈtu matou. Ua afai mai râ orua ia matou i teie medebara ia pohe teie amuiraa taatoa i te poia.”+
4 Na ô maira ïa Iehova ia Mose: “Teie au e faatopa nei i te faraoa na outou mai te raˈi mai,+ e e haere te taata tataitahi i rapae no te ohi i ta ˈna tuhaa i tera e tera mahana,+ e tamata vau ia ratou e e haere anei ratou ia au i ta ˈu ture aore ra eita.+
5 I te ono râ o te mahana,+ ia faaineine ratou i ta ratou i ohi, e tataipiti ïa te tuhaa ta ratou e ohi i to te tahi atu mahana.”+
6 Parau atura ïa Mose raua Aarona i te ati Iseraela atoa: “I te ahiahi e ite mau â ˈi outou e na Iehova outou i aratai i rapae i te fenua o Aiphiti.+
7 I te poipoi e ite ai outou i te hanahana o Iehova, ua faaroo hoi oia i to outou amuamuraa ia Iehova. O vai hoi mâua ia amuamu outou ia mâua?”
8 Parau faahou atura Mose: “Ia horoa ˈtu Iehova i te iˈo e amu i te ahiahi e te faraoa i te poipoi e paia noa ˈtu outou, e ite outou e ua faaroo Iehova i ta outou mau amuamuraa ta outou e amuamu ra ia ˈna. O vai hoi mâua? E ere o mâua ta outou e amuamu ra, o Iehova râ.”+
9 E parau atura Mose ia Aarona: “A parau i te amuiraa taatoa o te ati Iseraela: ‘A tapiri mai ia Iehova, ua faaroo hoi oia i ta outou mau amuamuraa.’”+
10 I te paraparauraa iho â Aarona i te amuiraa taatoa o te ati Iseraela, fariu atura ratou e hiˈo tia ˈtura i te medebara, e inaha, fa maira te hanahana o Iehova i roto i te ata.+
11 Paraparau faahou maira Iehova ia Mose:
12 “Ua faaroo vau i te amuamuraa a te ati Iseraela.+ A parau ia ratou: ‘I te ahiahi e amu ai outou i te iˈo, e i te poipoi e paia ˈi outou i te faraoa,+ e e ite mau â outou e o vau o Iehova to outou Atua.’”+
13 No reira i taua ahiahi ra, tae maira te manu e poˈi ihora te puhapa,+ e i te poipoi aˈe, tau maira te hupe e ati aˈe te puhapa.
14 I te peeraa te hupe, toe maira i raro i te repo i te medebara+ te hoê mea rii e te paapaaina mai te topata ûa paari.
15 I to te ati Iseraela iteraa i te reira, ui aˈera ratou te tahi i te tahi: “Eaha tera?,” aita hoi ratou i ite eaha te reira. Parau atura ïa Mose ia ratou: “O te faraoa teie ta Iehova i horoa ei maa na outou.+
16 Teie ta Iehova i faaue: ‘Ia haaputu te taata tataitahi i ta ˈna e nehenehe e amu. Ia rave outou i te hoê faito omera*+ no te taata tataitahi ia au i te rahiraa taata e vai ra i ǒ outou tataitahi i to outou fare ie.’”
17 O ta te ati Iseraela ïa i rave. Haaputu aˈera ratou i te reira, mea rahi ta vetahi i haaputu, e mea iti ta te tahi atu i haaputu.
18 Ia faito ratou i te omera, aita i rahi roa ta tei haaputu rahi mai, e aita i iti roa ta tei haaputu rii mai.+ Ua haaputu ratou tataitahi i ta ratou e nehenehe e amu.
19 Parau atura Mose ia ratou: “Eiaha e vaiiho i te tahi toea e poipoi noa ˈtu.”+
20 Tera râ, aita ratou i faaroo ia Mose. I to vetahi vaiihoraa i te tahi toea e poipoi noa ˈtu, tuˈahia ihora e hauˈa neoneo atura. Riri ihora Mose ia ratou.
21 E ohi na ratou i te reira i tera e tera poipoi, te taata tataitahi ia au i ta ˈna e nehenehe e amu. Ia paapaa te mahana, e tahe te reira.
22 I te ono o te mahana, ua tataipiti ta ratou faraoa i ohi mai,+ e piti omera no te taata hoê. Haere maira ïa pauroa te raatira o te amuiraa e faatia maira i te reira ia Mose.
23 Parau atura ïa oia ia ratou: “Teie ta Iehova i parau. Ananahi e mahana faafaaearaa,* e Sabati moˈa no Iehova.+ A eu i ta outou e hinaaro mau â e eu, a vaipâ i ta outou e hinaaro mau â e vaipâ,+ e a tuu i te toea i te hiti e a faaherehere i te reira e poipoi noa ˈtu.”
24 Faaherehere aˈera ïa ratou i te reira e poipoi noa ˈtu, mai ta Mose i faaue, e aita te reira i hauˈa neoneo, e aita atoa i tuˈahia.
25 Parau atura Mose: “A amu i te reira i teie mahana, no te mea e Sabati teie mahana no Iehova. Eita outou e ite i te reira i raro i te repo i teie mahana.
26 E ohi outou i te reira e ono mahana, i te hitu râ o te mahana, te Sabati,+ eita te reira e itehia.”
27 Tera râ, haere atura vetahi o te nunaa i rapae no te ohi i te reira i te hitu o te mahana, aita râ i itehia e ratou.
28 Na ô maira ïa Iehova ia Mose: “Ehia maororaa e ore ai outou e haapao i ta ˈu mau faaueraa e ta ˈu mau ture?+
29 A tapao na e ua horoa mai Iehova no outou i te Sabati.+ No reira oia i te ono o te mahana e horoa ˈi i te faraoa na outou no e piti mahana. Ia faaea noa te taata atoa i te vahi ta ˈna e tia ra, eiaha hoê e faarue i to ˈna vahi i te hitu o te mahana.”
30 Haapao atura ïa te nunaa i te Sabati* i te hitu o te mahana.+
31 Parau atura te nunaa o Iseraela i te faraoa e “mâna.”* Mea uouo te reira mai te hoê huero nainai, e mea momona mai te faraoa momona parahurahu e te meri.+
32 Parau atura Mose: “Teie ta Iehova i faaue: ‘A faaî hoê faito omera o te reira. E faahereherehia te reira e hope noa ˈtu to outou mau uˈi,+ ia nehenehe ratou ia ite i te faraoa ta ˈu i horoa ei maa na outou i te medebara i to ˈu aratairaa ia outou i rapae i te fenua o Aiphiti.’”
33 Parau atura ïa Mose ia Aarona: “A rave i te hoê farii, a faaî atu i te hoê faito omera o te mâna, e a afai atu i mua ia Iehova mai te hoê taoˈa te faahereherehia e hope noa ˈtu to outou mau uˈi.”+
34 Mai ta Iehova iho â i faaue ia Mose, tuu ihora Aarona i te reira i mua i te afata o te Haamanaˈoraa+ ia faahereherehia te reira.
35 Ua amu te ati Iseraela i te mâna e 40 matahiti,+ e ia tae roa ratou i te hoê fenua e taata te parahi ra i nia iho.+ Ua amu ratou i te mâna e tae roa ˈtu i te otia o te fenua o Kanaana.+
36 E te hoê omera, hoê ïa tuhaa i nia ahuru o te faito epha.*
Nota i raro i te api
^ Piri i te 2,2 L. Hiˈo i te tuhaa hau B14.
^ Aore ra “e haapaoraa i te Sabati.”
^ Aore ra “Faafaaea ˈtura ïa te nunaa.”
^ Peneiaˈe e parau Hebera “Eaha tera?” te auraa.
^ 1 epha: 22 L. Hiˈo i te tuhaa hau B14.
