Exodo 9:1-35
9 Na ô maira ïa Iehova ia Mose: “A tomo i ǒ Pharao e a parau atu: ‘Teie ta Iehova te Atua o te mau Hebera i parau: “A tuu i to ˈu nunaa ia haere ia nehenehe ratou e tavini ia ˈu.+
2 Ia ore râ oe e farii e tuu ia ratou ia haere e ia tapea noa oe ia ratou,
3 inaha, e tairi to Iehova rima+ i ta oe mau animara. E roohia te mau puaahorofenua, te mau asini, te mau kamela, te nǎnǎ puaatoro e te nǎnǎ mamoe i te hoê maˈi ino mau.+
4 E e faataa ê mau â Iehova i te mau animara a Iseraela i te mau animara a to Aiphiti, e eita hoê o ta te ati Iseraela e pohe.”’”+
5 Hau atu â, ua faataa Iehova i te hoê taime, a na ô ai: “Ananahi Iehova e rave ai i te reira i teie fenua.”
6 Rave ihora Iehova i te reira ananahi aˈe, e haamata aˈera te mau huru animara atoa a to Aiphiti i te pohe,+ aita râ hoê o ta Iseraela mau animara i pohe.
7 I to Pharao tonoraa i ta ˈna mau tavini ia haere e hiˈo, inaha aita hoê aˈe o ta Iseraela mau animara i pohe. Tera râ, aita â to Pharao aau i mǎrû, e aita ˈtura oia i tuu i te nunaa ia haere.+
8 Na ô maira ïa Iehova ia Mose raua Aarona: “A faaî i to orua rima i te rehu no roto mai i te hoê umu, e ia taora Mose i te reira i nia i mua ia Pharao.
9 E e riro te reira ei repo puehu i nia iho i te fenua taatoa o Aiphiti, e e riro te reira ei fêfê haapê i nia i te taata e te animara i te fenua taatoa o Aiphiti.”
10 Rave maira ïa raua i te rehu no roto mai i te hoê umu e tia aˈera i mua ia Pharao. Taora ˈtura Mose i te reira i nia, e riro maira ei fêfê haapê tei parari te pirau i nia i te taata e te animara.
11 Aita ˈtura te mau tahuˈa manamana i nehenehe e tia ˈtu i mua ia Mose, ua roohia hoi te mau tahuˈa manamana e to Aiphiti atoa+ i te fêfê.
12 Tera râ, vaiiho atura Iehova i te aau o Pharao ia etaeta, e aita ˈtura Pharao i faaroo ia raua, mai ta Iehova iho â i parau ia Mose.+
13 Na ô maira Iehova ia Mose: “A tia i nia i te poipoi roa e a tia ˈtu i mua ia Pharao, e a parau atu: ‘Teie ta Iehova te Atua o te mau Hebera i parau: “A tuu i to ˈu nunaa ia haere ia nehenehe ratou e tavini ia ˈu.
14 I teie nei hoi, te faatae atu nei au i ta ˈu mau ati atoa no te tairi i to oe aau, ta oe mau tavini e to oe mau taata, ia ite oe e aita hoê mai ia ˈu i te fenua atoa nei.+
15 I teie nei hoi, e nehenehe au e toro i to ˈu rima no te tairi ia oe e to oe mau taata i te hoê maˈi ino mau, a mou atu* ai outou mai nia mai i te fenua.
16 Te tumu râ i vaiiho ai au ia oe ia ora, no te faaite ïa ia oe i to ˈu puai e ia faaitehia to ˈu iˈoa na te fenua atoa nei.+
17 Te faateitei noa ra anei oe ia oe i nia i to ˈu nunaa ma te ore e tuu ia ratou ia haere?
18 Teie au e faatopa i te ûa paari rahi ananahi i teie taime, mai tei ore i topa aˈenei i Aiphiti e tae roa mai i teie nei.
19 No reira, a faaue ia faahoˈihia mai i raro aˈe i te tamaru pauroa ta oe animara e ta oe faufaa e vai ra i rapae. E pohe pauroa te taata e te animara i rapae aita i faahoˈihia i te fare ia roohia ratou i te ûa paari.”’”
20 Faahoˈi oioi maira te taata no roto i ta Pharao mau tavini tei mǎtaˈu i te parau a Iehova i ta ˈna iho mau tavini e ta ˈna mau animara i roto i te mau fare,
21 vaiiho noa ˈtura râ te taata aita to ˈna aau i tâuˈa i te parau a Iehova i ta ˈna mau tavini e ta ˈna mau animara i rapae.
22 Na ô maira ïa Iehova ia Mose: “A toro i to rima i nia i te raˈi, ia topa te ûa paari i nia i te fenua taatoa o Aiphiti,+ i nia i te taata e te animara e pauroa te raau tupu i te fenua o Aiphiti.”+
23 Toro atura ïa Mose i ta ˈna raau i nia i te raˈi, e faatae maira Iehova i te patiri e te ûa paari, e topa maira te auahi* i nia i te fenua, e faatopa noa maira Iehova i te ûa paari i nia i te fenua o Aiphiti.
24 E topa maira te ûa paari, e pura maira te auahi na roto i te ûa paari. Mea uˈana roa, aita i uˈana aˈenei mai tera i teie fenua mai te riroraa mai to Aiphiti ei nunaa.+
25 Tairi ihora te ûa paari i to te fenua taatoa o Aiphiti, mai te taata e tae roa i te animara, e huri ihora i te mau raau tupu atoa i raro, e fatifati ihora te mau tumu raau atoa.+
26 I te fenua anaˈe râ o Gosena, to reira te ati Iseraela, aita e ûa paari.+
27 Faaue atura ïa Pharao ia tiihia Mose raua Aarona e parau atura: “Ua hara vau i teie taime. E parau-tia ta Iehova, e o vau e to ˈu mau taata tei hape.
28 A taparu ia Iehova ia mau te patiri e te ûa paari a te Atua. I reira vau e tuu ai ia outou ia haere, e eita outou e faaea faahou mai.”
29 Parau atura ïa Mose ia ˈna: “Ia tae iho â vau i rapae i te oire, e faateitei au i to ˈu rima i mua ia Iehova. E mau te patiri e eita te ûa paari e topa faahou mai, ia ite hoi oe e no Iehova te fenua.+
30 Area oe e ta oe mau tavini, ua ite ê na vau e eita outou e mǎtaˈu i te Atua ra o Iehova.”
31 Ua hurihia ïa te lino e te kerite i raro, ua maahia hoi te kerite e ua uaa te tiare o te lino.
32 Aita râ te sitona e te sitona oviri i hurihia i raro, aita â hoi i paari atura.*
33 Haere atura ïa Mose i rapae i te oire mai mua ˈtu ia Pharao e faateitei atura i to ˈna rima i mua ia Iehova, e mau aˈera te patiri e te ûa paari e faaea ˈtura te ûa i te topa rahi mai i nia i te fenua.+
34 I to Pharao iteraa e ua mau te ûa, te ûa paari e te patiri, hara faahou atura oia e faaetaeta ihora i to ˈna aau,+ o ˈna e ta ˈna mau tavini.
35 Etaeta noa ˈtura to Pharao aau, e aita ˈtura oia i tuu i te ati Iseraela ia haere, mai ta Iehova iho â i parau na roto ia Mose.+
Nota i raro i te api
^ Aore ra “tumâhia ˈtu.”
^ Peneiaˈe e uira puai.
^ Aore ra “tae atura i to ˈna tau.”
