Exodo 26:1-37
26 “Ia hamani oe i te sekene,+ ia ahuru ïa tapoˈi tiahapa lino maitai roa tavirihia, te taura ninamu, te huruhuru mamoe vareau, e te ahu uteute. Ia hamani oe i te reira ma te nira faanehenehe i te hohoˈa o te kerubi.+
2 E 28 kubiti* te roa e e 4 kubiti te aano te tapoˈi tiahapa tataitahi. Ia hoê â faito to na ahuru tapoˈi tiahapa atoa.+
3 Ia puoihia e pae tapoˈi tiahapa te tahi i te tahi ei hoê noa tuhaa, e e puoihia te tahi atu na tapoˈi tiahapa e pae ei hoê noa tuhaa.
4 E hamani oe i te tapona taura ninamu i te hiti o te tapoˈi tiahapa hopea o te hoê tuhaa, e ia na reira atoa oe i te hiti o te tapoˈi hopea o te tahi atu tuhaa e puoi ai te reira.
5 E hamani oe e 50 tapona i nia hoê tapoˈi tiahapa e e 50 tapona i te hiti o te tahi atu tapoˈi tiahapa, ia tuati te tahi i te tahi i te vahi e puoi ai na tapoˈi.
6 E hamani oe e 50 pine auro e e puoi oe i na tapoˈi tiahapa i te pine, a riro atu ai ei hoê noa tapoˈi no te sekene.+
7 “E hamani atoa oe i te tapoˈi tiahapa huruhuru puaaniho+ ei tapoˈi na nia iho i te sekene. E hamani oe 11 tapoˈi tiahapa.+
8 E 30 kubiti te roa e e 4 kubiti te aano te tapoˈi tiahapa tataitahi. Ia hoê â faito to na 11 tapoˈi tiahapa atoa.
9 Ia puoi oe e pae tapoˈi tiahapa te tahi i te tahi e ia puoi oe i na ono tapoˈi tiahapa e toe ra te tahi i te tahi, e ia tufetu oe i te ono o te tapoˈi tiahapa i te muaraa o te sekene.
10 E ia hamani oe e 50 tapona i te hiti o te hoê tapoˈi, te tapoˈi tiahapa hopea o te hoê tuhaa, e e 50 tapona i te hiti o te tahi atu tapoˈi tiahapa i te vahi e puoi ai na tapoˈi.
11 Ia hamani oe e 50 pine veo e ia tamau oe i na pine i nia i te mau tapona e ia puoi oe i na tapoˈi tiahapa, a riro atu ai ei hoê noa tapoˈi.
12 Ei faatautauraa te toea o na tapoˈi tiahapa. E faatautauhia te afaraa o te tapoˈi tiahapa e toe ra na nia i te muriraa o te sekene.
13 Ei faatautauraa te toea o te roaraa o te tapoˈi no te sekene, hoê kubiti te tautau i te tahi e te tahi pae, no te tapoˈi i te reira.
14 “E hamani atoa oe i te hoê tapoˈi no te tiahapa i te iri mamoe oni faauteutehia e te hoê tapoˈi iri humi na nia iho.+
15 “E hamani oe i te mau iri pǎpai*+ no te sekene i te raau sitima te faatiahia i nia.+
16 Hoê ahuru kubiti te teitei e hoê kubiti e te afa te aano o na iri pǎpai tataitahi.
17 E piti tuatiraa niu to te iri pǎpai tataitahi ia puoihia te tahi i te tahi. Mai tera oe ia hamani pauroa te iri pǎpai o te sekene.
18 Ia hamani oe e 20 iri pǎpai no te pae apatoa o te sekene.
19 “E hamani oe e 40 niu ario+ i raro aˈe i na 20 iri pǎpai: e piti niu i raro aˈe i te iri pǎpai matamua no to ˈna na tuatiraa niu e piti, e e piti niu i raro aˈe i to muri mai iri pǎpai no to ˈna na tuatiraa niu e piti.+
20 No te tahi atu pae o te sekene, i te pae apatoerau, a hamani e 20 iri pǎpai
21 e to ratou na 40 niu ario, e piti niu i raro aˈe hoê iri pǎpai, e e piti niu i raro aˈe i to muri mai iri pǎpai.
22 No te muriraa o te sekene i tooa o te râ, e hamani oe e ono iri pǎpai.+
23 E hamani oe e piti iri pǎpai ei poro no te muriraa o te sekene.
24 Ei piti iri pǎpai mai raro e haere roa i nia, i reira raua e tuati ai i te hoê potaa. Mai tera ia hamanihia raua, e e turu teie na iri pǎpai i na poro e piti o te muriraa o te sekene.
25 Ei vaˈu iri pǎpai e to ratou na 16 niu ario, e piti niu i raro aˈe i te iri pǎpai matamua, e e piti niu i raro aˈe i to muri mai iri pǎpai.
26 “E hamani oe i te raau tarava i te sitima, e pae no te mau iri pǎpai o te hoê pae o te sekene,+
27 e pae raau tarava no te mau iri pǎpai o te tahi atu pae o te sekene e e pae raau tarava no te mau iri pǎpai o te pae tooa o te râ o te sekene, i te muriraa.
28 Ia pipiha roa te raau tarava te patiahia i ropu i te mau iri pǎpai.
29 “E tapiri oe i te mau iri pǎpai i te auro,+ e e hamani oe i to ratou mau potaa i te auro no te tapea i te mau raau tarava, e e tapiri oe i te mau raau tarava i te auro.
30 E faanaho oe i te sekene ia au i to ˈna hohoˈa tei faaitehia ia oe i nia i te mouˈa.+
31 “E hamani oe i te hoê paruru+ i te taura ninamu, te huruhuru mamoe vareau, te ahu uteute e te lino maitai roa tavirihia. E nira-faanehenehe-hia te hohoˈa o te kerubi i nia iho.
32 E faatautau oe ia ˈna i nia e maha pou raau sitima tapirihia i te auro. Ei tapea auro to ˈna. E tuuhia na pou i nia e maha niu ario.
33 E faatautau oe i te paruru i raro aˈe i te mau pine, e e hopoi mai oe i te afata o te Haamanaˈoraa+ i reira i muri mai i te paruru. E faataa ê te paruru i te Vahi Moˈa+ i te Vahi Moˈa Roa.+
34 E tuu oe i te tapoˈi i nia iho i te afata o te Haamanaˈoraa i roto i te Vahi Moˈa Roa.
35 “E tuu oe i te iri vairaa pane i rapaeau atu i te paruru, e te vairaa mori+ i te tahi atu pae o te iri vairaa pane i te pae apatoa o te sekene, e e tuu oe i te iri vairaa pane i te pae apatoerau.
36 E hamani oe i te hoê paruai* no te tomoraa o te tiahapa i te taura ninamu, te huruhuru mamoe vareau, te ahu uteute e te lino maitai roa tavirihia tei raraahia te tahi i te tahi.+
37 E hamani oe e pae pou raau sitima no te paruai* e e tapiri oe i te reira i te auro. Ei tapea auro to te reira e e faatô oe e pae niu veo no te reira.
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ Mea hamani-afata-hia teie mau iri pǎpai.
^ Aore ra “paruru.”
^ Aore ra “paruru.”
