Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE PITI AHURU

Ua tiaturi oia

Ua tiaturi oia

1. A faataa na i to Mareta huru aau e te tumu o te reira.

TE HOHO‘A e puta noa mai i roto i te feruriraa o Mareta, te menema ïa o to ’na taeae, te hoê ana tei opanihia i te hoê ofai. E ere to Mareta i te oto nainai nei, ua faarue mai hoi to ’na taeae here o Lazaro. Mai te mahana iho â i pohe ai Lazaro, a maha ’tura ïa mahana, e ta‘iraa noa ïa te ohipa ia haere mai te taata e hi‘o ia Mareta raua Maria no te faatae mai i te tapao aroha.

2, 3. (a) Eaha paha to Mareta huru i to ’na iteraa ’tu ia Iesu? (b) Eaha te nehenehe e parau no Mareta ia au i ta ’na mau parau i faahiti?

2 I mua ia Mareta, te tia noa ra to Lazaro hoa rahi roa ’‘e: o Iesu. Ua rahi atu â paha to Mareta oto i to ’na iteraa ’tu ia Iesu, o ’na ana‘e hoi i te ao nei e nehenehe e faaora i te ma‘i o to ’na taeae. Ua tamahanahanahia râ oia i te farereiraa ’tu ia Iesu i rapae mai ia Betania, te hoê oire iti i nia i te hoê aivi. Maa taime noa i pihai iho ia Iesu, ua mahanahana roa to Mareta aau e ua itoito mai no to Iesu hamani maitai e to ’na aumauiui. Ui atura Iesu ia ’na i te tahi mau uiraa o tei tauturu ia ’na ia haamau i to ’na feruriraa i nia i to ’na faaroo e to ’na tiaturi i te tia-faahou-raa. I reira ïa to Mareta faahitiraa i te mau parau faufaa roa ’‘e o to ’na oraraa: “Faaroo vau [aore ra tiaturi au] e o oe te Mesia te Tamaiti a te Atua o te haere mai i te ao nei.”—Ioa. 11:27.

3 Ia au i teie mau parau, e faaroo faahiahia mau â to Mareta. Aita i rahi to ’na parau i roto i te Bibilia, e haapiiraa hohonu râ te nehenehe e huti mai o te haapuai i to tatou faaroo. E hi‘o mai tatou i te aamu matamua o Mareta i roto i te Bibilia.

“Ua ahoaho oe, e te peapea na oe”

4. (a) Eaha te nehenehe e parau no te utuafare o Mareta? (b) Eaha te utuafare o Mareta no Iesu?

4 Tau ava‘e na mua ’tu, mea oraora maitai Lazaro. Fatata hoi Iesu Mesia, te ratere faufaa roa ’‘e, i te tae mai i ǒ Lazaro i Betania. E piti tuahine to ’na, Mareta raua Maria, e hoê â nohoraa to  ratou tootoru. Ia au i te tahi mau taata maimi, o Mareta paha te matahiapo, e au ra hoi e na ’na e farii mai i te manihini, e i te tahi taime, o ’na te faahitihia na mua. (Ioa. 11:5) Aita tatou i ite e ua faaipoipo anei hoê o ratou. Te mea papu râ, e hoa rahi roa ratou no Iesu. I te roaraa o ta ’na taviniraa i Iudea, i reira hoi oia i te ûraa i te patoiraa e te au ore rahi, i faaea na oia i ǒ Lazaro ma. Papu roa e ua mauruuru roa oia i ta ratou tamahanahanaraa e turu ia ’na.

5, 6. (a) No te aha mea rahi ai ta Mareta ohipa? (b) Eaha ta Maria i rave i to Iesu haapiiraa i te mau taata i te fare?

5 Aua‘e atoa Mareta i naho maitai ai te fare. Mea itoito roa o ’na e mea rave atoa i te ohipa. I to Iesu haereraa mai i te fare, opua ihora oia e faaineine e rave rahi maa no ta ’na manihini taa ê, e peneia‘e no vetahi o to ’na mau hoa ratere. I tera tau, mea faufaa roa ia farii maitai i te taata. Ia tae mai te hoê manihini, e hô‘ihia oia, e tatarahia to ’na tiaa, e horoihia to ’na avae, e faatahinuhia to ’na upoo i te mono‘i no‘ano‘a. (A taio i te Luka 7:44-47.) E peu matauhia ia rave maitai i te hoê manihini, ia parahi maitai hoi oia i te fare e ia tamaa maitai.

6 Mea rahi ïa te ohipa e rave hou Iesu e tae mai ai. Noa ’tu e o Maria te mea tâu‘a a‘e i te mau haapiiraa faaroo, ia au e rave rahi, ua tauturu atoa oia ia Mareta. Taui a‘era râ te tupuraa i to Iesu taeraa mai. Ua faaohipa Iesu i taua taime ra no te haapii i to reira mau taata. E ere o ’na mai te mau aratai haapaoraa i tera tau. Mea faatura o ’na i te vahine, e ua haapii roa ’tu oia ia ratou i te Basileia o te Atua, te mana‘o tumu hoi o ta ’na taviniraa. Parahi ihora Maria i te pae avae o Iesu e apo pauroa maira i ta ’na parau.

7, 8. (a) No te aha Mareta e haamata ’i i te riri? (b) Mea nafea to ’na faaiteraa i to ’na riri?

7 A feruri na ia Mareta e haamata ra i te riri. Te ahoaho e te peapea noa ’tu ra oia no te rahiraa maa e faaineine e te rahiraa ohipa e rave no ta ’na mau manihini. A haere noa ’i o ’na i tera e tera vahi na mua i to ’na tuahine e parahi noa ra, aita râ e tauturu mai ra, ua uteute mai anei oia, ua faaroohia anei o ’na ia autâ, aore ra ua tu‘atu‘a roa anei to ’na mata? Mai te peu e e, eiaha e maere. Eita hoi e oti ia ’na pauroa te ohipa!

8 Aita ’tura i noaa faahou ia Mareta ia tapea i to ’na riri. Tâpû atura oia i te parau a Iesu, a na ô ai: “Fatu, aita oe e ite ra e o vau ana‘e teie e rave nei i te ohipa? A parau na i to ’u tuahine ia tauturu mai ia ’u.” (Luka 10:40, Traduction du monde nouveau) Mea parau iho â ta Mareta! I roto i te tahi mau huriraa Bibilia, mai  teie to Mareta uiraa ’tu: “Fatu, eita oe e haapao mai . . . ?” E parau roa ’tura o ’na ia Iesu ia a‘o ia Maria, ia faaue atu ia tauturu ia ’na.

9, 10. (a) Mea nafea to Iesu pahonoraa ia Mareta? (b) Mea nafea tatou i ite ai e aita Iesu i a‘o ia Mareta no te faaohipa-rahi-raa ia ’na i te faaineineraa i te maa?

9 I to Iesu pahonoraa ’tu, ua maere paha Mareta, oia atoa e rave rahi taata taio i te Bibilia. Ma te mǎrû, na ô atura oia: “E Mareta e, e Mareta, ua ahoaho oe, e te peapea na oe ia oe iho i te mau mea e rave rahi: hoê roa râ mea tia, e ua rave iho nei Maria i taua mea tia ra, e ore roa hoi ta ’na e riro ê.” (Luka 10:41, 42) Eaha ta Iesu i hinaaro e parau? Mea nounou a‘e na Mareta te mau tao‘a materia? Te a‘o ra anei o ’na ia ’na no te faaohipa-rahi-raa ia ’na i te faaineineraa i te maa?

Ua ‘ahoaho e ua haapeapea Mareta no te mau mea e rave rahi,’ ua farii râ oia i te a‘oraa ma te haehaa

10 Eita. Ua ite maitai Iesu e e feruriraa maitai to Mareta e te î i te here. Aita atoa o ’na i mana‘o e mea ino ia faaineine e rave rahi maa no te mau manihini. I haere na hoi o ’na iho i te tamaaraa rahi ta Mataio i faanaho no ’na. (Luka 5:29) E ere o te maa a Mareta te fifi, ta ’na râ mau fa matamua roa. No to ’na haapao-noa-raa i ta ’na maa ohipa rahi, moe atura ia ’na te mea faufaa roa ’‘e. Eaha ïa taua mea ra?

Ua mauruuru Iesu i to Mareta farii maitai e ua ite oia e e feruriraa maitai to ’na e te î i te here

11, 12. Mea nafea to Iesu a‘oraa ia Mareta?

11 To roto Iesu, te Tamaiti otahi ta Iehova iho i poiete, i te fare o Mareta no te haapii atu i te parau mau. Tera te mea faufaa roa ’‘e, eiaha râ te faaineineraa e rave rahi maa. Ua peapea atoa paha Iesu i te ereraa Mareta i te ravea hoê roa no te haapuai i to ’na faaroo. Ua vaiiho râ oia e na Mareta e rave i ta ’na iho maitiraa. * Mea huru rahi râ ta Mareta i to ’na parauraa ia Iesu ia faahepo ia Maria ia tauturu ia ’na, a ere atu ai o Maria atoa i taua ravea ra.

12 A‘o atura Iesu ia Mareta ma te mǎrû, ma te faahiti e piti taime i to ’na i‘oa no te tamǎrû ia ’na. Haapapu atura oia e eiaha o ’na e ‘ahoaho e e haapeapea no te mau mea e rave rahi.’ E navai hoê aore ra e piti noa maa, mai te peu iho â râ e te vai ra te maa varua. Eita roa ’tu ïa oia e tama‘i ia Maria i te maitiraa i te  “mea tia,” aore ra te mea faufaa, oia hoi te faarooraa i ta ’na mau haapiiraa.

13. Eaha te haapiiraa e huti mai i teie aamu?

13 Mea rahi te haapiiraa e huti mai i teie aamu. Eiaha roa ’tu tatou e vaiiho i te tahi mea ia na nia a‘e i to tatou ‘hiaai i te aratairaa a te Atua.’ (Mat. 5:3, MN) Mea maitai ia horoa e ia rave i te ohipa mai ia Mareta. Eiaha roa râ e ‘ahoaho e e haapeapea’ no te mau mea e ere i te mea faufaa roa no te farii maitai i te taata. Aita ana‘e, e ere ïa tatou i te mea faufaa roa ’‘e. Ia tamaa tatou e te tahi mau taeae e tuahine, e ere te maa e tuuhia mai te mea faufaa roa ’‘e, te faaitoitoraa râ te tahi e te tahi ma te horoa ’tu i te tahi ô pae varua. (A taio i te Roma 1:11, 12.) Noa ’tu e e ere  i te haapaoraa maa, e nehenehe taua taime ra e riro ei mea faaitoito.

“E tia faahou mai . . . to tuaane”

14. No te aha tatou e parau ai e ua farii Mareta i te a‘oraa?

14 Ua farii anei Mareta i ta Iesu a‘oraa e ua huti mai anei i te haapiiraa? E. Te vai ra te haapapuraa i roto i te Ioane 11:5 faahitihia i te omuaraa, e faaite ra e mea here na Iesu ia Mareta, ia Maria e ia Lazaro. E rave rahi ava‘e tei mairi mai to Iesu tereraa ’tu i Betania. Papu maitai, aita Mareta i faariri, aita atoa i inoino noa ia Iesu no ta ’na a‘oraa î i te here. Ua farii râ oia i te reira. I ǒ nei atoa, e faaroo faahiahia mau â to ’na. O vai hoi o tatou e ore e hinaaro mau â maa a‘oraa i te tahi taime?

15, 16. (a) Eaha paha ta Mareta i rave i te ma‘iraahia Lazaro? (b) Eaha paha ta Mareta raua Maria i mana‘o?

15 I to Lazaro ma‘iraahia, eita e ore e ua haapao Mareta ia ’na. Ua rohi oia i te tamǎrû i to ’na mauiui e ia maitai mai o ’na. E pau râ te rave, ua rahi noa ’tu â te ma‘i o Lazaro. Ua haapao noa to ’na na tuahine ia ’na. Ehia hoi taime to Mareta hi‘o-noa-raa i to ’na taeae tei pararai roa, a haamana‘o noa ’i i tera rahiraa matahiti i orahia mai e ratou i roto i te oaoa e te oto!

16 Ite a‘era râ Mareta raua Maria e e pohe iho â Lazaro. Tono ihora ïa raua i te tahi vea ia Iesu ra, e poro ra i te hoê vahi e piti mahana ia haere avae mai. Mea poto roa ta raua poroi: “Fatu, inaha, te taata here na oe ra ua pohe i te ma‘i.” (Ioa. 11:1, 3) Ua ite raua e mea here na Iesu to raua taeae, e ua papu ia raua e e haere mai iho â Iesu e faaora i te ma‘i o to ’na hoa. Mea maitai e e tae oioi mai Iesu, ta raua paha ïa i mana‘o. Tera râ, ua pohe Lazaro.

17. (a) Eaha paha ta Mareta i uiui maere? (b) Eaha ta Mareta i rave i to ’na faarooraa e te piri mai ra Iesu i te oire?

17 Oto a‘era Mareta raua Maria e faaineine atura i te hunaraa o to raua taeae. Mea rahi tei haere atu e hi‘o ia raua, no Betania e no pihai iho mai. O Iesu râ, aita â ïa i tae mai atura. Ua uiui maere paha Mareta a mairi ai te mau mahana. E maha mahana i muri a‘e i to Lazaro poheraa, faaroo ihora Mareta e te piri mai ra Iesu i te oire. Noa ’tu to ’na oto rahi, haere ru atura oia e farerei ia ’na, ma te ore e faaite ia Maria.—A taio i te Ioane 11:18-20.

18, 19. (a) Eaha ta Mareta i tiaturi? (b) No te aha mea faahiahia ’i to Mareta faaroo?

18 I to Mareta iteraa ’tu i to ’na Fatu, parau atura oia i ta raua  Maria i mana‘ona‘o noa na: “Fatu, ahiri oe i ǒ nei e ore e pohe tau tuaane.” Te vai noa ra râ te tiaturiraa e te faaroo i roto ia Mareta, na ô faahou atura hoi oia: “Ua ite râ vau i ta oe e ani atu i te Atua ra, na te Atua ïa e horoa mai na oe i teie nei â.” I reira iho, haapuai a‘era Iesu i to ’na faaroo a na ô ai: “E tia faahou mai . . . to tuaane.”—Ioa. 11:21-23.

19 Mana‘o ihora Mareta e o te tia-faahou-raa no a muri a‘e ta Iesu e parau ra, e pahono atura: “Ua ite au e, e tia faahou mai â oia ia tae i te tia-faahou-raa i te mahana hopea.” (Ioa. 11:24) Mea faahiahia mau â to ’na faaroo i taua haapiiraa ra. Eita te tahi mau aratai haapaoraa ati Iuda, piihia Sadukea, e tiaturi i te tia-faahou-raa, noa ’tu e mea maramarama maitai tera haapiiraa i roto i te Parau a te Atua. (Dan. 12:13; Mar. 12:18) O Mareta râ, ua ite ïa e ua haapii Iesu i taua tiaturiraa ra i te taata e ua faatia  atoa mai o ’na i te taata pohe, aita râ i pohe maoro mai ia Lazaro. Aita Mareta i ite eaha te tupu i muri iho.

20. A faataa na i ta Iesu i parau i roto i te Ioane 11:25-27 e ta Mareta pahonoraa.

20 Faahiti ihora Iesu i teie parau e ore roa e moehia: “Tei ia ’u te tia-faahou-raa e te ora.” Ua horoa ’tu iho â Iehova i ta ’na Tamaiti i te mana no te faatia faahou mai i te feia pohe na te ao atoa nei a muri a‘e. Ui maira Iesu ia Mareta e e tiaturi anei o ’na i te reira. Horoa ’tura oia i te pahonoraa faahitihia i te omuaraa o teie pene. Te tiaturi ra oia e o Iesu te Mesia, te Tamaiti a te Atua, e o ’na ta te mau peropheta i tohu na e e haere mai o ’na i teie nei ao.—Ioa. 5:28, 29; a taio i te Ioane 11:25, 26; e te irava 27 i roto i te nota i raro i te api. *

21, 22. (a) Mea nafea Iesu i te faaiteraa e ua aroha roa o ’na i te feia e oto ra? (b) A faataa na i to Lazaro faaho‘iraahia mai i te ora.

21 Te haafaufaa ra anei te Atua ra o Iehova e ta ’na Tamaiti ra o Iesu Mesia i taua huru faaroo ra mai to Mareta? E. Na te ohipa e tupu i muri iho e haapapu mai. Haapeepee ihora Mareta i te tii i to ’na tuahine. Ite atura oia ia Iesu, ua peapea roa a paraparau noa ’i ia Maria e te feia atoa e oto ra. Ite ihora oia i te roimata o Iesu a ta‘i ai oia no to ’na oto rahi, mea mauiui hoi ia pohe te hoê taata. Faaroo atura oia ia Iesu i te faaueraa e turai i te ofai e opani ra i te menema.—Ioa. 11:28-39.

22 Oioi atura Mareta i te parauraa ’tu e ua hau‘a te tino, a maha ’tura hoi mahana to Lazaro poheraa. Haamana‘o atura Iesu ia ’na: “Aore au i parau atu ia oe e, I faaroo [aore ra tiaturi] oe ra e ite [ïa] oe i te mana o te Atua?” Ua tiaturi iho â Mareta, e ite atura oia i to Iehova mana, aore ra hanahana. Horoa ihora Iehova i te mana i ta ’na Tamaiti e faaho‘i mai ia Lazaro i te ora! Mau roa ia Mareta tei tupu i tera taime. Tuô atura Iesu: “Lazaro, a haere mai i rapae.” Faaroohia ihora te maniania i roto i te ana, te tia mai ra hoi Lazaro i nia ma te ahu i vehîhia ’i to ’na tino, e te haere mǎrû noa mai ra i rapae. Faaue ihora Iesu ia tatara i tera ahu e ia tuu ia ’na ia haere. Ua oaoa roa Mareta i to raua Maria hororaa ’tu e tauahi ia Lazaro! (A taio i te Ioane 11:40-44.) Pee ihora to Mareta oto!

Ua haamaitaihia to Mareta faaroo, ua faaho‘ihia mai to raua Maria taeae i te ora

23. Eaha ta Iehova raua Iesu e rave no oe, ia nahea râ oe?

23 Te faaite ra teie aamu e e ere te tia-faahou-raa mai te pohe  mai i te moemoeâ. E tupuraa mau râ, e haapiiraa Bibilia tamahanahana atoa. (Ioba 14:14, 15) Mea au na Iehova e na ta ’na Tamaiti e haamaitai i te feia e faaroo to ratou. Ta raua ïa i rave no Mareta, Maria e Lazaro. E haamaitai raua ia oe atoa ia haapuai oe i to oe faaroo.

‘Te raverave ra Mareta’

24. Eaha te taime hopea i faahiti ai te Bibilia ia Mareta?

24 Hoê noa taime to te Bibilia faahiti-faahou-raa ia Mareta, hoê ïa hebedoma hou Iesu a pohe ai. Ua ite maitai Iesu e e roohia oia i te ati, faaoti faahou ihora oia e parahi i te fare o to ’na mau hoa i Betania. Mai reira ïa oia e haere atu ai i Ierusalema, e toru kilometera te atea. A tamaa ’i Iesu raua Lazaro i te fare o Simona, e lepera na mua ’‘e, ‘te raverave ra Mareta.’ Tera ïa te taime hopea i faahiti ai te Bibilia ia ’na.—Ioa. 12:2.

25. No te aha e haamaitairaa ’i no te mau amuiraa te mau vahine mai ia Mareta?

25 E vahine peepee iho â Mareta! Te taime matamua i faahiti ai te Bibilia ia ’na, te rave ra o ’na i te ohipa. Te taime hopea, te ohipa noa ra o ’na, a rohi ai i te aupuru i te feia e haaati ra ia ’na. I roto i te mau amuiraa Kerisetiano i teie mahana, e haamaitairaa te mau vahine mai ia Mareta. Mea itoito roa ratou e te aau horoa, a faaite noa ’i i to ratou faaroo ma te rohi no vetahi ê. Eita e ore e ua tamau noa Mareta i te na reira. E haerea paari ïa, i te mea e e fifi â te tiai mai ra ia ’na.

26. Mea nafea te faaroo o Mareta i te tauturu-faahou-raa ia ’na?

26 Tau mahana i muri iho, ua mauiui faahou â Mareta i te haapoheraahia to ’na Fatu here ra o Iesu e te tahi mau taata haavarevare. Ua opua atoa tera mau taata e haapohe ia Lazaro, no te mea ua haapuai to ’na tia-faahou-raa i te faaroo o te taata e rave rahi. (A taio i te Ioane 12:9-11.) Parau mau, i muri a‘e ua mutu tera taairaa here i rotopu ia Mareta e to ’na taeae e to ’na tuahine i te pohe. Aita tatou i ite mea nafea e inafea te reira i te tupuraa. Papu maitai râ, ua tauturu to Mareta faaroo faufaa roa ia ’na ia mau papu e tae noa ’tu i te hopea. No reira, e pee ana‘e ïa i to ’na faaroo.

^ par. 11 I tera tau, eita te mau vahine ati Iuda e itehia i rotopu i te feia e faaroo ra i te hoê orometua haapii. Te mea noa i haapiihia ia ratou, te ohipa fare ïa. Ua mana‘o paha ïa Mareta e eita e tano ia parahi te hoê vahine i te pae avae o te hoê orometua haapii no te faaroo ia ’na.

^ par. 20 Ioane 11:27: “Faaroo [aore ra tiaturi] oe i te reira? Ua parau atura oia ia ’na, E te Fatu, e, ua faaroo vau [aore ra tiaturi au] e o oe te Mesia te Tamaiti a te Atua o te haere mai i te ao nei.”