Eaha to roto?

Tapura tumu parau

PENE AHURU MA PAE

Ua turu oia i te nunaa o te Atua

Ua turu oia i te nunaa o te Atua

1-3. (a) No te aha paha Esetera i riaria ˈi a haere ai oia e farerei i ta ˈna tane? (b) E pahono tatou i teihea na uiraa no nia ia Esetera?

 OTUˈITUˈI teie mea to Esetera mafatu, a piri atu ai oia i te aua i roto i te aorai i Susana. Ua patuhia teie aorai i nia i te hoê tiapai vahi papu i pihai iho i te mau mouˈa Zagros, ua poˈi te mau tupuai i te hiona. Mai nia mai, e ite atu oe i raro i te anavai ateate Choaspès. Te mau patu o te aorai, e piriti vanitihia ïa ua rau te û, e hohoˈa puaatoro oni pererau, taata teˈa e liona to nia iho. Te mau mea atoa o teie aorai, ua hamanihia ïa ia umere te ratere atoa i te mana rahi o te taata tei pii ia ˈna iho “te arii rahi.” O ˈna ta Esetera e haere ra e farerei. O ta ˈna ïa tane.

2 Ta ˈna tane? Ahasueru? a Mea taa ê roa teie taata i te tane ta te mau potii ati Iuda haapao maitai e hinaaro e faaipoipo! E ere roa ˈtu o ˈna mai ia Aberahama, tei farii ma te haehaa i te faaueraa a te Atua e faaroo ia Sara ta ˈna vahine. (Gen. 21:12) Aita rea aore ra aita roa ˈtu mea ta Ahasueru i ite no nia ia Iehova, te Atua o Esetera, e ta ˈna mau ture. Ua ite râ oia i te mau ture Peresia, mai te ture e opani ra i te taata atoa ia tia ˈtu i mua ia ˈna ma te ore e titauhia mai. O te pohe te utua. Tera hoi ta Esetera e rave ra. Aita oia i titauhia. Noa ˈtu râ, e haere o ˈna e farerei i te arii. A piri atu ai oia i te aua i roto mai o te arii, mai reira ˈtu te arii e ite mai ai ia ˈna, ua manaˈo paha o ˈna e e pohe oia.—A taio i te Esetera 4:11; 5:1.

3 No te aha Esetera i na reira ˈi noa ˈtu e e pohe o ˈna? Eaha ta te faaroo o teie vahine faahiahia e haapii mai ra? Na mua, e hiˈo mai tatou mea nafea Esetera i riro mai ai ei arii vahine no Peresia.

To Esetera tamariiraa

4. No te aha Esetera i faaamuhia ˈi e Moredekai?

4 E otare Esetera. Ta tatou noa i ite no nia i to ˈna na metua: ua pii raua ia ˈna Hadasa, te hoê taˈo Hebera e “hedesa” te auraa. E tumu raau nainai nehenehe teie, mea uouo to ˈna mau tiare e mea noˈanoˈa. I te poheraa to Esetera na metua, na Moredekai i faaamu ia ˈna. E taeae to raua nau papa. Mea paari aˈe Moredekai ia Esetera, ta ˈna i rave mai ta ˈna iho tamahine.—Esetera 2:5-7, 15.

Ua tano iho â Moredekai i te haapeuraa i ta ˈna tamahine faaamu

5, 6. (a) Eaha ta Moredekai i haapii ia Esetera? (b) Mai te aha te oraraa o Esetera raua Moredekai i Susana?

5 Mea hopoi-ê-hia Moredekai raua Esetera, nau ati Iuda, i taua oire pu Peresia ra. Mea hiˈo-ino-hia paha raua i ǒ no ta raua haapaoraa e te ture ta raua e tutava ra i te pee, te ture a Mose. Papu roa râ, ua piri atu â Esetera ia Moredekai a haapii ai oia ia ˈna no nia ia Iehova, te Atua aroha hamani maitai tei faaora na i to ˈna nunaa e rave rahi taime i tahito ra, e o te na reira â. (Lev. 26:44, 45) Papu maitai, ua tupu te hoê taairaa o te here e te taiva ore i rotopu ia Esetera e ia Moredekai.

6 E au ra e e taata toroa Moredekai i te aorai no Susana, e parahi na hoi oia i te uputa o te aorai e te tahi atu mau tavini a te arii. (Ese. 2:19, 21; 3:3) Aita tatou i ite eaha ta Esetera ohipa a paari mai ai o ˈna. E nehenehe râ e manaˈo e ua haapao maitai o ˈna ia Moredekai e to raua nohoraa, i rotopu i te faaearaa o te feia riirii i teie pae mai o te anavai Choaspès, to te tahi atu ïa pae te aorai. Mea au atoa paha na ˈna e haere i te matete i Susana, i reira te feia hamani taihaa auro aore ra ario e faaiteite ai i ta ratou taihaa. Aita Esetera i ite noa ˈˈe e e fanaˈo oia i taua mau taoˈa unauna ra a muri aˈe, a taui roa ˈtu ai to ˈna oraraa.

“Purotu”

7. No te aha Vaseti i ere ai i to ˈna tiaraa arii vahine, e eaha tei tupu i muri iho?

7 I te hoê mahana, ua atutu te parau o te ohipa haama i tupu i te aorai. I te hoê tamaaraa rahi, a tamaa ˈi e a inuinu ai Ahasueru e to ˈna mau taata mana, faaoti ihora oia e titau i te arii vahine purotu ra o Vaseti, o te tamaa atoa ra e te mau vahine. Aita râ Vaseti i haere mai. Haama ihora te arii e riri atura. Ani atura oia i to ˈna mau taata aˈo e nafea ia faautua ia Vaseti. Teie ïa: ua ere Vaseti i to ˈna tiaraa arii vahine. Imi haere ihora te mau tavini a te arii i te mau potii purotu aita i taoto aˈenei i te hoê tane. Na te arii e maiti i te arii vahine apî i rotopu i taua mau purotu ra.—Ese. 1:1–2:4.

8. (a) No te aha paha Moredekai i haapeapea ˈi no Esetera? (b) E nafea te Bibilia e tauturu mai ai ia tano noa to tatou manaˈo i te nehenehe? (A hiˈo atoa i te Maseli 31:30.)

8 E nehenehe tatou e manaˈo e a hiˈo noa ˈi Moredekai ia Esetera ma te oaoa, ua haapeu oia e ua haapeapea atoa râ, no te mea ua riro mai ta ˈna tamahine iti ei potii haviti mau. Ia au i te faatiaraa, “e tamahine nehenehe rahi oia e te mata purotu.” (Ese. 2:7, Te Bibilia Moˈa V.C.J.S., 1976) Te horoa ra te Bibilia i te manaˈo tano noa no nia i te nehenehe. Mea au roa ia hiˈo atu i te hoê purotu, mea faufaa atoa râ ia faahotu oia i te paari e te haehaa. Aita anaˈe, e faatupu ïa oia i te mau huru tano ore, mai te faaoru e te teoteo. (A taio i te Maseli 11:22.) Ua ite ê na paha oe i teie tupuraa. E o Esetera, e riro anei to ˈna nehenehe ei tauturu faufaa aore ra ei marei? Na te tau e faaite mai.

9. (a) Eaha ta te mau tavini a te arii i rave, e no te aha mea mauiui ai no Moredekai raua Esetera i to raua faataa-ê-raahia? (b) No te aha Moredekai i vaiiho ai ia Esetera ia faaipoipo i te hoê tane aita e haamori ra ia Iehova? (A hiˈo i te tumu parau “Uiraa no nia i te buka a Esetera.”)

9 Ite maira te mau tavini a te arii ia Esetera, e afai aˈera ia ˈna i te aorai i tera ˈtu pae mai o te anavai. (Ese. 2:8) Eita e ore e mea mauiui no Moredekai e no Esetera i to raua faataa-ê-raahia, mai te hoê papa e ta ˈna tamahine hoi raua. Aita Moredekai i hinaaro ia faaipoipo ta ˈna tamahine faaamu i te hoê tane, noa ˈtu e e arii, aita e haamori ra ia Iehova. Aita râ to ˈna e mana i nia i te mau tupuraa. b Eita e ore e ua faaroo maitai Esetera i ta Moredekai mau aˈoraa i horoa ˈtu hou oia a afaihia ˈi! A arataihia ˈi oia i te aorai i Susana, mea rahi te uiraa i puta mai. Mai te aha râ to ˈna oraraa i ǒ?

Ua auhia Esetera e “te feia atoa i hiˈo mai ia ˈna”

10, 11. (a) Eaha te nehenehe e tupu i nia ia Esetera i te aorai? (b) Eaha te faaite mai ra e ua haapeapea Moredekai no Esetera?

10 Ua taui roa te oraraa o Esetera i taua vahi apî roa ra no ˈna. O ˈna hoê o ‘te vahine apî e rave rahi’ e ati aˈe te hau emepera Peresia tei haaputuputuhia mai. Ta ratou tutuu, to ratou reo e ta ratou peu, ua rau ïa te huru. I raro aˈe i te tiaauraa a te hoê taata toroa o Hegai te iˈoa, ua taurumihia te mau potii i te monoˈi noˈanoˈa a riro mai ai ei purotu haviti roa, hoê matahiti i te maoro. (Ese. 2:8, 12) I roto i tera huru tupuraa e huru oraraa, e nehenehe tera mau potii e maamaahia i to ratou nehenehe, a faatitiaua ˈtu ai te tahi i te tahi. E o Esetera?

11 O Moredekai anaˈe te taata i te fenua nei tei haapeapea mau â no Esetera. Ia au i te faatiaraa, e haere oia pauroa te mahana na pihai iho roa i te fare o te mau vahine ia ite oia eaha to Esetera huru. (Ese. 2:11) Eita e ore e ua haapeu roa oia i te faaiteraa mai te tahi taata, peneiaˈe te hoê tavini i te aorai, e mea maitai roa Esetera. No te aha?

12, 13. (a) Mea aha roa na te taata ia Esetera? (b) No te aha Moredekai i oaoa roa ˈi e aita Esetera i faaite e e ati Iuda o ˈna?

12 No te mea ua au roa Hegai ia Esetera, ua hamani maitai roa oia ia ˈna ma te horoa ˈtu e hitu tavini vahine e te vahi maitai roa ˈˈe o te fare o te mau vahine. Te na ô atoa ra te faatiaraa: “I auhia mai Esetera i te aro o te feia atoa i hiˈo mai ia ˈna.” (Ese. 2:9, 15) No to ˈna noa anei nehenehe i au roa ˈi te taata atoa ia ˈna? E ere.

Ua ite Esetera e mea faufaa aˈe te haehaa e te paari i te nehenehe

13 Te taio nei tatou: “Aita Esetera i faˈi i to ˈna nunaa, e to ˈna fetii: ua oti hoi oia i te aˈohia e Moredekai e eiaha oia e faˈi.” (Ese. 2:10) I parau na Moredekai ia Esetera eiaha e faaite e e ati Iuda o ˈna, ua ite hoi oia e mea hiˈo-ino-roa-hia to ˈna nunaa i te aorai Peresia. Ua oaoa roa oia i te faarooraa e mea auraro noa iho â Esetera e te î i te paari, noa ˈtu e ua taa ê raua!

14. E nafea te feia apî e pee ai i te hiˈoraa o Esetera?

14 I teie mahana atoa, e nehenehe te feia apî e faaoaoa i te aau o to ratou na metua aore ra metua faaamu. E nehenehe ta ratou eiaha e pee i te mau taata ino, noa ˈtu e aita to ratou na metua e hiˈo mai ra e noa ˈtu e ua haaatihia ratou e te mau taata haapaoraa ore, ohipa ino aore ra haavî uˈana. Ia na reira ratou, e faaoaoa ïa ratou mai ia Esetera i te aau o to ratou Metua i te raˈi.—A taio i te Maseli 27:11.

15, 16. (a) Maoti te aha i here ai te arii ia Esetera? (b) No te aha mea fifi roa ˈi no Esetera te tauiraa to ˈna oraraa?

15 I te taeraa mai te taime e arataihia ˈi Esetera i te arii ra, e nehenehe oia e maiti i te mau faaneheneheraa atoa ta ˈna e hinaaro, ia haviti roa ˈtu â paha oia. Ma te aau faahaihai râ, ua rave noa oia i ta Hegai i tuu mai. (Ese. 2:15) Ua taa paha ia ˈna e e ore te aau o te arii e putapû i te nehenehe noa. Mea au aˈe te taata haehaa i te taata teoteo. I te aorai, mea varavara roa te taata aau faahaihai e te haehaa. Ua tano anei Esetera?

16 Te pahono mai ra te faatiaraa: “Hau atura to te arii hinaaro ia Esetera i te mau vahine atoa, herehia mai hoi oia e ana i te mau paretenia atoa; i tuu mai ai hoi oia i te korona arii i nia i tana upoo, e ua faariro ia ˈna ei arii vahine ei mono ia Vaseti.” (Ese. 2:17) Eita e ore e mea fifi roa no teie potii ati Iuda haehaa teie tauiraa i roto i to ˈna oraraa: o ˈna te arii vahine apî, te vahine a te arii mana roa ˈˈe o te fenua i tera ra tau! Ua teoteohia anei Esetera no teie tiaraa apî to ˈna? Aita roa ˈtu!

17. (a) No te aha tatou e parau ai e ua auraro noa Esetera i to ˈna papa faaamu? (b) No te aha mea faufaa roa ˈi ia pee tatou i te hiˈoraa o Esetera?

17 Ua auraro noa Esetera i to ˈna papa faaamu. Aita iho â oia i faaite e e ati Iuda o ˈna. I to Moredekai atoa iteraa e te opuahia ra e haapohe ia Ahasueru, ua farii Esetera i te faaara ˈtu i te arii, e ua itehia mai na taata opuaraa ino. (Ese. 2:20-23) Ua faaite atoa Esetera i to ˈna faaroo i to ˈna Atua ma te faahotu i te haehaa e ma te auraro. Mea faufaa roa ia pee tatou i to ˈna hiˈoraa. Mea auraro ore hoi e mea orure hau te rahiraa o te taata i teie mahana. Aita ïa ratou e haafaufaa ra i te auraro. Te feia râ e faaroo mau to ratou, mai ia Esetera, oia ïa.

Ua tamatahia te faaroo o Esetera

18. (a) No te aha Moredekai i ore ai i piˈo i raro i mua ia Hamana? (A hiˈo atoa i te nota i raro i te api.) (b) E nafea te mau tane e te mau vahine faaroo i teie mahana e pee ai i te hiˈoraa o Moredekai?

18 Ua faatoroahia te hoê taata o Hamana te iˈoa ei faatere hau nui. E tiaraa teitei roa teie i te aorai o Ahasueru. O ˈna te taata aˈo rahi o te arii e te piti o te taata mana o te hau emepera. Ua faaue roa te arii i te taata atoa e farerei ia Hamana ia piˈo i raro ei faaturaraa ia ˈna. (Ese. 3:1-4) No Moredekai, e fifi to taua ture ra. E auraro iho â o ˈna i te arii ma te ore râ e faatura ore i te Atua. E ati Agaga o Hamana. E huaai ïa o ˈna no Agaga, te arii Amaleka ta te peropheta Samuela i haapohe. (Sam. 1, 15:33) No to ratou ino rahi, e enemi te ati Amaleka no Iehova e no Iseraela. Ua faautuahia ïa taua nunaa taata ra e te Atua. c (Deut. 25:19) E nahea hoi te hoê ati Iuda haapao maitai e nehenehe ai e piˈo i mua i te hoê ati Amaleka? Eita ïa. Aita iho â Moredekai i piˈo i mua ia Hamana. E tae mai i teie mahana, ua ineine te mau tane e te mau vahine faaroo i te pohe no te pee i teie faaueraa tumu: “O te Atua ta matou e faaroo e tia ˈi eiaha te taata.”—Ohi. 5:29.

19. Eaha ta Hamana i hinaaro e rave, e mea nafea to ˈna paraparauraa i te arii?

19 Ua riri roa Hamana. Hinaaro atura oia e haapohe eiaha ia Moredekai noa, pauroa atoa râ te ati Iuda. Faaino atura oia i te ati Iuda i te arii, ma te parau e ‘te parare nei te hoê nunaa na te mau mataeinaa o to ˈna basileia.’ Aita oia i faahiti i te iˈoa o tera mau taata, a horoa ˈtu ai i te manaˈo e mea faufaa ore ratou. Te mea ino roa ˈtu â, ua parau oia e aita ratou e haapao ra i te ture a te arii. E orure hau atâta ïa ratou. Ua parau oia e e tuu oia i roto i te pueraa taoˈa a te arii i te hoê tino moni rahi mau no te aufau i te haapoheraa o te taatoaraa o te ati Iuda o te hau emepera. d Horoa ˈtura Ahasueru ia Hamana i to ˈna tapea rima arii no te haamana i te mau faaueraa atoa ta ˈna e horoa.—Ese. 3:5-10, V.C.J.S.

20, 21. (a) Ua aha te ati Iuda e ati aˈe te hau emepera Peresia e Moredekai atoa no ta Hamana poroi? (b) Ua taparu Moredekai ia Esetera ia aha?

20 Reva ru atura te mau vea na nia i te puaarehenua e faaite e ati aˈe te hau emepera i te poroi faautuaraa e haapohe i te nunaa ati Iuda. A feruri na i te huru o te toea ati Iuda, tei hoˈi mai i Ierusalema mai Babulonia mai, i to ratou faarooraa i taua poroi ra. Te tautoo ra hoi ratou i te patu faahou i te oire aita â te aua i tia mai atura. I to Moredekai faarooraa i teie parau peapea roa, ua manaˈo paha oia ia ratou, i to ˈna atoa mau hoa e to ˈna mau fetii i Susana. Ahoaho aˈera oia, hahae ihora i to ˈna ahu, tapoˈi maira ia ˈna i te ahu oto, tuu ihora i te rehu auahi i nia iho i to ˈna upoo e tutuô atura ma te oto na roto i te oire. O Hamana râ, parahi ihora ïa e te arii a inuinu noa ˈi. Aita oia i aroha noa ˈˈe i te ati Iuda e rave rahi e to ratou mau hoa i Susana e oto ra.—A taio i te Esetera 3:12–4:1.

21 Faarooroo ihora Esetera i te ahoaho o Moredekai e hopoi atura i te ahu no ˈna. Aita râ Moredekai i hinaaro i taua tamahanahanaraa ra. Ua ite o ˈna e ia imi oia i te tahi ravea. Eaha râ? I uiui noa na paha oia no te aha to ˈna Atua ra o Iehova i vaiiho ai ia ravehia ta ˈna tamahine here no te riro ei vahine na te hoê arii e ere i te ati Iuda. E au ra e te taa ra ia ˈna te pahonoraa. Poroi ihora oia ia Esetera ma te taparu ia haere e farerei i te arii “ia ora to ˈna mau taata.”—Ese. 4:4-8.

22. No te aha Esetera i riaria ˈi i te tia ˈtu i mua i ta ˈna tane te arii? (A hiˈo atoa i te nota i raro i te api.)

22 Eita e ore e ua hepohepo atu â Esetera i to ˈna faarooraa i ta Moredekai poroi. Teie te tamataraa rahi roa ˈˈe i to ˈna faaroo. Riaria ihora oia, mai ta ˈna i faˈi i roto i ta ˈna pahonoraa ia Moredekai. Ua haamanaˈo atu oia i te ture a te arii: te taata e tia ˈtu i mua ia ˈna ma te ore e titauhia mai, e pohe o ˈna. Ia toro mai râ te arii i ta ˈna sepeta auro, e ora ïa oia. Aita hoê aˈe tumu e manaˈo ai Esetera e e faaherehere te arii ia ˈna. Aita hoi oia i faaherehere ia Vaseti no to ˈna auraro ore. Faaite atura Esetera ia Moredekai e aita te arii i titau mai ia ˈna a 30 atura mahana. Ua tano ïa oia i te uiui e te here noa ra anei te arii, e taui hanoa to ˈna huru, ia ˈna. eEse. 4:9-11.

23. (a) Eaha ta Moredekai i parau no te haapuai i te faaroo o Esetera? (b) No te aha e hiˈoraa ˈi Moredekai no tatou?

23 Pahono maira Moredekai ma te tapea ore i te parau no te haapuai i te faaroo o Esetera. Ua parau roa oia e ia mamû noa Esetera, “e tupu mai te ora o te ati Iuda na te tahi vahi ê mai.” Ua uˈana roa anaˈe te haapoheraa, eiaha Esetera e manaˈo e e faahereherehia o ˈna. I ǒ nei, ua faaite Moredekai i to ˈna faaroo rahi ia Iehova, o te tapea iho â i ta ˈna mau parau fafau e o te ore roa ˈtu e vaiiho i to ˈna nunaa ia haapohehia. (Ios. 23:14) Ui ihora Moredekai ia Esetera: “O vai te ite e te mea teie i noaa ˈi ia oe te hau [aore ra te tiaraa arii vahine] i teie nei anotau?” (Ese. 4:12-14) Ua tiaturi roa iho â Moredekai i to ˈna Atua ra o Iehova. E na reira atoa anei tatou?—Mas. 3:5, 6.

Puai aˈe to ˈna faaroo i to ˈna riaria i te pohe

24. Mea nafea Esetera i faaite ai i te faaroo e te itoito?

24 Tae maira te taime e rave ai Esetera i ta ˈna faaotiraa. Poroi ihora oia ia Moredekai ia haapae oia e pauroa te ati Iuda i Susana i te maa e toru mahana, mai ia ˈna atoa. Faaoti ihora oia i ta ˈna poroi ma teie parau e faaite ra i to ˈna faaroo e to ˈna itoito: “Ia pohe au ra, pohe noa ˈtu [ïa] vau.” (Ese. 4:15-17) Putapû mau â teie mau parau poto roa! Eita e ore e ua pure rahi Esetera i tera na toru mahana, hau aˈe i na mua ˈtu. Tae maira te mahana e haere ai oia e farerei i te arii. Oomo ihora oia i to ˈna ahu arii nehenehe roa ˈˈe ia au mai hoi te arii ia ˈna, e haere atura.

Ua ineine Esetera i te pohe no te paruru i te nunaa o te Atua

25. A faataa na i te ohipa i tupu e tae roa i to Esetera tiaraa ˈtu i mua i ta ˈna tane.

25 Mai ta te omuaraa o teie pene e faataa ra, haere atura Esetera i te aua o te arii. A feruri na ïa i to ˈna ahoaho, a taparuparu noa ˈi ia Iehova. Tomo ihora oia i roto i te aua. Mai reira ˈtu, e nehenehe oia e ite ia Ahasueru i nia i to ˈna terono. Ua tamata paha oia i te hiˈo maitai i to ˈna hohoˈa mata. Mai te peu e ua faatiaihia o ˈna, eaha râ paha te maoro no ˈna! Ite maira râ ta ˈna tane ia ˈna. Mea papu e ua maere te arii, ua mǎrû mai râ to ˈna hohoˈa mata. Toro maira oia i ta ˈna sepeta auro!—Ese. 5:1, 2.

26. (a) No te aha tatou e hinaaro mau ai i te itoito mai to Esetera? (b) No te aha e haamataraa noa ˈi ta Esetera i rave i tera mahana?

26 Ua farii Ahasueru e faaroo ia Esetera. Ua tapea Esetera i to ˈna taiva ore i te Atua e ua ineine i te pohe no te paruru i te nunaa o te Atua. E hiˈoraa o te faaroo nehenehe mau â o ˈna no te mau tavini atoa a te Atua. Mea faufaa roa te mau hiˈoraa mai tera no te mau Kerisetiano mau i teie mahana. Ua parau Iesu e e itehia o vai ta ˈna mau pǐpǐ mau maoti te here haapae ia ˈna iho. (A taio i te Ioane 13:34, 35.) E titau pinepine taua here ra i te itoito mai to Esetera. Teie râ, i to Esetera tururaa i te nunaa o te Atua i tera mahana, e haamataraa noa ïa te reira. E nafea hoi oia e faataa ˈi i te arii e e opuaraa ino ta Hamana, te taata aˈo au-roa ˈˈe-hia e te arii? Eaha ta ˈna e nehenehe e rave ia ora mai to ˈna nunaa? E ite mai tatou i te pahonoraa i te pene 16.

a Mea rahi te manaˈo ra e o Xerxès I o Ahasueru tei faatere i te hau emepera Peresia i te omuaraa 496 hou te Mesia.

b A hiˈo i te tumu parau “Uiraa no nia i te buka a Esetera” i te pene 16.

c O Hamana atoa paha te ati Amaleka hopea, i te mea e ua haapohehia “te toea” o ratou i te tau o te arii Hezekia.—Par. 1, 4:43.

d Ua pûpû Hamana 10 000 taleni ario, e miria ïa moni farane i teie mahana. Mai te peu e o Xerxès I o Ahasueru, mea anaanatae atu â ïa teie pûpûraa a Hamana. E hinaaro hoi te arii i te moni iti rahi no te tamaˈi i to Heleni. Mea maoro hoi teie opuaraa ta ˈna. Mea ino roa râ te faahopearaa o taua tamaˈi ra.

e Ua matauhia Xerxès I mai te hoê arii e taui hanoa to ˈna huru e mea ino roa atoa. Ua faatia te hoê taata tuatapapa Heleni i te tahi mau ohipa i tupu i to taua arii ra aroraa i to Heleni. Ua faaue oia ia hamanihia te hoê eˈaturu ma te tapiripiri i te tahi mau pahi, e tae atu ai ratou i tera pae mai o te miti Hellespont. Tera râ, i te parariraa taua eˈaturu ra i te vero, ua faaue te arii ia tâpûhia te upoo o te feia i haapao i taua ohipa ra e ia faautua, ei auraa parau, i te Hellespont ma te hui i taua miti ra e ma te taio haapuai atu i te tahi mau parau ino. I taua atoa aroraa ra, ua taparu te hoê taata taoˈa rahi ia haapaehia ta ˈna tamaiti i te tau faehau. Na nia i te faaueraa a te arii, ua tâpûhia te tamaiti a taua taata ra na ropu e ua faaiteitehia to ˈna tino ei faaararaa.