Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

Rata a te Tino aratai

Rata a te Tino aratai

E te mau taeae e te mau tuahine here,

I roto i te numera matamua roa o Te Pare Tiairaa no te taata atoa reo Farani, oia hoi 1 no Tenuare 2008, ua matara mai te tuhaa apî faahiahia mau “A pee i to ratou faaroo.” Mai reira mai, ua oaoa tatou i te taioraa hoê tumu parau o taua tuhaa ra pauroa te toru ava‘e!

Eaha te mana‘o o te feia taio? I te otiraa ia ’na i te taio i te tumu parau no nia ia Mareta, teie ta te hoê vahine i papai: “Ua ata vau i to ’u taioraa i tera tumu parau, no te mea mai ia Mareta atoa vau. E raverave noa vau i te ohipa no te farii maitai i ta ’u mau manihini. I te tahi taime, e moe ia ’u ia faaea e ia paraparau e o ratou.” Teie ta te hoê potii i parau no te aamu o Esetera: “Parau mau iho â, e nehenehe tatou e maamaahia i te ahu e te huru faanehenehe apî. Ia faaahu maitai iho â tatou, ia tanotano noa râ.” Ua na ô â oia: “Te mea faufaa roa no Iehova, te huru mau ïa o to tatou aau.” E i to te hoê tuahine taioraa i te tumu parau no nia i te aposetolo Petero, ua au roa o ’na, mai te huru ra e to roto roa o ’na i te aamu. Ua faaohipa o ’na i to ’na mau tumu ite no te tamata i te ora i te tahi mau tupuraa aita i faahiti-roa-hia i roto i te faatiaraa.

Mea rahi atu â tei mauruuru mau â no teie tuhaa. Te haapapu ra ta ratou mau rata i ta te aposetolo Paulo i papai: “Te mau parau atoa hoi i papaihia i mutaa ihora, i papaihia ïa ia ite tatou.” (Roma 15:4) I haapapai na Iehova i teie mau faatiaraa i roto i te Bibilia no te horoa mai i te mau haapiiraa faufaa. E nehenehe tatou pauroa e haafaufaa i te reira, noa ’tu ehia matahiti to tatou iteraa i te parau mau.

Te faaitoito nei matou ia outou ia taio i teie buka. A faaohipa ’tu i roto i ta outou haamoriraa utuafare, e au roa te tamarii! Eiaha e mairi hoê noa ’‘e haapiiraa o teie buka ia hi‘opoahia te reira i te Haapiiraa Bibilia a te amuiraa. Eiaha e horo noa ia taio outou i teie buka. A faaohipa i to outou feruriraa e to outou mau tumu ite. A tamata i te faatupu i te huru aau o tera mau tavini o te Bibilia, i te ite i ta ratou i ite. A faaau i ta ratou i rave i roto i te hoê tupuraa e ta outou atoa e rave ahani o outou a‘e tera.

Oaoa roa matou i te pûpû atu i teie buka. Ia riro te reira ei haamaitairaa no outou e no to outou utuafare! Mea here na matou ia outou.

Tino aratai a te mau Ite no Iehova