Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE AHURU MA HITU

“Inaha ei tavini au no te Fatu”

“Inaha ei tavini au no te Fatu”

1, 2. (a) Mea nafea to te hoê ratere aroharaa ’tu ia Maria? (b) Ua titauhia ia rave Maria i teihea faaotiraa?

HI‘O a‘era Maria ma te maere i te ratere e tomo mai ra. Aita tera taata i ani mai i to ’na papa aore ra to ’na mama. O Maria ta ’na i haere mai e farerei! E ere o ’na no Nazareta, mea papu te reira. I roto i te hoê oire nainai mai ia Nazareta, e taa-oioi-hia e e taata ěê tera, mai taua ratere ra. Mea ê roa ta ’na huru paraparau ia Maria: “Ia ora na, e tei here-hua-hia mai e! tei ia oe te Fatu [ra o Iehova].”—A taio i te Luka 1:26-28.

2 Mai tera ïa ta te Bibilia faaiteraa mai ia Maria, tamahine a Heli, o te oire o Nazareta i Galilea. E haamata to ’na aamu i te hoê taime e titauhia ’i ia rave o ’na i te hoê faaotiraa faufaa roa. Ua momo‘ahia o ’na i te tamuta ra o Iosepha. E ere Iosepha i te hoê taata tao‘a rahi, e faaroo rahi râ to ’na i te Atua. Ua mana‘o paha ïa Maria e e ora o ’na i te hoê oraraa haihai, a haapao ai i ta ’na tane e ta raua mau tamarii. Teie râ, tia taue maira i mua ia ’na taua ratere ra, o tei faaite mai i te hoê ohipa ta to ’na Atua e horoa na ’na, te hoê hopoia o te taui roa i to ’na oraraa.

3, 4. Ia taa maitai ia tatou o vai Maria, eiaha tatou e haapao i te aha, e nahea râ tatou?

3 Te maere ra e rave rahi i ore ai te Bibilia i faahiti rahi ia Maria. Maa vahi iti noa no nia i to ’na oraraa na mua ’‘e, mea iti roa ’tu â no nia i to ’na huru, e aita hoê a‘e no nia i to ’na haviti. Mea rahi râ te haapiiraa e huti mai i ta te Parau a te Atua e faaite ra no nia ia Maria.

4 Ia taa maitai ia tatou o vai Maria, eiaha tatou e haapao i te mana‘o e rave rahi ta te mau haapaoraa i haapii i to ratou mau taata no nia ia ’na. Eiaha atoa tatou e tâu‘a i te huru “faahoho‘araa” a te taata e rave rahi ia ’na, e te mau haapiiraa fifi mau o tei faateitei ia ’na i te tiaraa “Metua vahine o te Atua” e “Arii vahine o te ra‘i.” E hi‘opoa noa râ tatou i ta te Bibilia e faaite mau ra. Te  horoa mai ra te Bibilia i te mau haamaramaramaraa faufaa no nia i to ’na faaroo, e e nafea ia pee i te reira.

Haereraa ’tu te hoê melahi i ǒ Maria

5. (a) Eaha ta tatou e haapii i to Maria horuhoru no te huru aroha a Gaberiela? (b) Eaha te haapiiraa faufaa roa ta Maria i taa?

5 E ere te ratere tei haere i ǒ Maria i te hoê taata. O te melahi Gaberiela. I to ’na piiraa ia Maria “tei here-hua-hia mai,” ua “horiri” Maria e ua uiui eaha râ te auraa o teie huru aroha. (Luka 1:29) Mea here-hua-hia mai o ’na e vai? E ere iho â ïa e to ’na mau taata-tupu. Aita o ’na i mana‘o i te reira. Mea herehia râ o ’na e te Atua ra o Iehova, ta te melahi ïa i hinaaro e parau. Tera te mea faufaa no Maria. Aita o ’na i mana‘o ma te teoteo e ua here-ê-na-hia o ’na e te Atua. E haa atoa ana‘e ia here mai te Atua ia tatou ma te ore e mana‘o ma te teoteo e ua fana‘o ê na tatou i te reira. E huti mai tatou i te haapiiraa faufaa roa ta Maria i taa maitai: e patoi te Atua i te feia teoteo, mea here râ na ’na i te feia haehaa e e turu oia ia ratou.—Iak. 4:6.

Aita Maria i mana‘o ma te teoteo e ua here-ê-na-hia o ’na e te Atua

6. Eaha te fana‘oraa taa ê roa ta te melahi i pûpû ia Maria?

6 Ia faahotu iho â Maria i te haehaa, no te mea e fana‘oraa taa ê roa ta te melahi i pûpû atu: te fanauraa mai ïa i te hoê tamarii o te riro mai ei taata faufaa roa ’‘e o te huitaata taatoa. Ua parau Gaberiela: “Na te Fatu ra na te Atua e horoa mai i te terono o to ’na ra metua o Davida no ’na: ei ia ’na te hau i te fetii o Iakoba e a muri noa ’tu; e e ore roa to ’na basileia e mure.” (Luka 1:32, 33) Ua ite Maria i ta te Atua i fafau ia Davida hau atu i te 1 000 matahiti na mua ’tu, oia hoi e faatere hoê o to ’na huaai e a muri noa ’tu. (Sam. 2, 7:12, 13) O ta Maria ïa tamaiti te riro mai ei Mesia ta te nunaa o te Atua i tiai noa na ahia ’tura hanere matahiti!

E fana‘oraa taa ê roa ta te melahi Gaberiela i pûpû ia Maria

7. (a) Eaha ta te uiraa a Maria e faaite ra no nia ia ’na? (b) Eaha te haapiiraa ta te feia apî e nehenehe e huti mai i te hi‘oraa o Maria?

7 Ua na ô atoa ’tu te melahi e ‘e parauhia ta ’na tamarii te Tamaiti na te Teitei.’ Mea nafea te hoê vahine i nehenehe ai e fanau mai i te Tamaiti a te Atua? Mea nafea hoi Maria i nehenehe ai e fanau mai i te hoê tamarii? Mea momo‘a-noa-hia raua Iosepha, aita â raua i faaipoipo atura. No reira ïa Maria i ui roa ’tu ai: “Eaha ïa e tia ’i aore hoi au i ite i te taata [aore ra i taoto a‘enei i te hoê tane]?” (Luka 1:34) Ua tapao oe? Aita Maria i haama i te parau e aita o ’na i taoto i te hoê tane. Ua haapeu râ oia i te reira.  I teie mahana, mea rahi te taata apî e ru nei i te taoto i te hoê apiti e o te faaooo nei i te feia aita e na reira ra. Ua taui roa teie nei ao. O Iehova râ, aita ïa. (Mal. 3:6) Mai i te tau o Maria, mea here na ’na te feia e faatura ra i ta ’na mau ture aveia morare.—A taio i te Hebera 13:4 i roto i te nota i raro i te api. *

8. Mea nafea Maria, taata hara hoi, i nehenehe ai e fanau mai i te hoê tamarii tia roa?

8 Noa ’tu e e tavini haapao maitai Maria na te Atua, e taata hara o ’na. Mea nafea ïa oia i nehenehe ai e fanau mai i te hoê tamarii tia roa, te Tamaiti a te Atua? Faataa ’tura Gaberiela: “E pou mai te Varua Maitai i nia iho ia oe, e na te mana o te Teitei e tamǎrǔ i nia iho ia oe, e parauhia ’i hoi tena na tamaiti mo‘a, o te Tamaiti na te Atua.” (Luka 1:35) “Viivii ore” te auraa o te ta‘o “mo‘a.” Te tanoraa, e tutuu atu te mau metua i to ratou tiaraa taata hara e te viivii na ta ratou mau tamarii. I roto râ i teie tupuraa, e rave Iehova i te hoê semeio otahi. Mai te ra‘i mai, e tuu oia i te ora o ta ’na Tamaiti i roto i te opu o Maria, e maoti to ’na puai ohipa, aore ra to ’na varua mo‘a, e “tamǎrǔ” oia ia Maria, a paruru atu ai i ta ’na Tamaiti i te hara. Eaha to Maria huru? Ua tiaturi anei o ’na i te parau fafau a te melahi?

Ta Maria pahonoraa ia Gaberiela

9. (a) Ua hape te feia aita e tiaturi ra i te aamu o Maria, no te aha? (b) Mea nafea to Gaberiela haapuairaa i te faaroo o Maria?

9 Mea rahi te taata, tae noa ’tu vetahi feia maimi i te pae faaroo, aita e tiaturi ra e e nehenehe te hoê vahine, aita i taoto a‘enei i te hoê tane, e fanau mai i te tamarii. Noa ’tu to ratou maramarama, ua moe ia ratou te hoê parau mau ohie ia taa. Ta Gaberiela ïa i faahiti: “Aore roa hoi e mea e ore te tia i te Atua.” (Luka 1:37) O Maria râ, ua tiaturi ïa i te melahi, no te mea e faaroo rahi to ’na. E ere taua faaroo ra i te vare-hanoa-raa, ua niuhia râ i nia i te haapapuraa. Ua horoa ’tu Gaberiela i te mau haapapuraa hau, ma te parau atu no Elisabeta to ’na fetii ruhiruhia. Mea maoro to ’na matauraahia ei vahine eita e noaa ta ’na tamarii. Ua faatia râ te Atua ia hapû o ’na maoti te hoê semeio!

10. E fana‘oraa taa ê iho â ia fanau mai i te Tamaiti a te Atua, e ere râ mea ohie no Maria, no te aha?

10 Ua nahea ’tura Maria? E ohipa te tiai mai ra ia ’na, e haapapuraa atoa ta ’na e e faatupu te Atua pauroa ta Gaberiela i parau. E fana‘oraa taa ê iho â ia fanau mai i te Tamaiti a te Atua,  e ere râ mea ohie no Maria. A tahi, ua momo‘ahia o ’na ia Iosepha. E hinaaro noa anei Iosepha e faaipoipo ia ’na ia ite o ’na e ua hapû Maria? A piti, e hopoia rahi atoa taua fana‘oraa taa ê ra. E hapû mai oia i te tamarii faufaa roa ’‘e a te Atua, ta ’na iho Tamaiti here! Ia aupuru ïa oia i taua tamarii ra e ia paruru atoa ia ’na i roto i te hoê ao ino. E ere i te hopoia nainai!

11, 12. (a) Ua nahea ’tu te tahi mau tane, mea itoito rahi hoi e te haapao maitai, i to te Atua horoaraa ’tu i te tahi mau ohipa? (b) Eaha ta te pahonoraa a Maria ia Gaberiela e faaite ra?

11 Te faaite ra te Bibilia e ua taiâ te tahi mau tane, mea itoito rahi hoi e te haapao maitai, i to te Atua horoaraa ’tu i te tahi mau ohipa fifi. Ua parau Mose e eita e tae ia ’na ia auvaha no te Atua, no te mea e reo maumau to ’na. (Exo. 4:10) Ta Ieremia otoheraa, “e tamaiti iti hoi” o ’na, mea apî roa ïa o ’na no te ohipa ta te Atua i faaue ia ’na e rave. (Ier. 1:6) Area Iona, ua taie ïa! (Iona 1:3) E o Maria?

12 Ma te haehaa e te auraro, pahono atura Maria ia Gaberiela ma teie mau parau putapû mau: “Inaha ei tavini au no te Fatu [ra o Iehova], ia na reirahia mai au mai ta oe i parau na.” (Luka 1:38) E tiaraa riirii roa to te hoê tavini e tei to ’na ra fatu te parau o to ’na oraraa. Tera ïa to Maria mana‘o: e tavini o ’na no to ’na Fatu ra o Iehova. Ua ite o ’na e e paruruhia oia e ana, e haapao maitai oia i te feia e tapea ra i to ratou haapao maitai ia ’na, e haamaitai atoa oia ia ’na ia faaitoito oia i te amo i tera hopoia fifi.—Sal. 18:25.

Ua ite Maria e e paruruhia o ’na e to ’na Atua haapao maitai ra o Iehova

13. I roto i teihea tupuraa e tauturu mai ai to Maria hi‘oraa?

13 I te tahi taime, e mana‘o tatou e mea fifi ta te Atua e ani mai ra, eita atoa e maraa ia tatou. I roto râ i ta ’na Parau, e rave rahi taime to ’na haapapuraa mai e e nehenehe tatou mai ia Maria e turui i nia ia ’na, e tiaturi roa ia ’na. (Mas. 3:5, 6) E na reira anei tatou? Mai te peu e e, e haamaitai mai o ’na, a puai atu â ’i to tatou faaroo ia ’na.

To Maria haereraa ’tu i ǒ Elisabeta

14, 15. (a) Eaha ta Iehova i rave i to Maria tomoraa ’tu i ǒ Elisabeta raua Zekaria? (b) Eaha ta te Luka 1:46-55 e faaite ra no nia ia Maria?

14 Ua itoito-roa-hia Maria i to Gaberiela parauraa ’tu no Elisabeta. Ua ite oia e e taa ia Elisabeta to ’na mau huru aau, to roto atoa hoi oia i te hoê tupuraa taa ê. Haere ru atura Maria i te fenua mou‘a o Iuda, i ǒ Elisabeta raua Zekaria te tahu‘a. E toru aore  ra e maha paha mahana teie tere. I to ’na tomoraa ’tu i roto i te fare, horoa maira Iehova i te tahi atu haapapuraa o tei haapuai i to ’na faaroo. I to Maria iho â aroharaa ’tu ia Elisabeta, hauti ihora te pêpe ma te oaoa rahi i roto i te opu o Elisabeta. Î a‘era Elisabeta i te varua mo‘a e pii atura ia Maria “te metua vahine [o] tau Fatu.” I faaite na te Atua ia Elisabeta e e riro mai te tamaiti a Maria, oia hoi te Mesia, ei Fatu no ’na. Ua aratai-atoa-hia Elisabeta e te Atua ia haapopou ia Maria no to ’na faaroo e to ’na auraro, a na ô ai: “E ao hoi to ’na to tei faaroo.” (Luka 1:39-45) Oia mau, e tupu ta Iehova i fafau na ia Maria!

E hoa Maria raua Elisabeta tei faaitoito te tahi i te tahi

15 Paraparau atura Maria. Ua faaherehere-maitai-hia ta ’na i  parau i roto i te Bibilia. (A taio i te Luka 1:46-55.) Te paraparauraa roa ’‘e teie a Maria i roto i te Bibilia, e mea rahi ta tatou e haapii mai no nia ia ’na. E mauruuru rahi to ’na ia Iehova, a arue ai o ’na ia ’na no to ’na horoaraa mai i te fana‘oraa taa ê e riro ei metua vahine no te Mesia. E faaroo rahi atoa to ’na i to ’na parauraa e e faahaehaa Iehova i te feia teoteo e te mana, e tauturu râ oia i te feia riirii e te veve e hinaaro ra e tavini ia ’na. Mea ite maitai atoa o ’na i te mau Papai Hebera. Te mana‘ohia ra e hau atu i te 20 taime i faahiti ai oia i te reira! *

16, 17. (a) Ia pee tatou i te hi‘oraa o Maria e ta ’na tamaiti i roto i teihea tupuraa? (b) Te haamana‘o mai ra to Maria haereraa ’tu i ǒ Elisabeta i te aha?

16 Papu roa, ua feruri hohonu Maria i te Parau a te Atua. Ua haehaa noa râ o ’na, ma te ore e faahiti i to ’na iho mana‘o, i te mau Papai râ. Ua na reira atoa te tamaiti e rahi mai i roto i to ’na opu i muri a‘e. Ua na ô oia: “[E] ere i ta ’u ta ’u e haapii nei, na ’na râ, na tei tono mai ia ’u.” (Ioa. 7:16) E uiui ana‘e ïa: ‘Mea faatura atoa anei au i te Parau a te Atua? Aore ra mea au a‘e na ’u e haapii i to ’u iho mau mana‘o ia vetahi ê?’ Ua vaiiho mai Maria i te hi‘oraa maitai.

17 Ua faaea Maria i ǒ Elisabeta e toru ava‘e. Eita e ore e ua faaitoito rahi te tahi i te tahi. (Luka 1:56) Te haamana‘o mai ra teie aamu mahanahana i te faufaaraa o te hoa. Ia faahoa tatou i te feia e here mau ra i to tatou Atua ra o Iehova, papu maitai e e piri roa ’tu â to tatou taairaa e o Iehova. (Mas. 13:20) Ua tae râ i te taime e ho‘i ai Maria i ǒ ’na. Eaha râ ta Iosepha e parau mai ia ite o ’na e ua hapû Maria?

Maria raua Iosepha

18. Eaha ta Maria i faaite ia Iosepha, e eaha te huru o Iosepha?

18 Aita Maria i tiai ia itehia e ua hapû o ’na no te faaite ia Iosepha. Hou râ oia a paraparau ai ia Iosepha, ua uiui paha o ’na e nahea mai râ tera taata tura e mǎta‘u ra i te Atua. Ua faaite pauroa râ o ’na i te ohipa i tupu. Ua horuhoru roa Iosepha, eaha e ore ai! Hinaaro iho â o ’na e tiaturi i teie potii here, e au ra râ e ua faaturi oia. Aita te Bibilia e parau ra eaha tei puta mai i roto i to ’na feruriraa i tera taime. Teie noa râ, ua faaoti o ’na e faataa ia raua. I tera tau, e hi‘ohia te feia momo‘ahia ei feia faaipoipo. Teie râ, aita Iosepha i hinaaro e faahaama ia Maria, maiti ihora ïa oia ia faataa huna noa ia raua. (Mat. 1:18, 19) Eaha râ paha  Maria i te mauiui i to ’na iteraa e ua horuhoru roa Iosepha! Aita râ o ’na i inoino.

19. Mea nafea to Iehova tautururaa ia Iosepha ia rave i te faaotiraa maitai?

19 Ma te hamani maitai, tauturu maira Iehova ia Iosepha ia rave i te faaotiraa maitai. Na roto i te moemoeâ, ua haapapu atu te hoê melahi e maoti te hoê semeio i hapû ai Maria. Topa a‘enei te hau o Iosepha, e rave atura i ta Maria i rave ê na mai te omuaraa mai â: ua haa oia mai ta Iehova i hinaaro. Faaipoipo ihora o ’na ia Maria e faaineine atura ia ’na no te amo i te hopoia faahiahia roa e aupuru i te Tamaiti a Iehova.—Mat. 1:20-24.

20, 21. Eaha ta te feia faaipoipo, te feia atoa e opua ra e faaipoipo, e haapii mai ia Maria raua Iosepha?

20 Ia huti mai ïa te feia faaipoipo, te feia atoa e opua ra e faaipoipo, i te haapiiraa i te hi‘oraa o Maria raua Iosepha tei ora na a 2 000 matahiti a‘enei. A ite ai Iosepha i ta ’na vahine ia rave maitai i ta ’na hopoia metua vahine, papu roa e ua oaoa oia i to te melahi a Iehova aratairaa ia ’na. Eita e ore e ua taa ’tura ia ’na te faufaaraa ia turui i nia ia Iehova. (Sal. 37:5; Mas. 18:13) Ua haapao maitai iho â ïa taua upoo utuafare ra i to ’na raveraa i te mau faaotiraa rahi.

21 Area Maria, ua farii ïa i te faaipoipo ia Iosepha noa ’tu e aita Iosepha i tiaturi oioi ia ’na. Eaha ïa ta tatou e haapii mai? Ua tiai Maria e ua tamau noa i te tiaturi ia Iosepha, o ’na hoi te tane o te riro mai ei upoo o te utuafare. Ua taa ïa ia ’na te faufaaraa o te faaoromai. E haapiiraa maitai teie no te mau tuahine Kerisetiano i teie tau. Ua haapii teie mau tupuraa ia Iosepha raua Maria e mea faufaa roa ia paraparau noa ’tu te tahi i te tahi ma te faaite roa ’tu i to raua mana‘o.—A taio i te Maseli 15:22.

22. Ua haamau Iosepha raua Maria i to raua oraraa utuafare i nia i te aha, e eaha te tiai mai ra ia raua?

22 Ua haamau iho â Iosepha raua Maria i to raua oraraa utuafare i nia i te niu papu roa ’‘e. Mea here roa na raua toopiti ia Iehova e ua hinaaro iho â raua e faaoaoa ia ’na ma te amo maitai i ta raua mau hopoia metua ma te here. Parau mau, e haamaitairaa rahi atu â te tiai mai ra ia raua, e fifi rahi atoa râ. Ia aupuru hoi raua ia Iesu, o te riro mai ei taata rahi roa ’‘e i ora a‘enei.

^ par. 7 Hebera 13:4: “Ia haamaitaihia te [faaipoiporaa] i te taata atoa ra, e te viivii ore hoi te roi; e haava hoi te Atua i te poreneia e te faaturi.”

^ par. 15 E au ra e ua faahiti Maria ia Hana, vahine faaroo rahi ta Iehova i haamaitai ma te horoa ’tu i te hoê tamaiti na ’na.—A hi‘o i te tumu parau “Piti pure faahiahia mau” i te pene 6.