Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE ONO

Ua haamahora oia i to ’na aau i te Atua

Ua haamahora oia i to ’na aau i te Atua

1, 2. (a) No te aha Hana i peapea ’i a faaineine ai oia ia ’na? (b) Eaha ta tatou e haapii mai i te aamu o Hana?

TE FAAINEINE haere ra Hana ia ’na, a tamata ’i i te ore e mana‘ona‘o i to ’na mau fifi. I te tanoraa, e taime oaoa teie. Pauroa te matahiti, e afai ta ’na tane o Elikana i to ’na utuafare taatoa i te sekene i Silo. Ia riro ïa tera mau oroa ei taime oaoa. Tera hoi to Iehova hinaaro. (A taio i te Deuteronomi 16:15.) Papu roa, mea au roa na Hana tera mau oroa mai to ’na tamariiriiraa mai â. Tera râ, ua tupu a‘enei te tahi mau tauiraa i roto i to ’na oraraa.

2 Mea fana‘o Hana, mea here hoi na ta ’na tane ia ’na. Tera noa râ, e vahine ê atu ta Elikana, o Penina te i‘oa. E au ra e ua faaoti Penina e haamauiui ia Hana. Ua itea atoa mai ia ’na te tahi ravea e haamamae maitai ia Hana i tera mau oroa matahiti. Eaha ïa tera ravea? Te mea faufaa roa ’tu â, mea nafea to Hana faaroo ia Iehova i tauturu ai ia ’na ia faaruru te hoê fifi e au ra e eita e noaa faahou ia ’na ia faaoromai? Ia faaruru oe i te mau fifi o te faaere i to oe oaoa, a taio i te aamu putapû mau o Hana.

“Eaha i inoino ai to aau?”

3, 4. Eaha na fifi rahi o Hana, e no te aha mea mamae ai no ’na tera tupuraa?

3 Te faaite ra te Bibilia e piti fifi rahi ta Hana e faaruru ra i roto i to ’na oraraa. Aita rea ravea ta ’na no te faaafaro i te fifi matamua, e aita roa ’tu i nia i te piti. A tahi, e piti vahine ta Elikana, e mea riri roa na te tahi atu vahine ia Hana. Te piti, eita e noaa ta Hana tamarii. Mea au ore roa teie tupuraa no te mau vahine e hinaaro i te tamarii. I te tau o Hana e ia au i te peu tumu, mea mamae mau â te reira. E tiaturi hoi te utuafare taitahi i te huaai ia vai noa to ratou i‘oa. Mea haama roa ïa no te hoê vahine eita e noaa ta ’na tamarii.

4 E noaa ia Hana ia faaoromai i tera tupuraa ahani aita o Penina. Aita iho â e auraa ia faaipoipo e rave rahi vahine. E pinepine roa e tupu mai te umeumeraa, te peapea e te oto. Aita roa  ’tu teie peu e tuati ra i te ture aveia ta te Atua i haamau i te ô i Edene, oia hoi hoê noa apiti. (Gen. 2:24) I roto i te Bibilia, aita e parau maitai to te faaipoiporaa e rave rahi vahine. A hi‘o na i te utuafare o Elikana.

5. No te aha Penina i hinaaro ai e haamauiui ia Hana? Eaha ta ’na i rave?

5 Mea here a‘e na Elikana ia Hana. Ia au i te tutuu ati Iuda, o Hana ta ’na i faaipoipo na mua e o Penina tau matahiti i muri a‘e. Tera noa râ, no to ’na pohehae rahi ia Hana, e imi Penina i te ravea atoa no te haamauiui ia Hana. Taa ê atu ia Hana, ua fanau mai Penina i te tamarii. Rahi noa ’tu â o ’na i te fanau i te tamarii, rahi noa ’tu â o ’na i te faaoru. Aita oia i aroha e i tamahanahana noa ’‘e ia Hana, ua hauti râ i nia i te vahi e mauiui ai Hana. “Ua haamaaroaro roa mai to ’na enemi ia ’na ia mihi.” (Sam. 1, 1:6) Mea opuahia ta Penina i rave. Ua hinaaro o ’na e haamauiui ia Hana e ua manuïa oia.

Mamae roa Hana eita hoi e noaa ta ’na tamarii, e imi Penina i te mau ravea atoa ia mamae roa ’tu â Hana

6, 7. (a) I to Elikana tamahanahanaraa ia Hana, no te aha Hana i ore ai i faatia pauroa ’tu? (b) No to Iehova anei mauruuru ore ia Hana i ore ai i noaa ta ’na tamarii? A faataa. (A hi‘o i te nota i raro i te api.)

6 E au ra e mea au roa na Penina e haamamae ia Hana ia haere ratou i Silo pauroa te matahiti. E horoa hoi Elikana na te “mau tamarii tamaroa e te mau tamahine” a Penina i te tahi mau tuhaa o te mau animara pûpûhia ei tusia ia Iehova. Area na Hana herehia, te hoê ïa tuhaa taa ê. No to Penina pohehae ino rahi i nia ia Hana, ma te haamana‘o noa ’tu e eita e noaa ta ’na tamarii, e ta‘i Hana a ore atu ai e tamaa faahou. Ite ihora râ Elikana i te oto o ta ’na vahine here o Hana, aita atoa e tamaa ra. Tamata ’tura oia i te tamahanahana ia ’na, a na ô ai: “E Hana, eaha oe i oto ai? e aha oe i ore i amu ai i te maa? eaha i inoino ai to aau? e ere anei i te maitai rahi to ’u, i to te tamarii e ia tino ahuru noa ’tu, ia oe ra?”—Sam. 1, 1:4-8.

7 Ua haroaroa Elikana e no te mea eita e noaa ta Hana tamarii e oto ai oia. * Mea papu, ua au roa Hana i te mau parau hamani maitai a ta ’na tane, tei haapapu atu i to ’na here ia ’na. Aita râ Elikana i faahiti i te ino o Penina. Aita atoa hoi te Bibilia e parau ra e ua faaite atu Hana. Ua feruri paha Hana  e ia faaite o ’na, e rahi roa ’tu ïa te fifi. Eita paha teie fifi e afaro ia Elikana. E rahi roa ’tu â paha to Penina ino i nia ia Hana, a na reira atoa ’i ta ’na mau tamarii e ta ’na mau tavini. I te pae hopea, e tuu-roa-hia ’tu â Hana i te hiti.

I mua i te ino o Penina, ua fariu Hana ia Iehova ra ia tamahanahanahia oia

8. I mua i te ino aore ra te ohipa tano ore, no te aha mea mahanahana ’i ia haamana‘o e e Atua parau-tia Iehova?

8 Aita paha Elikana i ite e mea ino roa Penina i nia ia Hana. O Iehova râ, oia ïa. Ua haapapai oia i te reira i roto i ta ’na Parau te Bibilia. E faaararaa ïa teie i te feia mea ino i nia ia vetahi ê no te pohehae aore ra no te riri, noa ’tu e i to ratou mana‘o e ere roa ’tu mea ino ta ratou peu. Area te feia hapa ore e te hau, mai ia Hana, e tamahanahanahia ïa e teie parau mau, e faaafaro te Atua parau-tia i te mau mea atoa i te taime ta ’na i faaoti e mai ta ’na i hinaaro. (A taio i te Deuteronomi 32:4.) Ua ite paha Hana i te reira, ua ani hoi oia i ta Iehova tauturu.

Aita ’tura to ’na mata i oto faahou

9. Eaha te haapiiraa e huti mai i to Hana haere-noa-raa ’tu i Silo noa ’tu eaha ta Penina e rave i nia ia ’na?

9 I te poipoi a‘e, te ohipa ra to te fare. Te faaineine ra te utuafare e te tamarii atoa. E na roto atu ratou i te fenua aivi o Epheraima e tae atu ai i Silo. Hau atu i te 30 kilometera te atea, hoê aore ra e piti mahana haereraa na raro. * Ua ite Hana eaha ta Penina e rave. Noa ’tu râ, aita oia i faaea i te fare. E hi‘oraa maitai ïa teie no tatou. Eiaha roa ’tu e vaiiho i te haerea ino o vetahi ê ia haafifi i ta tatou haamoriraa ia Iehova! Ia faaea tatou i te fare, e ere ïa tatou i te mau haamaitairaa o te faaitoito hoi ia tatou ia faaoromai.

10, 11. (a) No te aha Hana i haere oioi ai i te sekene? (b) Eaha ta Hana i faaite i to ’na Metua i te ra‘i?

10 I muri a‘e i to Elikana e to ’na utuafare haere-noa-raa i tera mahana na nia i te mau purumu mou‘a tioioi, te piri atu ra ratou ia Silo. To mua te oire ia ratou i nia i te hoê aivi tei haaatihia e te tahi atu mau aivi teitei a‘e. A haere noa ’i ratou, te feruri noa ra Hana i ta ’na e parau ia Iehova i roto i te pure. I to ratou taeraa ’tu, tamaa a‘era te utuafare. I to ’na iho â neheneheraa, faaatea ’tura Hana e haere atura i te sekene. To reira te tahu‘a rahi Eli, te parahi noa ra i te pae uputa o te aua o te sekene. Aita râ Hana i ite atu ia ’na, no te mea te feruri noa ra oia i ta ’na e parau  i te Atua i roto i te pure. Ua papu ia ’na e e faaroohia mai o ’na i te sekene. Eita paha e taa i te taata to ’na mauiui rahi. To ’na râ Metua i te ra‘i, oia ïa. No te rahi o to ’na oto, ta‘i ihora oia.

11 A ta‘i noa ’i, ua paraparau Hana ia Iehova i roto i ‘to ’na aau.’ To ’na vaha noa tei hautiuti, a horuhoru noa ’i to ’na aau. Ua pure maoro oia a haamahora ’i o ’na i to ’na aau i to ’na Metua. Ua hinaaro iho â oia i ta ’na haamaitairaa. Tera râ, aita noa Hana i ani ia tupu to ’na hinaaro iti rahi i te hoê tamarii, ua hinaaro atoa râ e pûpû ia Iehova i ta ’na e nehenehe e horoa. Euhe ihora Hana e ia noaa ta ’na tamaiti, e horoa oia i taua tamaiti ra na Iehova ei tavini na ’na i te roaraa o to ’na oraraa.—Sam. 1, 1:9-11.

12. Eaha te haamana‘o no nia i te pure?

12 No nia i te pure, e hi‘oraa maitai ta Hana i vaiiho mai. Ei Atua hamani maitai, te ani mai ra Iehova ia paraparau noa ’tu ia ’na ma te taiâ ore, ia huri i nia ia ’na i to tatou mau ahoaho mai te hoê tamarii e tiaturi ra i to ’na metua î i te here. (A taio i te Salamo 62:8; Tesalonia 1, 5:17.) I raro a‘e i te aratairaa a te varua o te Atua, ua papai te aposetolo Petero i teie mau parau tamǎrû: “E huri i to outou ahoaho atoa i nia ia [Iehova]; oia hoi te tiai mai ia outou.”—Pet. 1, 5:7.

13, 14. (a) Eaha ta Eli i mana‘o oioi no nia ia Hana? (b) No te aha e hi‘oraa maitai ai te faaroo o Hana?

13 E ere râ te taata i te mea aumihi roa mai ia Iehova. A ta‘i e a pure noa ’i Hana, hitimahuta ihora oia i te faarooraa i te hoê reo. O Eli tahu‘a rahi te na ô mai ra: “A fea râ . . . e pee ai to taero? e haapae ê atu i ta oe uaina.” I ite na Eli i te vaha o Hana e hautiuti ra, a ta‘i noa ’i no te oto. Aita oia i ui atu eaha to ’na, ua mana‘o oioi râ e ua taero Hana.—Sam. 1, 1:12-14.

14 Eaha paha Hana, o te ahoaho ê na ra, i te mauiui no teie pariraa hape a te hoê taata e tiaraa faahiahia to ’na! Teie râ, ua faaite faahou o ’na i te hi‘oraa maitai o te faaroo. Aita oia i vaiiho i te huru tia ore o te hoê taata ia haafifi i ta ’na haamoriraa ia Iehova. Ua pahono oia ia Eli ma te faatura e ua faataa i to ’na ahoaho. I to Eli iteraa e ua hape oia, na ô atura oia ma te reo mǎrû a‘e paha: “Ia ora na oe i te haerea; e ia faatia mai hoi te Atua no Iseraela i ta oe i ani atu ia ’na.”—Sam. 1, 1:15-17.

15, 16. (a) Eaha to Hana huru i muri a‘e i to ’na haamahoraraa i to ’na aau ia Iehova e haamoriraa ia ’na i te sekene? (b) E nafea ia pee i to Hana hi‘oraa ia ô mai te mana‘o faatoaruaru?

15 Eaha to Hana huru i muri a‘e i to ’na haamahoraraa i to ’na aau ia Iehova e haamoriraa ia ’na i to ’na sekene? Te na ô mai ra te faatiaraa: “Ua haere ihora taua vahine ra, e ua amu ihora  i te maa, e aita ’tura to ’na mata i hana,” aore ra i oto faahou. (Sam. 1, 1:18) Ua topa te hau o Hana. Mâmâ maira oia i to ’na tuuraa ’tu i to ’na ahoaho ia Iehova ra to ’na Metua i te ra‘i, tei hau a‘e i te puai ia ’na. (A taio i te Salamo 55:22.) Te vai ra anei te tahi fifi eita e maraa ia ’na ia amo? Aita hoê a‘e mai te tau e te tau mai â e a muri noa ’tu!

16 Ia teimaha, ia toaruaru e ia oto tatou, e pee ana‘e i te hi‘oraa o Hana ma te paraparau noa ’tu i “Tei faaroo i te pure.” (Sal. 65:2) Ia pure tatou ma te faaroo, e ite ïa tatou atoa i te hau o te Atua tei hau a‘e i te mana‘o taata, a ore atu ai to tatou oto.—Phil. 4:6, 7.

‘Aore e mato e au i to tatou Atua’

17, 18. (a) Ua aha Elikana i to ’na iteraa e ua euhe Hana? (b) Eaha ta Penina e taa oioi?

17 I te poipoi a‘e, ua haere faahou Hana i te sekene raua Elikana. Ua faaite atu paha oia i ta ’na i ani e i euhe ia Iehova. Ia au hoi i te ture a Mose, e nehenehe te hoê tane e faaore i te euhe ta ta ’na vahine i rave aita o ’na i horoa i te parau faatia. (Num. 30:10-15) Aita Elikana taata faaroo i na reira. Ua haere râ raua Hana i te sekene e haamori ia Iehova hou a ho‘i ai i ǒ raua.

18 I teihea taime to Penina iteraa e aita Hana e mauiui faahou ra no to ’na ino i nia ia ’na? Aita tatou i ite. Ta te faatiaraa noa e parau mai ra, aita ’tura te mata o Hana i oto faahou. Te auraa ïa e ua oaoa faahou mai oia. E taa oioi râ ia Penina e pau ta ’na rave ino ia Hana, te oaoa noa ra Hana. Aita te Bibilia i faahiti faahou ia Penina.

19. (a) Eaha te haamaitairaa ta Hana i fana‘o? (b) Mea nafea to Hana faaiteraa e aita i moe ia ’na na vai teie haamaitairaa?

19 A mairi ai te mau ava‘e, taui a‘era te hau o te feruriraa o Hana ei oaoa iti rahi. Ua hapû oia! Ua oaoa roa Hana, aita roa ’tu râ i moe ia ’na na vai teie haamaitairaa. I to ’na fanauraa mai i ta ’na tamaiti, ua maiti oia i te i‘oa ra Samuela, “I‘oa o te Atua” te auraa, tei taaihia i te tiaororaa i te i‘oa o te Atua, mai ta Hana i rave. I taua matahiti ra, aita oia i haere i Silo na muri ia Elikana e te utuafare. Ua faaea noa râ raua ta ’na aiû i te fare e toru â matahiti e mairi noa ’tura ta ’na û. Faaineine atura oia ia ’na ma te itoito mau no te mahana e taa ê ai raua ta ’na tamaiti here.

20. Mea nafea Hana raua Elikana i te tapearaa i ta raua euhe ia Iehova?

20 E ere iho â mea ohie no Hana ia vaiiho i ta ’na tamaiti i Silo. Parau mau, ua ite o ’na e e haapao-maitai-hia Samuela i ǒ, peneia‘e e te tahi mau vahine e tavini ra i te sekene. Tera râ, mea  apî roa Samuela, e o vai ïa mama e hinaaro ia taa ê raua ta ’na tamarii? Noa ’tu râ, ua afai Hana raua Elikana i ta raua tamaiti i te fare o te Atua ma te aau tae e te mauruuru. Ua pûpû raua i reira i te tusia e ua faaite atu ia Samuela ia Eli. Haamana‘o atura Hana ia Eli i ta ’na i euhe i taua vahi ra tau matahiti a‘enei.

E haamaitairaa mau â te hoê mama mai ia Hana no Samuela

21. Mea nafea te pure a Hana i faaite ai i te hohonuraa o to ’na faaroo? (A hi‘o atoa i te tumu parau “ Piti pure faahiahia mau.”)

21 Ua faaoti Hana i te hoê pure ta te Atua i mana‘o e mea tano ia tuu i roto i ta ’na Parau. A taio ai oe i tera pure i roto i te Samuela 1, 2:1-10, e ite oe i roto i te mau pereota atoa i te hohonuraa o te faaroo o Hana. Ua arue oia ia Iehova no to ’na faaohiparaa i to ’na puai ma te faahiahia mau. Taa ê atu i te taata, e nehenehe ta ’na e faahaehaa i te feia teoteo, e haamaitai i te feia e ahoaho ra, e rave i te ora aore ra e faaora i te taata i te pohe. Ua arue oia i to ’na Metua no to ’na mo‘araa faito ore, ta ’na parau-tia e to ’na taiva ore. Tano roa Hana i te parauraa: “Aore te hoê pare [aore ra mato] e au i to tatou Atua.” E nehenehe iho â tatou e tiaturi i te Atua ra o Iehova o te ore roa e taui. E haapuraa oia no te feia atoa e ahoaho ra o te ani i ta ’na tauturu.

22, 23. (a) Na te aha e haapapu mai ra e ua paari mai Samuela ma te ite e mea here na to ’na na metua ia ’na? (b) Mea nafea Iehova i te haamaitairaa ia Hana?

22 Mea fana‘o mau â Samuela iti, e mama faaroo roa to ’na ia Iehova. Papu roa, ua mihi o ’na i to ’na mama a paari mai ai oia. Aita râ oia i mana‘o noa ’‘e e ua haamoehia o ’na. Pauroa hoi te matahiti, e haere Hana i Silo no te afai i te tahi ahu aita e rima ahu no Samuela no ta ’na taviniraa i te sekene. Na ’na iho i nira  i tera ahu no ta ’na tamaiti. Tera te here mau. (A taio i te Samuela 1, 2:19.) A feruri na ia Hana e faaoomo ra i ta ’na tamaiti i te ahu apî, a faatano atu ai i nia iho ia ’na, a hi‘o noa ’i ia ’na ma te oaoa e a faahiti atu ai i te mau parau mǎrû e te faaitoito. E haamaitairaa mau â te hoê mama mai tera no Samuela. A paari mai ai oia, o ’na ïa tei riro ei haamaitairaa no to ’na na metua e no Iseraela taatoa.

23 Aita atoa Hana i haamoehia. Ua haamaitai Iehova ia ’na, ua fanau mai â oia e pae tamarii na Elikana. (Sam. 1, 2:21) Ta Hana râ haamaitairaa rahi, to ’na paha ïa taairaa e to ’na Metua ra o Iehova o tei piri noa ’tu â a mairi ai te mau matahiti. Ia piri atoa ïa to oe taairaa e o Iehova a pee noa ’i oe i to Hana faaroo.

^ par. 7 Te parau ra iho â te Bibilia e ‘aita a Hana e tamarii i horoahia mai e Iehova.’ E ere râ teie i te haapapuraa i to te Atua mauruuru ore i teie vahine haehaa e te taiva ore. (Sam. 1, 1:5) Ia au i te Bibilia, i te tahi taime e vaiiho te Atua i te tahi mau tupuraa no te hoê noa tau.

^ par. 9 Ua numerahia teie atearaa ia au i te mana‘o ra e to Elikana oire ra o Rama, o te oire ïa piihia Arimataio i te tau o Iesu.